પ્રથમ બિમસ્ટેક ગૃહ મંત્રીઓની બેઠક આજે દિલ્હી ડેકલેરેશન અપનાવવાની સાથે સંપન્ન થઈ.

દિલ્હી ડેકલેરેશન

અમે, પીપલ્સ રિપબ્લિક ઓફ બાંગ્લાદેશ, કિંગડમ ઓફ ભૂતાન, રિપબ્લિક ઓફ ઇન્ડિયા, રિપબ્લિક ઓફ ધ યુનિયન ઓફ મ્યાનમાર, ફેડરલ ડેમોક્રેટિક રિપબ્લિક ઓફ નેપાળ, ડેમોક્રેટિક સોશિયલિસ્ટ રિપબ્લિક ઓફ શ્રીલંકા અને કિંગડમ ઓફ થાઇલેન્ડના ગૃહ મંત્રીઓ, બે ઓફ બંગાળ ઇનિશિયેટિવ ફોર મલ્ટી-સેક્ટરલ ટેકનિકલ એન્ડ ઇકોનોમિક કોઓપરેશન (BIMSTEC) ના સભ્ય રાજ્યો હોવાના નાતે, પ્રથમ બિમસ્ટેક ગૃહ મંત્રીઓની બેઠક (HMM) માટે 13 ઓક્ટોબર 2026 ના રોજ નવી દિલ્હી, ભારત ખાતે એકત્રિત થઈને:

1. એકબીજા સાથે જોડાયેલા, સુરક્ષિત, સ્થિતિસ્થાપક, વિકસિત અને સમૃદ્ધ બિમસ્ટેક પ્રદેશ સાકાર કરવા માટે બિમસ્ટેક હેઠળ પ્રાદેશિક સહયોગ મજબૂત કરવાની અમારી કટિબદ્ધતાનો પુનરોચ્ચાર કરીએ છીએ;
2. સુરક્ષા ક્ષેત્રે બિમસ્ટેક અંતર્ગત સહયોગ એ સાર્વભૌમ સમાનતા, ક્ષેત્રીય અખંડિતતા, રાજકીય સ્વતંત્રતા, આંતરિક બાબતોમાં અહસ્તક્ષેપ, બિન-આક્રમણ, શાંતિપૂર્ણ સહ-અસ્તિત્વ, પરસ્પર આદર અને પરસ્પર લાભના સિદ્ધાંત પ્રત્યેના આદર પર આધારિત છે અને તે સભ્ય રાજ્યોને સાંકળતા દ્વિપક્ષીય, ઉપ-પ્રાદેશિક, પ્રાદેશિક અથવા બહુપક્ષીય સહયોગનો વિકલ્પ નથી પરંતુ પૂરક છે તે સિદ્ધાંતને વધુ પુનરોચ્ચાર કરીએ છીએ;
3. યાદ કરીએ છીએ કે, ઓગસ્ટ 2018 માં કાઠમંડુ ખાતે યોજાયેલી 4થી બિમસ્ટેક શિખર પરિષદે આતંકવાદ વિરોધી અને સરહદ પારના અપરાધોમાં સહયોગ અને સંકલનને પ્રોત્સાહન આપવા માટે, બિમસ્ટેક રાષ્ટ્રીય સુરક્ષા સલાહકારો/વડાઓની બેઠકો ઉપરાંત, ગૃહ મંત્રીઓના સ્તરે બેઠકો યોજવાનું નક્કી કર્યું હતું;
4. વધુમાં યાદ કરીએ છીએ કે, 04 એપ્રિલ 2025 ના રોજ બેંગકોક ખાતે યોજાયેલી 6ઠ્ઠી બિમસ્ટેક શિખર પરિષદે વ્યૂહાત્મક માર્ગદર્શન પૂરું પાડવા અને સુરક્ષા ક્ષેત્રે સહયોગ મજબૂત કરવા માટે ગૃહ મંત્રીઓની બેઠક (HMM) ની પ્રણાલી સ્થાપવાના નિર્ણયનું સ્વાગત કર્યું હતું;
5. બિમસ્ટેક ગૃહ મંત્રીઓની ઉદ્ઘાટન બેઠકની યજમાની કરવાની ભારતની પહેલની પ્રશંસા કરીએ છીએ, જેણે બિમસ્ટેક હેઠળ સુરક્ષા સહયોગ સ્થાપિત કરવા માટે સંસ્થાકીય માળખાના વિકાસમાં એક સીમાચિહ્નરૂપ સ્થાન અંકિત કર્યું છે;
6. સ્વીકારીએ છીએ કે બંગાળની ખાડી પ્રદેશ એ સહિયારા સુરક્ષા જોખમો ધરાવતો એક સામાન્ય સુરક્ષા ક્ષેત્ર છે, જે સરહદ પારના અને પ્રાદેશિક પરિમાણો ધરાવે છે, જેમ કે આતંકવાદ અને આતંકવાદ માટે અનુકૂળ હિંસક કટ્ટરપંથ, ડ્રગ સ્મગલિંગ, સંગઠિત અપરાધ, સાયબર ક્રાઈમ, મની લોન્ડરિંગ અને આતંકવાદનું નાણાપોષણ તથા આતંકવાદ માટે અનુકૂળ હિંસક કટ્ટરપંથ, માનવ તસ્કરી, શસ્ત્રોની તસ્કરી, ચાંચિયાગીરી, ગેરકાયદેસર શિકાર, ગેરકાયદેસર માનવ સ્થળાંતર અને આતંકવાદી પ્રવૃત્તિઓ માટે સાયબર સ્પેસનો દુરુપયોગ વગેરે;
7. વધુમાં સ્વીકારીએ છીએ કે સરહદ પારના અપરાધ જૂથો માનવ તસ્કરીને સરળ બનાવવા માટે ટેકનોલોજીનો ઉપયોગ કરી રહ્યા છે અને તસ્કરીના પીડિતોને ઓનલાઈન છેતરપિંડી અને સ્કેમ કામગીરી કરવા માટે મજબૂર કરીને તેમનું શોષણ કરી રહ્યા છે, જેનાથી પીડિતોને બળજબરીપૂર્વકના અપરાધો, દેવાની ગુલામી અને વિવિધ પ્રકારના શિકાર થવું પડે છે;
8. પોતપોતાના અધિકારક્ષેત્રોમાં અને સરહદો પાર, રાષ્ટ્રીય કાયદાઓ અને લાગુ પડતી આંતરરાષ્ટ્રીય જવાબદારીઓ અનુસાર અને પીડિતોના અધિકારોનું સન્માન કરતા પીડિત-કેન્દ્રિત અભિગમ દ્વારા, સ્કેમ સેન્ટરોમાં બળજબરીપૂર્વકના અપરાધો માટે માનવ તસ્કરીના પીડિતોના મૂળ, ટ્રાન્ઝિટ અને ગંતવ્ય રાજ્યો, તેમજ જેમાં સ્કેમ સેન્ટરો ચાલે છે અને જેમાં વ્યક્તિઓ સાથે છેતરપિંડી થાય છે તેવા રાજ્યો વચ્ચેના સહયોગની તાકીદ પર ભાર મૂકીએ છીએ.
9. જટિલ અને ઉભરતા સુરક્ષા પડકારોને સ્વીકારીએ છીએ, અને સહયોગ તથા સહિયારી જવાબદારીની ભાવનાથી સભ્ય રાજ્યોને યોગ્ય પ્રતિભાવ આપવા આહવાન કરીએ છીએ.

