1961-ലെ ആദായനികുതി നിയമപ്രകാരം അംഗീകാരം ലഭിച്ചിട്ടുണ്ടെങ്കിലും, 1952-ലെ എംപ്ലോയീസ് പ്രൊവിഡൻ്റ്  ഫണ്ട്സ് ആൻഡ് മിസ്‌സലേനിയസ് പ്രൊവിഷൻസ് (EPF&MP) നിയമത്തിലെ വകുപ്പ് 17 പ്രകാരമോ 2020-ലെ 'കോഡ് ഓൺ സോഷ്യൽ സെക്യൂരിറ്റി (CoSS)' വകുപ്പ്  143  പ്രകാരമോ  ഔദ്യോഗിക 'ഒഴിവാക്കൽ ഉത്തരവ്' (exemption order)ലഭിച്ചിട്ടില്ലാത്ത പ്രൊവിഡൻ്റ്  ഫണ്ട് (PF) ട്രസ്റ്റുകൾക്ക്, തങ്ങളുടെ ഇളവ് പദവി നിയമപരമായി ക്രമീകരിക്കുന്നതിനുള്ള അവസരം 'പൊതുമാപ്പ് പദ്ധതി 2026' മുഖേന ലഭ്യമാക്കുന്നു. ആവശ്യമായ ഔദ്യോഗിക അംഗീകാരം നേടുന്നതിനും ബാധകമായ നിയമങ്ങൾക്കനുസൃതമായി 'എക്സംപ്റ്റ്' പദവി ക്രമീകരിക്കുന്നതിനും PF ട്രസ്റ്റുകൾക്ക് പദ്ധതി മുഖേന  ഒറ്റത്തവണ മാത്രം അവസരം നൽകുന്നു.

2026 ജൂലൈ 11-ന് പുറത്തിറക്കിയ സർക്കുലറിൽ, 'പൊതുമാപ്പ് പദ്ധതി  2026'-ലേക്കുള്ള അപേക്ഷാ രീതിയും പാലിക്കേണ്ട നടപടിക്രമങ്ങളും ഉൾപ്പെടെയുള്ള പ്രവർത്തന മാർഗ്ഗനിർദ്ദേശങ്ങൾ വിശദീകരിച്ചിട്ടുണ്ട്. 2026 ഡിസംബർ 28 വരെ ആറു മാസത്തേക്കാണ് പദ്ധതി നിലവിലുണ്ടാകുക; അതിനാൽ, അർഹതയുള്ള എല്ലാ സ്ഥാപനങ്ങളും നിശ്ചിത സമയപരിധിക്കുള്ളിൽ അപേക്ഷിക്കണമെന്ന് EPFO നിർദ്ദേശിക്കുന്നു. മുൻകാല പ്രാബല്യത്തോടെ 'എക്സംപ്ഷൻ' (ഒഴിവാക്കൽ) പദവിക്ക് ഔദ്യോഗിക അംഗീകാരം നേടാൻ PF ട്രസ്റ്റുകളെ ഈ പദ്ധതി അനുവദിക്കുന്നു. കൂടാതെ, ജീവനക്കാരുടെ കുറഞ്ഞ എണ്ണം, ഫണ്ടിൻ്റെ   കുറഞ്ഞ തുക, മൂന്ന് വർഷത്തെ നിയമപാലന നിബന്ധന തുടങ്ങിയ ചില നിയമപരമായ വ്യവസ്ഥകളിൽ ഇളവും  നൽകുന്നു. ക്രമവത്ക്കരണ നടപടികൾക്ക് ശേഷം, സ്ഥാപനങ്ങൾക്ക് രണ്ട് രീതിയിൽ പ്രവർത്തനം തുടരാവുന്നതാണ്: ഒന്നുകിൽ അംഗീകൃത ട്രസ്റ്റ് മുഖേന PF കൈകാര്യം ചെയ്യുന്ന 'എക്സംപ്റ്റ്' (ഒഴിവാക്കപ്പെട്ട) സ്ഥാപനമായോ, അല്ലെങ്കിൽ ബാധകമായ ചട്ടങ്ങൾക്കനുസൃതമായി EPFO മുഖേന PF വിഹിതം കൈകാര്യം ചെയ്യുന്ന 'അൺ-എക്സംപ്റ്റ്' (ഒഴിവാക്കപ്പെടാത്ത) സ്ഥാപനമായോ പ്രവർത്തിക്കാം.

