প্রধান মন্ত্রীনা ময়াই তাংবল লৌদুনা ৫৪শুবা প্রাগাতি মীফম পাংথোকখ্রে

ঙসি প্রধান মন্ত্রী শ্রী নরেন্দ্র মোদীনা লুচিংদুনা সেবা তির্থদা আই.সি.তি শীজিন্নরবা, মল্তি-মোদাল প্লেতফোর্ম প্রাগাতি (প্রো-এক্তিপ গভর্নান্স এন্দ তাইম্লি ইমপ্লিমেন্তেসন) গী ৫৪ শুবা মীফম পাংথোকখ্রে। থবক ওইনা পায়খৎপদা থেংনবা খুদোংচাদবশিং কোকহন্নবা অমসুং প্রোজেকশিং অমসুং য়াইফ থৌরাংগী স্কিমশিং পায়খৎপা ফগৎহন্নবা মীফম অসিদা কেন্দ্র অমসুং রাজ্য সরকারশিং পুল্লে।

মীফম মনুংদা, প্রধান মন্ত্রীনা রেলৱেজ, এক্ত মোলশিং অমসুং দ্রগ পার্কশিং য়াওনা রাজ্য অমসুং য়ু.তি ৩১ হেনবদা লুপা করোর ১৬,০০০ হেনবগী ইনফ্রাষ্ট্রকচর প্রোজেকশিংগী ফিবম হন্না য়েংশিনখ্রে। প্রোজেকশিং অসি শেন-থুম চাউখৎপা অমসুং মীয়ামগী য়াইফ-থৌরাংদা য়াম্না মরুওই লোয়ননা প্রোজেকশিং অদু মতম চানা পায়খৎনবা, এজেন্সিশিংগী মরক্ত পুন্না চৎমিন্ননবা, পন্দুনা লৈবগী খুদোংচাদবশিং কোকহন্নবা অমসুং য়াংনা লোইশিন্নবা হন্না য়েংশিনখিবনি।

প্রধান মন্ত্রীনা হায়খি মদুদি পি.এম এক্ত মোলশিংনা মফম অমগী পোৎথোকশিংগী য়োনফম পীগনি, খুৎহৈবশিংগী হিংনবগী লম্বীশিং ফগৎহনগনি অমসুং মখোয়গী ললোন-ইতিক্কী থবকশিং চাউথোকপদা মখোয়গী মতেং পাংগনি।  এক্ত মোলশিংগা তুরিজম অমসুং লমদম অমগী ললোন-ইতিকশিংগা শম্নগদবনি। দরকার ওইবা হেনগৎলকপদগী খুঙ্গংদা পোৎথোক পুথোকপা, পেকেজিং, লৈদুনা থম্বা অমসুং পুথোক-পুশিন্দা থবক পীগনি। মোলশিং মতম চানা শাবা লোইশিন্নবা অমসুং থবক্কী খুমাংচাউশিনবা চীফ সেক্রেতরিশিংনা চাংনাইনা য়েংশিন্নবা মহাক্না তকশিনখি।

অন্ধ্র প্রদেস, গুজরাত অমসুং হিমাচল প্রদেসতা ব্লক দ্রগ পার্কশিং হন্না য়েংশিল্লদুনা, প্রধান মন্ত্রীনা হায়খি মদুদি মশা মরোমদোম লেপচবা ঙম্বা হেনগৎহন্নবা হিদাক-লাংথক শুংনবা মচাকশিং অমসুং তঙাইফদবা পোৎলমশিং লৈবাক অসিদা পুথোকপা দরকার ওই।

থবক পায়খৎপদা থেংনরিবা খুদোংচাদবশিং কোকহন্নবা অমসুং কান্নবশিং বেনিফিসরিশিংদা মতম চানা য়ৌহন্নবা থা খুদিংগী দিষ্ট্রিক মেজিষ্ট্রেদশিংগা লোয়ননা স্কিমশিং হন্না য়েংশিন্নবা প্রধান মন্ত্রীনা চীফ সেক্রেতরিশিংদা খঙহনখ্রে। এস্পিরেসনেল দিষ্ট্রিক্স অমসুং এস্পিরেসনেল ব্লোক্স প্রোগ্রামশিং পল্লদুনা, প্রধান মন্ত্রীনা হায়খি মদুদি চাউখৎত্রিবা মফমশিংদা চাউখৎপা য়াংশিন্নবা থবকশিং পুনশিনবা, চাংনাইনা য়েংশিনবা অমসুং মরম চানা থবক তৌবগী মরুওইবা থৌদাং লৈরি। লৈঙাক মপাঙ্গল কনখৎলকপা অমসুং য়াইফ থৌরাংগী স্কিমশিং পায়খৎপা হেনগৎলকপদগী  চাউরাক্না মীওই করোর ২৫ রোম লায়রবা কোক্লে।

অহমেদবাদ রেলৱে ষ্টেসন অমুক হন্না শেমগৎলিবা অসি হন্না য়েংশিনবদা, প্রধান মন্ত্রীনা হায়খি মদুদি পেসেঞ্জরশিং নুংঙাইবা হেনগৎনবা অমসুং চৎথোক-চৎশিন লাইহন্নবা লৈবাক শীনবা থুংবগী অচৌবা রেলৱে ষ্টেসনশিং অমুক হন্না শেমগৎপগী থবক  য়াংশিনগদবনি। অমুক হন্না শেমগৎলবা ষ্টেসনশিং মেত্রো অমসুং অতোপ্পা ত্রান্সপোর্ত নেতৱার্কশিংগা শম্নদুনা মল্তিমোদাল ত্রান্সপোর্ত হবশিং ওইনা থবক তৌগদবনি।

খুদোংচাদবশিং মিসনগী মওংদা লোইশিন্নবা, সেন্তর-ষ্টেৎ অমসুং ইন্তর-এজেন্সি কোওর্দিনেসন মপাঙ্গল কনখৎহন্নবা অমসুং খ্বাইদগী ৱাংবা থাক্ত নকশিন্না য়েংশিন্নবা মরী লৈনবা মিনিষ্ট্রিশিং অমসুং রাজ্য সরকারশিংদা প্রধান মন্ত্রীনা খঙহনখ্রে। থাক খুদিংমক্ত হেন্না থৱায় য়াওনা থবক তৌনবা চৎনবী অমা শেমগৎনবা তকশিল্লদুনা, প্রধান মন্ত্রীনা হায়খি মদুদি থবক পায়খৎপদা থেংনবা খুদোংচাদবশিং কোকহনবা, প্রোজেকশিং অপীবা মতমগী মনুংদা মপুংফানা লোইশিন্নবা মতম চানা ৱারেপ লৌবা অমসুং দাইত্ব লৌবা দরকার ওই।

***