ৰাষ্ট্ৰীয় প্ৰাণী উদ্যানৰ ৬৭ সংখ্যক প্রতিষ্ঠা দিৱস উদযাপন

নতুন দিল্লীৰ ৰাষ্ট্ৰীয় প্ৰাণী উদ্যানে (NZP) ০১ নৱেম্বৰ, ২০২৬ তাৰিখে ৬৭ সংখ্যক প্রতিষ্ঠা দিৱস উদযাপন কৰে৷এই উপলক্ষে  দৰ্শনাৰ্থীসকলৰ বাবে এটা আকৰ্ষণীয় ডুডল কার্যসূচীৰ আয়োজন কৰা হয়, যিয়ে  বন্যপ্ৰাণী সংৰক্ষণ, জৈৱ বৈচিত্ৰ্য বিষয়ক সচেতনতা আৰু পৰিৱেশ শিক্ষাৰ প্ৰতি উদ্যানখনৰ দায়বদ্ধতাক পুনৰ প্ৰতিফলিত কৰিছে। এই কার্যকলাপে উৎসাহজনক সঁহাৰি লাভ কৰে, প্ৰায় ১,৫০০ দৰ্শনাৰ্থীয়ে এই পদক্ষেপৰ শলাগ লয় আৰু অংশগ্ৰহণ কৰে। ই বিশেষকৈ শিশু আৰু পৰিয়ালৰ বাবে নিজৰ ধাৰণা প্ৰকাশ কৰিবলৈ আৰু বন্যপ্ৰাণী আৰু প্ৰকৃতি সুৰক্ষাৰ গুৰুত্বৰ সৈতে সংযোগ স্থাপন কৰিবলৈ অংশগ্ৰহণমূলক  আৰু সৃজনশীল মঞ্চ হিচাপে কাম কৰিছে ।

এই উপলক্ষে NZP ৰ সঞ্চালক ড° সঞ্জিত কুমাৰে কয়, “৬৭ সংখ্যক প্রতিষ্ঠা দিৱস উদ্যানখনৰ যাত্ৰাৰ গুৰুত্বপূৰ্ণ মাইলৰ খুঁটি আৰু বন্যপ্ৰাণী সংৰক্ষণ, প্ৰাণী কল্যাণ, জৈৱ বৈচিত্ৰ্য সুৰক্ষা আৰু জনসাধাৰণৰ অংশগ্ৰহণৰ প্ৰতি আমাৰ দায়বদ্ধতা নৱীকৰণৰ এটা উপলক্ষ। আধুনিক চিৰিয়াখানা কেৱল জন্তু চোৱাৰ ঠাই নহয়; ই সংৰক্ষণ, শিক্ষা, গৱেষণা আৰু অনুপ্ৰেৰণাৰ কেন্দ্ৰ। প্ৰতিজন দৰ্শনাৰ্থী, বিশেষকৈ প্ৰতিটি শিশুৱেই সচেতন আৰু দায়িত্বশীল পছন্দৰ জৰিয়তে প্ৰকৃতিৰ দূত হ'ব পাৰে।” তেওঁ নাগৰিকসকলক ৰাষ্ট্ৰীয় প্ৰাণী উদ্যানৰ সৈতে সংযোগ স্থাপন কৰিবলৈ, চহকী জৈৱ বৈচিত্ৰ্যৰ বিষয়ে জানিবলৈ আৰু ভৱিষ্যৎ প্ৰজন্মৰ বাবে বন্যপ্ৰাণী আৰু প্ৰাকৃতিক জগত সুৰক্ষিত কৰাত যোগদান কৰিবলৈ আমন্ত্ৰণ জনায়।

জৈৱ বৈচিত্ৰ্য নিৰীক্ষণ আৰু বন্যপ্ৰাণী সংৰক্ষণৰ ক্ষেত্ৰত  জনসাধাৰণৰ অংশগ্ৰহণক উৎসাহিত কৰাৰ বাবে অব্যাহত  থকা প্ৰচেষ্টাৰ অংশ হিচাপে ৰাষ্ট্ৰীয় প্ৰাণী উদ্যানে আজি পুৱা ৭:৩০ বজাৰ পৰা ১০:৩০ বজালৈ ‘Sunday Bird Walk @ NZP’ ৰ ১৯সংখ্যক সংস্কৰণৰ আয়োজন কৰে। এই ভ্ৰমণ পক্ষীবিজ্ঞানী ড° পাৰিতোষ আহমেদৰ সুদক্ষ নিৰ্দেশনাত আৰু নিষ্ঠাবান স্বেচ্ছাসেৱকসকলৰ সহযোগত পৰিচালিত হয়।        

