কেন্দ্ৰীয় বিত্ত মন্ত্ৰী নিৰ্মলা সীতাৰমণৰ অধ্যক্ষতাত নতুন দিল্লীত আজি বিত্তীয় স্থিৰতা আৰু উন্নয়ন পৰিষদৰ (FSDC) ৩০সংখ্যক বৈঠক সম্পন্ন

কেন্দ্ৰীয় বিত্ত আৰু কৰ্প’ৰেট পৰিক্ৰমা মন্ত্ৰী শ্ৰীমতী নিৰ্মলা সীতাৰমণে আজি নতুন দিল্লীত বিত্তীয় স্থিৰতা আৰু উন্নয়ন পৰিষদৰ (FSDC) সদস্যসকলৰ সৈতে পৰিষদৰ ৩০সংখ্যক বৈঠকত অধ্যক্ষতা কৰে। বৈঠকত বিত্তীয় স্থিৰতা আৰু উন্নয়ন পৰিষদে অন্যান্য বিষয়ৰ লগতে সামষ্টিক বিত্তীয় স্থিৰতা আৰু এইক্ষেত্ৰত ভাৰতৰ প্ৰস্তুতিৰ সৈতে জড়িত বিষয়সমূহ আলোচনা কৰে। বিত্তীয় খণ্ডত নিয়ামক ব্যৱস্থাৰ উন্নয়ন আৰু ডিজিটেল আধুনিকীকৰণৰ গুৰুত্ব বিবেচনা কৰি পৰিষদে বিত্তীয় প্ৰযুক্তি (ফিনটেক) খণ্ডত উদ্ভাৱনক উৎসাহিত কৰা আৰু বিত্তীয় সম্পত্তি তথা অন্যান্য বাস্তৱ সম্পত্তিৰ সংবেদনশীল তথ্যৰ সম্ভাৱনা অন্বেষণ কৰাৰ বাবে গ্ৰহণ কৰিবলগীয়া ব্যৱস্থাসমূহৰ বিষয়ে আলোচনা কৰে। পৰিষদে ভাৰতৰ বিত্তীয় খণ্ডৰ চাইবাৰ স্থিতিস্থাপকতা পৰ্যালোচনা কৰে আৰু বিত্তীয় খণ্ডৰ নিয়ামক সংস্থা তথা চাইবাৰ সুৰক্ষা সংস্থাসমূহক লৈ গঠিত আন্তঃমন্ত্ৰালয় গোটে (IMG), অৰ্থনৈতিক পৰিক্ৰমা বিভাগ (DEA), বিত্তীয় সেৱা বিভাগ (DFS) আৰু ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ৰ সৈতে সমন্বয় সাধন কৰি প্ৰস্তুত কৰা বিত্তীয় খণ্ডৰ চাইবাৰ সুৰক্ষা কৌশল (FSCSS)ৰ বিষয়ে অৱগত হয়। এই কৌশল ৰূপায়ণৰ ফলত ভাৰতৰ বিত্তীয় খণ্ডৰ সামগ্ৰিক স্থিতিস্থাপকতা শক্তিশালী হ’ব বুলি আশা কৰা হৈছে। আলোচনাত গুৰুত্বপূৰ্ণ তথ্য আন্তঃগাঁথনি সুৰক্ষিত কৰাৰ বাবে ভাৰতৰ প্ৰস্তুতি, সুৰক্ষা ব্যৱস্থাৰ স্থিতিস্থাপকতা আৰু আঞ্চলিক গ্ৰামীণ বেংকসমূহৰ (RRBs) চাইবাৰ সুৰক্ষাৰ প্ৰস্তুতি উন্নত কৰাৰ বিষয়সমূহো সামৰি লোৱা হয়। পৰিষদে পূৰ্বৰ সিদ্ধান্ত আৰু বাজেটত ঘোষণা কৰা পদক্ষেপসমূহ ৰূপায়ণৰ বাবে কৌশল প্ৰস্তুত কৰাৰ সৈতে জড়িত বিষয়বোৰৰো আলোচনা কৰে। ইয়াৰ ভিতৰত আছিল—