 'പൊതുമാപ്പ് പദ്ധതി  2026'-നെക്കുറിച്ച് അവബോധം സൃഷ്ടിക്കുന്നതിനായി ഇന്ത്യയിലുടനീളം EPFO വിവിധ നടപടികൾ സ്വീകരിച്ചുവരുന്നു. ഈ പദ്ധതിയെക്കുറിച്ച് ബിസിനസ്സ് സ്ഥാപനങ്ങളെ അറിയിക്കുന്നതിനായി കോൺഫെഡറേഷൻ ഓഫ് ഇന്ത്യൻ ഇൻഡസ്ട്രി (CII), ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടൻ്റ്സ്  ഓഫ് ഇന്ത്യ (ICAI), ബോംബെ സ്റ്റോക്ക് എക്സ്ചേഞ്ച് (BSE) തുടങ്ങിയ പ്രമുഖ സംഘടനകളുമായി സഹകരിച്ച് യോഗങ്ങളും സെമിനാറുകളും സംഘടിപ്പിക്കുന്നുണ്ട്. അർഹരായ PF ട്രസ്റ്റുകളെ കണ്ടെത്തുന്നതിനും അപേക്ഷ സമർപ്പിക്കാൻ അവരെ സഹായിക്കുന്നതിനുമായി ചാർട്ടേഡ് അക്കൗണ്ടൻ്റുമാരുടെയും സ്റ്റാറ്റ്യൂട്ടറി ഓഡിറ്റർമാരുടെയും സേവനവും പ്രയോജനപ്പെടുത്തുന്നു. കൂടാതെ, തൊഴിലുടമകൾ, സ്ഥാപനങ്ങൾ, ട്രസ്റ്റ് അംഗങ്ങൾ എന്നിവർക്കായി EPFO-യുടെ പ്രാദേശിക, മേഖലാ ഓഫീസുകൾ ശിൽപശാലകളും ബോധവത്ക്കരണ പരിപാടികളും സംഘടിപ്പിക്കുന്നുണ്ട്. അപേക്ഷാ നടപടികളും പാലിക്കേണ്ട നിബന്ധനകളും വിശദീകരിക്കുന്നതിനായി സാമൂഹ്യ മാധ്യമ പ്രചാരണങ്ങൾ, മൾട്ടിമീഡിയ ആശയവിനിമയം, ലളിതമായ ഇൻഫോഗ്രാഫിക്സ് എന്നിവയും ഈ പ്രവർത്തനങ്ങൾക്ക് പിന്തുണയേകുന്നു.

 'പൊതുമാപ്പ് പദ്ധതി  2026'-ൻ്റെ   നടപടിക്രമങ്ങൾ എളുപ്പത്തിൽ മനസ്സിലാക്കാനും പൂർത്തിയാക്കാനും അപേക്ഷകരെ സഹായിക്കുന്നതിനായി EPFO പ്രത്യേക പരിശീലന പരിപാടികൾ സംഘടിപ്പിച്ചിട്ടുണ്ട്. രാജ്യത്തുടനീളമുള്ള EPFO ഉദ്യോഗസ്ഥർക്കായി ആസ്ഥാനത്തുള്ള 'എക്സംപ്ഷൻ ഡിവിഷൻ' (Exemption Division) ഓൺലൈൻ മുഖേനയും നേരിട്ടും പരിശീലനം നൽകിയിട്ടുണ്ട്. കൂടാതെ, 'പണ്ഡിറ്റ് ദീൻദയാൽ ഉപാധ്യായ നാഷണൽ അക്കാദമി ഓഫ് സോഷ്യൽ സെക്യൂരിറ്റി' (PDUNASS)-യിൽ വെച്ച് ഓൺലൈൻ കോഴ്സുകളിലൂടെയും ക്ലാസ്റൂം സെഷനുകളിലൂടെയും EPFO ഉദ്യോഗസ്ഥർക്കും തൊഴിലുടമകൾക്കുമായി  പരിശീലന പരിപാടികൾ നടത്തി വരുന്നു.

നികുതി സംബന്ധമായ അംഗീകാരമോ ഇളവോ ലഭിച്ചിട്ടുള്ള PF ട്രസ്റ്റുകളെക്കുറിച്ചുള്ള വിവരങ്ങൾ പങ്കിടുന്നതിന് EPFO ധനകാര്യ മന്ത്രാലയവുമായും ആദായനികുതി വകുപ്പുമായും ചേർന്ന് പ്രവർത്തിക്കുന്നു. ആവശ്യമായ ഔദ്യോഗിക ഇളവ് അംഗീകാരം നേടിയിട്ടില്ലാത്തതോ ബാധകമായ നിയമങ്ങൾ പാലിക്കാത്തതോ ആയ PF ട്രസ്റ്റുകളെ തിരിച്ചറിയാനും പരിശോധിക്കാനും ഇത് EPFO യെ സഹായിക്കുന്നു. ആദായനികുതി വകുപ്പ് അംഗീകരിച്ചതും എന്നാൽ EPFO യിൽ നിന്ന് ഔപചാരിക ഇളവ് ഉത്തരവുകൾ ഇല്ലാത്തതുമായ PF ട്രസ്റ്റുകൾ എത്രയും വേഗം അവയുടെ പദവി ക്രമപ്പെടുത്തുന്നുവെന്ന് ഉറപ്പാക്കുകയാണ് ലക്ഷ്യം. നിശ്ചിത സമയപരിധിക്കുള്ളിൽ പദവി ക്രമീകരിക്കുന്നതിനുള്ള അപേക്ഷകൾ സമർപ്പിക്കുന്നുവെന്ന് ഉറപ്പാക്കാൻ രാജ്യത്തുടനീളമുള്ള EPFO പ്രാദേശിക ഓഫീസുകൾ സജീവമായ തുടർനടപടികൾ സ്വീകരിച്ചുവരുന്നു.

ആദായനികുതി വകുപ്പിൻ്റെ   അംഗീകാരമുള്ള ട്രസ്റ്റുകൾക്ക് ലഭിക്കുന്ന ആദായനികുതി ആനുകൂല്യങ്ങൾ തുടർന്നും ലഭ്യമാക്കുന്നതിനായി, ഇന്ത്യയിലുടനീളമുള്ള അർഹരായ PF ട്രസ്റ്റുകൾ ഒറ്റത്തവണ മാത്രമുള്ള ഈ അവസരം പ്രയോജനപ്പെടുത്തണമെന്ന് അഭ്യർത്ഥിക്കുന്നു.

( റിലീസ് ഐ.ഡി: 2322993) സന്ദര്‍ശക കൗണ്ടര്‍ : 7