       পক্ষী অনুৰাগী, প্ৰকৃতিপ্ৰেমী, ছাত্ৰ-ছাত্ৰী, বন্যপ্ৰাণী ফটোগ্ৰাফাৰ আৰু জৈৱ বৈচিত্ৰ্যৰ প্ৰতি আগ্ৰহী নাগৰিকসহ মুঠ ১৮জন অংশগ্ৰহণকাৰীয়ে অংশ লয়। ভ্ৰমণৰ সময়ত অংশগ্ৰহণকাৰীসকলে ৪৬টা পক্ষী প্ৰজাতিৰ তথ্য লিপিবদ্ধ কৰে আৰু নিৰ্ধাৰিত এলেকাত ৫০০ তকৈ অধিক পক্ষী পৰ্যবেক্ষণ কৰে। এই পৰ্যবেক্ষণে ক্ষেত্ৰ পৰ্যায়ৰ জৈৱ বৈচিত্ৰ্য নথিভুক্তকৰণত অৰিহণা যোগায় আৰু অংশগ্ৰহণকাৰীসকলক নাগৰিক বিজ্ঞানত জড়িত হোৱাৰ ব্যৱহাৰিক সুযোগ প্ৰদান কৰে। বিশেষজ্ঞজনে পক্ষীৰ পৰিৱেশ, আচৰণ আৰু সংৰক্ষণৰ বিষয়ে আলোকপাত  কৰে, পৰিৱেশৰ ভাৰসাম্য বজাই ৰখাত পক্ষীৰ ভূমিকা, প্ৰাকৃতিক কীট নিয়ন্ত্ৰণৰ জৰিয়তে আৰু বাস্তুতন্ত্ৰৰ স্বাস্থ্যৰ সূচক হিচাপে ইয়াৰ মূল্যৰ ওপৰত আলোকপাত কৰে।

অংশগ্ৰহণকাৰীসকলক সম্বোধন কৰি সঞ্চালকগৰাকীয়ে  গুৰুত্ব আৰোপ কৰে যে প্ৰকৃতি ভ্ৰমণে ক্ষেত্ৰ চিনাক্তকৰণ দক্ষতা শক্তিশালী কৰে, পৰিৱেশ সম্পৰ্ক আৰু খাদ্য শৃংখল সম্পৰ্কে ধাৰণা গভীৰ কৰে, জৈৱ বৈচিত্ৰ্য নথিভুক্তকৰণত সহায় কৰে আৰু বন্যপ্ৰাণী সংৰক্ষণৰ প্ৰতি স্থায়ী শলাগৰ মনোভাৱ গঢ়ি তোলে। অৰ্থপূৰ্ণ শিক্ষা আৰু ফলপ্ৰসূ অংশগ্ৰহণ নিশ্চিত কৰিবলৈ প্ৰতিটো Sunday Bird Walk ২০-২৫ জন অংশগ্ৰহণকাৰীৰ মাজতে সীমিত ৰখা হয়। পূৰ্বৰ পঞ্জীয়ন বাধ্যতামূলক আৰু প্ৰথমে অহা, প্ৰথমে পোৱা ভিত্তিত আসন আবণ্টন দিয়া হয়। পঞ্জীয়ন প্ৰ-পত্ৰ প্ৰতি সপ্তাহে সোমবাৰৰ পৰা শুকুৰবাৰলৈ খোলা থাকে। লিংকটো ৰাষ্ট্ৰীয় প্ৰাণী উদ্যানৰ চৰকাৰী ৱেবছাইট আৰু NZP Saathi মোবাইল এপ্লিকেচনৰ জৰিয়তে পোৱা যায়।

*****

VM/SK/KG