কেন্দ্ৰীয় কৃষি আৰু কৃষক কল্যাণ তথা গ্ৰামোন্নয়ন মন্ত্ৰী শ্ৰী শিৱৰাজ সিং চৌহানে আজি দিল্লীৰ পুছাত অনুষ্ঠিত দশম ৰাষ্ট্ৰীয় কৃষি সমাৰোহত ভাষণ দিয়ে। তেওঁ কয় যে কৃষকসকলৰ জীৱিকা অধিক উন্নত কৰাৰ সমান্তৰালকৈ ভাৰতে নিজৰ খাদ্যৰ প্ৰয়োজনীয়তা পূৰণ কৰাৰ লগতে পৰবৰ্তী বছৰবোৰত সমগ্ৰ বিশ্বৰ 'খাদ্যৰ ভঁৰাল’ হিচাপে আত্মপ্ৰকাশ কৰিব। তেওঁ স্পষ্ট কৰি দিয়ে যে সঠিক মান অবিহনে চলি থকা আৰু ভুৱা ডিগ্ৰী প্ৰদান কৰা ব্যক্তিগত কৃষি মহাবিদ্যালয়সমূহৰ প্ৰসাৰ নিয়ন্ত্ৰণৰ বাবে কঠোৰ ব্যৱস্থা গ্ৰহণ কৰা হ’ব। এই প্ৰতিষ্ঠানসমূহক নিয়ন্ত্ৰণ কৰাৰ লগতে কৃষি শিক্ষাৰ ক্ষেত্ৰত অধিক দায়বদ্ধতা অনাৰ বাবে শীঘ্ৰেই এখন কৃষি পৰিষদ গঠন কৰা হ’ব। কৃষি শিক্ষাত গুণগত মান নিশ্চিত কৰা, শিক্ষাৰ্থীসকলৰ ভৱিষ্যত সুৰক্ষিত কৰা আৰু দেশৰ উন্নয়নত কৃষিৰ অৱদান শক্তিশালী কৰাৰ ওপৰত চৰকাৰৰ গুৰুত্ব অটুত থাকিব।

অনাটনৰ যুগৰ পৰা আত্মনিৰ্ভৰশীলতা আৰু অভিলেখ উৎপাদনলৈ

ভাষণত কেন্দ্ৰীয় মন্ত্ৰী শ্ৰী শিৱৰাজ সিং চৌহানে ভাৰতীয় কৃষিৰ যাত্ৰাৰ ওপৰত আলোকপাত কৰি দেশখনে পিএল-৪৮০ কাৰ্যসূচীৰ অধীনত আমদানি কৰা খাদ্যশস্যৰ ওপৰত নিৰ্ভৰ কৰিবলগীয়া হোৱা দিনসমূহ স্মৰণ কৰে । ইয়াৰ বিপৰীতে  আজি ভাৰতীয় কৃষকসকলৰ কঠোৰ পৰিশ্ৰম আৰু আধুনিক নীতি গ্ৰহণৰ জৰিয়তে দেশে খাদ্যশস্য উৎপাদনত সম্পূৰ্ণ আত্মনিৰ্ভৰশীলতা অৰ্জন কৰিছে। ২০১৪ চনৰ পৰা ২০২৪ চনৰ ভিতৰত ভাৰতৰ মুঠ কৃষি উৎপাদন ৪৯ শতাংশ বৃদ্ধি হৈছে। ধান উৎপাদন আৰু ৰপ্তানিৰ ক্ষেত্ৰত দেশখন এতিয়া বিশ্বৰ ভিতৰতে প্ৰথম স্থানত থকাৰ বিপৰীতে ঘেঁহু উৎপাদনৰ ক্ষেত্ৰত দেশ দ্বিতীয় স্থানত আছে। ভাৰতৰ সন্মুখত থকা প্ৰত্যাহ্বান এতিয়া কেৱল উৎপাদন বৃদ্ধি কৰা নহয় বুলি তেওঁ গুৰুত্ব সহ উল্লেখ কৰে । ইয়াৰ পৰিৱৰ্তে তেওঁ বৈজ্ঞানিক সংৰক্ষণ, দক্ষ ব্যৱস্থাপনা আৰু বিশ্ব বজাৰলৈ ৰপ্তানি সম্প্ৰসাৰণৰ ওপৰত গুৰুত্ব দিয়াৰ পোষকতা কৰে। এই দিশসমূহক শক্তিশালী কৰাৰ জৰিয়তে কৃষকৰ বাবে অধিক সুযোগ সৃষ্টি হোৱাৰ লগতে দেশে নিজৰ কৃষি উৎপাদনৰ সৰ্বোত্তম ব্যৱহাৰ নিশ্চিত কৰাৰ দিশে আগবাঢ়িব।

 

"আপুনি ধাৰণাৰ অমৃত কঢ়িয়াই আনক; আমি নীতি প্ৰস্তুত কৰিম আৰু সেয়া ৰূপায়ণ কৰিম"

