কেন্দ্ৰীয় মন্ত্ৰী সৰ্বানন্দ সোনোৱালে ছিউলত এইচ ডি হুণ্ডাইৰ অধ্যক্ষ চুং কি-সুনক সাক্ষাৎ কৰাৰ পাছত ভাৰতৰ থুথুকুড়ি মেগা শ্বিপয়াৰ্ডৰ অগ্ৰগতি

কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোনোৱালে আজি ছিউলত এইচডি হুণ্ডাইৰ অধ্যক্ষ চুং কি-সুনক সাক্ষাৎ কৰি তামিলনাডুৰ থুথুকুড়িত ভাৰতৰ প্ৰস্তাৱিত গ্ৰীনফিল্ড শ্বিপয়াৰ্ডৰ বাবে পৰৱৰ্তী পদক্ষেপসমূহৰ বিষয়ে আলোচনা কৰে। চাৰিদিনীয়া দক্ষিণ কোৰিয়াৰ ভ্ৰমণৰ সময়ত জাহাজ নিৰ্মাণ আৰু বিস্তৃত সামুদ্ৰিক উদ্যোগত ভাৰত-কোৰিয়াৰ সহযোগিতা গভীৰ কৰাত গুৰুত্ব দি এই বৈঠক অনুষ্ঠিত হয়।

বৈঠকখনে প্ৰকল্পটোত গতি প্ৰদান কৰি ভৱিষ্যতৰ পথ প্ৰশস্ত কৰে। এইচডি হুণ্ডাইৰ জাহাজ নিৰ্মাণ শাখা এইচডি কোৰিয়া শ্বিপবিল্ডিং এণ্ড অফশ্ব’ৰ ইঞ্জিনিয়াৰিঙে (এইচডি কেএছঅ’ই) প্ৰাথমিক কৌশলগত বিনিয়োগকাৰী হিচাপে অংশগ্ৰহণ কৰাৰ নিজৰ অভিপ্ৰায়ৰ কথা দোহাৰে আৰু প্ৰকল্পৰ অংশীদাৰসকলে ইয়াক আগুৱাই নিয়াৰ বাবে তেওঁলোকৰ অংশীদাৰী অভিপ্ৰায় প্ৰকাশ কৰে। যৌথ কাৰ্যকৰী গোটটোৱে (জেডব্লিউজি) প্ৰকল্পৰ উন্নয়নৰ তত্বাৱধান কৰিব, দুয়োপক্ষই যৌথ উদ্যোগৰ গাঁথনি সন্দৰ্ভত সন্মত হোৱাৰ দিশত কাম কৰি ছমাহৰ ভিতৰত বিশদ প্ৰকল্প প্ৰতিবেদন (ডিপিআৰ) চূড়ান্ত কৰিব বুলি আশা কৰা হৈছে।

ভাৰত এইচডি হুণ্ডাইৰ বিশ্ব ভৱিষ্যতৰ  মূল স্তম্ভ হিচাপে প্ৰধানমন্ত্ৰী নৰেন্দ্ৰ মোদীৰ অংশীদাৰী দৃষ্টিভংগীক অতিশীঘ্ৰে বাস্তৱায়িত কৰাই ইয়াৰ মূল লক্ষ্য বুলি কেন্দ্ৰীয় মন্ত্ৰী সৰ্বানন্দ সোনোৱালে এইচডি হুণ্ডাইৰ অধ্যক্ষ চুং কি-সুনক কয়। উল্লেখ্য যে এই বছৰৰ আৰম্ভণিতে ৰাষ্ট্ৰপতি লী জে মিউঙৰ নতুন দিল্লী ভ্ৰমণৰ পিছত ভাৰত-কোৰিয়া সামুদ্ৰিক সম্পৰ্কই নতুন গতি লাভ কৰিছে।

