দিভেলপমেন্ত ওফ নোর্থ ইস্তর্ন রিজন অমসুং কম্যুনিকেসন্সকী য়ুনিয়ন মিনিস্তর, জ্যৌতিরাদিত্য এম. সিন্দিয়ানা ঙসি আইজোলদা লৈবা মিজোরাম য়ুনিভর্সিতীদা নোর্থ ইস্ত বেঙ্কর্স কনক্লেব ৩.০ হৌদোকখ্রে। কনক্লেব অদুনা নোর্থ ইস্ত শিনবা থুংনা বেঙ্কিং ফংবা হেনগৎহন্নবা, ফাইনান্সিয়েল ইনক্লুসন মপাঙ্গল কনখৎহনবা অমসুং শেন্মিৎলোনগী চাউখৎ-থৌরাং থুনা চাউখৎহনবদা মীৎয়েং থমখি।

থৌরম অদুদা মিজোরামগী চীফ মিনিস্তর, লালদুহোমা, স্তেত মিনিস্তর, প্রোফেসর লালনিলোমা, এম.দি.ও.এন.ই.আর.গী (MDoNER) সেক্রেতরী, শ্রীনিবাস কতিকিথালা, চীফ সেক্রেতরী, খিল্লী রাম মীনা অমসুং এন.ই.সি.গী (NEC) সেক্রেতরী, সতিন্দর কুমার ভাল্লানা শরুক য়াখি। আর.বি.আই. (RBI), এস.বি.আই. (SBI), পঞ্জাব নেস্নেল বেঙ্ক, সেন্ত্রেল বেঙ্ক ওফ ইন্দিয়া, য়ুকো (UCO) বেঙ্ক, বেঙ্ক ওফ বরোদা, ইন্দিয়ন ওভরসীজ বেঙ্ক, ইন্দিয়ন বেঙ্ক, ইন্দিয়া পোস্ত পেমেন্তস বেঙ্ক, কানারা বেঙ্ক, পঞ্জাব এন্দ সিন্দ বেঙ্ক অমসুং আই.দি.বি.আই. (IDBI) বেঙ্ককী মীহুৎশিংনসু শরুক য়াখি। নাবার্দ (NABARD), সিদবি (SIDBI), দি.এফ.এস. (DFS), নেদফি (NEDFi), নেরামেক (NERAMAC) অমসুং এন.ই.সি.বি.দি.সি. (NECBDC) য়াওনা চাউখৎ-থৌরাংগী লুপশিংগী মীহুৎশিংসু থৌরম অদুদা শরুক য়াখি।

নোর্থ ইস্ত বেঙ্কর্স কনক্লেবতা ৱা ঙাংলদুনা, শ্রী সিন্দিয়ানা বেঙ্কশিংদা মরুওইবা ৱাফম অহুমদা মীৎয়েং থম্নবা তকশিনখি: ফিজিকেল বেঙ্কিং ইনফ্রাস্ত্রকচর পাকথোক-চাউথোকহনবা, স্তেত-ৱাইজ ক্রেদিত-দিপোজিৎ (সি.দি.) রেসিও পান্দমশিংগী খুত্থাংদা লোন ফংহনবা হেনগৎহনবা, অমসুং এম.এস.এম.ই.শিং (MSMEs) অমসুং ইনফ্রাস্ত্রকচর চাউখৎহনবদা শৌগৎপা।

নোর্থ ইস্তপু ভারত অমসুং মালেমদা খ্বাইদগী থাজবা য়াবা বেঙ্কিং কৈথেলশিংগী মনুংদা অমা ওইনা ফোংদোক্লদুনা, য়ুনিয়ন মিনিস্তর সিন্দিয়ানা লমদম অসিগী চহি খুদিংগী শেন্মিৎলোনগী চাউখৎ-থৌরাং চাদা ৯-১১ ওইরিবা অদুদা মীৎয়েং থমখি। নোর্থ ইস্তকা মহাক্কী লনাইগী ওইবা মরী লৈনবা অদু ফোংদোক্লদুনা, মহাক্না বেঙ্করশিংদা মসিগী হেনগৎলক্লিবা খুদোংচাবশিং অদু খঙদোক্নবা অমসুং লমদম অসিদা পুথোকপা শেন্মিৎলোনগী কান্নবা অদু লমদম অসিগী মনুংদা লেংদনা লৈহন্নবা তকশিনখি।

