حکومتِ ہند کی وزارتِ صحت و خاندانی بہبود کے محکمۂ صحت و خاندانی بہبود (ڈی او ایچ ایف ڈبلیو) کی جانب سے خصوصی مہم 6 میں سرگرمی سے حصہ لیا جا رہا ہے۔ یہ مہم 2 اکتوبر سے 31 اکتوبر 2026 تک جاری ہے، جس کا مقصد سرکاری دفاتر میں صفائی ستھرائی کو ادارہ جاتی طور پر فروغ دینا اور زیرِ التوا معاملات کو کم سے کم کرنا ہے۔

آج محکمۂ صحت و خاندانی بہبود کے جوائنٹ سکریٹری اور مہم کے نوڈل افسر، جناب ایلنگبام رابرٹ سنگھ نے محکمہ کی مہم کے دوران اب تک کی پیش رفت کا جائزہ لیا۔ اس جائزے میں زیرِ التوا معاملات کی روزانہ نگرانی اور محکمہ کے تحت آنے والے تمام مرکزی سرکاری اسپتالوں، اداروں، تنظیموں اور دفاتر کی فعال شرکت کی اہمیت پر زور دیا گیا، تاکہ مہم کے اہداف بروقت حاصل کیے جا سکیں۔

محکمہ اپنے منسلک اور ماتحت دفاتر، خود مختار اداروں اور مرکزی سرکاری اسپتالوں کے ساتھ مل کر صفائی ستھرائی کو فروغ دینے، انتظامی کارکردگی بہتر بنانے اور عوامی خدمات کی فراہمی کو مضبوط کرنے کے لیے مختلف سرگرمیاں انجام دے رہا ہے۔

مہم کے وسط تک ہونے والی پیش رفت کے تحت، ملک بھر میں شجرکاری مہم سمیت صفائی ستھرائی سے متعلق 988 مقامات کا احاطہ کیا گیا ہے، تاکہ صفائی کو فروغ دینے کے ساتھ دفتری احاطوں کی خوبصورتی میں بھی اضافہ کیا جا سکے۔ محکمہ نے عوامی شکایات کے 3,993 اور اپیلوں کے 454 معاملات بھی نمٹائے ہیں، جو شکایات کے بروقت ازالے اور عوامی خدمات کی فراہمی کو بہتر بنانے کے لیے اس کی مسلسل کوششوں کی عکاسی کرتے ہیں۔

ریکارڈ کے انتظام کے شعبے میں 40,123 کاغذی فائلوں کا جائزہ لیا گیا، جن میں سے 6,890 فائلوں کو غیر ضروری قرار دے کر تلف کر دیا گیا۔ اس کے علاوہ، 7,034 برقی فائلوں کا جائزہ لیا گیا، جس کے نتیجے میں 6,875 برقی فائلیں بند کر دی گئیں۔ ان اقدامات کا مقصد سرکاری ریکارڈ کو منظم بنانا، زیرِ التوا معاملات کو کم کرنا اور انتظامی کارکردگی کو بہتر بنانا ہے۔

مزید برآں، اس مہم کے تحت برقی کچرے کی 800  اشیا کو ٹھکانے لگایا گیا، جس سے کچرے کے ذمہ دارانہ انتظام اور ماحولیاتی پائیداری کو فروغ دینے میں مدد ملی۔

محکمۂ صحت و خاندانی بہبود، صفائی ستھرائی کی مسلسل مہمات، زیرِ التوا معاملات کو منظم انداز میں نمٹانے، ریکارڈ کے مؤثر انتظام اور اپنے تمام دفاتر و اداروں میں مہم کی سرگرمیوں کی مسلسل نگرانی کے ذریعے خصوصی مہم 6 کے مقاصد حاصل کرنے کے لیے پُرعزم ہے۔

محکمہ 31 اکتوبر 2026 کو مہم کے اختتام تک اپنی کوششیں جاری رکھے گا، تاکہ صفائی ستھرائی کو ادارہ جاتی طور پر مستحکم کیا جا سکے اور صاف ستھری، مؤثر اور شہریوں کی ضروریات پر مرکوز حکمرانی کو فروغ دیا جا سکے۔

************

ش ح۔ م م۔ ق ر

UN-No-6216

(ریلیز آئی ڈی: 2324404) وزیٹر کاؤنٹر : 14