বৈঠকত ভাষণ দি সৰ্বানন্দ সোনোৱালে কয়, ‘একেলগে আমাৰ কামৰ পৰিসৰ বৃদ্ধি কৰাৰ বাবে আমাৰ স্পষ্ট নিৰ্দেশনা আছে। ২০২৬ চনৰ ২০ এপ্ৰিলত আমি স্বাক্ষৰ কৰা বুজাবুজি চুক্তি হৈছে তামিলনাডুৰ থুথুকুড়িত আমি একেলগে যি নিৰ্মাণ কৰিবলৈ বিচাৰো, তাৰ আধাৰ। ৪ বিলিয়ন ডলাৰ বিনিয়োগৰ সৈতে এখন গ্ৰীনফিল্ড শ্বিপয়াৰ্ড এটা বৃহৎ মাইলৰ খুঁটি আৰু আমি ইয়াৰ বাবে সম্পূৰ্ণৰূপে প্ৰতিশ্ৰুতিবদ্ধ। আপোনালোকৰ দলে স্থানৰ মূল্যায়নৰ সময়ত অবিশ্বাস্য কাম কৰিছে আৰু কেন্দ্ৰীয় তথা ৰাজ্য উভয় চৰকাৰৰ দলৰ সৈতে নিৰন্তৰ সহযোগিতা আগবঢ়াই আহিছে।’

নেচনেল শ্বিপবিল্ডিং এণ্ড হেভী ইণ্ডাষ্ট্ৰীজ পাৰ্ক, তামিলনাডু লিমিটেড (এনএছএইচআইপি-টিএন) আৰু এইচডি কোৰিয়া শ্বিপবিল্ডিং এণ্ড অফশ্ব’ৰ ইঞ্জিনিয়াৰিং কোম্পানী লিমিটেডে (এইচডি-কেএছঅ’) তামিলনাডুৰ থুথুকুড়িত প্ৰস্তাৱিত গ্ৰীনফিল্ড শ্বিপয়াৰ্ডক আগবঢ়াই নিয়াৰ বাবে আগ্ৰহ প্ৰকাশ কৰিছে।

জাহাজ নিৰ্মাণ, জাহাজ পৰিবহণ আৰু সামুদ্ৰিক লজিষ্টিকৰ ক্ষেত্ৰত অংশীদাৰিত্বৰ বাবে ভাৰত-কোৰিয়া গণৰাজ্যৰ ব্যাপক পৰিকাঠামোৰ ওপৰত আধাৰিত আলোচনাৰ প্ৰস্তাৱসমূহ ২০২৬ চনৰ এপ্ৰিলত গ্ৰহণ কৰা হৈছিল আৰু কোৰিয়া গণৰাজ্যৰ ৰাষ্ট্ৰপতি মহামান্য লী জে মিউঙৰ চৰকাৰী ভ্ৰমণৰ সমান্তৰালভাৱে ২০২৬ চনৰ ২০ এপ্ৰিলত এইচডি-কেএছঅ’ই আৰু এনএছএইচআইপি-টিএনৰ মাজত বুজাবুজিৰ চুক্তিত স্বাক্ষৰ কৰা হৈছিল। বৈঠকত এইচডি-কেএছঅ’ই প্ৰকল্পটোৰ ৰূপায়ণৰ দিশত ভাৰত চৰকাৰে গ্ৰহণ কৰা পদক্ষেপক প্ৰশংসা কৰে।

ভাৰত চৰকাৰৰ জাহাজ নিৰ্মাণ উন্নয়ন আঁচনিৰ অধীনৰ প্ৰস্তাৱিত শ্বিপয়াৰ্ডখনৰ বাৰ্ষিক জাহাজ নিৰ্মাণ ক্ষমতা বিশদ প্ৰকল্প প্ৰতিবেদন (ডিপিআৰ)ৰ জৰিয়তে বৈধতা সাপেক্ষে প্ৰায় ২.৫ মিলিয়ন গ্ৰছ টনেজ (জিটি) হ’ব বুলি ধাৰণা কৰা হৈছে। কাৰ্য্যকৰী হোৱাৰ পিছত ই ভাৰতৰ সৰ্ববৃহৎ বাণিজ্যিক শ্বিপয়াৰ্ড হ’ব বুলি আশা কৰা হৈছে, যিয়ে ঘৰুৱা জাহাজ নিৰ্মাণ ক্ষমতা আৰু বিশ্ব সামুদ্ৰিক উদ্যোগত ভাৰতৰ প্ৰতিযোগিতামূলক ক্ষমতাক শক্তিশালী কৰিব।

