ಪ್ರಜಾಪ್ರಭುತ್ವದಲ್ಲಿ  ಅಭಿಪ್ರಾಯ ಭೇದಗಳಿದ್ದರೂ ಪರಸ್ಪರ ಗೌರವ ಅಗತ್ಯ: ಲೋಕಸಭಾ ಸ್ಪೀಕರ್

ಪ್ರಜಾಪ್ರಭುತ್ವದಲ್ಲಿ ಅಭಿಪ್ರಾಯ ಮತ್ತು ದೃಷ್ಟಿಕೋನಗಳ ಭಿನ್ನತೆ ಸಹಜ. ಆದರೆ, ಭಿನ್ನಾಭಿಪ್ರಾಯಗಳನ್ನು ಯಾವಾಗಲೂ ಪರಸ್ಪರ ಗೌರವ ಮತ್ತು ಘನತೆಯನ್ನು ಕಾಪಾಡಿಕೊಂಡು ವ್ಯಕ್ತಪಡಿಸಬೇಕು ಎಂದು ಲೋಕಸಭಾ ಸ್ಪೀಕರ್ ಶ್ರೀ ಓಂ ಬಿರ್ಲಾ ಅವರು ಇಂದು ಒತ್ತಿ ಹೇಳಿದರು. ಅಭಿಪ್ರಾಯಗಳಲ್ಲಿ ಭಿನ್ನತೆಗಳಿದ್ದರೂ, ಮಾತಿನಲ್ಲಿ ಸಂಯಮ, ನೈತಿಕ ನಡವಳಿಕೆ ಮತ್ತು ಇತರರ ಬಗ್ಗೆ ಗೌರವ ಹೊಂದಿರುವುದರ ಮಹತ್ವವನ್ನು ಸಂತ ಕಬೀರರ ಬೋಧನೆಗಳು ಸಾರುತ್ತವೆ ಎಂದು ಅವರು ಹೇಳಿದರು.

ಉತ್ತರ ಪ್ರದೇಶದ ಲಖೀಂಪುರ ಖೇರಿಯ ಕಬೀರಧಾಮ ಆಶ್ರಮದಲ್ಲಿ ಆಯೋಜಿಸಲಾಗಿದ್ದ ಸಂತ ಕಬೀರ ಮಹೋತ್ಸವ ಮತ್ತು ಕಬೀರ ಸ್ಮೃತಿ ಭವನದ ಶಿಲಾನ್ಯಾಸ ಸಮಾರಂಭವನ್ನು ಉದ್ದೇಶಿಸಿ ಮಾತನಾಡಿದ ಶ್ರೀ ಬಿರ್ಲಾ ಅವರು, ಸಹಾನುಭೂತಿ, ಸಮಾನತೆ ಮತ್ತು ಸಾಮಾಜಿಕ ಸಾಮರಸ್ಯದ ಸಂತ ಕಬೀರರ ಕಾಲಾತೀತ ಸಂದೇಶವು ಆರು ಶತಮಾನಗಳ ನಂತರವೂ ಸಮಾಜಕ್ಕೆ ಮಾರ್ಗದರ್ಶನ ನೀಡುತ್ತಿದೆ ಎಂದು ಹೇಳಿದರು. ಸಂತ ಕಬೀರರ ಬೋಧನೆಗಳನ್ನು ವ್ಯಾಪಕವಾಗಿ ಜನರಿಗೆ ತಲುಪಿಸುವುದರಿಂದ ಸಂವೇದನಾಶೀಲತೆ, ಪರಸ್ಪರ ತಿಳುವಳಿಕೆ ಮತ್ತು ಸಾಮಾಜಿಕ ಸಾಮರಸ್ಯ ವೃದ್ಧಿಯಾಗುತ್ತದೆ ಎಂದು ಅವರು ಅಭಿಪ್ರಾಯಪಟ್ಟರು.

