প্ৰধানমন্ত্ৰীৰ কাৰ্যালয়
২০২৬ চনৰ এছিয়ান ক্ৰীড়া প্ৰতিযোগিতাত অংশগ্ৰহণ কৰা ভাৰতীয় খেলুৱৈৰ দলৰ সৈতে প্ৰধানমন্ত্ৰী নৰেন্দ্ৰ মোদীৰ মত-বিনিময়
আমাৰ এছিয়ান ক্ৰীড়া প্ৰতিযোগিতাৰ বিজয়ীসকলে ত্ৰিৰংগ পতাকাক উচ্চ স্থানলৈ লৈ গৈ দেশৰ সন্মান আৰু গৌৰৱ বৃদ্ধি কৰিছে : প্ৰধানমন্ত্ৰী
প্ৰতিটো ক্ষেত্ৰতে তিৰংগাৰ গৌৰৱ, ক্ৰীড়াক্ষেত্ৰত ভাৰতৰ নতুন পৰিচয়, প্ৰতিটো খেলতে নতুন বিজয়ী আৰু আমাৰ নামত নতুন অভিলেখ; আমি এয়া কৰি দেখুৱাইছো : প্ৰধানমন্ত্ৰী
ভাৰত বিশ্বৰ অন্যতম শক্তিশালী ক্ৰীড়া ৰাষ্ট্ৰ হিচাপে পৰিগণিত হ’বলৈ সম্পূৰ্ণৰূপে সাজু হৈছে : প্ৰধানমন্ত্ৰী
পোষ্ট কৰা হৈছে:
15 OCT 2026 7:23PM by PIB Guwahati
২০২৬ চনৰ এছিয়ান ক্ৰীড়া প্ৰতিযোগিতাত অংশগ্ৰহণ কৰা ভাৰতীয় খেলুৱৈৰ দলটোৰ সৈতে আজি প্ৰধানমন্ত্ৰী শ্ৰী নৰেন্দ্ৰ মোদীয়ে মত-বিনিময় কৰে। একে স্থানতে ইমানসংখ্যক পদক বিজয়ী খেলুৱৈৰ সমাগমে সৃষ্টি কৰা আনন্দময় পৰিৱেশৰ কথা উল্লেখ কৰি তেওঁ কয় যে এই সমাৱেশ এক বিশেষ অভিজ্ঞতা।
শ্ৰী মোদীয়ে কয়, “আপোনালোক প্ৰতিগৰাকী যুৱ খেলুৱৈয়ে প্ৰমাণ কৰিছে যে যেতিয়া আবেগ আৰু নিষ্ঠাই বিজয়ৰ ৰূপ লয়, তেতিয়া পদকৰ লগতে মুখমণ্ডলতো আনন্দৰ উজ্জ্বলতা বিয়পি পৰে।”
দেশৰ ১৪০ কোটি নাগৰিকৰ বাবে অপৰিসীম গৌৰৱ কঢ়িয়াই অনা খেলুৱৈসকলক প্ৰশংসা কৰি প্ৰধানমন্ত্ৰীয়ে কয় যে ৰাষ্ট্ৰীয় পতাকাৰ সন্মান আৰু গৌৰৱ বৃদ্ধি কৰাটোৱেই হৈছে এই সফলতাৰ সৰ্বোচ্চ প্ৰাপ্তি। তেওঁ খেলুৱৈসকলৰ লগতে তেওঁলোকৰ প্ৰশিক্ষক, সহযোগী কৰ্মচাৰী আৰু পৰিয়ালবৰ্গক এই সামূহিক ৰাষ্ট্ৰীয় সফলতাৰ বাবে অভিনন্দন জনায়।
প্ৰধানমন্ত্ৰী মোদীয়ে কয়, “সেয়েহে আপোনালোকৰ সফলতা কেৱল আপোনালোকৰ নিজৰ সফলতা নহয়; ই দেশৰ কোটি কোটি নাগৰিকৰো সফলতা।”
