سائنس و ٹیکنالوجی اور ارضیاتی علوم  کے مرکزی وزیر مملکت (آزادانہ چارج ) ، نیز وزیر اعظم کے دفتر، عملہ، عوامی شکایات و پنشن، جوہری توانائی اور خلائی امور کے وزیر مملکت ڈاکٹر جتیندر سنگھ نے نئی دہلی میں برطانیہ کے وزیر برائے کاروبار، اختراع، سائنس اور تجارت، عزت مآب جوناتھن رینالڈز کے ساتھ آٹھویں ہندوستان-برطانیہ سائنس و اختراع کونسل (ایس آئی سی) کی میٹنگ میں شرکت کی۔

اس میٹنگ میں سائنس اور اختراع کے شعبوں میں دونوں ممالک کے باہمی تعاون میں ہونے والی پیش رفت کا جائزہ لیا گیا اور تحقیقی شراکت داری کو مستحکم بنانے، ابھرتی ہوئی ٹیکنالوجیوں کے شعبے میں تعاون بڑھانے اور سائنسی تحقیق کو عملی استعمال میں لانے کے امکانات پر غور کیا گیا۔

ہندوستانی وفد میں حکومتِ ہند کے پرنسپل سائنسی مشیر پروفیسر اجے سود؛ سائنس و ٹیکنالوجی کے محکمے (ڈی ایس ٹی) کے سکریٹری پروفیسر امیش واگھمارے؛ حیاتیاتی ٹیکنالوجی کے محکمے (ڈی بی ٹی) کے سکریٹری ڈاکٹر راجیش گوکھلے؛ ارضیاتی علوم کی وزارت کے سکریٹری ڈاکٹر سرینیواسا کمار تمّلا؛ انوسندھان نیشنل ریسرچ فاؤنڈیشن (اے این آر ایف) کے چیف ایگزیکٹو افسر ڈاکٹر شیوکمار کلیانارامن اور ٹیکنالوجی ڈیولپمنٹ بورڈ (ٹی ڈی بی) کے سکریٹری ڈاکٹر راجیش پاٹھک شامل تھے۔ ان کے ساتھ متعلقہ محکموں اور اداروں کے دیگر سینئر افسران بھی وفد کا حصہ تھے۔

برطانیہ کے وفد کی قیادت کاروبار، اختراع اور تجارت کے وزیر، رکنِ پارلیمنٹ عزت مآب  جوناتھن رینالڈز نے کی۔ وفد میں ہندوستان میں برطانیہ کی ہائی کمشنر محترمہ لنڈی کیمرون؛ ہندوستان میں برطانیہ کے ڈپٹی ہائی کمشنر جناب بین میلور؛ کاروبار، اختراع اور تجارت کے محکمے کی قائم مقام مستقل سکریٹری محترمہ امانڈا بروکس؛ برطانیہ کے شاہی تجارتی کمشنر جناب ہرجندر کانگ اور کاروبار، اختراع اور تجارت کے محکمے کے بین الاقوامی امور کے ڈائریکٹر جناب رائس بووین شامل تھے۔ ان کے علاوہ برطانیہ کے سائنس، تحقیق اور اختراع کے شعبوں سے وابستہ دیگر نمائندے بھی وفد میں شامل تھے۔

اس موقع پر ڈاکٹر جتیندر سنگھ اور جوناتھن رینالڈز نے مشترکہ طور پر بی آر آئی سی-سی ڈی ایف ڈی–او این ٹی ہندوستانی جینومکس سینٹر آف ایکسی لینس کا افتتاح کیا۔ اس افتتاحی تقریب میں حیاتیاتی ٹیکنالوجی کے محکمے کے سکریٹری اور حیاتیاتی ٹیکنالوجی تحقیق و اختراع کونسل (بی آر آئی سی) کے ڈائریکٹر جنرل ڈاکٹر راجیش ایس گوکھلے؛ بی آر آئی سی-سی ڈی ایف ڈی کے ڈائریکٹر پروفیسر اُلّاس کولتھر سیتارام اور آکسفورڈ نینوپور ٹیکنالوجیز کے چیف مالیاتی افسر جناب نک کیہر نے شرکت کی۔

