ପୋଷ୍ଟ କରାଯିବା ଦିନାଙ୍କ:
28 OCT 2026 3:42PM by PIB Bhubaneswar
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ ୧୦,୦୦୦ କୋଟି ଟଙ୍କାର ବଜେଟ୍ ବ୍ୟୟବରାଦ ସହିତ କଣ୍ଟେନର ନିର୍ମାଣ ପ୍ରୋତ୍ସାହନ ଯୋଜନା (ସିଏମପିଏସ)କୁ ଅନୁମୋଦନ କରିଛନ୍ତି । ଏହି ଯୋଜନା ୨୦୩୯-୪୦ ଆର୍ଥିକ ବର୍ଷ ପର୍ଯ୍ୟନ୍ତ କାର୍ଯ୍ୟକାରୀ ହେବ । ଭାରତରେ ଏକ ବିଶ୍ୱସ୍ତରୀୟ ପ୍ରତିଯୋଗିତାମୂଳକ କଣ୍ଟେନର ନିର୍ମାଣ ଇକୋସିଷ୍ଟମ ପ୍ରତିଷ୍ଠା, ଆମଦାନୀ ନିର୍ଭରଶୀଳତା ହ୍ରାସ ଏବଂ ଯୋଗାଣ ଶୃଙ୍ଖଳା ସ୍ଥିରତାକୁ ସୁଦୃଢ଼ କରିବା ଏହି ଯୋଜନାର ଲକ୍ଷ୍ୟ । ସିଏମପିଏସ ଯୋଜନା ନୂତନ ନିର୍ମାଣ ସୁବିଧା ଏବଂ ବର୍ତ୍ତମାନର କଣ୍ଟେନର ନିର୍ମାଣ ୟୁନିଟ୍ଗୁଡ଼ିକର ସମ୍ପ୍ରସାରଣକୁ ସମର୍ଥନ କରିବା ପାଇଁ ଉଦ୍ଦିଷ୍ଟ ।
କେନ୍ଦ୍ରୀୟ ବଜେଟ୍ ୨୦୨୬-୨୭ ରେ କଣ୍ଟେନର ନିର୍ମାଣ ଯୋଜନା ଘୋଷଣା କରାଯାଇଥିଲା।
ଏହି ଯୋଜନାରେ ନିମ୍ନ ପ୍ରମୁଖ ଉପାଦାନକୁ ସାମିଲ କରାଯାଇଛି:
- ସୁଧ ରିହାତି ସୁବିଧା: ଏହି ଯୋଜନାରେ ଗ୍ରୀନଫିଲ୍ଡ ବା ନୂଆ କଣ୍ଟେନର ନିର୍ମାଣ କାରଖାନା ପ୍ରତିଷ୍ଠା ଏବଂ ବ୍ରାଉନଫିଲ୍ଡ ବା ବର୍ତ୍ତମାନର କଣ୍ଟେନର କାରଖାନାର କ୍ଷମତା ସମ୍ପ୍ରସାରଣ ଲାଗି ସୁଧ ରିହାତି ସୁବିଧା ମିଳିବ । କଣ୍ଟେନର ନିର୍ମାଣକାରୀମାନେ ଯୋଗ୍ୟ ମିଆତି ଋଣ ବା ପୁଞ୍ଜି ଋଣ ଉପରେ ବାର୍ଷିକ ୩% ସୁଧ ରିହାତି ପାଇପାରିବେ । ଏଥିପାଇଁ ୮୫୯ କୋଟି ଟଙ୍କା ବ୍ୟୟବରାଦ କରାଯାଇଛି ।