প্ৰাক্তন ৰাষ্ট্ৰপতি ড০ এ পি জে আব্দুল কালামৰ জয়ন্তীৰ কথা স্মৰণ কৰি প্ৰধানমন্ত্ৰীয়ে প্ৰয়াত মহান ব্যক্তিগৰাকীৰ প্ৰতি গভীৰ শ্ৰদ্ধাঞ্জলি জ্ঞাপন কৰে। তেওঁ উল্লেখ কৰে যে ড০ কালামৰ অসাধাৰণ জীৱন আৰু দূৰদৰ্শী চিন্তাধাৰাই আজিও দেশবাসীক পথ দেখুৱাই আহিছে।
শ্ৰী মোদীয়ে কয়, “তেওঁৰ জীৱন আৰু দূৰদৃষ্টিয়ে আমাৰ সকলোকে অনুপ্ৰাণিত কৰে।”
এছিয়ান ক্ৰীড়া প্ৰতিযোগিতাত অৰ্জন কৰা ঐতিহাসিক সফলতাসমূহৰ কথা স্মৰণ কৰি প্ৰধানমন্ত্ৰীয়ে পুৰুষ আৰু মহিলা উভয় হকী দলৰ স্বৰ্ণপদক বিজয়ক বিশেষভাৱে প্ৰশংসা কৰে। মহিলা হকী দলে ৪৪ বছৰৰ অপেক্ষাৰ অন্ত পেলাই স্বৰ্ণপদক অৰ্জন কৰাটো এক উল্লেখযোগ্য সফলতা বুলি তেওঁ অভিহিত কৰে।
ইয়াৰ উপৰি ক্ৰিকেটৰ পুৰুষ আৰু মহিলা উভয় দলৰ ধাৰাবাহিক পদক বিজয় আৰু কাবাডীত দুটাকৈ স্বৰ্ণপদক লাভৰ কথাও তেওঁ উল্লেখ কৰে।
ধনুৰ্বিদ্যাত পাঁচটা স্বৰ্ণপদক, লক্ষ্যভেদী ক্ৰীড়া, বক্সিং আৰু মল্লযুঁজত খেলুৱৈসকলৰ অসাধাৰণ প্ৰদৰ্শন, এথলেটিকছত নতুন অভিলেখ স্থাপন, ২৮ বছৰৰ পাছত ভাৰোত্তোলনত পদক লাভ আৰু ১৯৮২ চনৰ পাছত প্ৰথমবাৰৰ বাবে মাৰাথনত সফলতা অৰ্জনৰ বাবেও তেওঁ ভাৰতীয় খেলুৱৈসকলক প্ৰশংসা কৰে।
প্ৰধানমন্ত্ৰীয়ে কয়, “এইবাৰৰ এছিয়ান ক্ৰীড়া প্ৰতিযোগিতা আমাৰ বাবে বহু দিশৰ পৰাই স্মৰণীয় হৈ থাকিব।”
ভাৰতৰ মুঠ ৮৫টা পদকৰ ভিতৰত ৩৮টা পদক তথা ১১টা স্বৰ্ণপদক অৰ্জন কৰা মহিলা খেলুৱৈসকলৰ অসাধাৰণ অৱদানৰ প্ৰশংসা কৰি প্ৰধানমন্ত্ৰীয়ে কয় যে এই সফলতা কেৱল সংখ্যাৰ হিচাপ নহয়; ই শক্তিশালী আৰু আত্মবিশ্বাসী নতুন ভাৰতৰ প্ৰতিচ্ছবি।
মিশ্ৰিত সমৰকলা, ছফ্ট টেনিছ আৰু পালতৰা নৌকা চালনাৰ কেইবাটাও শাখাত প্ৰথমবাৰৰ বাবে এছিয়ান ক্ৰীড়া প্ৰতিযোগিতাৰ পদক লাভ কৰি ভাৰতীয় খেলুৱৈসকলে ইতিহাস ৰচনা কৰাৰ কথাও তেওঁ উল্লেখ কৰে।
