প্ৰতিৰক্ষা গৱেষণা আৰু উন্নয়ন সংস্থা (ডি আৰ ডি অ’)-ই ২৭ অক্টোবৰৰ পৰা নতুন দিল্লীৰ ভাৰত মণ্ডপমত অনুষ্ঠিত হ’বলগীয়া উদীয়মান বিজ্ঞান, প্ৰযুক্তি আৰু উদ্ভাৱন সন্মিলন (ই এছ টি আই চি ২০২৬)ৰ সময়ত 'ছেমিকণ্ডাক্টৰ আৰু পৰৱৰ্তী প্ৰজন্মৰ চিপছ’ শীৰ্ষক এখন বিষয়ভিত্তিক অধিৱেশনৰ নেতৃত্ব দিব। ভাৰত চৰকাৰৰ প্ৰধান বৈজ্ঞানিক উপদেষ্টাৰ নিৰ্দেশনাত ১২টা মন্ত্ৰ্যালয়/বিভাগে যুটীয়াভাৱে এই সন্মিলনৰ আয়োজন কৰিছে। ই এক গুৰুত্বপূৰ্ণ ৰাষ্ট্ৰীয় পদক্ষেপ যাৰ লক্ষ্য হৈছে বিজ্ঞান, প্ৰযুক্তি আৰু উদ্ভাৱনৰ জৰিয়তে বিকশিত ভাৰত @২০৪৭ৰ দৃষ্টিভংগীক আগুৱাই নিয়া আৰু আত্মনিৰ্ভৰতা শক্তিশালী কৰা।

ডি আৰ ডি অ’ৰ অধিৱেশনত উদ্যোগ, শিক্ষা, থলুৱা চিপ-বিকাশ পৰিৱেশ তন্ত্ৰ আৰু প্ৰতিৰক্ষা ইলেক্ট্ৰনিকছৰ বিশিষ্ট ব্যক্তিসকলক একত্ৰিত কৰা হ’ব। ইয়াত মাইক্ৰন ইণ্ডিয়াৰ উপাধ্যক্ষ আৰু পৰিচালন সঞ্চালকৰ মূল ভাষণ থাকিব আৰু ইয়াৰ পিছত ভাৰত ছেমিৰ মুখ্য কাৰ্যবাহী বিষয়া, নেট্ৰাছেমিৰ মুখ্য কাৰ্যবাহী বিষয়া আৰু আই আই টি মাদ্ৰাজৰ সঞ্চালকৰ আলোচনা অনুষ্ঠিত হ’ব। এই আলোচনাত ছেমিকণ্ডাক্টৰ প্ৰযুক্তি, উদ্দেশ্য-নিৰ্মিত কৃত্ৰিম বুদ্ধিমত্তা ছিষ্টেম-অন-চিপছ, ছিলিকনৰ লগতে বুদ্ধিমত্তা আৰু বিকশিত মাইক্ৰ’প্ৰচেছৰৰ বিষয়ত গুৰুত্বপূৰ্ণ উন্নয়ন সন্দৰ্ভত অন্বেষণ কৰা হ’ব।

 

বিভিন্ন দক্ষতা থকা বক্তাসকলে ছেমিকণ্ডাক্টৰ ফেব্রিকেচন, চিপ ডিজাইন, কৃত্ৰিম বুদ্ধিমত্তা (এ আই) কম্পিউটিং, থলুৱা ছেমিকণ্ডাক্টৰ প্লেটফৰ্ম, গৱেষণা আৰু বিকাশ, আৰু কৌশলগত আৰু প্ৰতিৰক্ষা প্ৰয়োগ সম্পৰ্কে  গুৰুত্বপূৰ্ণ আলোচনা কৰিব। এই অধিৱেশনত উদ্যোগ, শিক্ষা আৰু কৌশলগত অংশীদাৰসকলৰ মাজত শক্তিশালী সহযোগিতা বৃদ্ধি, উদীয়মান প্ৰযুক্তিগত সুযোগ চিনাক্তকৰণ আৰু গুৰুত্বপূৰ্ণ আৰু পৰৱৰ্তী প্ৰজন্মৰ প্ৰয়োগৰ বাবে থলুৱা সামৰ্থ্যৰ ওপৰত গুৰুত্ব দি এক শক্তিশালী ঘৰুৱা ছেমিকণ্ডাক্টৰ পৰিৱেশ তন্ত্ৰৰ বিকাশত অৰিহণা যোগাব বুলি আশা কৰা হৈছে।