ঘৰুৱা বিনিয়োগৰ পৰিৱেশ শক্তিশালী কৰা আৰু বিনিয়োগৰ বাবে সম্পদৰ প্ৰবাহ উন্নত কৰা, যাৰ ভিতৰত গিফ্ট-আইএফএছচি (GIFT-IFSC)ও অন্তৰ্ভুক্ত। গ্ৰাহকক চিনাক্তকৰণৰ (KYC) প্ৰক্ৰিয়া সৰলীকৰণ আৰু ডিজিটেলকৰণ কৰাৰ লগতে প্ৰবাসী ভাৰতীয় (NRIs) আৰু বিদেশী পৰ্টফলিঅ’ বিনিয়োগকাৰীসকলৰ (FPIs) বাবে ডিজিটেল পঞ্জীয়নৰ ব্যৱস্থা কৰা। ভাৰতত ডিজিটেল ৰাজহুৱা আন্তঃগাঁথনি (DPIs) সম্প্ৰসাৰণৰ বাবে সংস্কাৰ সাধন কৰা। ইয়াৰ ভিতৰত বিশেষকৈ ক্ষুদ্ৰ, লঘু আৰু মজলীয়া উদ্যোগসমূহৰ (MSMEs) ওপৰত গুৰুত্ব আৰোপ কৰি একাউণ্ট এগ্ৰিগেটৰ আৰু ইউনিফাইড লেণ্ডিং ইণ্টাৰফেচ (ULI) ব্যৱস্থাৰ উন্নয়ন অন্তৰ্ভুক্ত। বিত্তীয় খণ্ডত মধ্যস্থতাকৰণৰ ব্যয় হ্ৰাস কৰা, নিয়ামক ব্যৱস্থাৰ সঁহাৰি প্ৰদানৰ ক্ষমতা উন্নত কৰা আৰু ভাৰতৰ ঋণ নিশ্চয়তা আঁচনিসমূহৰ যুক্তিসংগত পুনৰ্বিন্যাস কৰা। ঘৰুৱা আৰু বিশ্বৰ সামষ্টিক বিত্তীয় পৰিস্থিতিৰ পৰা উদ্ভৱ হোৱা নতুন প্ৰৱণতাসমূহৰ প্ৰতি পৰিষদে দৃষ্টি আকৰ্ষণ কৰে। চলি থকা ভূ-ৰাজনৈতিক অনিশ্চয়তা, কৃত্ৰিম বুদ্ধিমত্তাৰ দ্ৰুত উত্থান আৰু বিশ্বজুৰি বণ্ডৰ লাভৰ হাৰ তীব্ৰভাৱে বৃদ্ধি পোৱাৰ পৰিপ্ৰেক্ষিতত অধিক সতৰ্ক হৈ থকাৰ প্ৰয়োজনীয়তাৰ ওপৰত পৰিষদে গুৰুত্ব আৰোপ কৰে। বিত্তীয় স্থিৰতাৰ প্ৰতি সম্ভাৱ্য বিপদাশংকা হ্ৰাস কৰিবলৈ আগতীয়াকৈ সক্ৰিয় ব্যৱস্থা গ্ৰহণ কৰাৰ লগতে বিত্তীয় ব্যৱস্থাৰ স্থিতিস্থাপকতা নিশ্চিত কৰিবলৈ পৰ্যাপ্ত সুৰক্ষামূলক ব্যৱস্থা গ্ৰহণ কৰাটো প্ৰয়োজনীয় বুলি পৰিষদে স্বীকাৰ কৰে। বিত্তীয় খণ্ডৰ বহল পৰিসৰৰ উন্নয়নৰ বাবে বিভিন্ন নিয়ামক সংস্থাৰ মাজত সমন্বয় অধিক শক্তিশালী কৰাৰ সিদ্ধান্তও সদস্যসকলে গ্ৰহণ কৰে। কেন্দ্ৰীয় বিত্ত মন্ত্ৰীগৰাকীয়ে সংশ্লিষ্ট নিয়ামক সংস্থা আৰু অংশীদাৰসকলক দাবী নকৰাকৈ পৰি ৰোৱা সম্পত্তি—যেনে বেংকৰ জমা ধন, লভ্যাংশ, শ্বেয়াৰ, ডাকঘৰৰ একাউণ্ট, বীমা আৰু পেঞ্চন পুঁজিৰ ধন—প্ৰকৃত গৰাকীসকলক ঘূৰাই দিয়াৰ প্ৰক্ৰিয়া ত্বৰান্বিত কৰিবলৈও আহ্বান জনায়। পৰিষদে জিলা পৰ্যায়ত ‘আপোনাৰ ধন, আপোনাৰ অধিকাৰ’ অভিযানৰ অধীনত বৰ্তমানলৈ দাবী নকৰাকৈ পৰি ৰোৱা বিত্তীয় সম্পত্তিসমূহ ঘূৰাই দিয়াৰ ক্ষেত্ৰত অংশীদাৰসকলে লাভ কৰা সফলতাৰ বিষয়ে অৱগত হয়। লগতে