10. અમારી સુરક્ષા માટેના બહુપરિમાણીય પડકારોને રોકવા, તેનો સામનો કરવા અને નાબૂદ કરવા માટે બિમસ્ટેક હેઠળ સુરક્ષા ક્ષેત્રે પ્રાદેશિક સહયોગ પ્રોત્સાહિત કરવાના અત્યંત મહત્વ પર ભાર મૂકીએ છીએ;

11. ભારપૂર્વક જણાવીએ છીએ કે સુરક્ષા અને વિકાસ એકબીજા સાથે જોડાયેલા છે અને સુરક્ષા ક્ષેત્રે બિમસ્ટેક હેઠળ પ્રાદેશિક સહયોગ વધારવાથી માત્ર સુરક્ષા સુનિશ્ચિત કરવામાં જ નહીં પરંતુ વિકાસાત્મક આકાંક્ષાઓને સાકાર કરવામાં પણ યોગદાન મળશે;

12. સરહદ પારના આતંકવાદ સહિત તમામ સ્વરૂપો અને અભિવ્યક્તિઓમાં આતંકવાદ અને આતંકવાદ માટે અનુકૂળ હિંસક કટ્ટરપંથની સખત શબ્દોમાં નિંદા કરીએ છીએ, પછી તે ગમે ત્યાં, ગમે તેના દ્વારા અને ગમે તે હેતુઓ માટે આચરવામાં આવ્યો હોય; યુએન ચાર્ટર અને આંતરરાષ્ટ્રીય કાયદા અનુસાર સર્વગ્રાહી અને સતત રીતે આતંકવાદ તથા હિંસક કટ્ટરપંથને રોકવા, તેનો સામનો કરવા અને નાબૂદ કરવાના અમારા નિશ્ચયનો પુનરોચ્ચાર કરીએ છીએ; અને આ સંદર્ભમાં, 1267 સાંકશન્સ કમિટી સહિત યુએન સિક્યોરિટી કાઉન્સિલના પ્રતિબંધિત પગલાંના અસરકારક અમલીકરણ માટે આહવાન કરીએ છીએ. આ સંદર્ભમાં, સભ્ય રાજ્યોમાં આતંકવાદી હુમલાના પીડિતો અને તેમના પરિવારો તથા અસરગ્રસ્ત રાજ્યોની સરકારો પ્રત્યે અમારી ઊંડી સંવેદના અને એકજૂથતા વ્યક્ત કરીએ છીએ, અને લાગુ પડતા રાષ્ટ્રીય અને આંતરરાષ્ટ્રીય કાયદા તથા સંબંધિત યુએન સિક્યોરિટી કાઉન્સિલના ઠરાવો અનુસાર જવાબદાર લોકોને ન્યાયના કટેડામાં લાવવા આહવાન કરીએ છીએ;

