हवाई दलाचे एअर चीफ मार्शल आशुतोष दीक्षित यांनी भारतीय हवाई दलाचे 29 वे प्रमुख म्हणून पदभार स्वीकारला; भारतीय हवाई दलासाठी मार्गदर्शक दृष्टिकोन म्हणून ‘वायू’ संकल्पनेचे अनावरण

भारतीय हवाई दलाचे 29 वे प्रमुख म्हणून एअर चीफ मार्शल आशुतोष दीक्षित, पीव्हीएसएम, एव्हीएसएम, व्हीएम, व्हीएसएम यांनी 01 नोव्हेंबर 2026 रोजी आपल्या कार्यकाळाची सुरुवात राष्ट्रसेवेत सर्वोच्च बलिदान दिलेल्या शूरवीरांना राष्ट्रीय युद्ध स्मारक येथे आदरांजली अर्पण करून केली. त्यानंतर नवी दिल्ली येथील हवाई दलाच्या तळावर त्यांना औपचारिक मानवंदना देण्यात आली.

प्रायोगिक चाचणी वैमानिक आणि पात्र उड्डाण प्रशिक्षक असलेल्या एअर चीफ मार्शल दीक्षित यांना 3,500 तासांहून अधिक उड्डाणाचा अनुभव आहे. त्यांनी एकात्मिक संरक्षण कर्मचारी प्रमुख (सीआयएससी), चीफ्स ऑफ स्टाफ कमिटीचे अध्यक्ष, मुख्यालय एकात्मिक संरक्षण कर्मचारी (मुख्यालय आयडीएस), मध्य हवाई कमांडचे एअर ऑफिसर कमांडिंग-इन-चीफ आणि हवाई दलाचे उपप्रमुख यांसह अनेक महत्त्वाच्या कार्यात्मक आणि धोरणात्मक पदांवर काम केले आहे.

हवाई दलाचे प्रमुख म्हणून आपल्या पहिल्या संबोधनात त्यांनी भारतीय हवाई दलासाठीचा आपला दृष्टिकोन आणि प्राधान्यक्रम स्पष्ट केले. भारतीय हवाई दलाच्या भविष्यातील वाटचालीला आकार देणाऱ्या चार स्वतंत्र स्तंभांची मांडणी करणारी ‘वायू’ ही मार्गदर्शक संकल्पना त्यांनी मांडली.

V - Vigilance, Victory and Readiness (सतर्कता, विजय आणि सज्जता): सर्व हवाई दलाच्या तुकड्यांमध्ये सर्वोच्च स्तरावरील कार्यात्मक सज्जता कायम ठेवणे आणि लढाऊ क्षमता मंजूर स्तरापर्यंत पुन्हा प्रस्थापित करणे.

A - Aatmanirbharta (आत्मनिर्भरता): विविध विमाने, सेन्सर्स, शस्त्रास्त्रे आणि तंत्रज्ञानाच्या क्षेत्रांमध्ये स्वदेशी क्षमता वाढविण्याच्या प्रक्रियेला गती देणे. कार्यात्मक स्वावलंबन आणि सातत्यपूर्ण लढाऊ क्षमता यांवर विशेष लक्ष केंद्रित करणे.

Y - Yukti (युक्ती): सिद्धांत, तंत्रज्ञान आणि कार्यपद्धतींमध्ये कल्पकता व नावीन्यपूर्णतेचा वापर करणे. यामध्ये कृत्रिम बुद्धिमत्तेवर आधारित कमांड आणि नियंत्रण व्यवस्था, ड्रोनविरोधी क्षमता, लवचिकता आणि उदयोन्मुख कार्यात्मक क्षेत्रांचा समावेश आहे.

U - Unity of Effort (प्रयत्नांमधील एकता): ‘जय’ म्हणजेच संयुक्तता, आत्मनिर्भरता आणि नावीन्य या राष्ट्रीय दृष्टिकोनाशी सुसंगत राहून लष्कर, नौदल आणि राष्ट्रीय संस्थांसोबत समन्वय व एकात्मता अधिक मजबूत करणे.

‘वायू’ या संकल्पनेच्या माध्यमातून हवाई दलाच्या प्रमुखांनी कार्यात्मकदृष्ट्या सज्ज, तंत्रज्ञानाच्या दृष्टीने प्रगत, आत्मनिर्भर आणि अखंडपणे एकात्मिक भारतीय हवाई दलासाठी स्पष्ट दिशा निश्चित केली आहे. देशाच्या हितसंबंधांचे रक्षण करण्यासाठी आणि विश्वासार्ह हवाई सामर्थ्याच्या माध्यमातून संघर्षाला प्रतिबंध करण्यासाठी भारतीय हवाई दल कटिबद्ध राहील.

***

शैलेश पाटील/गजेंद्र देवडा/परशुराम कोर

*** 

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai