ماحولیات، جنگلات اور موسمیاتی تبدیلی کی وزارت
پوسٹ کرنے کی تاریخ:
01 NOV 2026 7:01PM by PIB Delhi
نیشنل زولوجیکل پارک (این زیڈ پی)، نئی دہلی نے یکم نومبر 2026 کو اپنا 67واں یوم تاسیس منایا۔ اس موقع پر زائرین کے لیے ایک دلچسپ ڈوڈل سرگرمی کا اہتمام کیا گیا، جس کے ذریعے جنگلی حیات کے تحفظ، حیاتیاتی تنوع کے بارے میں بیداری اور ماحولیاتی تعلیم کے تئیں اپنے عزم کا اعادہ کیا گیا۔ اس سرگرمی کو زائرین کی جانب سے پُرجوش ردعمل حاصل ہوا اور تقریباً 1500 افراد نے اس میں دلچسپی لی اور حصہ لیا۔ اس سرگرمی نے بالخصوص بچوں اور خاندانوں کو اپنے خیالات کے اظہار اور تخلیقی صلاحیتوں کے مظاہرے کے لیے ایک انٹرایکٹو اور تخلیقی پلیٹ فارم فراہم کیا۔ اس کے ذریعے انہیں جنگلی حیات اور قدرتی ماحول کے تحفظ کی اہمیت سے وابستہ ہونے کا موقع بھی ملا۔
اس موقع پر ڈاکٹر سنجیت کمار، ڈائریکٹر (نیشنل زولوجیکل پارک) نے کہا، ”پارک کا 67واں یوم تاسیس اس کے سفر کا ایک اہم سنگ میل ہے اور جنگلی حیات کے تحفظ، جانوروں کی فلاح و بہبود، حیاتیاتی تنوع کے تحفظ اور عوامی شمولیت کے تئیں اپنے عزم کی تجدید کا ایک موقع بھی ہے۔ ایک جدید چڑیا گھر محض جانوروں کو دیکھنے کی جگہ نہیں ہوتا، بلکہ یہ تحفظ، تعلیم، تحقیق اور ترغیب کا ایک مرکز ہوتا ہے۔ ہر زائر، بالخصوص ہر بچہ، باخبر اور ذمہ دارانہ انتخاب کے ذریعے فطرت کا سفیر بن سکتا ہے۔‘‘ انہوں نے شہریوں سے اپیل کی کہ وہ قومی حیواناتی پارک سے وابستہ ہوں، قدرت کے بھرپور حیاتیاتی تنوع کے بارے میں معلومات حاصل کریں اور آنے والی نسلوں کے لیے جنگلی حیات اور قدرتی ماحول کے تحفظ کی کوششوں میں اپنا تعاون دیں۔
حیاتیاتی تنوع کی نگرانی اور جنگلی حیات کے تحفظ کی کوششوں میں عوامی شرکت کی حوصلہ افزائی کے لیے نیشنل زولوجیکل پارک نے آج صبح 7:30 بجے سے 10:30 بجے تک ’سنڈے برڈ واک @ این زیڈ پی‘ @ این زیڈ پی کے 19ویں ایڈیشن کا انعقاد کیا۔ اس واک کا اہتمام ماہرینِ پرندیات ڈاکٹر پرِیتوش احمد کی ماہرانہ رہنمائی میں کیا گیا، جس میں سرشار رضاکاروں نے بھی تعاون کیا۔
اس پروگرام میں پرندوں کے شوقین افراد، فطرت سے محبت کرنے والوں، طلبہ، جنگلی حیات کے فوٹوگرافروں اور حیاتیاتی تنوع میں دلچسپی رکھنے والے شہریوں سمیت کل 18 افراد نے شرکت کی۔ واک کے دوران شرکت کنندگان نے مقررہ علاقے میں پرندوں کی 46 اقسام کا اندراج کیا اور 500 سے زائد پرندوں کا مشاہدہ کیا۔ ان مشاہدات سے زمینی سطح پر حیاتیاتی تنوع کے دستاویزی ریکارڈ کی تیاری میں مدد ملی اور شرکت کنندگان کو سٹیزن سائنس کی سرگرمیوں میں عملی طور پر حصہ لینے کا موقع فراہم ہوا۔ ماہرین نے پرندوں کی ماحولیات، ان کے طرز عمل اور تحفظ سے متعلق اہم معلومات فراہم کیں۔ انہوں نے ماحولیاتی توازن برقرار رکھنے میں پرندوں کے کردار کو اجاگر کیا، جس میں قدرتی طور پر حشرات و کیڑوں پر قابو پانا بھی شامل ہے۔ اس کے علاوہ انہوں نے ماحولیاتی نظام کی صحت کے اشاریوں کے طور پر پرندوں کی اہمیت پر بھی روشنی ڈالی۔
شرکت کنندگان سے خطاب کرتے ہوئے ڈائریکٹر (نیشنل زولوجیکل پارک) نے اس بات پر زور دیا کہ فطرت کی سیر سے میدان میں پرندوں اور دیگر جانداروں کی شناخت کی مہارت بہتر ہوتی ہے، ماحولیاتی تعلقات اور غذائی جال کی تفہیم میں اضافہ ہوتا ہے، حیاتیاتی تنوع کے دستاویزی ریکارڈ کی تیاری میں مدد ملتی ہے اور جنگلی حیات کے تحفظ کے تئیں دیرپا دلچسپی پیدا ہوتی ہے۔ بامعنی تعلیم اور مؤثر شرکت کو یقینی بنانے کے لیے ہر سنڈے برڈ واک میں شرکت کنندگان کی تعداد 20 سے 25 تک محدود رکھی جاتی ہے۔ پیشگی رجسٹریشن لازمی ہے اور نشستیں پہلے آئیے، پہلے پائیے کی بنیاد پر مختص کی جاتی ہیں۔ رجسٹریشن فارم ہر ہفتے پیر سے جمعہ تک کھلا رہتا ہے۔ اس کا لنک نیشنل زولوجیکل پارک کی سرکاری ویب سائٹ اور این زیڈ پی ساتھی (NZP Saathi) موبائل ایپلی کیشن پر دستیاب ہے۔
**************
ش ح۔ ف ش ع
01-11-2026
U: 7065