வழிகாட்டி செயற்கைக் கோள்கள் - உள்நாட்டுத் திறன்களை வலுப்படுத்தும்: இஸ்ரோ

இந்திய விண்வெளி ஆராய்ச்சி நிறுவனமான இஸ்ரோ, ஸ்ரீஹரிகோட்டாவில் உள்ள சதீஷ் தவான் விண்வெளி மையத்திலிருந்து ஜிஎஸ்எல்வி-எஃப்18/என்விஎஸ்-03 திட்டத்தை 2026 அக்டோபர் 30 அன்று இரவு 23:51 மணிக்கு வெற்றிகரமாக நிறைவேற்றியது.

ஜிஎஸ்எல்வி-எஃப்18 செலுத்து வாகனமானது, என்விஎஸ்-03 வழிகாட்டி செயற்கைக்கோளை (நேவிகேஷன் சாட்டிலைட்) ஒரு துல்லியமான புவி ஒத்திசைவு மாற்று சுற்றுப்பாதையில் (ஜிடிஓ) செலுத்தியது. அதனைத் தொடர்ந்து, முதல் சுற்றுப்பாதை சூழ்ச்சி 31 அக்டோபர் 2026 அன்று 16:48 மணிக்கு நிறைவடைந்தது. அதனை 111.75° கிழக்கில் உள்ள அதற்கென ஒதுக்கப்பட்ட புவி ஒத்திசைவு சுற்றுப்பாதை இடத்தில் நிலைநிறுத்த மேலும் சில உத்திகள் திட்டமிடப்பட்டுள்ளன.

இந்தியாவின் ஐந்து அடுத்த தலைமுறை வழிகாட்டி செயற்கைக்கோள்களின் வரிசையில் இது மூன்றாவது ஆகும்.

புவி ஒத்திசைவு அல்லது புவி நிலை சுற்றுப்பாதையை நோக்கிய ஒரு விண்கலம், பொதுவாக முதலில் ஒரு நீள்வட்ட புவி ஒத்திசைவு மாற்று சுற்றுப்பாதையில் நிலைநிறுத்தப்படுகிறது. இந்த சுற்றுப்பாதையானது, தாழ்வான புவி அண்மைப் புள்ளியையும் (பூமிக்கு மிக அருகிலுள்ள புள்ளி), உயர்வான புவி சேய்மைப் புள்ளியையும் (பூமியிலிருந்து மிகத் தொலைவான புள்ளி) கொண்டுள்ளது. ஒரு வழக்கமான ஜிடிஓ-வில், புவி சேய்மைப் புள்ளியானது பூமியின் மேற்பரப்பிலிருந்து சுமார் 35,786 கிலோ மீட்டர் உயரத்தில் இருக்கும். புவி சேய்மைப் புள்ளிக்கு அருகில், விண்கலம் தனது புவி அண்மைப் புள்ளியை உயர்த்தி, அதன் சுற்றுப்பாதையை வட்டமாக்குவதற்காக, தன்னுள் உள்ள உந்துவிசை அமைப்பை இயக்குகிறது. இலக்கு சுற்றுப்பாதையைப் பொறுத்து, கூடுதல் உத்திகள் அதன் சுற்றுப்பாதைச் சாய்வையும் நிலையையும் சரிசெய்யக்கூடும். இந்த சுற்றுப்பாதையை உயர்த்தும் உத்திகளுக்குப் பயன்படுத்தப்படும் உந்துவிசை அமைப்பு பொதுவாக புவி சேய்மை மோட்டார் (Apogee Motor) என்று அழைக்கப்படுகிறது. என்விஎஸ்-03-ஐப் பொறுத்தவரை, அதன் சுற்றுப்பாதையை உயர்த்தும் உத்தியானது, ஒரு வகையான வேதியியல் ராக்கெட் இயந்திரமான அதன் திரவ புவி சேய்மை மோட்டாரைப் (Liquid Apogee Motor - LAM) பயன்படுத்தி நிகழ்த்தப்பட்டது.

பணியின் முக்கிய சிறப்பம்சங்கள்:

வெற்றிகரமான செலுத்துதல்: ஜிஎஸ்எல்வி-எஃப்18 ராக்கெட், என்விஎஸ்-03 செயற்கைக்கோளை அதன் திட்டமிடப்பட்ட புவி ஒத்திசைவு மாற்று சுற்றுப்பாதையில் நிலைநிறுத்தியது . இது, இந்தியாவின் செயற்கைக்கோள் வழிகாட்டி உள்கட்டமைப்பை வலுப்படுத்தும் முயற்சிகளில் மற்றுமொரு மைல்கல்லைக் குறிக்கிறது.