বৈঠকত শ্বিপয়াৰ্ড ডিজাইন, নিৰ্মাণ, উন্নত উৎপাদন আৰু কাৰ্য্যকলাপৰ ক্ষেত্ৰত বিশ্বব্যাপী দক্ষতাৰ সৈতে এইচডি কেএছঅ’ইয়ে প্ৰাথমিক কৌশলগত বিনিয়োগকাৰী হিচাপে অংশগ্ৰহণ কৰাৰ নিজৰ দৃঢ় অভিপ্ৰায়ৰ কথা দোহাৰে। উপযুক্ত পৰিশ্ৰম আৰু প্ৰয়োজনীয় অনুমোদন সাপেক্ষে ভৱিষ্যতৰ আলোচনাসমূহত প্ৰস্তাৱিত বিনিয়োগৰ গাঁথনি, ইকুইটি অংশগ্ৰহণ আৰু ৰূপায়ণ ব্যৱস্থা চূড়ান্ত কৰাৰ ওপৰত গুৰুত্ব প্ৰদান কৰা হ’ব। একেদৰে এনএছএইচআইপি-টিএনে কেন্দ্ৰীয় আৰু ৰাজ্যিক উভয় পৰ্যায়ৰ চৰকাৰী কৰ্তৃপক্ষৰ সৈতে সকলোধৰণৰ সমন্বয়কে ধৰি গ্ৰীনফিল্ড শ্বিপয়াৰ্ড স্থাপনৰ বাবে ইয়াৰ সমৰ্থনৰ আশ্বাস দিয়ে।

ভাৰতৰ ঘৰুৱা চাহিদাৰ বিষয়ে উল্লেখ কৰি সৰ্বানন্দ সোনোৱালে কয়, ‘বৰ্তমান ভাৰতত ঘৰুৱা বজাৰ বৃদ্ধি পাইছে। আমাৰ ৰাজহুৱা সংস্থাসমূহে অনাগত বছৰবোৰত ৪০০ৰো অধিক জাহাজ লাভ কৰিবলৈ বিচাৰিছে। মই নিশ্চিত যে ৰপ্তানি অৰ্ডাৰৰ উপৰি চিনাক্ত কৰা এই জাহাজসমূহৰ ভিতৰত তামিলনাডুৰ থুথুকুড়িত থকা মেগা গ্ৰীনফিল্ড শ্বিপয়াৰ্ডে বহু নিৰ্মাণকাৰ্যত গুৰুত্বপূৰ্ণ ভূমিকা পালন কৰিব। এইচডি কেএছঅ’ইয়ে কৌশলগত অংশীদাৰিত্ব, প্ৰযুক্তি সহযোগিতা আৰু স্থানীয় উৎপাদনৰ জৰিয়তে ভাৰতত ইয়াৰ পদচিহ্ন গভীৰ কৰাটো আমি বিচাৰো, যিয়ে ভাৰতক বিশ্বব্যাপী জাহাজ নিৰ্মাণ কেন্দ্ৰ হিচাপে উন্নীত কৰাত উল্লেখনীয় অৰিহণা আগবঢ়াব।’

ৰূপায়ণ ত্বৰান্বিত কৰিবলৈ দুয়ো পক্ষৰ বিষয়াসকলৰে গঠিত এটা কাৰ্যকৰী গোটে প্ৰকল্পৰ উন্নয়নৰ তত্বাৱধান কৰিব আৰু মূল কাৰ্যকলাপসমূহৰ মাজত সমন্বয় সাধন কৰিব। দুয়োটা সংস্থাই এটা উপযুক্ত যৌথ উদ্যোগৰ গাঁথনি সন্দৰ্ভত সন্মত হোৱাৰ প্ৰয়াসেৰে জাহাজৰ সামগ্ৰীৰ মিশ্ৰণ, উৎপাদন ক্ষমতা, আন্তঃগাঁথনিৰ প্ৰয়োজনীয়তা, প্ৰকল্পৰ ব্যয় আৰু ৰূপায়ণ সময়সূচী সামৰি ছমাহৰ ভিতৰত ডিপিআৰ চূড়ান্ত কৰিব বুলি আশা কৰা হৈছে।

