প্ৰতিৰক্ষা ৰাজ্য মন্ত্ৰী (আৰ আৰ এম) শ্ৰী সঞ্জয় শেঠে ২০২৬ৰ ১৫ অক্টোবৰত অসমৰ গুৱাহাটীৰ ৰাষ্ট্ৰীয় শিক্ষাৰ্থী বাহিনী (এন চি চি)ৰ দ্বাৰা আয়োজিত বিশেষ যুটীয়া ৰাজ্যিক প্ৰতিনিধি আৰু অতিৰিক্ত সঞ্চালকপ্ৰধানৰ সন্মিলনত অংশগ্ৰহণ কৰে। এই সন্মিলনত উত্তৰ-পূৰ্বাঞ্চল (এন ই আৰ), পশ্চিমবংগ আৰু ছিকিমত এন চি চিৰ সম্প্ৰসাৰণ, শক্তিশালীকৰণ আৰু ফলপ্ৰসূ কাৰ্যকলাপ সন্দৰ্ভত আলোচনা কৰা হয়।

সন্মিলনত ভাষণ দি প্ৰতিৰক্ষা ৰাজ্য মন্ত্ৰীগৰাকীয়ে গণৰাজ্য দিৱস শিবিৰ (আৰ ডি চি)ত উত্তৰ-পূবৰ ৰাজ্যসমূহৰ কেডেটসকলৰ অংশগ্ৰহণ আৰু ছোৱালী কেডেটসকলৰ বৰ্ধিত নামভৰ্তিৰ প্ৰশংসা কৰে, যিয়ে মহিলা সবলীকৰণত এন চি চিৰ অৱদানক প্ৰতিফলিত কৰে। তেওঁ এন চি চিৰ কেডেটৰ সংখ্যা বৰ্তমানৰ প্ৰায় ১৭ লাখৰ পৰা ২০ লাখলৈ বৃদ্ধি কৰাৰ ক্ষেত্ৰত প্ৰধানমন্ত্ৰীৰ দৃষ্টিভংগীৰ দিশত কাম কৰাৰ প্ৰয়োজন সন্দৰ্ভত গুৰুত্ব আৰোপ কৰে। প্ৰতিৰক্ষা ৰাজ্য মন্ত্ৰীগৰাকীয়ে যুৱপ্ৰজন্মক ‘ৰাষ্ট্ৰ প্ৰথম’ৰ মনোভাব গঢ়ি তুলিবলৈ অনুপ্ৰাণিত কৰাৰ লগতে পথ প্ৰদৰ্শনৰ ওপৰত গুৰুত্ব আৰোপ কৰে। তেওঁ অংশগ্ৰহণকাৰী ৯ খন ৰাজ্যক এন চি চি সম্প্ৰসাৰণৰ বাবে ব্যৱহাৰিক, কাৰ্যকৰী পৰিকল্পনা প্ৰস্তুত আৰু ৰূপায়ণ কৰিবলৈ আহ্বান জনায়, বিশেষকৈ আন্তঃগাঁথনি শক্তিশালী কৰাৰ লগতে কেডেটসকলৰ বাবে প্ৰশিক্ষণৰ সুবিধা বৃদ্ধিৰ ওপৰত গুৰুত্ব আৰোপ কৰে আৰু ইয়াৰ প্ৰতি চৰকাৰৰ দায়বদ্ধতাক পুনৰ নিশ্চিত কৰে।

‘এন চি চি হৈছে এনে এক আন্দোলন যিয়ে ভাৰতৰ যুৱ শক্তিক সবল কৰে, আমাৰ যুৱপ্ৰজন্মক আত্মবিশ্বাসী, শৃংখলাবদ্ধ আৰু ৰাষ্ট্ৰৰ প্ৰতি সমৰ্পিত কৰে’ বুলি প্ৰধানমন্ত্ৰী শ্ৰী নৰেন্দ্ৰ মোদীৰ উদ্ধৃতি দি প্ৰতিৰক্ষা ৰাজ্য মন্ত্ৰীগৰাকীয়ে সংগঠনৰ প্ৰসাৰ আৰু কাৰ্য্যকলাপ শক্তিশালী কৰিবলৈ ফলপ্ৰসূ প্ৰশিক্ষণ, পৰ্যাপ্ত প্ৰাতিষ্ঠানিক সমৰ্থন আৰু অংশীদাৰসকলৰ মাজত উন্নত সমন্বয় নিশ্চিত কৰাৰ ওপৰত গুৰুত্ব আৰোপ কৰে।

