Ha ka:
01 NOV 2026 10:14PM by PIB Shillong
Ban sam ïa ki jingtip shaphang ka jingïohi jngai jong u Myntri Rangbah Duh ka Ri, u Narendra Modi ‘ban pynrung ïa ki tiar Swadeshi ha man la ki thliew ïing’ bad ka ‘‘Atmanirbhar Bharat’ hapdeng jong ki paid, ka Khadi and Village Industries Commission (KVIC) ka la pynlong ïa ka ‘Khadi Diwali Fest-2026’ ha NDMC Palika Park, Connaught Place, kaba don ha New Delhi (pyrshah ïa ka Regal Cinema). Ha kane ka tamasa, la sakhi ïa ka jingïashimbynta bakyrpang jong ki lad pathai khubor bad ka jingpynlong ïa ka ‘Diwali Milan’ (Diwali get together). U Chairman ka KVIC, u Shri Manoj Goel, u la shimbynta kum u Kongsan ha katei ka sngi. Ba la pynlong hapoh jong ka phang ‘Khadi-wali Diwali,’ kane ka jingïakynduhlang ka thmu ban pynshlur ïa ki paidbah ba kin pyndonkam ïa ki jaiñ Khadi bad ki tiar Swadeshi ha ka por Diwali bad kumjuh ha kiwei ki tamasa, ban ai ka jingithuh kaba kham khraw ïa ki jingshna jong ki nongthaw tiar, bad ki kynhun seng kam jong ki shnong ki thaw bad khamtam ban pynïasnoh ïa ki samla bad ka Swadeshi movement.
U Chairman ka KVIC, u Shri Manoj Goel haba ai jingkren ha katei ka prokram u la pynpaw ïa la ka jingsngew ba u Kpa jong ka Jaitbynriew, u Mahatma Gandhi, u la ïohi ïa ka jaiñ Khadi ym tang kum u ‘sai-thaiñ jaiñ hynrei kum ka dak jong ka jingshaniah ha lade, ka jingburom ïalade bad kumjuh ruh jong ka ïoh ka kot ba laitluid. Mynta, hapoh ka jingïalam jong u Myntri Rangbah Duh, u Shri Narendra Modi, ka jaiñ Khadi bad ka jingïaleh Swadeshi (kiba long ki mar tynrai) ka la nang ïoh bor thymmai bad sakhi ïa ka jingïashimbynta jong ki paidbah na kylleng kylleng. Ka jingkyntu jong u Myntri Rangbah Duh na ka bynta ka ‘Har Ghar Swadeshi, Ghar Ghar Swadeshi’ kam mut eh tang ïa ka jingthied ïa ki tiar tynrai, hynrei ka dei ka jingïakhih kaba kynthup lut ïa baroh bad kaba thmu ban pynshlur ïa ka jingsngewsarong ha ka jingpyndonkam ïa ki tiar ba pynmih ha la ka jong ka Ri, ka jingpynshlur ïa ki nongpynmih mar jong ka thaiñ, bad ban pynkhlaiñ ïa ka jingkyrshan da lade ha ka ïoh ka kot jong ka Ri.
U Shri Goel u la ban biang ba kane ka aïom tamasa ka long kaba donkam bha ïa ka ïoh ka kot jong ka Ri, ki ïew ki hat bad ki nongshna tiar da la ki kti. Lada baroh ki longïing ki pynkongsan ïa ki jaiñ Khadi bad kiwei ki tiar Swadeshi ha kane ka aïom tamasa, ka jingmyntoi kan sa poi sha ki phew hajar ngut ki nongshna jingshna, ki nongthaiñ jaiñ, bad ki nongseng kam ha shnong, bad ïa ki longïing jong ki ha kylleng jong ka Ri. U la banjur ba ka jingthied ïa ki tiar Swadeshi kam dei eh tang ka rai jong ki nongthied hynrei ka jingnohsynñiang badonkam da ki nongshongshnong sha ka jingpynkhlaiñ ïa ka ïoh ka kot jong ka Ri bad ka jingïohkam ïohjam jong ka thaiñ.