শেন্মিৎলোন চাউখৎহন্নবগীদমক ক্রেদিত ফ্লো হেনগৎহনবা

ফাইনান্সিয়েল ইনক্লুসনবু ইকোনোমিক ইনক্লুসনদা ওন্থোকপগী মথৌ তাবা অদুদা মীৎয়েং থম্লদুনা, য়ুনিয়ন মিনিস্তর, জ্যৌতিরাদিত্য সিন্দিয়ানা হায়খি মদুদি নোর্থ ইস্ত শিনবা থুংনা বেঙ্কশিংদা দিপোজিৎ তৌখিবা লুপা ১০০ খুদিংগী লুপা ৪৭ খক্তমক ক্রেদিত ওইনা পীরি।

মহাক্না বেঙ্কশিংদা এন্ত্রপ্রেনরশিং, লৌমীশিং, নুপীশিং অমসুং এম.এস.এম.ই.শিংগীদমক ক্রেদিত হেনগৎহন্নবা হায়খি, অমসুং ক্রেদিত-দিপোজিৎ (সি.দি.) রেসিওনা নোর্থ ইস্ততা “চাউখৎনবগীদমক ক্রেদিত” হায়বা অসি মমি তাহনগদবনি হায়না পনখি।

মিনিস্তরনা নোর্থ ইস্তকীদমক অখন্নবা ক্রেদিত-রিস্ক ফ্রেমৱার্ক্কী মথৌ তাবা অদুসু পনখি। মহাক্না হায়খি মদুদি লমদম অসিদা খুন্নাইনা লমগী মপু ওইবগী চৎনবী লৈবনা লোন ফংবা ফগৎহন্নবগীদমক ফ্লেক্সিবল ওইবা কোল্লেতরেলগী (collateral) কাংলোনশিং মথৌ তাই।

নোর্থ ইস্ত শিনবা থুংনা বেঙ্কিং নেতৱার্ক পাকথোক-চাউথোকখ্রে

অহানবা নোর্থ ইস্ত বেঙ্কর্স কনক্লেবকী মতুংদগী লৈখ্রিবা চাউখৎ-থৌরাং অদু য়েংশিল্লদুনা, শ্রী সিন্দিয়ানা হায়খি মদুদি  কনক্লেব হৌদোকখিবা মতমদা থমখিবা বেঙ্কিংগী পান্দমশিং অদুগা য়েংনবদা চহি মঙাগী মনুংদা চাউরাক্না চাদা ৭৩গী চাংদা খুমাং চাউশিনবা ঙমখ্রে।

মরুওইবা মাইপাকপশিংদা মখাগী অসি য়াওরি :-

· অনৌবা বেঙ্ক ব্রাঞ্চ ১৩১ অমসুং এ.তি.এম. ১২৬ হাপচিনখ্রে।

· অনৌবা ইন্দিয়া পোস্ত পেমেন্তস বেঙ্ক (IPPB) সেন্তর ২৪৭ লিংখৎখ্রে।

· লমদম অসি শিনবা থুংনা বেঙ্ক ব্রাঞ্চ ৬,৬৭৪ অমসুং এ.তি.এম. ৫,৮২৩ থবক তৌরি।

· বেঙ্কিং তচপোইন্তশিংনা খুঙ্গংশিংগী চাউরাক্না চাদা ৯৯.৯৩ দা য়ৌখ্রে।

· অহেনবা আই.পি.পি.বি. (IPPB) এক্সেস পোইন্ত ২,৫০০ থৌরাং তৌখ্রে।

বেঙ্কিং অমসুং পোস্তেল কভরেজ ফগৎহন্নবা খঙদোকখিবা চাউরাক্না খুঙ্গং ৯,০০০গী মনুংদা, ৬,৯০৫ দি য়ৌখ্রে। ফিজিকেল বেঙ্ক ব্রাঞ্চ অমা হাংনবা মথৌ তাবা খ্বাইদগী নেম্বা মীশিংগী মশিং অদুসু ৩,০০০দগী ২,০০০দা হন্থহনখ্রে।