ই এছ টি আই চি ২০২৬ৰ আউটৰিচ ষ্টলে মন্ত্ৰালয়ৰ মূল পদক্ষেপ, সাফল্য, গৱেষণা কাৰ্যসূচী আৰু বিজ্ঞান, প্ৰযুক্তি আৰু উদ্ভাৱনত অৱদান প্ৰদৰ্শনৰ বাবে এক মঞ্চ প্ৰদান কৰিব। ষ্টলত উন্নত যোগাযোগ প্ৰণালী, কোৱাণ্টাম প্ৰযুক্তিৰ প্ৰটোটাইপ, অত্যধিক ঠাণ্ডা-বতৰৰ কাপোৰ, ’প্ৰবালা’ নামৰ মহিলাৰ সম্পূৰ্ণ-শৰীৰ সুৰক্ষা, নিষ্ক্রিয় আৰু চালিত কংকাল(exoskeleton), বহনযোগ্য হাইব্ৰিড শক্তি ব্যৱস্থাপনা প্ৰণালী, উচ্চ-শক্তিৰ পাল্চ লেজাৰ ডায়ড, আৰু স্ক্ৰেমজেট ইঞ্জিন প্ৰযুক্তিকে ধৰি ডি আৰ ডি অ’ পৰীক্ষাগাৰসমূহে বিকশিত কৰা থলুৱা প্ৰযুক্তিৰ এক বৈচিত্ৰ্যময় সমাহাৰ ঘটিব।

এই প্ৰদৰ্শনীসমূহে থলুৱা গৱেষণা আৰু উন্নয়ন শক্তিশালী কৰা, প্ৰযুক্তিৰ বিকাশ আৰু আত্মনিৰ্ভৰশীলতা বৃদ্ধি কৰা আৰু প্ৰতিৰক্ষা আৰু অন্যান্য কৌশলগত খণ্ডৰ গুৰুত্বপূৰ্ণ প্ৰয়োজনীয়তাবোৰ সমাধান কৰাৰ বাবে চলি থকা প্ৰচেষ্টাৰ বিষয়ত আলোকপাত কৰিব। এই ষ্টলে ভাৰতৰ বৈজ্ঞানিক আৰু প্ৰযুক্তিগত সামৰ্থ্যৰ অগ্ৰগতিৰ ক্ষেত্ৰত মন্ত্ৰালয়ৰ ভূমিকাৰ বিষয়ে জনসাধাৰণৰ মাজত সজাগতা বৃদ্ধি কৰাৰ লগতে শিক্ষা, উদ্যোগ, ষ্টাৰ্ট-আপ আৰু গৱেষণা প্ৰতিষ্ঠানসমূহৰ মাজত সহযোগিতা বৃদ্ধি কৰিব।