মন্ত্ৰালয় আৰু নিয়ামক সংস্থাসমূহক প্ৰকৃত গৰাকীসকলক সময়মতে ধন ঘূৰাই দিয়াৰ বাবে অতিৰিক্ত প্ৰচেষ্টা অব্যাহত ৰাখিবলৈ নিৰ্দেশনা প্ৰদান কৰে। বৰ্ধিত ভূ-ৰাজনৈতিক প্ৰত্যাহ্বান আৰু বিশ্বজনীন অনিশ্চয়তাৰ পৰিপ্ৰেক্ষিতত শ্ৰীমতী সীতাৰমণে পূৰ্বনিৰ্ধাৰিত সময়সূচী অনুসৰি বিত্তীয় স্থিৰতা আৰু উন্নয়ন পৰিষদৰ বৈঠক অধিক সঘনাই অনুষ্ঠিত কৰিবলৈ পৰিষদক আহ্বান জনায়। ভাৰতীয় ৰিজাৰ্ভ বেংকৰ গৱৰ্ণৰৰ অধ্যক্ষতাত অনুষ্ঠিত বিত্তীয় স্থিৰতা আৰু উন্নয়ন পৰিষদৰ উপ-সমিতিয়ে গ্ৰহণ কৰা কাৰ্যকলাপসমূহৰ বিষয়েও পৰিষদ অৱগত হয়। লগতে পৰিষদৰ পূৰ্বৰ বৈঠকসমূহত লোৱা কিন্তু এতিয়াও বাকী থকা সিদ্ধান্তসমূহৰ ক্ষেত্ৰত গ্ৰহণ কৰা ব্যৱস্থাসমূহৰো পৰ্যালোচনা কৰা হয়। বিত্তীয় স্থিৰতা আৰু উন্নয়ন পৰিষদৰ এই বৈঠকত ভাৰতীয় ৰিজাৰ্ভ বেংকৰ গৱৰ্ণৰ শ্ৰী সঞ্জয় মালহোত্ৰা; বিত্ত মন্ত্ৰালয়ৰ অৰ্থনৈতিক পৰিক্ৰমা বিভাগৰ সচিব শ্ৰীমতী অনুৰাধা ঠাকুৰ; বিত্ত মন্ত্ৰালয়ৰ বিত্তীয় সেৱা বিভাগৰ সচিব শ্ৰী সঞ্জয় লোহিয়া; বিত্ত মন্ত্ৰালয়ৰ ৰাজহ বিভাগৰ সচিব শ্ৰী অৰবিন্দ শ্ৰীবাস্তৱ; ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ৰ সচিব শ্ৰী এছ কৃষ্ণন; কৰ্প’ৰেট পৰিক্ৰমা মন্ত্ৰালয়ৰ সচিব ড° পল্লৱী জৈন গোভিল; বিত্ত মন্ত্ৰালয়ৰ মুখ্য অৰ্থনৈতিক উপদেষ্টা ড° ভি অনন্ত নাগেশ্বৰন; ভাৰতীয় ছিকিউৰিটিজ এণ্ড এক্সচেঞ্জ ব’ৰ্ডৰ (SEBI) অধ্যক্ষ শ্ৰী তুহিন কান্ত পাণ্ডে; ভাৰতীয় বীমা নিয়ামক আৰু উন্নয়ন প্ৰাধিকৰণৰ অধ্যক্ষ শ্ৰী অজয় শেঠ; আন্তঃৰাষ্ট্ৰীয় বিত্তীয় সেৱা কেন্দ্ৰ প্ৰাধিকৰণৰ অধ্যক্ষ শ্ৰী কে ৰাজাৰমন; পেঞ্চন পুঁজি নিয়ামক আৰু উন্নয়ন প্ৰাধিকৰণৰ অধ্যক্ষ শ্ৰী এছ ৰামন; দেউলীয়া আৰু দেউলীয়াপনা বিধি ব’ৰ্ডৰ ভাৰপ্ৰাপ্ত অধ্যক্ষ শ্ৰী জয়ন্তী প্ৰসাদ; ভাৰতীয় কম্পিউটাৰ জৰুৰীকালীন সঁহাৰি দলৰ (CERT-In) সঞ্চালক প্ৰধান ড° সঞ্জয় বাহল; আৰু বিত্ত মন্ত্ৰালয়ৰ অৰ্থনৈতিক পৰিক্ৰমা বিভাগৰ বিত্তীয় স্থিৰতা আৰু উন্নয়ন পৰিষদৰ সচিব শ্ৰীমতী অপৰ্ণা সিনহাই অংশগ্ৰহণ কৰে।

******

KT/KMN/PB