নোর্থ ইস্তনা দিজিতেল বেঙ্কিং শিজিন্নবা হেনগৎলক্লিবা অদুদা মীৎয়েং থম্লদুনা, শ্রী সিন্দিয়ানা পনখি মদুদি লমদম অসি শিনবা থুংনা ব্রাঞ্চ নত্তবা ত্রাঞ্জেক্সন পুম্নমক্কী চাদা ৯০.২ দি য়ু.পি.আই.না (UPI) তৌরি।

নোর্থ ইস্ততা লুপা করোর ৪০,০০০গী ইনভেস্তমেন্ত তৌখ্রে

য়ুনিয়ন মিনিস্তর, সিন্দিয়ানা হায়খি মদুদি মে ২০২৫দা পাংথোকখিবা রাইজিং নোর্থ ইস্ত ইনভেস্তর্স সম্মিতকী মতুংদা অৱাং-নোংপোক্কী স্তেত নিপাল শিনবা থুংনা চাউরাক্না লুপা করোর ৪০,০০০গী ইনভেস্তমেন্ত তৌখ্রে।

লমদম অসিগী এয়রপোর্ত নেতৱার্ক অসি ৯দগী ১৭ ফাওবা পাকথোক-চাউথোকহনবা য়াওনা, মহাক্না মরুওইবা ইনফ্রাস্ত্রকচর ফগৎলকপশিং অদুদা মীৎয়েং থমখি।

মহাক্না মিজোরামগী বৈরাবি রেলৱে লাইনগী খুদমসু পীখি, মদুনা খোঙচৎ ১,১০০গী খুত্থাংদা চাউরাক্না পেসেঞ্জর লাখ ১৫ পুখ্রে।

মিনিস্তরনা হায়খি মদুদি এম.দি.ও.এন.ই.আর.না (MDoNER) য়েংশিনবা, গ্রোস বজেতরী সপ্পোর্তকী চাদা ১০ খাইদোক্তুনা নোর্থ ইস্তনা চহি খুদিংগী লুপা করোর লাখ অমদগী হেন্না ফংলি। মহাক্না স্তেত নিপাল অসিদা ফিস্কেল দিভোলুসনগী খুত্থাংদা চাউরাক্না লুপা করোর লাখ ৬ ফংহল্লিবা অদুসু পনখি।

নোর্থ ইস্তনা অচৌবা দেমোগ্রাফিক্কী খুদোংচাবা পীরি

লমদম অসিগী দেমোগ্রাফিক অমসুং শেন্মিৎলোনগী মতিক অদুদা মীৎয়েং থম্লদুনা, শ্রী সিন্দিয়ানা পনখি মদুদি নোর্থ ইস্ততা চাউরাক্না মীশিং করোর ৫ লৈ। মহাক্না এজুকেসন, স্কিল দিভেলপমেন্ত, এন্ত্রপ্রেনরশিপ অমসুং থবক্কী লমদা অহেনবা খুদোংচাবশিং ফংহন্দুনা লমদম অসিগী নহারোলশিংগী তৌবা ঙম্বগী মতিক অদু শিজিন্নবগী মরুওইবা অদু পনখি। মহাক্না হায়খি মদুদি স্তেত নিপাল শিনবা থুংবগী চাংচত্তা লৈরিবা লিতরেসী রেত অসি চাদা ৯৩ নি, অদুগা মিজোরামনা চাদা ১০০ লিতরেসী ফংখ্রে।

লমদম অসিগী মহৌশাগী লন-থুম অমসুং শেন্মিৎলোনগী পোতেন্সিয়েলদা মীৎয়েং থম্লদুনা, সিন্দিয়ানা হায়খি, “নোর্থ ইস্ততা দেমোগ্রাফিক অমসুং এজুকেসনগী ওইবা খুদোংচাবা অমা চাউনা লৈ, মহৌশাগী লন-থুম কয়ামরুম অমসুং তোপ-তোপ্পা মহৌশাগী ফজবা অমা লৈ। অদোম্না লেংপুইদা থুংবা মতমদা, অদোম্না উমং অমদা থুংখ্রে হায়না ফাওগনি। মহৌশাগী ইমানা লমদম অসিদা য়াম্না তোপ-তোপ্পা পোৎলম অমা খুদোল তমখ্রে।”