- ପରିଚାଳନାଗତ ବ୍ୟୟ ସହାୟତା (ଓଇଏ): ୮,୮୯୧ କୋଟି ଟଙ୍କାର ବ୍ୟୟ ଅଟକଳ ସହିତ ବିଶ୍ୱସ୍ତରୀୟ ଜାହାଜ ଚଳାଚଳ ମାନକ ଆଧାରରେ ନିର୍ମିତ କଣ୍ଟେନର ଏବଂ ଯୋଗ୍ୟ କଣ୍ଟେନର ନିର୍ମାତାଙ୍କ ଦ୍ୱାରା ସେଗୁଡ଼ିକର ବିକ୍ରି ନିମନ୍ତେ ଓଇଏ ସହାୟତା ଯୋଗାଇ ଦିଆଯିବ । ଏହା ଖର୍ଚ୍ଚ ଜନିତ ପାର୍ଥକ୍ୟକୁ କମାଇବା ଏବଂ ସ୍ୱଦେଶୀ ଭାବେ ନିର୍ମିତ କଣ୍ଟେନରଗୁଡ଼ିକର ପ୍ରତିଯୋଗିତାମୂଳକ କ୍ଷମତା ବୃଦ୍ଧି କରିବାରେ ସାହାଯ୍ୟ କରିବ।
- ‘ଡାଇନାମିକ ଲଙ୍ଗଟିଚ୍ୟୁଡିନାଲ ଇମ୍ପାକ୍ଟ ଟେଷ୍ଟିଂ’ ଭଳି ସୁବିଧା ନିମନ୍ତେ ସହାୟତା ଲାଗି ୧୫୦ କୋଟି ଟଙ୍କାର ଆର୍ଥିକ ବ୍ୟୟବରାଦ ସହିତ, ଟେଷ୍ଟିଂ ଏବଂ ପ୍ରମାଣୀକରଣ ସଂକ୍ରାନ୍ତ ସହଯୋଗ ଯୋଗାଇ ଦିଆଯିବ ।
ପ୍ରତ୍ୟାଶିତ ସାମଗ୍ରିକ ପ୍ରଭାବ:
- ବାର୍ଷିକ ଘରୋଇ କଣ୍ଟେନର ନିର୍ମାଣ କ୍ଷମତାକୁ ପ୍ରାୟ ଦଶ ଗୁଣ ବୃଦ୍ଧି କରି ୭.୫ ଲକ୍ଷ (ଟିଇୟୁ) ପର୍ଯ୍ୟନ୍ତ ପହଞ୍ଚାଇବା।
- ଏକ ଅନ୍ତର୍ଜାତୀୟ ସ୍ତରରେ ପ୍ରତିଯୋଗିତାମୂଳକ ନିର୍ମାଣ ଭିତ୍ତିଭୂମି ସୃଷ୍ଟି କରିବା, ଯାହା ଭାରତକୁ ଗୁଣାତ୍ମକ ଜାହାଜ ଚଳାଚଳ କଣ୍ଟେନର ପାଇଁ ଏକ ବିଶ୍ୱସ୍ତରୀୟ ରପ୍ତାନି କେନ୍ଦ୍ର ଭାବରେ ପ୍ରତିଷ୍ଠିତ କରିବାର ସମ୍ଭାବନା ରଖିଛି ।
- ଭାରତର ସାମୁଦ୍ରିକ ଏବଂ ଲଜିଷ୍ଟିକ୍ସ ଯୋଗାଣ ଶୃଙ୍ଖଳାର ସ୍ଥାୟିତ୍ୱ ତଥା ଦୃଢ଼ତାକୁ ବୃଦ୍ଧି କରିବା।
- ପ୍ରାୟ ୩,୦୦୦ ପ୍ରତ୍ୟକ୍ଷ ଏବଂ ୫୦,୦୦୦ରୁ ଅଧିକ ପରୋକ୍ଷ ନିଯୁକ୍ତି ସୃଷ୍ଟି କରିବା ସହିତ କର୍ନର କାଷ୍ଟିଂ, ବିଶେଷ ଧରଣର ଇସ୍ପାତ, କାଠ ଫ୍ରେମ୍ ଏବଂ ରଙ୍ଗ ଭଳି ଆନୁସଙ୍ଗିକ ଶିଳ୍ପଗୁଡ଼ିକୁ ସହାୟତା ପ୍ରଦାନ କରିବା।
*******
PS/Swadhin