کونسل کے وسیع تر باہمی تعاون کے ایجنڈے کی بنیاد ہندوستان اور برطانیہ کے درمیان تحقیق و اختراع سے متعلق مفاہمت نامے، ٹیکنالوجی کے تحفظ کے اقدام اور ہندوستان-برطانیہ وژن 2035 پر قائم ہے۔ یہ فریم ورک تحقیقی اداروں، جامعات، صنعت اور اختراع کاروں کے درمیان تعاون کی بنیاد فراہم کرتے ہیں، جس کا مقصد سائنسی ترقی کو فروغ دینا اور تحقیق کو ٹیکنالوجیوں اور اطلاقات میں ڈھالنا ہے۔

صنعت کی قیادت میں تحقیق اور ٹیکنالوجی کو تجارتی استعمال میں لانا باہمی تعاون کے اہم شعبوں میں شامل ہیں۔ سائنس و ٹیکنالوجی کے محکمے اور انوویٹ یو کے کے درمیان تعاون کے ذریعے مشترکہ صنعتی تحقیق اور ترقی کے منصوبوں کی معاونت کی جاتی ہے، جن کا مقصد نئی دانشورانہ ملکیت، ٹیکنالوجیوں، طریقۂ کار اور نمونہ جاتی مصنوعات کو تیار کرنا ہے۔ اس پروگرام کے تحت جدید مینوفیکچرنگ، برقی توانائی کے آلات اور خالص صفر اخراج کی ٹیکنالوجیوں سمیت مختلف شعبوں میں 8منصوبوں کی معاونت پر اتفاق کیا گیا ہے۔ یہ منصوبے عمل درآمد کے مختلف مراحل میں ہیں۔

باہمی تعاون کا دائرہ مصنوعی ذہانت، کوانٹم ٹیکنالوجیوں،سیمی کنڈیکٹروں، اہم معدنیات، جدید مواد، حیاتیاتی ٹیکنالوجی، مواصلاتی ٹیکنالوجیوں اور خالص صفر اخراج کی ٹیکنالوجیوں سمیت ابھرتی ہوئی اور تزویراتی اہمیت کی حامل ٹیکنالوجیوں تک بھی پھیلا ہوا ہے۔ ان شعبوں میں دونوں ممالک کی ایک دوسرے کی تکمیل کرنے والی تحقیقی صلاحیتوں سے فائدہ اٹھانے، اختراع کے نظام کو مضبوط بنانے اور صنعتی و سماجی استعمال کی حامل ٹیکنالوجیوں کی تیاری میں معاونت کرنے کے مواقع موجود ہیں۔

ہندوستانی اور برطانوی اداروں کے درمیان مشترکہ تحقیق میں اینٹی مائکروبیل مزاحمت ، صحت کی دیکھ بھال ، زراعت ، آب و ہوا اور موسمی سائنس ، جیو خطرات ، جدید مینوفیکچرنگ اور بنیادی سائنس کا بھی احاطہ کیا گیا ہے ۔  موسم اور آب و ہوا کی سائنس میں تعاون میں جنوبی ایشیائی مانسون سے وابستہ قدرتی خطرات پر تحقیق ، بہتر ماڈلنگ کی صلاحیتیں اور خطرے پر مبنی پیشن گوئی شامل ہیں ۔

میٹنگ میں مسلسل ادارہ جاتی مصروفیت اور تحقیق ، صنعت اور اختراعی ماحولیاتی نظام کے درمیان قریبی روابط کی اہمیت کا اعادہ کیا گیا ۔  ہندوستان اور برطانیہ کے درمیان مسلسل تعاون سائنسی دریافت کو آگے بڑھانے ، تحقیقی شراکت داری کو مستحکم کرنے اور مشترکہ چیلنجوں کے لیے سائنسی صلاحیتوں کو عملی حل میں تبدیل کرنے میں مدد کر سکتا ہے ۔

********

) ش ح ۔ا ک۔ش ت)

U.No. 5029

(ریلیز آئی ڈی: 2322391) وزیٹر کاؤنٹر : 7