এনএছএইচআইপি-টিএনে প্ৰযোজ্য আইন আৰু প্ৰক্ৰিয়া অনুসৰি উপযুক্ত জলাশয় ভূমিৰ উপলভ্যতা, সক্ষম আন্তঃগাঁথনি আৰু উপযোগিতাৰ বিকাশ আৰু সময়মতে বিধিবদ্ধ অনুমোদনৰ বাবে সংশ্লিষ্ট কৰ্তৃপক্ষৰ সৈতে সমন্বয় সাধন কৰিব। সমান্তৰালভাৱে স্থানৰ মূল্যায়ন, আন্তঃগাঁথনি পৰিকল্পনা আৰু প্ৰাৰম্ভিক ড্রেজিং/ৰিক্লেমেচন অধ্যয়নকে ধৰি প্ৰকল্পৰ প্ৰস্তুতিত সহায় আগবঢ়াবলৈ কাৰ্যকলাপসমূহ আগবঢ়াই নিয়া হ’ব।

আন্তঃগাঁথনি উন্নয়নৰ বাহিৰেও এই সহযোগিতাৰ লক্ষ্য হৈছে প্ৰযুক্তি স্থানান্তৰ আৰু কৰ্মচাৰীৰ দক্ষতাত গুৰুত্ব দি ভাৰতত বিশ্বব্যাপী প্ৰতিযোগিতামূলক জাহাজ নিৰ্মাণ পৰিবেশতন্ত্ৰ স্থাপন কৰা। থলুৱা জাহাজ নিৰ্মাণৰ সামৰ্থ্য শক্তিশালী কৰিবলৈ আৰু দক্ষ নিয়োগ সৃষ্টি কৰাৰ বাবে ভাৰতীয় উদ্যোগ আৰু শৈক্ষিক প্ৰতিষ্ঠানসমূহৰ সৈতে কাৰিকৰী প্ৰশিক্ষণ, জ্ঞানৰ আদান-প্ৰদান আৰু সহযোগিতাৰ সুযোগৰ অন্বেষণ কৰা হ’ব।

সামৰণী ভাষণত সৰ্বানন্দ সোনোৱালে কয়, ‘এই অংশীদাৰিত্ব বিস্তৃত ভাৰত-কোৰিয়া সম্পৰ্কৰ  প্ৰকৃত গুৰুত্বপূৰ্ণ আৰু নিৰ্ধাৰিত ভেটি হিচাপে বিবেচিত হ’ব। ভাৰতৰ অৰ্থনৈতিক শক্তি আৰু বজাৰৰ পৰিসৰৰ সৈতে দক্ষিণ কোৰিয়াৰ বিশ্বমানৰ প্ৰযুক্তিগত প্রতিভাক একত্ৰিত কৰি, আমি এটা অংশীদাৰীত্ব সৃষ্টি কৰিছো, যিয়ে প্ৰকৃততে বিশ্বৰ সামুদ্ৰিক দৃশ্যপটক পুনৰ গঠন কৰিব। আমি কেনেকৈ সহযোগিতাৰে এই যাত্ৰা ত্বৰান্বিত কৰিব পাৰো, তাৰ ওপৰত আপোনালোকৰ মনোভাব জানিবলৈ মই আগ্ৰহী।’

কোৰিয়াৰ উন্নত জাহাজ নিৰ্মাণ দক্ষতাক ভাৰতৰ ঔদ্যোগিক সামৰ্থ্য আৰু দীৰ্ঘম্যাদী সামুদ্ৰিক উচ্চাকাংক্ষাৰ সৈতে একত্ৰিত কৰি ভাৰত-কোৰিয়া গণৰাজ্য বিশেষ কৌশলগত অংশীদাৰিত্বৰ অধীনৰ মূল পদক্ষেপ হিচাপে প্ৰস্তাৱিত থুথুকুড়ি শ্বিপয়াৰ্ডৰ পৰিকল্পনা কৰা হৈছে।

***

MI/Indu/NB