শ্ৰী মোদীয়ে কয়, “আজি ভাৰতে এনে ক্ৰীড়া শাখাতো পদক লাভ কৰিছে, য’ত এছিয়ান ক্ৰীড়া প্ৰতিযোগিতাৰ ইতিহাসত ইয়াৰ পূৰ্বে আমি কেতিয়াও পদক লাভ কৰা নাছিলোঁ।”
খেলুৱৈসকলক ক্ৰীড়াক্ষেত্ৰত আৰু অধিক উচ্চতা লাভ কৰিবলৈ আহ্বান জনাই প্ৰধানমন্ত্ৰীয়ে তেওঁলোকৰ সৈতে এক উদ্দীপনাময় সংকল্প গ্ৰহণ কৰে। খেলুৱৈসকলে একেলগে “আমি কৰি দেখুৱাম” বুলি সংকল্প গ্ৰহণ কৰে।
তেওঁ খেলুৱৈসকলক প্ৰতিটো ক্ষেত্ৰতে তিৰংগাৰ গৌৰৱ অক্ষুণ্ণ ৰখা, দেশৰ বাবে ক্ৰীড়াক্ষেত্ৰত নতুন পৰিচয় গঢ়ি তোলা আৰু প্ৰতিটো ক্ৰীড়া শাখাত নতুন বিজয়ী সৃষ্টি কৰাৰ আহ্বান জনায়।
প্ৰধানমন্ত্ৰীয়ে দৃঢ়তাৰে কয়, “আমাৰ নামত আৰু অধিক নতুন অভিলেখ সংযোজিত হ’ব, আমি এয়া কৰি দেখুৱাম।”
অনুষ্ঠানস্থলীৰ কথা উল্লেখ কৰি প্ৰধানমন্ত্ৰীয়ে খেলুৱৈসকলক স্মৰণ কৰাই দিয়ে যে ষ্টেডিয়ামখনৰ নাম কিংবদন্তি হকী খেলুৱৈ মেজৰ ধ্যান চান্দৰ নামেৰে ৰখা হৈছে। তেওঁ নিশা বহু সময়লৈকে হকীৰ অনুশীলন কৰা ধ্যান চান্দৰ একাগ্ৰতা আৰু অধ্যৱসায়ৰ কথা উল্লেখ কৰি কয় যে মহান সংকল্প পূৰণ কৰিবলৈ বছৰ বছৰ ধৰি ধৈৰ্য আৰু কঠোৰ পৰিশ্ৰমৰ প্ৰয়োজন।
শ্ৰী মোদীয়ে কয়, “তেওঁৰ এই কঠোৰ পৰিশ্ৰমে আমাক বাৰে বাৰে সোঁৱৰাই দিয়ে যে সংকল্প আৰু সপোন এদিনতে পূৰণ নহয়।”
যোৱা ১২ বছৰত ক্ৰীড়াৰ আন্তঃগাঁথনি আৰু ব্যৱস্থাটো শক্তিশালী কৰাৰ বাবে গ্ৰহণ কৰা নিৰন্তৰ প্ৰচেষ্টাৰ কথা উল্লেখ কৰি প্ৰধানমন্ত্ৰীয়ে কয় যে ইয়াৰ পূৰ্বৰ সময়ছোৱাত ভাৰতে মাত্ৰ কেইটামান পদক লাভ কৰিছিল আৰু বহু ক্ৰীড়া শাখাৰ বিষয়ে দেশৰ পৰ্যাপ্ত ধাৰণা নাছিল।
তেওঁ স্মৰণ কৰে যে পূৰ্বে অলিম্পিকৰ আধাতকৈও অধিক ক্ৰীড়া শাখাত ভাৰতৰ কোনো প্ৰতিনিধিত্ব নাছিল। প্ৰতিযোগিতাত অংশগ্ৰহণেই নকৰিলে দেশখনে কেনেকৈ পদক আৰু সন্মান লাভ কৰিব বুলি তেওঁ প্ৰশ্ন কৰে।
প্ৰধানমন্ত্ৰীয়ে কয়, “আমি যদি প্ৰতিযোগিতাত অৱতীৰ্ণই নহওঁ, তেন্তে পদক কেনেকৈ আনিম?”
