২০২৬ চনৰ ২১ অক্টোবৰত চালকবিহীন আৰু স্বায়ত্তশাসিত ব্যৱস্থাৰ পথপ্ৰদৰ্শক ৰোডমেপ সন্দৰ্ভত ভাৰতীয় বায়ুসেনাৰ ঔদ্যোগিক জনপ্ৰসাৰ কাৰ্যসূচী ৰূপায়ণ

ভাৰতীয় বায়ুসেনা আইএএফে চালকবিহীন আৰু স্বায়ত্তশাসিত ব্যৱস্থাৰ ক্ষেত্ৰত নিজৰ দীৰ্ঘম্যাদী সক্ষমতাৰ প্ৰয়োজনীয়তাসমূহ অংশীদাৰ, সূক্ষ্ম, ক্ষুদ্ৰ আৰু মজলীয়া উদ্যোগ এমএছএমই, ষ্টাৰ্টআপ তথা উদ্যোগ অংশীদাৰসকলৰ সৈতে ভাগ-বতৰা কৰাৰ উদ্দেশ্যে ২০২৬ চনৰ ২১ অক্টোবৰ তাৰিখে নতুন দিল্লীৰ বিজ্ঞান ভৱনত এক ঔদ্যোগিক জনপ্ৰসাৰ কাৰ্যসূচী ৰূপায়ণ কৰে। এই অনুষ্ঠানত বায়ু সেনা সদৰৰ অস্ত্ৰ ব্যৱস্থা বিভাগৰ সঞ্চালক প্ৰধান এয়াৰ মাৰ্শ্বাল প্ৰেমকুমাৰ কে, ভিএম, ভিএছএমে পৌৰোহিত্য কৰে। বিভিন্ন ড্ৰোন নিৰ্মাতা কোম্পানী আৰু সংশ্লিষ্ট উদ্যোগ অংশীদাৰসকলৰ পৰা প্ৰায় ১০০ গৰাকী প্ৰতিনিধিয়ে ইয়াত অংশগ্ৰহণ কৰে, যিয়ে ভাৰতীয় বায়ুসেনা আৰু দেশৰ চালকবিহীন ড্ৰোন বাতাবৰণৰ মাজত গঢ় লৈ উঠা ক্ৰমবৰ্ধমান সংযোগক প্ৰতিফলিত কৰে।

২০২৬ চনৰ ১৪ ছেপ্টেম্বৰত পোখৰানত অনুষ্ঠিত ‘আইএএফ ড্ৰোনাথন ২০২৬’-ৰ সময়ত উন্মোচিত ‘আইএএফ আনমেনড এণ্ড অট’নমাছ ছিষ্টেমছ ৰোডমেপৰ ভেটিত আয়োজিত এই অনুষ্ঠানে ভাৰতীয় বায়ুসেনাক নিজৰ কাৰ্যকৰী প্ৰয়োজনীয়তা আৰু প্ৰযুক্তিগত অগ্ৰাধিকাৰসমূহ স্পষ্টভাৱে দাঙি ধৰিবলৈ এক আনুষ্ঠানিক মঞ্চ প্ৰদান কৰে। আজিৰ এই কাৰ্যসূচীৰ জৰিয়তে ভাৰতীয় বায়ুসেনাই কেৱল নিজৰ ভৱিষ্যতৰ প্ৰয়োজনীয়তাসমূহেই ব্যাখ্যা কৰা নাছিল, বৰঞ্চ ঔদ্যোগিক অংশীদাৰসকলৰ মাজত ‘আইএএফ ৰোডমেপ পুস্তিকাও বিতৰণ কৰে।

ই চালকবিহীন আৰু স্বায়ত্তশাসিত ব্যৱস্থাৰ ক্ষেত্ৰখনত ভাৰতীয় বায়ুসেনাৰ কাৰ্যকৰী প্ৰয়োজনীয়তাসমূহ অধিক স্পষ্টভাৱে বুজি পোৱাত সহায় কৰিব। আকাশী শক্তিৰ দ্ৰুত পৰিৱৰ্তনক উপলব্ধি কৰি এই ৰোডমেপত স্তৰীভূত আৰু নেটৱৰ্কযুক্ত চালকবিহীন ব্যৱস্থাৰ এক শৃংখলৰ পৰিকল্পনা কৰা হৈছে। বৰ্তমানৰ আৰু ভৱিষ্যতৰ মানৱচালিত বিমান প্লেটফৰ্মসমূহৰ পৰিপূৰক হিচাপে কাৰ্যকৰীভাৱে প্ৰাসংগিক, নিৰ্ভৰযোগ্য আৰু স্থিতিস্থাপক থলুৱা সক্ষমতা গঢ়ি তোলাৰ ওপৰত বিশেষ গুৰুত্ব আৰোপ কৰা হৈছে।

অনুষ্ঠানত গুৰুত্বসহকাৰে উল্লেখ কৰা হয় যে চালকবিহীন ব্যৱস্থাত ‘আত্মনিৰ্ভৰশীলতা’ কেৱল এক উচ্চাকাংক্ষাই নহয়, বৰঞ্চ ই এক কাৰ্যকৰী অপৰিহাৰ্য প্ৰয়োজনীয়তা। ইয়াৰ উপৰি বাহ্যিক উৎসৰ ওপৰত নিৰ্ভৰশীলতা হ্ৰাস কৰিবলৈ আৰু দেশীয় প্ৰতিৰক্ষা বাতাবৰণ শক্তিশালী কৰিবলৈ থলুৱা প্ৰপালেচন, স্বায়ত্তশাসিত ছফটৱেৰ, স্থিতিস্থাপক নেভিগেচন আৰু মান্য আন্তঃপৃষ্ঠ হৈছে এনে কিছুমান গুৰুত্বপূৰ্ণ প্ৰযুক্তিগত ক্ষেত্ৰ, য’ত বিশেষ মনোযোগ দিয়াৰ প্ৰয়োজন।

উদ্যোগ, এমএছএমই, ষ্টাৰ্টআপ আৰু শৈক্ষিক মহলৰ সৈতে নিৰৱচ্ছিন্ন যোগাযোগৰ জৰিয়তে ভাৰতীয় বায়ুসেনাই উদ্ভাৱন ক্ষিপ্ৰতৰ কৰা, যৌথ বিকাশক উৎসাহিত কৰা আৰু নতুন প্ৰযুক্তিসমূহক বিশ্বাসযোগ্য কাৰ্যকৰী সক্ষমতালৈ ৰূপান্তৰিত কৰাৰ লক্ষ্য নিৰ্ধাৰণ কৰিছে; লগতে প্ৰতিৰক্ষা প্ৰযুক্তিত ভাৰতৰ আত্মনিৰ্ভৰশীলতাক সমৰ্থন আৰু অৰিহণা যোগাব পৰাকৈ এক শক্তিশালী দেশীয় বাতাবৰণ গঢ়ি তোলাৰ দিশতো গুৰুত্ব আৰোপ কৰিছে।

***

JS/VK/GK/MM