সন্মিলনখনে এন চি চি আৰু ৰাজ্য চৰকাৰৰ মাজত সমন্বয় শক্তিশালী কৰাৰ বাবে এখন মঞ্চ প্ৰদান কৰে, য’ত এন চি চিৰ পৰিসৰ সম্প্ৰসাৰণ, কেডেট কল্যাণ, প্ৰশিক্ষণ আন্তঃগাঁথনি, প্ৰাতিষ্ঠানিক শক্তিশালীকৰণ আৰু প্ৰশাসনিক প্ৰত্যাহ্বানসমূহৰ সৈতে যুঁজ দিয়া আদি বিভিন্ন বিষয় সন্দৰ্ভত গুৰুত্ব আৰোপ কৰা হয়। ই সমাজসেৱা আৰু সামগ্ৰিক বিকাশ, চৰিত্ৰ গঠন, নেতৃত্ব, ৰাষ্ট্ৰীয় সংহতি আৰু যুৱক-যুৱতীসকলৰ মাজত সেৱাৰ মনোভাব বিকাশত এন চি চিৰ অৱদানতো গুৰুত্ব আৰোপ কৰে।

উত্তৰ-পূৰ্বাঞ্চলৰ এন চি চি সঞ্চালকালয়ে অৰুণাচল প্ৰদেশ, অসম, মণিপুৰ, মেঘালয়, মিজোৰাম, নাগালেণ্ড আৰু ত্ৰিপুৰা এই সাতোখন ৰাজ্যত ৯ টা গোটৰ মুখ্য কাৰ্যালয় আৰু ৫০ টা গোটৰ জৰিয়তে সেৱা প্ৰদান কৰে। প্ৰায় ১.২৫ লাখ কেডেটৰ শক্তিৰে অঞ্চলটোৰ ১,৬৪৫ খন শিক্ষানুষ্ঠানসমূহত এন চি চি প্ৰশিক্ষণ উপলব্ধ। একেদৰে পশ্চিমবংগ আৰু ছিকিম এন চি চি সঞ্চালকালয়ে ছটা গোটৰ মুখ্য কাৰ্যালয় আৰু ৫৬ টা গোটৰ জৰিয়তে সেৱা প্ৰদান কৰে, য’ত এন চি চিৰ কাৰ্যকলাপ ১,৩২৬ খন শিক্ষা প্ৰতিষ্ঠান আৰু প্ৰায় ১.২৫ লাখ কেডেটলৈ সম্প্ৰসাৰিত কৰা হৈছে।

এন চি চিৰ সঞ্চালকপ্ৰধান লেফটেনেন্ট জেনেৰেল বীৰেন্দ্ৰ বৎসৰ নেতৃত্বত অনুষ্ঠিত এই সন্মিলনত অতিৰিক্ত সচিব শ্ৰীমতী দীপ্তি মোহিল চাওলা, অংশগ্ৰহণকাৰী ৰাজ্য অৰুণাচল প্ৰদেশ, অসম, মণিপুৰ, মেঘালয়, মিজোৰাম, নাগালেণ্ড, ত্ৰিপুৰা, পশ্চিমবংগ আৰু ছিকিমৰ মন্ত্ৰী আৰু জ্যেষ্ঠ বিষয়াসকলৰ লগতে প্ৰতিৰক্ষা মন্ত্ৰালয় আৰু এন চি চিৰ জ্যেষ্ঠ বিষয়াসকল উপস্থিত থাকে।

***

SR/Ruchi/NB

(ৰিলিজ আই ডি : 2324343) অতিথি কক্ষ : 8