LEIT JNGOH U MYNTRI RANGBAHDUH KA RI ÏA KA CCIC PAVILION JONG KA BHARAT PARV 2026 HA EKTA NAGAR

Ka Central Cottage Industries Corporation of India Ltd. (CCIC), kaba dei ka tnad treikam jong ka sorkar India hapoh ka Ministry of Textiles, ka la ïashimbynta ha ka  Bharat Parv 2026 kaba la pynlong ha Ekta Nagar, Kevadia, Gujarat. Ka la long shisha ka khyllipmat kaba dap da ka jingsngewsarong bad kaban sah jingkynmaw ïa ka CCIC hadien ba U Myntri Rangbahduh ka Ri dalade hi u la wan jngoh ïa ka CCIC Pavilion kaba la pynlong ha ka 30 tarik Risaw 2026 ha Ekta Nagar, Kevadia. Kane ka jingleit jngoh U Myntri Rangbahduh ka Ri ka long ruh ka kabu ïa ka CCIC ban ïohlad ban pyni paidbah ïa ka jingriewspah jong ka nam bad ka burom kaba la hiar pateng na ki por mynshwa, ka don ïa ka jingïadei kaba jan bad slem bha bad ki seng jong ki nongtrei ba shna tiar da ki kti bad ki nongthaiñ jaiñ (artisans & weavers), bad ruh ki jingpyrshang ban ïai bteng ban kyntiew bad pynneh pynsah ïa ka rukom thaiñ jaiñ ne shna tiar tynrai da ki kti ha ka Ri India.

Ka Pavilion jong ka CCIC ka pyni ruh ïa ka jingïaid lynti jong ka seng (Corporation) ha kaba ïadei bad ka jingpynkupbor ïa ki nongtrei kiba shna tiar da ki kti bad ki nongthaiñ jaiñ da kaba ailad kham bha ïa ki ban pynïaid ïew ïa ki mar jong ki bad ruh ki lad kamai jakpoh kiba lah ban neh slem. Lyngba ki sienjam bapher bapher jong ka, ka CCIC ka noh synñiang shitrhem bha ha kaban pynurlong ïa ka jingthmu jong ka “Vocal for Local” bad shim ruh ïa ka thong jong ka “Local to Global”, da kaba pynïasoh ïa ka sap shna tiar tynrai jong ka India bad ki ïew kiba kham heh kiba don hapoh ka Ri ne shabar ka Ri ruh kumjuh.

Ha kane ka sngi la ïadonlang ruh U Bimal Gopalachari, Managing Director ka CCIC, haryngkat ki sahep bad nongtrei jong ka seng, ki nongshna tiar da ki kti bad ki nongthaiñ jaiñ. Kane ka Pavilion ka pyni ïa ka jingtbit ba kyrpang jong ki nongshna tiar da ki kti na ki bynta bapher bapher jong ka Ri, kaba kynthup naduh ki nongshna tiar kiba na Gujarat kiba la pyni ïa ka rukom shna tiar tynrai da kaba pyndonkam ïa ki jait maw Agate bad kiwei pat ki maw ba kordor bad ruh haduh ka rukom airong bad pynitynnad ïa ki jaiñ da kaba khleh lang ïa ki jaiñ lyngkhot ïa kaba la tip kum ka Appliqué Work.

Ka CCIC ka rakhe bad lehkmen halor ka jinglong pher bad riewspah jong ki sap ban shna tiar da ki kti bad ka rukom thaiñ jaiñ kaba wanrah ruh ïa ka jingtbit ha ka kam shna tiar da ki kti ha kylleng ki bynta jong ka Ri. Ym tang kata ka pyni ruh ïa ki jait mar tynrai bapher bapher bad ki jingshna kti kiba pynpaw ïa ka pateng bad ka lariti kaba kham pher jong ka Ri India bad ki jingitynnad ki bym ju jah na ka khamtam ha ka liang ki kam ban shna tiar tynrai da ki kti.

Kane ka ïew pyninam kan neh haduh ka 15 tarik u Naiwieng 2026 na ka bynta ki paidbah kiba kwah ban wan peit ïa ki jaiñ bad ki tiar ba shna kti kaba long ha Ekta Nagar, Kevadia, Gujarat.

*****