ಸಾಮಾಜಿಕ ಸುಧಾರಣೆಗೆ ಸಂತ ಕಬೀರರು ನೀಡಿದ ಗಮನಾರ್ಹ ಕೊಡುಗೆಯನ್ನು ಸ್ಮರಿಸಿದ ಶ್ರೀ ಬಿರ್ಲಾ ಅವರು, ಸಮಾಜವು ಜಾತಿ ಭೇದಗಳು, ಧಾರ್ಮಿಕ ಭಿನ್ನತೆಗಳು ಮತ್ತು ಸಾಮಾಜಿಕ ಪೂರ್ವಾಗ್ರಹಗಳಿಂದ ವಿಭಜನೆಯಾಗಿದ್ದ ಕಾಲದಲ್ಲಿ ಸಂತ ಕಬೀರರು ಅಸ್ತಿತ್ವದಲ್ಲಿದ್ದ ಸಂಪ್ರದಾಯವಾದಿ ನಂಬಿಕೆಗಳನ್ನು ಪ್ರಶ್ನಿಸಿ, ವಿಭಜನೆಯ ಅಡೆತಡೆಗಳನ್ನು ಮುರಿಯಲು ಶ್ರಮಿಸಿದರು ಎಂದು ಹೇಳಿದರು. ಸಾಮಾನ್ಯ ಜನರ ಭಾಷೆಯಲ್ಲಿ ರಚಿಸಿದ ಸರಳವಾದರೂ ಅರ್ಥಗರ್ಭಿತವಾದ ತಮ್ಮ ದ್ವಿಪದಿಗಳ ಮೂಲಕ ಅವರು ಸತ್ಯ, ನೈತಿಕತೆ, ಸಮಾನತೆ ಮತ್ತು ಸದಾಚಾರದ ಸಾರ್ವತ್ರಿಕ ಸಂದೇಶಗಳನ್ನು ಸಾರಿದರು. ಈ ಬೋಧನೆಗಳು ತಲೆಮಾರುಗಳಿಂದ ಸಕಾರಾತ್ಮಕ ಸಾಮಾಜಿಕ ಪರಿವರ್ತನೆಗೆ ಪ್ರೇರಣೆ ನೀಡುತ್ತಲೇ ಬಂದಿರುವುದು ಅವುಗಳ ಅಸಾಧಾರಣ ಶಕ್ತಿಯನ್ನು ತೋರಿಸುತ್ತದೆ ಎಂದು ಶ್ರೀ ಬಿರ್ಲಾ ಹೇಳಿದರು.

ಆತ್ಮಾವಲೋಕನದ ಮಹತ್ವವನ್ನು ಒತ್ತಿಹೇಳಿದ ಶ್ರೀ ಬಿರ್ಲಾ ಅವರು, ಸಂತ ಕಬೀರರ ಪ್ರಸಿದ್ಧ ದ್ವಿಪದಿಯನ್ನು ಉಲ್ಲೇಖಿಸಿದರು: “ಬುರಾ ಜೋ ದೇಖನ ಮೈ ಚಲಾ, ಬುರಾ ನ ಮಿಲಿಯಾ ಕೋಯಿ; ಜೋ ದಿಲ್ ಖೋಜಾ ಆಪನಾ, ಮುಝ್‌ಸೇ ಬುರಾ ನ ಕೋಯಿ” (ಕೆಟ್ಟದ್ದನ್ನು ಹುಡುಕಲು ನಾನು ಹೊರಟಾಗ ಯಾರೂ ಕೆಟ್ಟವರು ಸಿಗಲಿಲ್ಲ; ನನ್ನ ಹೃದಯವನ್ನು ನಾನು ಹುಡುಕಿಕೊಂಡಾಗ ನನಗಿಂತ ಕೆಟ್ಟವರು ಯಾರೂ ಇರಲಿಲ್ಲ). ಇತರರಲ್ಲಿ ತಪ್ಪುಗಳನ್ನು ಹುಡುಕುವ ಬದಲು, ಪ್ರತಿಯೊಬ್ಬರೂ ತಮ್ಮ ನಡವಳಿಕೆ ಮತ್ತು ನ್ಯೂನತೆಗಳ ಬಗ್ಗೆ ಆತ್ಮಾವಲೋಕನ ಮಾಡಿಕೊಳ್ಳಬೇಕು ಎಂದು ಅವರು ಹೇಳಿದರು. ಇಂತಹ ಆತ್ಮಾವಲೋಕನವು ವಿವೇಕ ಮತ್ತು ವಿನಯವನ್ನು ಬೆಳೆಸುವುದರ ಜೊತೆಗೆ ಸಹ ಮಾನವರ ಬಗ್ಗೆ ಹೆಚ್ಚು ಸಹಾನುಭೂತಿಯ ಮನೋಭಾವವನ್ನು ಬೆಳೆಸಲು ಪ್ರೇರೇಪಿಸುತ್ತದೆ ಎಂದು ಅವರು ಹೇಳಿದರು.