13. રાષ્ટ્રીય કાયદાઓ અને લાગુ પડતા આંતરરાષ્ટ્રીય કાયદાઓ અનુસાર આંતરરાષ્ટ્રીય સ્તરે સંમત ટેરર ફંડિંગનો સામનો કરવા અને મની લોન્ડરિંગ વિરોધી ધોરણોને પ્રોત્સાહન આપીને કટ્ટરપંથ અને આતંકવાદ માટે અનુકૂળ હિંસક કટ્ટરપંથ, અને ખાસ કરીને આતંકવાદના નાણાપોષણનો સામનો કરવા માટે સહયોગની જરૂરિયાત પર ભાર મૂકીએ છીએ, જેથી આતંકવાદી હેતુઓ માટે નવી અને ઉભરતી ટેકનોલોજીના શોષણને અટકાવી શકાય અને આતંકવાદી ભરતીનો સામનો કરી શકાય;

14. સેક્રેટરી જનરલના રિપોર્ટમાં હાઇલાઇટ કર્યા મુજબ, દરિયાઈ સુરક્ષા સહયોગમાં નોંધપાત્ર પ્રગતિ, 1.5 ટ્રેક બિમસ્ટેક સિક્યોરિટી ડાયલોગની શરૂઆત અને હિમાલયન સાયન્સ કાઉન્સિલની પહેલ સહિત આપણી સુરક્ષા સામેના બહુવિધ પડકારોનો સામનો કરવામાં પ્રાદેશિક સહયોગ પ્રસ્થાપિત કરવા માટે આપણા રાષ્ટ્રીય સુરક્ષા વડાઓ/સલાહકારો દ્વારા ભજવવામાં આવેલી અનુકરણીય ભૂમિકાની પ્રશંસા કરીએ છીએ;

15. માર્ચ 2021 થી અમલમાં આવેલા આંતરરાષ્ટ્રીય આતંકવાદ, સરહદ પારના સંગઠિત અપરાધ અને ગેરકાયદેસર ડ્રગ સ્મગલિંગનો સામનો કરવા અંગેના બિમસ્ટેક કન્વેન્શનના સંપૂર્ણ અને અસરકારક અમલીકરણની જરૂરિયાત પર ભાર મૂકીએ છીએ;

16. માર્ચ 2022 માં કોલંબો ખાતે 5મી બિમસ્ટેક શિખર પરિષદમાં હસ્તાક્ષર કરાયેલા ફોજદારી બાબતોમાં પરસ્પર કાનૂની સહાય અંગેના બિમસ્ટેક કન્વેન્શનના અસરકારક અમલીકરણ માટે આહવાન કરીએ છીએ.

17. અનુક્રમે પ્રત્યાર્પણ, શિક્ષા પામેલી વ્યક્તિઓની બદલી, અને માનવ તસ્કરી સામેના કન્વેન્શન્સના પાઠ્યને વહેલી તકે આખરી ઓપ આપવા તેમજ માનવ તસ્કરીના પીડિતોના બચાવ, પ્રત્યાર્પણ અને પુનર્વસન માટેની માનક સંચાલન પ્રક્રિયા (SoP) ને પ્રોત્સાહિત કરીએ છીએ;

18. માનવ તસ્કરી, નશીલા દ્રવ્યો અને પ્રીકર્સર્સ રસાયણો તથા મની લોન્ડરિંગ વિરોધી ક્ષેત્રોમાં આખરી ઓપ અપાયેલી કાર્ય યોજનાઓના અસરકારક અમલીકરણ તેમજ કટ્ટરપંથ અને આતંકવાદનો સામનો કરવા અંગેના સહયોગ પરના સબ-ગ્રુપ (SG-CCRT) દ્વારા કાર્ય યોજનાને આખરી ઓપ આપવા માટે આહવાન કરીએ છીએ;

