ક્લીન સ્પોર્ટ માટે ભારત દ્રઢપણે પ્રતિબદ્ધ: યુનેસ્કોના આંતરરાષ્ટ્રીય એન્ટી-ડોપિંગ કન્વેન્શન હેઠળની COP10 બ્યુરોની બેઠકમાં ડૉ. મનસુખ માંડવિયા

નવી દિલ્હીમાં 'રમતગમતમાં ડોપિંગ વિરુદ્ધ યુનેસ્કો આંતરરાષ્ટ્રીય સંમેલન' હેઠળ, માનનીય કેન્દ્રીય યુવા બાબતો અને રમતગમત મંત્રી ડૉ. મનસુખ માંડવિયાએ COP10 બ્યુરોની ત્રીજી ઔપચારિક બેઠક અને વર્ષ 2026-27 માટે ફંડની મંજૂરી સમિતિની ચોથી ઔપચારિક બેઠકની અધ્યક્ષતા કરી હતી.

ડૉ. માંડવિયાએ બ્યુરોને રમતગમતમાં સ્વચ્છતા અને પ્રામાણિકતા માટે ભારતની પ્રતિબદ્ધતાની ખાતરી આપી હતી. તેમણે જણાવ્યું હતું કે, “ભારત દ્રઢપણે માને છે કે રમતગમતની શ્રેષ્ઠતા સાથે હંમેશા પ્રામાણિકતા હોવી જ જોઈએ. દરેક રમતવીર ન્યાયી રીતે સ્પર્ધા કરવાની તક મેળવવાને પાત્ર છે, જેમાં સફળતાનો નિર્ણય પ્રતિબંધિત પદાર્થો અથવા પદ્ધતિઓના આધારે નહીં, પરંતુ પ્રતિભા, તૈયારી અને સખત મહેનત દ્વારા થાય છે. આદરણીય પ્રધાનમંત્રી શ્રી નરેન્દ્ર મોદીજીએ રમતગમતમાં સ્વચ્છતા અને ડોપિંગના દૂષણ પ્રત્યે ઝીરો ટોલરન્સની નીતિ અપનાવવાની જરૂરિયાત પર સતત ભાર મૂક્યો છે.”

કેન્દ્રીય રમતગમત મંત્રીએ નેશનલ એન્ટી-ડોપિંગ એક્ટ, 2022 અને તેના 2025ના સુધારા દ્વારા ભારતની એન્ટી-ડોપિંગ સંસ્થાકીય વ્યવસ્થાને મજબૂત કરવાનો ઉલ્લેખ કર્યો હતો. "ભારતે નેશનલ એન્ટી-ડોપિંગ એક્ટ, 2022 અને તેના 2025ના સુધારા દ્વારા તેના કાનૂની અને સંસ્થાકીય માળખાને મજબૂત બનાવ્યું છે, આ બંને જુલાઈ 2026માં અમલમાં આવ્યા હતા," ડૉ. માંડવિયાએ જણાવ્યું હતું. "અમે આપણી સંસદના આગામી સત્રમાં વધુ એક સુધારો પણ લાવીશું, જેનો ઉદ્દેશ્ય કોચ અને સપ્લાય ચેઇન સાથે સંકળાયેલા લોકો સહિતના ઉલ્લંઘનો સામે વધુ અસરકારક રીતે નિપટવા માટે ફોજદારી જોગવાઈઓ દાખલ કરવાનો છે."

કેન્દ્રીય રમતગમત મંત્રીએ ડોપિંગ સામે લડવા અને પોતાના રમતવીરોને પ્રતિબંધિત પદાર્થો વિશે માહિતગાર કરવા માટે ભારતે અગાઉથી લીધેલા પગલાં પર વધુ પ્રકાશ પાડ્યો હતો.

"2025-26 દરમિયાન, નેશનલ એન્ટી-ડોપિંગ એજન્સી ઓફ ઇન્ડિયા (NADA)એ 7,000 થી વધુ ટેસ્ટિંગ અને 350થી વધુ શિક્ષણ તથા જાગૃતિ સત્રો યોજ્યા હતા, જેમાં જોખમ-આધારિત ટેસ્ટિંગ અને ગુપ્ત માહિતી-આધારિત તપાસ પર ધ્યાન કેન્દ્રિત કરીને 27,000 સહભાગીઓ સુધી પહોંચ બનાવી હતી," ડૉ. માંડવિયાએ જણાવ્યું હતું. "'નો યોર મેડિસિન' મોબાઇલ એપ્લિકેશને અડધા મિલિયન (5 લાખ) થી વધુ સર્ચ નોંધ્યા છે, જે દવાઓ વિશે જાણકારીપૂર્ણ નિર્ણયો લેવામાં મદદ કરે છે."

