ہندوستانی بحریہ کے پہلے تربیتی اسکواڈرن (1 ٹی ایس) کے جہاز آئی این ایس تیر، آئی این ایس سوجاتا اور ہندوستانی کوسٹ گارڈ کے جہاز سارتھی 15 اکتوبر 2026 کو سیشلز کے پورٹ وکٹوریہ سے بندرگاہ پر قیام مکمل کرنے کے بعد روانہ ہوگئے۔ یہ پروگرام 12 اکتوبر کو شروع ہوا تھا اور موجودہ تربیتی تعیناتی کے تحت کیا گیا۔ اس دورے نے پیشہ ورانہ تربیت، صلاحیت سازی اور سیشلز کی قیادت و بحری برادری کے ساتھ تبادلوں کے ذریعے ہندوستان اور سیشلز کے دیرینہ تعلقات کو مزید مضبوط کیا۔

بندرگاہ پر قیام کے دوران پہلے تربیتی اسکواڈرن کے سینئر افسر نے دورہ کرنے والے بحری جہازوں کے کمانڈنگ افسران کے ساتھ سیشلز ڈیفنس فورس (ایس ڈی ایف) کے چیف آف ڈیفنس فورسز میجر جنرل مائیکل روزیٹ سے ملاقات کی۔ ملاقات کے دوران دونوں افواج کے درمیان دیرینہ شراکت داری اور دوطرفہ تعاون پر تبادلہ خیال کیا گیا۔

پروگرام کے دوران پیشہ ورانہ سرگرمیوں اور باہمی تربیتی دوروں کے علاوہ ایس ڈی ایف کے اہلکاروں کے لیے آگ بجھانے اور چھوٹے ہتھیاروں سے متعلق تربیت کا بھی اہتمام کیا گیا۔ فرسٹ ٹریننگ اسکواڈرن نے سیشلز کوسٹ گارڈ کے جہاز اینڈرو میک کے ساتھ پاسج ایکسرسائز (پاسیج ایکسرسائز) بھی کی، جس میں مشترکہ گشت، مواصلاتی مشقیں اور مربوط نقل و حرکت شامل تھی۔

رابطہ عامہ سے متعلق سرگرمیوں کے تحت ایک طبی کیمپ کا انعقاد کیا گیا، پوائنٹ لا ریو کے بزرگوں کے مرکز میں ضروری اشیا تقسیم کی گئیں، اسکول کے بچوں نے بحری جہازوں کا دورہ کیا اور ہندوستانی بحریہ کے بینڈ نے موسیقی کی پیشکش کی۔

اس تربیتی تعیناتی سے ہندوستان اور سیشلز کے درمیان دوستی کے مضبوط رشتوں کی عکاسی ہوتی ہے اور علاقائی شراکت داری و صلاحیت سازی کے لیے ہندوستانی بحریہ کے عزم کا اظہار ہوتا ہے۔ یہ ہندوستانی بحریہ کے ’مہاساگر‘ (تمام خطوں میں سلامتی اور ترقی کے لیے باہمی اور جامع پیش رفت) کے وژن کے عین مطابق ہے۔

 ************

ش ح ۔   م  د ۔  م  ص

(U :6264  )