કેન્દ્રીય ગૃહ અને સહકારિતા મંત્રી શ્રી અમિત શાહે આજે પંજાબના લુધિયાણા ખાતે વિજયાદશમી ઉત્સવમાં ભાગ લીધો હતો, અને 'ચિટ્ટા' (ડ્રગ્સ/નશો) ના પ્રતીકાત્મક રાવણનું દહન કર્યું હતું.

પોતાના સંબોધનમાં કેન્દ્રીય ગૃહ મંત્રી શ્રી અમિત શાહે જણાવ્યું હતું કે આપણી પરંપરામાં રાવણના પૂતળાનું દહન એ બુરાઈ પર અછાઈના વિજયનું પ્રતીક છે. વિજયાદશમી એ દરેક વ્યક્તિ માટે પોતાનામાં રહેલા અહંકાર, ઘમંડ, લોભ અને અન્ય બુરાઈઓને નાબૂદ કરવાનો દિવસ છે. આ જ દિવસે, હજારો વર્ષો પહેલા, ભગવાન શ્રીરામે રાવણ પર વિજય મેળવ્યો હતો, ત્યારથી સમગ્ર વિશ્વ ભગવાન શ્રીરામના વિજયને અધર્મ પર ધર્મની જીત તરીકે ઉજવતું આવ્યું છે. તેમણે જણાવ્યું હતું કે તેઓ બાળપણથી સાંભળતા આવ્યા છે કે જો તમે રાવણ દહન જોવા માંગતા હો, તો લુધિયાણા જાઓ, જ્યાં રામલીલા સમિતિ 200 વર્ષથી રાવણ દહન કાર્યક્રમનું આયોજન કરી રહી છે.

શ્રી અમિત શાહે જણાવ્યું હતું કે આજે તેઓ પંજાબમાં ત્રણ સ્થળોએ એવા પરિવારોને મળ્યા જેમણે નશા સામેની લડાઈમાં પોતાના પુત્રો ગુમાવ્યા છે. તેમણે કહ્યું કે તે સગા-સંબંધીઓની આંખોમાં આંસુ, તેમના પ્રશ્નો અને તેમનું દર્દ કોઈપણ વ્યક્તિને અંદરથી હચમચાવી દેવા માટે પૂરતા છે. શ્રી શાહે જણાવ્યું હતું કે પંજાબ સરકારે એક હત્યાની તપાસ સીબીઆઈને સોંપી છે. તેમણે પંજાબ સરકારને બાકીની બે હત્યાઓની તપાસ પણ સીબીઆઈને સોંપવા વિનંતી કરી હતી. ગૃહ મંત્રીએ વિશ્વાસ વ્યક્ત કર્યો હતો કે આ કેસોમાં ન્યાય થશે. એકવાર તપાસ સીબીઆઈને સોંપવામાં આવ્યા પછી, આ હત્યાઓમાં ગમે તેટલી મોટી વ્યક્તિ સંકળાયેલી હશે, તો પણ મોદી સરકાર તેને શોધી કાઢશે અને જેલના સળિયા પાછળ ધકેલી દેશે.

કેન્દ્રીય ગૃહ મંત્રીએ જણાવ્યું હતું કે આ વિજયાદશમી પર જ, આપણે એ સંકલ્પ લઈએ છીએ કે 31 ડિસેમ્બર 2029 સુધીમાં આપણે સમગ્ર પંજાબને નશાના વેપારમાંથી મુક્ત કરીશું અને તેને ડ્રગ-મુક્ત પંજાબ બનાવીશું. તેમણે કહ્યું કે પોતાના પ્રાણ ગુમાવનારા આ ત્રણ બહાદુર વ્યક્તિઓને આનાથી મોટી કોઈ શ્રદ્ધાંજલિ હોઈ શકે નહીં. શ્રી શાહે જણાવ્યું હતું કે જો પંજાબના લોકો નાર્કોટિક્સ કંટ્રોલ બ્યુરોની ટોલ-ફ્રી હેલ્પલાઇન પર નશાના વેપાર વિશે માહિતી આપશે, તો મોદી સરકાર તેના પર કાર્યવાહી કરશે.

શ્રી અમિત શાહે જણાવ્યું હતું કે મોદી સરકાર જે વચન આપે છે તેને પૂરું કરવાનો રેકોર્ડ ધરાવે છે. કલમ 370 અને 35A દૂર થઈ ગઈ છે, આતંકવાદ નાબૂદ થવાના આરે છે, અને આપણે નક્સલવાદનો અંત આણ્યો છે. તેમણે કહ્યું કે હવે આપણે નશાના વેપારને પણ નાબૂદ કરશું.

SM/NP/JD