اکتوبر 2021 میں وزیر اعظم جناب نریندر مودی کے ذریعے شروع کیے گئے پی ایم گتی شکتی قومی ماسٹر پلان (پی ایم جی ایس این ایم پی) کے پانچ سال مکمل ہو رہے ہیں۔ یہ موقع ملک میں بنیادی ڈھانچے کی مربوط منصوبہ بندی اور ترقی کے میدان میں ہونے والی اہم پیش رفت کی عکاسی کرتا ہے۔

پی ایم گتی شکتی کے جغرافیائی معلومات پر مبنی ڈیجیٹل پلیٹ فارم کو آتم نربھر بھارت کے تحت بھاسکر آچاریہ قومی خلائی اقدامات  اور جغرافیائی معلوماتی ادارے (بی آئی ایس اے جی-این) نے ملک میں ہی تیار کیا ہے۔ وزارتوں، محکموں اور ریاستوں و مرکز کے زیر انتظام علاقوں کے درمیان تال میل قائم کرنے کے مقصد سے پی ایم گتی شکتی نے بنیادی ڈھانچے کی منصوبہ بندی کے لیے حکومت کے تمام شعبوں کو یکجا کرنے کا طریقۂ کار اپنایا ہے۔ اس کے تحت جغرافیائی معلومات کو یکجا کیا گیا ہے، باہمی تال میل کے ساتھ فیصلے کرنے میں سہولت فراہم کی گئی ہے اور نقل و حمل کے متعدد ذرائع کے درمیان رابطوں، مختلف ذرائع نقل و حمل کے باہمی ربط اور آخری مرحلے تک رسائی کو مضبوط بنایا گیا ہے۔ گزشتہ پانچ برسوں کے دوران یہ پہل ایک مربوط ڈیجیٹل منصوبہ بندی کے پلیٹ فارم سے ترقی کرکے ایک جامع جغرافیائی منصوبہ بندی کے نظام میں تبدیل ہو گئی ہے، جو بنیادی ڈھانچے، اقتصادی ترقی اور سماجی شعبے کی ترقی میں معاونت کرتا ہے۔

پی ایم گتی شکتی کے ڈیجیٹل پلیٹ فارم پر 1,800 سے زیادہ معلوماتی تہوں کو یکجا کیا گیا ہے، جن میں 58 مرکزی وزارتوں اور محکموں نیز تمام 36 ریاستوں اور مرکز کے زیر انتظام علاقوں کا احاطہ کیا گیا ہے۔ اس پلیٹ فارم نے 65 سے زیادہ سافٹ ویئر ماڈیولز اور آلات نیز 100 سے زیادہ موبائل اور ویب ایپلی کیشنز کی تیاری اور انضمام میں بھی سہولت فراہم کی ہے، جس سے ملک بھر میں اعداد و شمار پر مبنی بنیادی ڈھانچے کی منصوبہ بندی کو تقویت ملی ہے۔

نیٹ ورک پلاننگ گروپ (این پی جی) نے پی ایم گتی شکتی کے اصولوں کی بنیاد پر تقریباً 20.23 لاکھ کروڑ روپے کی مالیت کے 400 سے زیادہ بنیادی ڈھانچے کے منصوبوں کا جائزہ لیا۔ جائزے کے اس نظام میں کثیر ذرائع نقل و حمل کے بنیادی ڈھانچے کی مربوط منصوبہ بندی اور ترقی، اقتصادی اور سماجی مراکز تک آخری مرحلے کی رسائی، مختلف ذرائع نقل و حمل کے درمیان رابطے، رسد کی کارکردگی میں بہتری اور منصوبوں پر تال میل کے ساتھ عمل درآمد پر زور دیا گیا ہے۔ این پی جی نے حکومت کے تمام شعبوں کو یکجا کرکے کام کرنے کے طریقۂ کار کو ادارہ جاتی شکل دی ہے۔

پی ایم گتی شکتی کا دائرہ روایتی بنیادی ڈھانچے کی منصوبہ بندی سے آگے بڑھاتے ہوئے سماجی شعبے کی ترقی اور مخصوص علاقوں پر مبنی منصوبہ بندی تک وسیع کیا گیا ہے۔ اس پہل کو بتدریج ضلع سطح تک وسعت دی گئی ہے، جس سے مقامی سماجی و اقتصادی ترقی کے لیے مربوط منصوبہ بندی میں مدد مل رہی ہے۔ اس میں ضلع کی سطح پر سڑکوں، اسکولوں، صحت کی سہولتوں، پانی کی پائپ لائنوں اور دیگر بنیادی خدمات کی منصوبہ بندی شامل ہے۔