ડૉ. માંડવિયાએ ભારતમાં 'સ્પોર્ટ વેલ્યુઝ ઇન એવરી ક્લાસરૂમ ટૂલકિટ' શરૂ કરવા માટે યુવા બાબતો અને રમતગમત મંત્રાલય, શિક્ષણ મંત્રાલય અને યુનેસ્કો વચ્ચે ટૂંક સમયમાં થનારા સમજૂતી કરાર (MoU) પર હસ્તાક્ષર થવાનો ઉલ્લેખ કર્યો હતો. આ પહેલનો ઉદ્દેશ્ય વર્ગખંડો સુધી રમતગમતના મૂલ્યો, નૈતિકતા અને પ્રામાણિકતા પહોંચાડવાનો અને લાખો યુવા મન સુધી પહોંચવાનો છે.

આ બેઠકનો ઉદ્દેશ્ય ડોપિંગ સામેની લડાઈમાં વૈશ્વિક સહયોગને આગળ ધપાવવાનો અને કન્વેન્શનના અમલીકરણને મજબૂત કરવાનો હતો. ચર્ચાઓ વૈશ્વિક એન્ટી-ડોપિંગ ઇકોસિસ્ટમમાં સાર્વજનિક સત્તાધિશોની ભૂમિકાઓ અને જવાબદારીઓની રૂપરેખા આપતા એક ફ્રેમવર્ક દસ્તાવેજ પર તેમજ નેશનલ કમ્પ્લાયન્સ પ્લેટફોર્મ દ્વારા સ્ટેટ્સ પાર્ટીઝ સાથેના જોડાણ મારફતે એન્ટી-ડોપિંગ શિક્ષણ ક્ષમતા અને શૈક્ષણિક સંશોધનને મજબૂત કરવા પર કેન્દ્રિત હતી. એજન્ડામાં સંસાધન ગતિશીલતા, 2026-2031 માટે ફંડની ઓપરેશનલ વ્યૂહરચના, ટકાઉ વૈશ્વિક એન્ટી-ડોપિંગ પ્રણાલીને ટેકો આપવા માટે પાલન અને ક્ષમતા-નિર્માણનો પણ સમાવેશ થતો હતો.

ઉદ્ઘાટન સત્રમાં અઝરબૈજાન પ્રજાસત્તાકના યુવા અને રમતગમત મંત્રી અને COP10 બ્યુરોના ચેરપર્સન શ્રી ફરીદ ગાયિબોવ; રમતગમતમાં ડોપિંગ નાબૂદી માટેના ફંડની મંજૂરી સમિતિના ચેરપર્સન શ્રી લ્યુક મેકકેન; ભારત સરકારના સચિવ (રમતગમત) અને COP10 બ્યુરોના વાઇસ-ચેરપર્સન શ્રી હરિ રંજન રાવ; યુનેસ્કોના સામાજિક નીતિઓ અને સમાવેશના નિયામક શ્રી ગુસ્તાવો મેરિનો; તથા ઝામ્બિયા, સ્પેન રાજ્ય અને રશિયન ફેડરેશનના COP10 બ્યુરો અને ફંડ મંજૂરી સમિતિના સભ્યો ઉપસ્થિત રહ્યા હતા.

આ સંયુક્ત બેઠક વૈશ્વિક રમતગમત શાસનમાં ભારતની સક્રિય ભાગીદારીને પ્રતિબિંબિત કરે છે, જેમાં ભારત વાઇસ-ચેરપર્સન તરીકે ગ્રુપ IVનું પ્રતિનિધિત્વ કરે છે, તથા નૈતિક રમત પ્રથાઓને આગળ ધપાવવા અને રમતગમતમાં ડોપિંગ સામેના યુનેસ્કો આંતરરાષ્ટ્રીય કન્વેન્શન જેવા આંતરરાષ્ટ્રીય માળખાને ટેકો આપવા માટેની તેની પ્રતિબદ્ધતા દર્શાવે છે.

SM/BS/JD