19. બિમસ્ટેક ડ્રગ ઓફન્સિસ મોનિટરિંગ ડેસ્ક (BDOMD) ના વિકાસની જરૂરિયાત નોંધીએ છીએ, અને માનવ તસ્કરી અને સ્થળાંતર કરનારાઓની સ્મગલિંગ અંગેના પ્રસ્તાવિત બિમસ્ટેક રિજનલ ઇન્ફોર્મેશન-શેરિંગ મિકેનિઝમ પર સભ્ય રાજ્યો વચ્ચે વધુ સલાહ-મસલત થાય તે જરૂરી છે, જે રાષ્ટ્રીય કાનૂની માળખા અનુસાર કામ કરવું જોઈએ, તેમજ તમામ સભ્ય રાજ્યો દ્વારા વાર્ષિક ડ્રગ રિપોર્ટ્સનું સમયસર પ્રકાશન થવું જોઈએ;

20. બિમસ્ટેકના માળખા હેઠળ પ્રાદેશિક પહેલો તરીકે; આતંકવાદ અને આતંકવાદ માટે અનુકૂળ હિંસક કટ્ટરપંથ, ડ્રગ સ્મગલિંગ, માનવ તસ્કરી, મની લોન્ડરિંગ અને અન્ય સરહદ પારના અપરાધોનો સામનો કરવા માટે આપણી સંબંધિત પ્રીમિયર સંસ્થાઓમાં તમામ સભ્ય રાજ્યોના સહભાગીઓ માટે ટેલર-મેડ તાલીમ અને ક્ષમતા નિર્માણ કાર્યક્રમો ઓફર કરવા માટે કટિબદ્ધ થઈએ છીએ;

21. સીટીટીસી (CTTC) પરના JWG અને સુરક્ષા ક્ષેત્રે સહયોગ સ્થાપિત કરવા માટે તેના સબ-ગ્રુપ્સ દ્વારા કરવામાં આવેલા ઉત્કૃષ્ટ કાર્યની પ્રશંસા કરીએ છીએ અને આ ઘોષણાપત્રમાં સમાવિષ્ટ નિર્ણયો અને નિર્દેશોના અમલીકરણ અંગે ફોલો-અપ કરવા માટે તેમને આદેશ આપીએ છીએ.

22. આવા સંગઠનોની કાર્યસૂચિ પરના મુદ્દાઓ પર તેમના સહિયારા દ્રષ્ટિકોણને સંકલિત કરવા અને વ્યક્ત કરવાના હેતુથી, યોગ્યતા મુજબ, યુએન, આંતરરાષ્ટ્રીય અને પ્રાદેશિક સંગઠનોની બેઠકોની સાથે બિમસ્ટેક સભ્ય રાજ્યોના ગૃહ મંત્રાલયોના પ્રતિનિધિમંડળોની બેઠકો યોજવા પ્રોત્સાહિત કરીએ છીએ;

23. એશિયા/પેસિફિક ગ્રુપ ઓન મની લોન્ડરિંગ (APG) ખાતે નિરીક્ષકનો દરજ્જો મેળવવામાં બિમસ્ટેક સચિવાલયના પ્રયાસોની પ્રશંસા કરીએ છીએ, આ બેઠકની તૈયારીમાં તેની ભૂમિકા અને યોગદાનને બિરદાવીએ છીએ, અને બિમસ્ટેક હેઠળ પ્રાદેશિક સુરક્ષા સહયોગને આગળ ધપાવવામાં તેને અમારા પૂર્ણ સમર્થનની ખાતરી આપીએ છીએ; અને સભ્ય રાજ્યો દ્વારા કરવામાં આવેલા પગલાંઓને પૂરક અને મજબૂત બનાવવાના હેતુથી યુએનઓડીસી (UNODC), ઇન્ટરપોલ (INTERPOL), એફએટીએફ (FATF) અને અન્ય સંબંધિત આંતરરાષ્ટ્રીય તથા પ્રાદેશિક સંગઠનો જેવી આંતરરાષ્ટ્રીય સંસ્થાઓ સાથે ભાગીદારી માટેની તકો શોધવા સચિવાલયને પ્રોત્સાહિત કરીએ છીએ;

24. પ્રથમ બિમસ્ટેક ગૃહ મંત્રીઓની બેઠકની યજમાની કરવા, આપણને આપવામાં આવેલ ઉષ્માભર્યા આતિથ્ય સત્કાર અને બેઠક માટે કરવામાં આવેલી ઉત્કૃષ્ટ વ્યવસ્થાઓ બદલ ભારત પ્રજાસત્તાકની સરકારનો હૃદયપૂર્વક આભાર વ્યક્ત કરીએ છીએ;

25. નિયમિત અને વારંવાર બેઠક યોજવા તથા આપણી ભવિષ્યની બેઠકોની યજમાની કરવા માટે કટિબદ્ધ થઈએ છીએ.

SM/NP/JD