দেশৰ ক্ৰীড়ানীতিৰ পৰিৱৰ্তনৰ কথা উল্লেখ কৰি প্ৰধানমন্ত্ৰীয়ে কয় যে ক্ৰীড়াক্ষেত্ৰত দীৰ্ঘদিন ধৰি চলি অহা উদাসীনতা আৰু আত্মবিশ্বাসৰ অভাৱ দূৰ কৰাৰ বাবে চৰকাৰে দৃঢ় সংকল্প গ্ৰহণ কৰিছে। ইয়াৰ ফলত আজি অধিকসংখ্যক ভাৰতীয় খেলুৱৈয়ে আন্তঃৰাষ্ট্ৰীয় প্ৰতিযোগিতাত অংশগ্ৰহণ কৰিবলৈ সক্ষম হৈছে।
শ্ৰী মোদীয়ে কয়, “আমি এই সংকল্প লৈছিলোঁ যে এই নিৰাশাবাদী মানসিকতা আমি আঁতৰ কৰিম।”
যোৱা ১০ৰ পৰা ১২ বছৰত গ্ৰহণ কৰা দূৰদৰ্শী পৰিকল্পনা আৰু আন্তৰিক প্ৰচেষ্টাৰ ফলত এই পৰিৱৰ্তন সম্ভৱ হৈছে বুলি প্ৰধানমন্ত্ৰীয়ে উল্লেখ কৰে। তেওঁ কয় যে অলিম্পিকৰ পদক লাভৰ লক্ষ্যৰে গ্ৰহণ কৰা লক্ষ্য অলিম্পিক পডিয়াম আঁচনি আৰু সম্প্ৰসাৰিত খেলো ইণ্ডিয়া কাৰ্যসূচীৰ জৰিয়তে এক স্বচ্ছ আৰু আধুনিক ক্ৰীড়া ব্যৱস্থা গঢ়ি তোলা হৈছে।
ক্ৰীড়া সন্থাসমূহক শক্তিশালী কৰা আৰু দেশৰ তৃণমূল পৰ্যায়ত ক্ৰীড়াৰ প্ৰসাৰৰ বাবে চৰকাৰে বৃহৎ পৰিমাণৰ ধন আবণ্টন দিয়াৰ কথাও তেওঁ উল্লেখ কৰে।
প্ৰধানমন্ত্ৰীয়ে কয়, “খেলো ইণ্ডিয়াৰ সম্প্ৰসাৰণ আৰু ক্ৰীড়া সন্থাসমূহক শক্তিশালী কৰাৰ বাবে ৩৬ হাজাৰ কোটি টকাতকৈও অধিক ধন আবণ্টন দিয়া হৈছে।”
তৃণমূল পৰ্যায়ৰ ক্ৰীড়া আন্তঃগাঁথনিৰ দ্ৰুত সম্প্ৰসাৰণৰ কথা উল্লেখ কৰি প্ৰধানমন্ত্ৰীয়ে দেশজুৰি এহেজাৰতকৈও অধিক খেলো ইণ্ডিয়া কেন্দ্ৰ স্থাপনৰ কথা কয়। ইয়াৰ লগতে বিভিন্ন আকাৰৰ নগৰ আৰু চহৰত হাজাৰ হাজাৰ নতুন ষ্টেডিয়াম, বহুমুখী ক্ৰীড়া প্ৰেক্ষাগৃহ, দৌৰৰ পথ, ফুটবল আৰু হকীৰ খেলপথাৰ তথা সাঁতোৰৰ পুখুৰী নিৰ্মাণৰ কাম চলি থকাৰ কথাও তেওঁ উল্লেখ কৰে।
খেলুৱৈসকলক প্ৰত্যক্ষভাৱে আৰ্থিক সাহায্য প্ৰদানৰ বিষয়টোও প্ৰধানমন্ত্ৰীয়ে বিশেষভাৱে উল্লেখ কৰে। লক্ষ্য অলিম্পিক পডিয়াম আঁচনিৰ অধীনত খেলুৱৈসকলক প্ৰতিমাহে ৫০ হাজাৰ টকাৰ ব্যক্তিগত ব্যয়ৰ ভাট্টা প্ৰদান কৰা হৈছে বুলি তেওঁ জানিবলৈ দিয়ে। বিদেশত প্ৰশিক্ষণ গ্ৰহণৰ প্ৰয়োজন হ’লেও চৰকাৰে আৰ্থিক সাহায্য আগবঢ়াই আহিছে বুলি তেওঁ উল্লেখ কৰে।