U Chairman ka KVIC u la kyntu kyrpang ïa ki samla kiba kynthup ïa ki Gen-Z ban ïasnoh bad kane ka Swadeshi Movement, da kaba pynpaw ba ki samla ka mynta ki long kiba phikir bha haba ïadei bad ka riam ka beit, ki jingdro dur ha ki, ka teknoloji bad ki jingmut ba shem thymmai. Da kaba pynïasnoh ïa ka jaiñ Khadi bad ki tiar jong ki karkhana shnong bad ki jingdro dur ka juk mynta, ki jingpyni bakhring, ka jingpynithuh kyrpang ïa ki mar, bad ka rukom im ka juk ba mynta, kine ki tiar ki lah ban long kiba pawnam shuh shuh hapdeng jong ki samla. U la bynrap shuh shuh ba ki khynnah samla ki lah ban long ym tang tang ki nongpyndonkam ïa ki tiar Swadeshi, hynrei ki lah ruh ban shakri kum ki nongmihkhmat jong kane ka jaiñ, ki nongpynwandur, ki nongpynbna lyngba ki lad digital bad ki nongsengkam sengjam.
U Shri Goel u la ong ba ka bynta jong ki samla ka long kaba donkam bha ha kaban pynurlong ïa ka jingthmu jong u Myntri Rangbah Duh u Narendra Modi, halor ka phang "Local to Global.” Lyngba ka rynsan social media, ka e-commerce, ka digital marketing bad ki startup, ki samla ki lah ban ïarap ban pynpoi ïa ka jaiñ Khadi bad ki mar jong ki karkhana shnong sha ki kyndong bad ki kynshrot jong ka Ri, ha kajuh ka rukom da kaba ai dur thymmai ïa ki ha ki ïew ka pyrthei. U la nang bynrap shuh shuh ba, ban pynurlong pat ïa ka jingthmu jong u Myntri Rangbah Duh u Shri Narendra Modi jong ka ‘Viksit Bharat @ 2047’ bad ka sienjam ‘Vocal for Local’ sha ki pateng ka juk mynta, ka KVIC ka la pyllait ïa ka jingïakren podcast ba la ai kyrteng ‘Baat Khadi Ki’. Lyngba kane la ïaleh ban pynïasnoh ïa ka pateng Gen Z bad ki jaiñ Khadi ryngkat bad ka jingïaleh pyndonkam ïa ki tiar tynrai Swadeshi da kaba wad ïa ki phang bapher bapher kum ka pateng jong ka Khadi, ki riam phong ka juk, ki jingshem thymmai bad ka jingseng kam da ki samla. Kane ka sienjam kan sa ïarap ban pynpawnam ïa ka jaiñ Khadi hapdeng ki khynnah ka juk mynta bad ban pynkhlaiñ ban pynïoh na ka bynta ka Atmanirbhar Bharat (Self-reliant India).
Haba ïakren bad ki lad pathai khubor, u Shri Goel u la shem ba ki Jaiñ Khadi bad ki tnat karkhana shnong ki la sakhi ïa ka jingroi jingsan kabym pat ju shem mynno mynno, kaba shah ïalam da ka jingpyrkhat ba jngai bad ki rukom treikam jong u Myntri Rangbah Duh, u Shri Narendra Modi.
Ha u financial year jong u snem 2025-26, ka jingmih pisa na ki jaiñ Khadi bad ki karkhana shnong ka la poi sha ka 1.87 lak klur tyngka, ha kajuh ka por ka tnat ka la ai kam ruh sha palat 2.04 klur ngut ki briew. U la pynpaw ïa ka jingsngew skhem ba ha ki pateng ban wan, ka tnat kan sa kot sha ka thong pynmih pisa ba la buh, kata ka 2.51 lak klur.
Ka ‘Khadi Diwali Fest-2026,’ kaba lah sdang ha ka 31 tarik u bnai Risaw, ka la tyrwa bit dor kumba 20 percent eiei halor ki jaiñ Khadi bad kumba 10 percent eiei ha ki tiar ba lah pynmih na ki karkhana hapoh shnong. Kane ka tamasa ka la pynskhem ruh ïa ka khubor ba ha kane ka jinglehkmen Diwali, ngim dei ban thang ïa ki sharak (diyas) tang hapoh ïing hynrei ban pynsaphriang ruh ïa ka jingshai jong ka jingkmen ha ka jingim jong ki phew hajar ngut ki nongshna mar kiba pyndonkam da la ki jong ki kti bad ha ki longïing jong ki thaiñ nongkyndong ha kylleng jong ka Ri da kaba shim bad pyndonkam ïa ka jaiñ Khadi bad ki tiar Swadeshi.
*****