ریلوے  کے وزیر   اور مغربی بنگال کے وزیر اعلیٰ نے جے پور (کھاتی پورہ)۔ ٹاٹا نگر۔ سانترا گاچھی ایکسپریس ٹرین کو ہری جھنڈی دکھا کر روانہ کیا

مرکزی وزیر ریلوے جناب اشونی ویشنو اور مغربی بنگال کے وزیر اعلیٰ جناب سوویندو ادھیکاری نے آج جے پور (کھاتی پورہ)–ٹاٹا نگر–سانترا گاچھی ایکسپریس ٹرین کو ہری جھنڈی دکھا کر روانہ کیا۔ جناب ویشنو نے ویڈیو کانفرنسنگ کے ذریعے پروگرام میں شرکت کی۔

پروگرام میں مغربی بنگال حکومت کے وزیر جناب دلیپ گھوش، میئر جناب سنیل کوٹھاری، رکن پارلیمنٹ جناب بدیوت بارن مہاتو اور رکن پارلیمنٹ محترمہ منجو شرما کے علاوہ دیگر عوامی نمائندے اور معزز شخصیات موجود تھیں۔

وزیر ریلوے جناب ویشنو نے کہا کہ جے پور کو جمشیدپور اور کولکاتا سے جوڑنے والی نئی ٹرین سروس سے راجستھان، اترپردیش، بہار، جھارکھنڈ اور مغربی بنگال کے درمیان ریل رابطہ بہتر ہوگا۔ وزیر ریلوے نے کہا کہ اس نئی سروس سے راجستھان میں مقیم تارک وطن مزدوروں، کاروباری برادری، طلبا اور مختلف علاقوں کے درمیان سفر کرنے والے دیگر مسافروں کو فائدہ پہنچے گا۔

جھارکھنڈ میں ریلوے کی ترقی کو اجاگر کرتے ہوئے جناب ویشنو نے کہا کہ ریاست کے لیے ریلوے بجٹ مختص رقم 450 کروڑ روپے سے بڑھا کر 7500 کروڑ روپے کر دی گئی ہے، جو پہلے کی مختص رقم سے تقریباً 16 گنا زیادہ ہے۔ انہوں نے کہا کہ ریاست میں تقریباً 75 ہزار کروڑ روپے کے منصوبوں پر کام جاری ہے۔ انہوں نے یہ بھی بتایا کہ امرت بھارت اسٹیشن اسکیم کے تحت جھارکھنڈ کے 57 اسٹیشنوں کی ازسرنو ترقی کی جا رہی ہے۔ گودا، گووندپور روڈ، لوہردگا، مدھوپور اور موری سمیت کئی اسٹیشنوں پر کام مکمل ہو چکا ہے۔

وزیر ریلوے نے کہا کہ امرت بھارت اسٹیشن اسکیم کے تحت ملک بھر میں اسٹیشنوں کی ازسرنو ترقی کا کام جاری ہے اور 1300 سے زیادہ اسٹیشنوں کو ترقی کے لیے منتخب کیا گیا ہے۔ مغربی بنگال کے سانترا گاچھی، جلپائی گوڑی روڈ، جئے چندی پہاڑ، ہلدیہ اور کاماکھیہ گڑی سمیت کئی اسٹیشنوں کو بھی ازسرنو ترقی دی جا رہی ہے۔

جناب ویشنو نے کہا کہ ریلوے کی ترقی متوسط طبقے اور معاشی طور پر کمزور خاندانوں کی ضروریات کو مدنظر رکھتے ہوئے کی جا رہی ہے، جن کے لیے ریلوے سستا نقل و حمل کا ایک اہم ذریعہ ہے۔ انہوں نے کہا کہ اسٹیشنوں کی ازسرنو ترقی اور بہتر ریل رابطے سے تمام آمدنی والے طبقوں کے مسافروں کو فائدہ ہوگا۔

جناب ویشنو نے کہا کہ ہاوڑہ، کھڑگپور، چاکولیا اور ٹاٹا نگر کو جوڑنے والی ریلوے لائن کو چار لائنوں میں تبدیل کرنے کا کام جاری ہے۔ وزیر ریلوے نے یہ بھی بتایا کہ کولکاتا میٹرو کے بیلی گھاٹا-آئی ٹی سینٹر سے منسلک 4.5 کلومیٹر طویل سیکشن کا کام مکمل ہو چکا ہے اور اس پر آزمائشی ٹرینیں چلانے کا عمل شروع ہو گیا ہے۔ انہوں نے کہا کہ اس سیکشن سے گرین لائن کے ساتھ رابطہ قائم ہوگا۔

 مغربی بنگال کے وزیر اعلیٰ جناب سوویندو ادھیکاری نے پروگرام کے دوران ریاست میں ریلوے کے بنیادی ڈھانچے سے متعلق جاری منصوبوں کے لیے وزیر ریلوے جناب اشونی ویشنو کا شکریہ ادا کیا۔

مغربی بنگال کے لیے ریلوے بجٹ میں اضافے کا حوالہ دیتے ہوئے جناب ادھیکاری نے کہا کہ 2009-14 کے دوران سالانہ اوسطاً 4380 کروڑ روپے مختص کیے جاتے تھے، جو 2026-27 کے لیے بڑھ کر 14205 کروڑ روپے ہو گئے ہیں۔ انہوں نے کہا کہ بڑھتی ہوئی سرمایہ کاری سے ریاست میں ریلوے کے بنیادی ڈھانچے کی ترقی اور رابطے کو بہتر بنانے میں مدد ملے گی۔

************

ش ح ۔   م  د ۔  م  ص

(U : 6725 )