শ্ৰী শিৱৰাজ চৌহানে শিক্ষাৰ্থী আৰু কৃষক সংগঠনসমূহৰ দক্ষতাক নীতি নিৰ্ধাৰণ প্ৰক্ৰিয়াত বিশেষভাৱে গুৰুত্বপূৰ্ণ আখ্যা দিয়ে। সন্মিলনত অংশগ্ৰহণ কৰা বিশেষজ্ঞ আৰু শিক্ষাৰ্থীসকলক তেওঁলোকৰ ধাৰণা আৰু অন্তৰ্দৃষ্টি বিনিময় কৰিবলৈ আহ্বান জনাই কেন্দ্ৰীয় মন্ত্ৰীগৰাকীয়ে কয়, "এই ৰাষ্ট্ৰীয় সন্মিলনত গভীৰভাৱে চিন্তা-চৰ্চা কৰক আৰু আপোনাৰ সিদ্ধান্তৰ ৰূপত অমৃত কঢ়িয়াই আনক। ৰাষ্ট্ৰীয় স্বাৰ্থত এই ধাৰণাসমূহৰ বিনিময় আৰু সেইবোৰ ৰূপায়ণৰ দায়িত্ব চৰকাৰে গ্ৰহণ কৰিব।" এই আলোচনাসমূহে কৃষি উন্নয়নত অৰিহণা যোগাবলৈ আৰু কৃষক তথা শিক্ষাৰ্থীসকলে সন্মুখীন হোৱা প্ৰত্যাহ্বানসমূহৰ মুখামুখি হ’বলৈ সক্ষম ব্যৱহাৰিক পৰামৰ্শসমূহৰ দিশে লৈ যাব বুলিও তেওঁ উল্লেখ কৰে। পৰৱৰ্তী বৈঠকৰ কথা ঘোষণা কৰি তেওঁ কয় যে সন্মিলনৰ সিদ্ধান্তৰ ওপৰত ভিত্তি কৰি এক বিশদ কাৰ্য্য পৰিকল্পনা প্ৰস্তুত কৰিবলৈ তেওঁ অহা ১৫ দিনৰ পৰা এক মাহৰ ভিতৰত প্ৰতিনিধিসকলক পুনৰ সাক্ষাৎ কৰিব।প্ৰতিশ্ৰুতিসমূহক বাস্তৱত ৰূপায়িত কৰাৰ উদ্দেশ্যে পৰৱৰ্তী আলোচনাত পোনপটীয়াকৈ হ্ৰস্বম্যাদী আৰু দীৰ্ঘম্যাদী দুয়োটা পৰিকল্পনাৰ বিকাশ আৰু ৰূপায়ণৰ ওপৰত আলোকপাত কৰা হ’ব।

 

 

কৃষি শিক্ষাৰ্থীসকলৰ ভৱিষ্যত সুৰক্ষিত কৰাৰ দিশত সৰ্বোচ্চ অগ্ৰাধিকাৰ

কৃষি শিক্ষাৰ মান বৃদ্ধিৰ প্ৰয়োজনীয়তাৰ ওপৰত আলোকপাত কৰি কেন্দ্ৰীয় মন্ত্ৰী শ্ৰী শিৱৰাজ চৌহানে কয় যে উপযুক্ত মান বজাই ৰাখিব নোৱাৰাকৈ কোনো প্ৰতিষ্ঠানক কেৱল মাচুল সংগ্ৰহ কৰা আৰু ডিগ্ৰী বিতৰণ কৰা ব্যৱসায় হিচাপে কাম কৰিবলৈ অনুমতি দিয়া নহ’ব। চৰকাৰে নিশ্চিত কৰিব যে কৃষি বিজ্ঞানত স্নাতক (বি এছ চি কৃষি) আৰু কৃষি বিজ্ঞানত স্নাতকোত্তৰ (এম এছ চি কৃষি) সহ যুৱক-যুৱতীসকলে অনুসৰণ কৰা কাৰিকৰী যোগ্যতাই তেওঁলোকৰ মূল্য বজাই ৰাখিব আৰু সেইবোৰ কেতিয়াও অথলে নাযাব। তেওঁ কৃষি প্ৰতিষ্ঠানসমূহে অৰ্থপূৰ্ণ আৰু বিশ্বাসযোগ্য অৰ্হতা প্ৰদান কৰাটো নিশ্চিত কৰি শিক্ষাৰ্থীসকলৰ শিক্ষাৰ ক্ষেত্ৰত সময়, প্ৰচেষ্টা আৰু ধনৰ বিনিয়োগ সুৰক্ষিত কৰাৰ গুৰুত্বৰ ওপৰত আলোকপাত কৰে। প্ৰস্তাৱিত নিয়ন্ত্ৰক ব্যৱস্থাসমূহে কৃষি শিক্ষাৰ মান আৰু বিশ্বাসযোগ্যতা বজাই ৰখাত সহায় কৰাৰ লগতে নিম্নমানৰ মহাবিদ্যালয় আৰু ভুৱা ডিগ্ৰীৰ প্ৰসাৰ প্ৰতিৰোধ কৰিব। ইয়াৰ উদ্দেশ্য হৈছে শিক্ষাৰ্থীসকলে ভৱিষ্যতৰ সম্ভাৱনা ত্বৰান্বিত কৰা তথা তেওঁলোকক কৃষি খণ্ডত ফলপ্ৰসূভাৱে অৰিহণা যোগাবলৈ সক্ষম কৰি তোলা এক শিক্ষা লাভ কৰাটো নিশ্চিত কৰা।