অক্টোবৰত কৰ্ণাটকৰ বেংগালুৰুত ডি আৰ ডি অ’ৰ দ্বাৰা আয়োজিত আৰম্ভনি অনুষ্ঠানত সভাপতিত্ব কৰি বিশিষ্ট বিজ্ঞানী তথা সঞ্চালক প্ৰধান (ইলেক্ট্ৰনিকছ এণ্ড কমিউনিকেশ্যন চিষ্টেমছ) ড0 বি কে দাসে অৰ্থনৈতিক প্ৰতিযোগিতামূলকতা, ডিজিটেল সাৰ্বভৌমত্ব আৰু ৰাষ্ট্ৰীয় নিৰাপত্তাৰ বাবে ছেমিকণ্ডাক্টৰ আৰু পৰৱৰ্তী প্ৰজন্মৰ চিপছৰ গুৰুত্বৰ বিষয়ত আলোকপাত কৰে। তেওঁ কয় যে ভাৰতে বিকশিত ভাৰতৰ দিশত আগবাঢ়ি যোৱাৰ লগে লগে দূৰসংযোগ, অটোমোটিভ প্ৰণালী, ঔদ্যোগিক অটোমেচন, এ আই হাৰ্ডৱেৰ আৰু কৌশলগত প্ৰতিৰক্ষা প্লেটফৰ্মসমূহক শক্তি প্ৰদানৰ বাবে এক সম্পূৰ্ণ, স্থায়ী মাইক্ৰ’ইলেক্ট্ৰনিকছ পৰিৱেশ তন্ত্ৰ নিৰ্মাণ কৰাটো অত্যাৱশ্যকীয়।

ডাঃ দাসে লগতে কয় যে গোলকীয় যোগান শৃংখলত হোৱা ব্যাঘাত, ভূ-ৰাজনৈতিক অস্থিৰতা আৰু আন্তঃৰাষ্ট্ৰীয় প্ৰযুক্তি ৰপ্তানি নিয়ন্ত্ৰণৰ পৰা ৰাষ্ট্ৰীয় অৰ্থনীতিক সুৰক্ষিত কৰিবলৈ ঘৰুৱা সামৰ্থ্য শক্তিশালী কৰাটো অতি গুৰুত্বপূৰ্ণ। তেওঁ সমগ্ৰ মাইক্ৰ’ইলেক্ট্ৰনিক মূল্য শৃংখলত কৌশলগত স্বায়ত্তশাসন আৰু উচ্চ মূল্যৰ ৰপ্তানি আগবঢ়াই গোলকীয় ছেমিকণ্ডাক্টৰ শক্তিকেন্দ্ৰ হিচাপে আত্মপ্ৰকাশ কৰাৰ ভাৰতৰ লক্ষ্যৰ ওপৰত গুৰুত্ব আৰোপ কৰে।

বিশিষ্ট বিজ্ঞানী তথা সঞ্চালক প্ৰধান (প্ৰযুক্তি ব্যৱস্থাপনা) ড0 অনুপম শৰ্মাই আধুনিক যুদ্ধত ছেমিকণ্ডাক্টৰৰ গুৰুত্বপূৰ্ণ ভূমিকাৰ ওপৰত আলোকপাত কৰি কয় যে এই প্ৰযুক্তিবোৰ সামৰিক অভিযানৰ প্ৰায় প্ৰতিটো দিশতে অবিচ্ছেদ্য। তেওঁ লগতে কয় যে ২০৩৫ চনৰ ভিতৰত ছেমিকণ্ডাক্টৰ সম্পৰ্কীয় খণ্ডৰ ব্যৱসায় ২০০ বিলিয়ন ডলাৰলৈ বৃদ্ধি পাব বুলি আশা কৰা হৈছে।

এই অনুষ্ঠানত বহির্জাগতিক গৱেষণা আৰু বৌদ্ধিক সম্পত্তি অধিকাৰ সঞ্চালকালয়ৰ সঞ্চালক, ছলিড ষ্টেট ফিজিক্স লেবৰটৰীৰ সঞ্চালক, ইলেক্ট্ৰনিকছ এণ্ড ৰাডাৰ ডেভেলপমেণ্ট এষ্টাব্লিশমেণ্টৰ সঞ্চালক আৰু কম্বেট এয়াৰক্ৰাফ্ট ছিষ্টেম ডেভেলপমেণ্ট এণ্ড ইন্টিগ্ৰেচন চেণ্টাৰৰ কেন্দ্ৰ মুৰব্বী উপস্থিত আছিল।

***

SR/Savvy/US
 

(ৰিলিজ আই ডি : 2323248) অতিথি কক্ষ : 2