ವ್ಯಕ್ತಿಯ ನಿಜವಾದ ಪರಂಪರೆ ಅಥವಾ ಹೆಗ್ಗುರುತು ಅವರ ಹುದ್ದೆ ಅಥವಾ ಸ್ಥಾನಮಾನದಿಂದ ನಿರ್ಧಾರವಾಗುವುದಿಲ್ಲ; ಬದಲಿಗೆ ಅವರು ಮಾಡಿದ ಕಾರ್ಯಗಳು ಮತ್ತು ಸಮಾಜಕ್ಕೆ ನೀಡಿದ ಕೊಡುಗೆಗಳಿಂದ ನಿರ್ಧಾರವಾಗುತ್ತದೆ ಎಂದು ಶ್ರೀ ಬಿರ್ಲಾ ಹೇಳಿದರು. ಸಂತ ಕಬೀರರ ಸರಳ ಜೀವನ ಮತ್ತು ನಿರಂತರ ಪ್ರಭಾವವನ್ನು ಉಲ್ಲೇಖಿಸಿದ ಅವರು, ಅವರ ಉದಾತ್ತ ಕಾರ್ಯಗಳು, ನಿಸ್ವಾರ್ಥ ಸೇವೆ ಮತ್ತು ಇತರರ ಕಲ್ಯಾಣದ ಬಗೆಗಿನ ಬದ್ಧತೆ ಸಮಾಜದ ಮೇಲೆ ಶಾಶ್ವತವಾದ ಪ್ರಭಾವ ಬೀರುತ್ತವೆ ಎಂದು ಹೇಳಿದರು.

ಕಬೀರ ಸ್ಮೃತಿ ಭವನದ ಮಹತ್ವದ ಕುರಿತು ಮಾತನಾಡಿದ ಶ್ರೀ ಬಿರ್ಲಾ ಅವರು, ಈ ಸಂಸ್ಥೆಯು ಸಂತ ಕಬೀರರ ಸಂದೇಶವನ್ನು ಜನರಿಗೆ ತಲುಪಿಸುವುದರ ಜೊತೆಗೆ, ಮುಂದಿನ ಪೀಳಿಗೆಗಳು ಅವರ ಆದರ್ಶಗಳನ್ನು ಅಳವಡಿಸಿಕೊಳ್ಳಲು ಪ್ರೇರಣೆ ನೀಡಲಿದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು. ಸಂತ ಕಬೀರರ ಆಧ್ಯಾತ್ಮಿಕ ಜ್ಞಾನ, ಜನಕೇಂದ್ರಿತ ದೃಷ್ಟಿಕೋನ ಮತ್ತು ತಾರ್ಕಿಕ ಅಭಿವ್ಯಕ್ತಿಯನ್ನು ಸಮಾಜದ ಪ್ರತಿಯೊಂದು ವರ್ಗಕ್ಕೂ ತಲುಪಿಸುವ ಅಗತ್ಯವನ್ನು ಅವರು ಒತ್ತಿಹೇಳಿದರು.