20-வது ஜிஎஸ்எல்வி : இந்தத் திட்டம், இந்தியாவின் புவி ஒத்திசைவு செயற்கைக்கோள் செலுத்து வாகனத்தின் 20வது செலுத்துதல் ஆகும்.

அடுத்த தலைமுறைத் தொடர் செயற்கைக்கோள்: என்விஎஸ்-03 என்பது இரண்டாம் தலைமுறை நேவிக் செயற்கைக்கோள்களில் என்விஎஸ்-01 முதல் என்விஎஸ்-05 வரையிலானதில் மூன்றாவது செயற்கைக்கோள் ஆகும். இந்தச் செயற்கைக்கோள்கள் இந்தியாவின் பிராந்திய வழிகாட்டி அமைப்பின் பரப்பு, துல்லியம், நம்பகத்தன்மை ஆகியவற்றை வலுப்படுத்தும் வகையில் வடிவமைக்கப்பட்டுள்ளன.

செயற்கைக்கோள் வழிகாட்டி அமைப்பு:

செயற்கைக்கோள் வழிகாட்டி அமைப்பு என்பது, இருப்பிடம், வழிசெலுத்தல், நேரத் தகவல்களை வழங்கும் செயற்கைக்கோள்களின் கட்டமைப்பு ஆகும். இந்தச் செயற்கைக்கோள்கள், தங்களின் இருப்பிடம், துல்லியமான நேரத் தகவல்களைக் கொண்ட சமிக்ஞைகளைத் தொடர்ந்து அனுப்புகின்றன. ஸ்மார்ட்போன்கள், வாகனங்கள், வழிசெலுத்தல் கருவிகள் போன்றவை, தங்களின் துல்லியமான இருப்பிடம், வேகம், திசை ஆகியவற்றைத் தீர்மானிக்க, பல செயற்கைக்கோள்களிலிருந்து வரும் சமிக்ஞைகளைப் பயன்படுத்துகின்றன. இந்த அமைப்புகள், வழித்தடங்களுக்கான வழிகாட்டுதல், விமானம், கப்பல் கண்காணிப்பு, துல்லியமான விவசாயம், பேரிடர் மேலாண்மை, தொலைத்தொடர்பு உள்ளிட்ட பலவற்றுக்குப் பயன்படுகின்றன.

மேம்படுத்தப்பட்ட வழிகாட்டி சமிக்ஞைகள் : என்விஎஸ்-03 ஆனது எல்1, எல்5, எஸ் அதிர்வெண் பட்டைகளில் வழிகாட்டுதல் கருவிகளைக் கொண்டுள்ளது. இது திறன்களையும் இணக்கத்தன்மையையும் தொடர்ந்து மேம்படுத்துகிறது. இது இந்தியாவின் நிலப்பரப்பு முழுவதிலும், அதன் புவிசார் அரசியல் எல்லைக்கு அப்பால் 1,500 கிலோ மீட்டர் தொலைவிற்கு விரிந்துள்ள ஒரு பிராந்தியத்திலும் வழிகாட்டி சேவையை ஆதரிக்கிறது.

உள்நாட்டுத் தொழில்நுட்பம்: என்விஎஸ்-03, உள்நாட்டிலேயே உருவாக்கப்பட்ட ஒரு அணு கடிகாரத்தையும், கொள்முதல் செய்யப்பட்ட அணு கடிகாரங்களையும் கொண்டுள்ளது. இந்தக் கடிகாரங்கள், வழிகாட்டி சமிக்ஞைகளை உருவாக்குவதற்கு மிகவும் துல்லியமான நேரக் குறிப்புகளை வழங்குகின்றன.

விரிவான பயன்பாடுகள் : என்விஎஸ்-03, இந்தியாவின் தற்சார்புத் திறன்களை வலுப்படுத்துகிறது. இந்தத் திறன்கள் போக்குவரத்து, கடல்சார் செயல்பாடுகள், விமானப் போக்குவரத்து, பேரிடர் மேலாண்மை, உத்திசார் சேவைகள் போன்ற பல்வேறு பயன்பாடுகளுக்கு ஆதரவளிக்கின்றன. இது இந்தியாவின் விண்வெளி இறையாண்மையை நோக்கிய மற்றொரு படியாக அமைந்துள்ளது.

மேலும் விவரங்களுக்கு இந்த ஆங்கிலச் செய்திக்குறிப்பைக் காணவும்: https://www.pib.gov.in/PressReleasePage.aspx?PRID=2331077&reg=3&lang=1

***

SK/PLM/PD