ستمبر 2025 میں متحدہ جغرافیائی معلوماتی انٹرفیس (یو جی آئی) کے ذریعے پی ایم گتی شکتی کا عوامی پلیٹ فارم شروع کیا گیا، جس کے تحت اعداد و شمار کے تجزیے سے متعلق منتخب سہولتیں نجی اداروں اور عام لوگوں کے لیے بھی دستیاب کرائی گئیں۔ علم کے انتظامی نظام (کے ایم ایس)، غیر مرکزی ڈیٹا اپ لوڈنگ اور انتظامی نظام (ڈی یو ایم ایس) اور پی ایم جی ایس-این ایم پی ڈیش بورڈ نے معلومات کے تبادلے، اعداد و شمار کے نظم و نسق، غیر مرتکز  ڈیٹا مینجمنٹ اور بنیادی ڈھانچے کی نگرانی کو مزید مضبوط بنایا ہے۔

 

2021-22 میں آغاز کے بعد سے پی ایم گتی شکتی نے بنیاد کی تشکیل، توسیع، مزید وسعت، ڈیجیٹلائزیشن اور رسائی میں اضافے کے مختلف مراحل طے کیے ہیں۔ 2022-23 کے دوران بنیادی ڈھانچے سے متعلق آٹھ اہم وزارتوں کو اس پلیٹ فارم سے جوڑا گیا اور 71 منصوبوں کا جائزہ لیا گیا۔ 2023-24 میں سماجی شعبے کو اس میں شامل کیا گیا، جس کے تحت 1,463 معلوماتی تہوں اور تمام 36 ریاستوں اور مرکز کے زیر انتظام علاقوں کو اس پلیٹ فارم سے جوڑا گیا۔

2024-25 کے دوران اقتصادی شعبے کو اس میں شامل کیا گیا، ضلعی ماسٹر پلان شروع کیا گیا اور 121 منصوبوں کا جائزہ لیا گیا۔ 2025-26 میں پی ایم گتی شکتی کا عوامی پلیٹ فارم، متحدہ جغرافیائی معلوماتی انٹرفیس (یو جی آئی)، علم کے انتظامی نظام (کے ایم ایس)، غیر مرتکز  ڈیٹا اپ لوڈنگ اور انتظامی نظام (ڈی یو ایم ایس) اور ڈیش بورڈ شروع کیے گئے۔ فروری 2026 تک 352 منصوبوں کا جائزہ لیا جا چکا تھا۔

2026 میں 20.23 لاکھ کروڑ روپے کی مالیت کے 421 منصوبوں کا جائزہ لیا جا چکا تھا۔ اس کے ساتھ تقریباً 1,800 معلوماتی تہوں، 65 سے زیادہ آلات اور 100 سے زیادہ ایپلی کیشنز کو بھی پلیٹ فارم سے جوڑا گیا۔ مرکزی کابینہ نے مربوط نقل و حمل و رسد اتھارٹی کے قیام کی منظوری بھی دی۔

گزشتہ پانچ برسوں کے دوران پی ایم گتی شکتی نے ایک مربوط قومی منصوبہ بندی کا نظام قائم کرنے سے آگے بڑھ کر بنیادی ڈھانچے اور علاقائی ترقی کے لیے ایک وسیع تر جغرافیائی منصوبہ بندی کے نظام کی تشکیل کی ہے۔ اعداد و شمار کے انضمام، ادارہ جاتی تال میل، منصوبوں کے جائزے، ڈیجیٹل آلات اور ضلع سطح پر منصوبہ بندی کے ذریعے یہ پہل بنیادی ڈھانچے کی ترقی کے لیے زیادہ مربوط طریقۂ کار کو فروغ دے رہی ہے۔

مربوط طویل مدتی نقل و حمل کی منصوبہ بندی کے لیے پی ایم گتی شکتی کی پوری صلاحیت سے فائدہ اٹھانے کی غرض سے حکومت نے مربوط نقل و حمل و رسد اتھارٹی (آئی ٹی ایل اے) قائم کرنے کا فیصلہ کیا ہے۔ اس کا مقصد نقل و حمل اور رسد کے وسیع شعبوں میں تحقیق، منصوبہ بندی، جائزے، نگرانی اور اثرات کی تشخیص کو مضبوط بنانا ہے۔ آئی ٹی ایل اے کا قیام کثیر ذرائع نقل و حمل کے بنیادی ڈھانچے کے درمیان رابطوں کو مضبوط بنانے، بنیادی ڈھانچے کی کارکردگی بہتر کرنے، رسد کے اخراجات کم کرنے اور عالمی رسدی مسابقت کے میدان میں ہندوستان کی پوزیشن مستحکم کرنے میں کلیدی کردار ادا کرے گا۔

2047 تک وکست بھارت کے وژن کی جانب پیش قدمی کرتے ہوئے پی ایم گتی شکتی مربوط بنیادی ڈھانچے کی منصوبہ بندی، کثیر ذرائع نقل و حمل کے رابطوں اور رسد کی کارکردگی میں بہتری کے لیے ایک نظام فراہم کرتا ہے۔ اس طرح ایک مربوط، مؤثر اور مستقبل کی ضروریات کے لیے تیار نقل و حمل اور رسد کے نظام کی ترقی میں مدد ملتی ہے۔

****

ش ح۔ ک ح۔ خ م

U.NO.6007

(ریلیز آئی ڈی: 2322878) وزیٹر کاؤنٹر : 11