শ্ৰী মোদীয়ে কয়, “কোনো ক্ৰীড়া শাখাত প্ৰশিক্ষণৰ বাবে বিদেশলৈ যোৱাৰ প্ৰয়োজন হ’লে চৰকাৰে সেই ক্ষেত্ৰতো সুবিধা কৰি দিয়াৰ লগতে আৰ্থিক সাহায্য আগবঢ়াইছে।”
শীতকালীন ক্ৰীড়া প্ৰতিযোগিতা, সংসদ ক্ৰীড়া প্ৰতিযোগিতা আৰু নতুন ‘খেলো ভাৰত নীতি’ৰ জৰিয়তে খেলুৱৈসকলক অধিক প্ৰতিযোগিতামূলক অভিজ্ঞতা প্ৰদানৰ প্ৰচেষ্টাৰ কথাও তেওঁ উল্লেখ কৰে। দেশলৈ সন্মান কঢ়িয়াই অনা দিব্যাংগ খেলুৱৈসকলকো প্ৰধানমন্ত্ৰীয়ে প্ৰশংসা কৰে।
তেওঁ কয় যে খেলুৱৈসকলৰ সফলতাই প্ৰমাণ কৰিছে, যেতিয়া তেওঁলোকে উপলব্ধি কৰে যে সমগ্ৰ দেশে তেওঁলোকৰ যাত্ৰাত সহায় কৰি আছে, তেতিয়া তেওঁলোকৰ আত্মবিশ্বাস আৰু অধিক বৃদ্ধি পায়।
প্ৰধানমন্ত্ৰীয়ে দৃঢ়তাৰে কয়, “আজি প্ৰতিগৰাকী খেলুৱৈৰ এই বিশ্বাস আছে যে তেওঁলোকৰ সমগ্ৰ যাত্ৰাত দেশখন তেওঁলোকৰ সৈতে আছে।”
দলটোত অংশগ্ৰহণ কৰা ১৫ৰ পৰা ১৭ বছৰ বয়সৰ খেলুৱৈসকলৰ উল্লেখযোগ্য প্ৰদৰ্শনৰ কথা আঙুলিয়াই দি প্ৰধানমন্ত্ৰীয়ে কয় যে কম বয়সৰ পৰাই ক্ৰীড়াৰ প্ৰশিক্ষণ আৰম্ভ কৰিলে খেলুৱৈসকলৰ বাবে অধিক সুবিধা সৃষ্টি হয়।
পাঁচৰ পৰা ১৫ বছৰ বয়সৰ শিশুসকলক চিনাক্ত কৰি উপযুক্ত প্ৰশিক্ষণ প্ৰদানৰ বাবে খেলো ইণ্ডিয়া আৰু উদীয়মান খেলো ইণ্ডিয়া কাৰ্যসূচীৰ ওপৰত বিশেষ গুৰুত্ব আৰোপ কৰা হৈছে বুলি তেওঁ জানিবলৈ দিয়ে।
২০২৮ চনৰ লছ এঞ্জেলেছ অলিম্পিক, ২০৩০ চনত ভাৰতত অনুষ্ঠিত হ’বলগীয়া কমনৱেলথ ক্ৰীড়া প্ৰতিযোগিতা আৰু ২০৩৬ চনৰ অলিম্পিক আয়োজনৰ লক্ষ্যৰ কথা উল্লেখ কৰি প্ৰধানমন্ত্ৰীয়ে লালকিল্লাৰ পৰা কৰা নিজৰ ঘোষণাৰ কথাও স্মৰণ কৰে। সেই ঘোষণাত তেওঁ গাঁও পৰ্যায়ৰ পৰা প্ৰতিভা চিনাক্ত কৰাৰ বাবে দেশজোৰা অভিযানৰ কথা উল্লেখ কৰিছিল।
শ্ৰী মোদীয়ে কয়, “এই খেলুৱৈসকলেই ভৱিষ্যতে ভাৰতৰ বাবে পদক কঢ়িয়াই আনিব।”