লমদম অসিগী শেন্মিৎলোনগী চাউখৎ-থৌরাং অদুদা মীৎয়েং থম্লদুনা, মহাক্না হায়খি, “নখোয়না অমুক্তা থীজিন্দ্রিবা শেন্মিৎলোনগী মফম অমদা চংশিল্লিবা নত্তে। মালেম অসি চাউখৎলি। নোর্থ ইস্তকী চহিগী শাহৌগী চাং অসি কয়া ওইরমগনি খন্দুনা য়েংবীয়ু? মসি চহি খুদিংগী চাদা ৯-১১ নি।” মহাক্না শাহৌ অসিবু লেপ্পা লৈতনা থম্নবগীদমক বেঙ্কশিংনা মরুওইবা থৌদাং লৌনবা হায়খি।

লমদম অসিগা মহাক্না লৈনরিবা মরী অদুগী মতাংদা নিংশিংলদুনা, শ্রী সিন্দিয়ানা হায়খি, “ঐহাক্না চাউরাক্না থা ৩২ গীদমক দি.ও.এন.ই.আর.গী (DoNER) মিনিস্তর ওইদুনা লাক্লি, অমসুং মসি ঐহাক্না নোর্থ ইস্ততা লাকপা ৩৫শুবনি। মসিগী সুরুং অমসুং তুরেলশিংদগী হৌরগা মসিগী হিঙলিবা উরাগী থোং ফাওবা, অমসুং মসিগী এন্ত্রপ্রেনররশিংদগী হৌরগা খুঙ্গংগী থাক্তা লৈবা লমদম অসিগী সরকারশিংগী তৌবা ঙম্বগী শক্তি ফাওবা, লমদম অসিগী চাউখ্রবা মতিক-ময়াই অদু ঐহাক্না উখ্রে।”

রাজ্যগী মতুং ইন্না বেঙ্কিং রোদমেপ

য়ুনিয়ন মিনিস্তর, সিন্দিয়ানা দিপার্তমেন্ত ওফ ফাইনান্সিয়েল সর্বিসেস (DFS)কীদমক মরুওইবা ৱাফম মরি পনখি: বেঙ্ক ব্রাঞ্চ ৭০, বিজিনেস কোরেস্পোন্দেন্তশিং অমসুং আই.পি.পি.বি. (IPPB) পোইন্তশিংগীদমক থৌরাং অমা শেম-শাবা; কমর্সিয়েল-বেঙ্কশিং লৈবা মপাঙ্গল কনখৎহনবা; নোর্থ ইস্তকীদমক অখন্নবা ক্রেদিত-রিস্ক ফ্রেমৱার্ক অমা শেমগৎপা; অমসুং লমদম অসিগী ফাইনান্সিয়েল সিস্তেমগীদমক এক্সন প্লান অমা শেম-শাবা।

মহাক্না হায়খি মদুদি নেদফি (NEDFi), দি.এফ.এস. (DFS), এম.দি.ও.এন.ই.আর. (MDoNER) অমসুং রাজ্য সরকারশিংনা শেল-থুমগী অৱাৎপশিং খঙদোক্নবা অমসুং রাজ্যগী ওইবা অখন্নবা থৌরাং শেমগৎনবা পুন্না থবক তৌমিন্নখ্রে।

২০২৬কী এপ্রিল অমসুং জুন থাগী মরক অসিদা, এম.দি.ও.এন.ই.আর.গী সেক্রেতরীনা রাজ্যশিংগা অমমমতা ওইনা খন্ন-নৈনখি, মসিগী মতুংদা মখোয় মশাগী পান্দমশিং লেপচখ্রে।

নোর্থ ইস্তকী হেনগৎলক্লিবা ফাইনান্সিয়েল এক্সেস অসি শেন্মিৎলোনগী খুদোংচাবশিংদা ওন্থোক্নবা অমসুং লমদম অসিদা পুথোকপা কান্নবা অদু লমদম অসিগী মনুংদা লেংদনা লৈহন্নবা মিনিস্তরনা বেঙ্করশিংদা তকশিনখি।

 

***

(রিলিজ আই.দি.: 2323649) ভিজিতর কাউন্তর : 6