ಈ ಸಂದರ್ಭದಲ್ಲಿ ಶ್ರೀ ಬಿರ್ಲಾ ಅವರು ಸಂತ ಅಸಂಗ್ ದೇವ್ ಜೀ ಮಹಾರಾಜ್‌ ಅವರಿಗೆ ಗೌರವ ಸಲ್ಲಿಸಿದರು. ಸಾಮಾಜಿಕ ಸೇವೆ ಮತ್ತು ಸಂತ ಕಬೀರರ ಬೋಧನೆಗಳನ್ನು ಭಾರತ ಹಾಗೂ ವಿದೇಶಗಳಲ್ಲಿ ಪ್ರಚಾರ ಮಾಡುವಲ್ಲಿ ಅವರು ಜೀವನಪರ್ಯಂತ ತೋರಿದ ಸಮರ್ಪಣಾ ಮನೋಭಾವವನ್ನು ಶ್ಲಾಘಿಸಿದರು. ತ್ಯಾಗ, ಶಿಸ್ತು ಮತ್ತು ನಿಸ್ವಾರ್ಥ ಸಮರ್ಪಣೆಯಿಂದ ಕೂಡಿದ ಸಂತರ ಜೀವನವು ಸಮಾಜಕ್ಕೆ ಆಧ್ಯಾತ್ಮಿಕ ಶಕ್ತಿ ಮತ್ತು ಸ್ಫೂರ್ತಿಯನ್ನು ಒದಗಿಸುತ್ತದೆ ಎಂದು ಅವರು ಹೇಳಿದರು. ಸಂತ ಕಬೀರರ ಸಂದೇಶವನ್ನು ಮುಂದಿನ ಪೀಳಿಗೆಗಳಿಗೆ ತಲುಪಿಸಲು ತಮ್ಮ ಜೀವನವನ್ನೇ ಮುಡಿಪಾಗಿಟ್ಟಿರುವ ಸಂತರು ಮತ್ತು ಅನುಯಾಯಿಗಳ ಕೊಡುಗೆಯನ್ನೂ ಅವರು ಪ್ರಶಂಸಿಸಿದರು.

ಸಂತ ಕಬೀರರ ಬೋಧನೆಗಳಿಂದ ಸ್ಫೂರ್ತಿ ಪಡೆಯುವಂತೆ, ಮಾತಿನಲ್ಲಿ ಸಂಯಮವನ್ನು ಪಾಲಿಸುವಂತೆ, ಆತ್ಮಾವಲೋಕನದ ಅಭ್ಯಾಸವನ್ನು ಬೆಳೆಸಿಕೊಳ್ಳುವಂತೆ ಹಾಗೂ ಇತರರ ಜೀವನದಲ್ಲಿ ಸಕಾರಾತ್ಮಕ ಬದಲಾವಣೆ ತರಲು ಶ್ರಮಿಸುವಂತೆ ಶ್ರೀ ಬಿರ್ಲಾ ಅವರು ಕರೆ ನೀಡಿದರು.

ಈ ಸಂದರ್ಭದಲ್ಲಿ ಉತ್ತರ ಪ್ರದೇಶದ ಉಪಮುಖ್ಯಮಂತ್ರಿ ಶ್ರೀ ಕೇಶವ ಪ್ರಸಾದ್ ಮೌರ್ಯ, ಸಂತ ಅಸಂಗ್ ದೇವ್ ಜೀ ಮಹಾರಾಜ್, ಹಲವು ಜನಪ್ರತಿನಿಧಿಗಳು, ಸಂತರು ಮತ್ತು ಸಂತ ಕಬೀರರ ಅಪಾರ ಸಂಖ್ಯೆಯ ಅನುಯಾಯಿಗಳು ಉಪಸ್ಥಿತರಿದ್ದರು.

*****