দেশৰ বৃহৎ সংকল্পসমূহ পূৰণ কৰাৰ ক্ষেত্ৰত নিজৰ দৃঢ় বিশ্বাস প্ৰকাশ কৰি প্ৰধানমন্ত্ৰীয়ে খেলুৱৈসকলৰ সৈতে পুনৰ “আমি কৰি দেখুৱাম” বুলি সংকল্প গ্ৰহণ কৰে। বিশ্বৰ বৃহৎ ক্ৰীড়া প্ৰতিযোগিতাসমূহ আয়োজন কৰা, বিশ্বৰ আগশাৰীৰ ক্ৰীড়া ৰাষ্ট্ৰসমূহৰ ভিতৰত স্থান লাভ কৰা, বিশ্বমানৰ আন্তঃগাঁথনি গঢ়ি তোলা আৰু বিশ্বৰ ক্ৰীড়া কেন্দ্ৰ হিচাপে পৰিগণিত হোৱাৰ লক্ষ্যত উপনীত হ’বলৈ তেওঁ সকলোকে আহ্বান জনায়।
প্ৰধানমন্ত্ৰীয়ে দৃঢ়তাৰে কয়, “ভাৰতৰ প্ৰতিটো প্ৰান্তৰ পৰা নতুন বিজয়ী ওলাই আহিব, আমি এয়া কৰি দেখুৱাম।”
এছিয়ান ক্ৰীড়া প্ৰতিযোগিতাৰ সফলতাৰ সৈতে ভাৰতৰ যুৱপ্ৰজন্মৰ বৃহত্তৰ আকাংক্ষাৰ সম্পৰ্ক ব্যাখ্যা কৰি প্ৰধানমন্ত্ৰীয়ে কয় যে যুৱ উদ্ভাৱকসকলে ভাৰতক বিশ্বৰ তৃতীয় বৃহত্তম নতুন উদ্যোগ ব্যৱস্থাৰ দেশ হিচাপে প্ৰতিষ্ঠা কৰাত সহায় কৰিছে। মহাকাশ, উপগ্ৰহ প্ৰযুক্তি, প্ৰতিৰক্ষা আৰু কৃত্ৰিম বুদ্ধিমত্তাৰ ক্ষেত্ৰতো ভাৰতীয় যুৱক-যুৱতীসকলে নতুন নতুন সফলতা অৰ্জন কৰিছে।
ক্ৰীড়াৰ দৰেই উদ্যোগ আৰু উদ্ভাৱনৰ ক্ষেত্ৰতো সৰু চহৰ আৰু গাঁওসমূহৰ যুৱপ্ৰজন্মই গুৰুত্বপূৰ্ণ ভূমিকা পালন কৰিছে বুলি তেওঁ উল্লেখ কৰে। যোৱা দশকত গ্ৰহণ কৰা ব্যৱস্থাগত সংস্কাৰসমূহে যুৱপ্ৰজন্মক নিজৰ সপোন বাস্তৱায়িত কৰাৰ বাবে দেশৰ সম্পূৰ্ণ সহযোগিতা লাভ কৰাৰ বিশ্বাস প্ৰদান কৰিছে বুলি প্ৰধানমন্ত্ৰীয়ে কয়।
শ্ৰী মোদীয়ে কয়, “তেওঁলোকৰ এই বিশ্বাস আছে যে নিজৰ সপোন আগুৱাই নিবলৈ দেশৰ সম্পূৰ্ণ সামৰ্থ্য তেওঁলোকৰ সৈতে আছে।”
ক্ৰীড়াৰ দ্ৰুত বিকাশে দেশৰ অৰ্থনীতি আৰু নিয়োগৰ ক্ষেত্ৰতো নতুন সুযোগ সৃষ্টি কৰিছে বুলি প্ৰধানমন্ত্ৰীয়ে উল্লেখ কৰে। তেওঁ কয় যে চৰকাৰৰ বিভিন্ন পদক্ষেপৰ সুবিধা কেৱল খেলপথাৰত অংশগ্ৰহণ কৰা খেলুৱৈসকলেই লাভ কৰা নাই। ক্ৰীড়া প্ৰশিক্ষণ, শৰীৰৰ যত্ন আৰু পুনৰ্বাসন চিকিৎসা, ক্ৰীড়া পৰিচালনা আৰু ক্ৰীড়া সম্প্ৰচাৰৰ দৰে বিভিন্ন বৃত্তিগত ক্ষেত্ৰৰো দ্ৰুত বিকাশ ঘটিছে।
প্ৰধানমন্ত্ৰীয়ে কয়, “ইয়াৰ ফলত যুৱপ্ৰজন্মৰ বাবে নিয়োগ আৰু উদ্যোগৰ নতুন নতুন পথ মুকলি হৈছে।”