 

ক্ষুদ্ৰ কৃষকসকলৰ বাবে এক 'সংহত কৃষি' আৰ্হি

ভাৰতৰ গড় ভূমিৰ আকাৰ মাত্ৰ ১ হেক্টৰ বুলি উল্লেখ কৰি শ্ৰী চৌহানে কয় যে ক্ষুদ্ৰ আৰু প্রান্তীয় কৃষকসকলৰ আয় বৃদ্ধিৰ বাবে বৈচিত্ৰ অপৰিহাৰ্য। কেৱল শস্য খেতিৰ ওপৰত নিৰ্ভৰ কৰাৰ পৰিৱৰ্তে একাধিক কৃষি কাৰ্যকলাপ একত্ৰিত কৰি তেওঁলোকৰ জীৱিকা অধিক সুৰক্ষিত আৰু সমৃদ্ধিশালী কৰিব পাৰি। খাদ্যশস্য উৎপাদনৰ লগতে কৃষকসকলক ফল-মূল আৰু শাক-পাচলিৰ খেতি, ঔষধি উদ্ভিদৰ খেতি, পশুপালন, মীন পালন, মৌমাখি পালন আৰু প্ৰাকৃতিক কৃষি কৰিবলৈ উৎসাহিত কৰিব লাগে। এই কাৰ্যকলাপসমূহক একত্ৰিত কৰিলে উপাৰ্জনৰ উৎসসমূহৰ বৈচিত্ৰ্যত সহায় হ’ব, এবিধ শস্যৰ ওপৰত নিৰ্ভৰশীলতা হ্ৰাস হ’ব আৰু কৃষক পৰিয়ালসমূহৰ অৰ্থনৈতিক নিৰাপত্তা শক্তিশালী হ’ব। তেওঁ লগতে কৃষিক্ষেত্ৰত আধুনিক প্ৰযুক্তিৰ গ্ৰহণ ত্বৰান্বিত কৰাৰ প্ৰয়োজনীয়তাৰ ওপৰতো আলোকপাত কৰে। কৃত্ৰিম বুদ্ধিমত্তা (এ আই), যন্ত্ৰ শিক্ষণ আৰু ৰবটিক্সক কৃষিৰ সৈতে একত্ৰিত কৰাৰ বাবে কৰা প্ৰয়াসৰ ফলত কৃষি পদ্ধতিৰ আধুনিকীকৰণ আৰু ইয়াৰ দক্ষতা উন্নত কৰাটো সম্ভৱ হৈছে। প্ৰযুক্তিগত অগ্ৰগতিৰ সৈতে বৈচিত্ৰ্যময় কৃষি প্ৰণালীৰ সংমিশ্ৰণে উৎপাদনশীলতা বৃদ্ধি আৰু কৃষকসকলৰ জীৱিকা উন্নত কৰাৰ প্ৰচেষ্টা ত্বৰান্বিত কৰিব। কাৰ্যসূচীৰ সময়ত কেন্দ্ৰীয় মন্ত্ৰী শ্ৰী শিৱৰাজ সিং চৌহানে এগ্ৰিভিচনৰ ১০ বছৰীয়া যাত্ৰাৰ তথ্য সম্বলিত এখন বিশেষ পুস্তিকা মুকলি কৰে। সমগ্ৰ দেশৰ পৰা বৃহৎ সংখ্যক কৃষি বিজ্ঞানী, গৱেষক আৰু ছাত্ৰ-ছাত্ৰীয়ে এই ৰাষ্ট্ৰীয় সন্মিলনত অংশগ্ৰহণ কৰিছিল। তেওঁলোকৰ অংশগ্ৰহণে কৃষিৰ সৈতে জড়িত বিশেষজ্ঞ আৰু যুৱক-যুৱতীসকলক এই খণ্ডৰ প্ৰত্যাহ্বান, ভৱিষ্যতৰ অগ্ৰাধিকাৰ আৰু উন্নয়নৰ সুযোগ সন্দৰ্ভত আলোচনাত জড়িত হোৱাৰ সুযোগ প্ৰদান কৰিছিল।

*****

SS/MS/MK/DD

(ৰিলিজ আই ডি : 2323646) অতিথি কক্ষ : 2