আন্তঃৰাষ্ট্ৰীয় প্ৰতিযোগিতাৰ অভিজ্ঞতাৰে সমৃদ্ধ পদক বিজয়ী খেলুৱৈসকলক পৰৱৰ্তী প্ৰজন্মৰ খেলুৱৈসকলক পথ প্ৰদৰ্শন কৰাৰ দায়িত্ব গ্ৰহণ কৰিবলৈ প্ৰধানমন্ত্ৰীয়ে আহ্বান জনায়। তেওঁ খেলুৱৈসকলক বিদ্যালয়সমূহলৈ যোৱা, নিজৰ পুৰণি অনুশীলনস্থলীলৈ উভতি যোৱা আৰু নিজৰ গাঁও-চহৰৰ শিশুসকলৰ সৈতে মত-বিনিময় কৰাৰ পৰামৰ্শ দিয়ে।
তেওঁ কয় যে নিজৰ কঠোৰ পৰিশ্ৰমেৰে অৰ্জন কৰা অভিজ্ঞতা নতুন প্ৰজন্মৰ সৈতে ভাগ-বতৰা কৰিলে ক্ৰীড়াৰ জগতখনত আগবাঢ়িবলৈ সপোন দেখা শিশুসকল যথেষ্ট অনুপ্ৰাণিত হ’ব।
প্ৰধানমন্ত্ৰীয়ে কয়, “আপোনালোকৰ এটা সৰু কথাই হয়তো কোনো শিশুক ক্ৰীড়াক্ষেত্ৰত আগবাঢ়ি যোৱাৰ সাহস দিব পাৰে।”
খেলপথাৰৰ বাহিৰতো ক্ৰীড়াৰ গভীৰ মূল্য আছে বুলি উল্লেখ কৰি প্ৰধানমন্ত্ৰীয়ে কয় যে ক্ৰীড়াই জীৱনজুৰি অনুশাসন, পৰিস্থিতিৰ সৈতে খাপ খুৱাই লোৱাৰ ক্ষমতা, দীৰ্ঘম্যাদী লক্ষ্যৰ প্ৰতি নিষ্ঠা আৰু পৰাজয়ৰ পাছতো পুনৰ থিয় দিয়াৰ মানসিক দৃঢ়তা গঢ়ি তোলে।
তেওঁৰ মতে, এই গুণসমূহে দৈনন্দিন জীৱনৰ বিভিন্ন প্ৰত্যাহ্বানৰ সন্মুখীন হোৱাত ব্যক্তিক সহায় কৰে।
প্ৰধানমন্ত্ৰীয়ে কয়, “ক্ৰীড়াৰ জৰিয়তে গঢ় লৈ উঠা এই মনোভাৱে সমগ্ৰ জীৱনতে আমাক সহায় কৰে।”
ভাষণৰ সামৰণিত প্ৰধানমন্ত্ৰীয়ে নিজৰ পৰিচিত বাণী “যিয়ে খেলে, তেওঁ উজলি উঠে” বুলি উল্লেখ কৰি খেলুৱৈসকলৰ উৎসাহক নতুন ভাৰতৰ সৰ্ববৃহৎ শক্তি বুলি অভিহিত কৰে।
তেওঁ খেলুৱৈসকলৰ সৈতে পুনৰ “আমি কৰি দেখুৱাম” বুলি সংকল্প গ্ৰহণ কৰি ২০৪৭ চনৰ ভিতৰত বিকশিত ভাৰত গঢ়ি তোলা, বিশ্বৰ শীৰ্ষ তিনিখন অৰ্থনীতিৰ ভিতৰত স্থান লাভ কৰা, আত্মনিৰ্ভৰ ভাৰত নিৰ্মাণ, বিশ্বৰ উৎপাদন কেন্দ্ৰ হিচাপে পৰিগণিত হোৱা, প্ৰযুক্তিৰ ক্ষেত্ৰত নেতৃত্ব গ্ৰহণ, মহাকাশ অভিযানত নতুন উচ্চতা লাভ আৰু অলিম্পিক আয়োজনৰ লক্ষ্যসমূহৰ কথা উল্লেখ কৰে।
প্ৰধানমন্ত্ৰীয়ে খেলুৱৈসকলৰ ভৱিষ্যতৰ সকলো প্ৰতিযোগিতা আৰু প্ৰচেষ্টাৰ বাবে শুভেচ্ছা জ্ঞাপন কৰে।
শ্ৰী মোদীয়ে কয়, “এই আত্মবিশ্বাসক সাৰথি কৰিয়েই আমি ভাৰতক নতুন উচ্চতালৈ লৈ যাব লাগিব।”
****
MJPS/SS/PRK/DM
(ৰিলিজ আই ডি : 2324196)
অতিথি কক্ষ : 9