ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ಇಂದು ತಮಿಳುನಾಡಿನ ಚೆನ್ನೈನಲ್ಲಿರುವ, ಜೈಗೋಪಾಲ್ ಗರೋಡಿಯಾ ಹಿಂದೂ ವಿದ್ಯಾಲಯ ಮೆಟ್ರಿಕ್ಯುಲೇಷನ್ ಹಿರಿಯ ಪ್ರಾಥಮಿಕ ಶಾಲೆಯ ಸುವರ್ಣ ಮಹೋತ್ಸವ ಆಚರಣೆಯಲ್ಲಿ ಭಾಗವಹಿಸಿದರು. ಈ ದಿನದ ಆಳವಾದ ಆಧ್ಯಾತ್ಮಿಕ ಮಹತ್ವವನ್ನು ಎತ್ತಿಹಿಡಿದ ಪ್ರಧಾನಮಂತ್ರಿಯವರು, ನವರಾತ್ರಿಯ ಮೊದಲ ದಿನದಂದೇ ಶಿವ ಮತ್ತು ಶಕ್ತಿಯ ಪವಿತ್ರ ಭೂಮಿಗೆ ಭೇಟಿ ನೀಡಿದ್ದಕ್ಕೆ ತಮ್ಮ ಅಪಾರ ಸಂತೋಷವನ್ನು ವ್ಯಕ್ತಪಡಿಸಿದರು. ಸರಸ್ವತಿ ದೇವಿಯ ಭಕ್ತರನ್ನು ಭೇಟಿಯಾಗುವಾಗ ಯುವಕರ ಧನಾತ್ಮಕ ಶಕ್ತಿ, ಉತ್ಸಾಹ ಮತ್ತು ರೋಮಾಂಚಕ ಚೈತನ್ಯವನ್ನು ಅನುಭವಿಸುವುದು, ಹಬ್ಬದ ಸಂದರ್ಭದಲ್ಲಿ ಅತ್ಯಂತ ಶುಭ ಆರಂಭವನ್ನು ನೀಡಿದೆ ಎಂದು ಅವರು ಹೇಳಿದರು. "ನಿಮ್ಮೆಲ್ಲರ ಕಣ್ಣುಗಳಲ್ಲಿ ನಾನು ಭಾರತದ ಭವಿಷ್ಯವನ್ನು ಕಾಣುತ್ತಿದ್ದೇನೆ" ಎಂದು ಶ್ರೀ ಮೋದಿ ಹೇಳಿದರು.

ಯುವ ಪೀಳಿಗೆಯ ಅಪಾರ ಸಾಮರ್ಥ್ಯವನ್ನು ಗುರುತಿಸಿದ ಪ್ರಧಾನಮಂತ್ರಿಯವರು, ಇಂದಿನ ಯುವಜನರು 'ವಿಕಸಿತ ಭಾರತ'ದ ದೃಷ್ಟಿಕೋನದ ಹಿಂದಿನ ಚಾಲಕ ಶಕ್ತಿಯಾಗಲು ತೀವ್ರ ಬಯಕೆಯನ್ನು ಹೊಂದಿದ್ದಾರೆ ಎಂದು ಒತ್ತಿಹೇಳಿದರು. ಈ ರಾಷ್ಟ್ರೀಯ ಗುರಿಯನ್ನು ತಲುಪಲು ಅಗತ್ಯವಿರುವ ಹೊಸ ಆಲೋಚನೆಗಳು ಮತ್ತು ಪರಿಹಾರಗಳು ಅಂತಿಮವಾಗಿ ದೇಶದ ಭವಿಷ್ಯವನ್ನು ಮಾತ್ರವಲ್ಲದೆ ಇಡೀ ಜಗತ್ತಿನ ಭವಿಷ್ಯವನ್ನು ರೂಪಿಸುತ್ತವೆ ಎಂದು ಅವರು ಹೇಳಿದರು. "ಇಂದು ಪ್ರಪಂಚವು ಪರಿಹಾರಗಳನ್ನು ಹುಡುಕುತ್ತಿದೆ, ಮತ್ತು ಆ ಪರಿಹಾರಗಳನ್ನು ಒದಗಿಸುವ ಸಾಮರ್ಥ್ಯ ನಿಮಗಿದೆ" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ದೊಡ್ಡ ದೊಡ್ಡ ಕನಸುಗಳನ್ನು ಕಾಣಲು ವಿದ್ಯಾರ್ಥಿಗಳನ್ನು ಪ್ರೋತ್ಸಾಹಿಸಿದ ಪ್ರಧಾನಮಂತ್ರಿಯವರು, ಪ್ರಸ್ತುತ ದೇಶಾದ್ಯಂತ ಹೊರಹೊಮ್ಮುತ್ತಿರುವ ಅನಂತ ಅವಕಾಶಗಳ ಬೃಹತ್ ಕ್ಯಾನ್ವಾಸ್‌ನಲ್ಲಿ ತಮ್ಮ ಭವಿಷ್ಯವನ್ನು ಕಲ್ಪಿಸಿಕೊಳ್ಳುವಂತೆ ಪ್ರತಿಯೊಬ್ಬ ಯುವಕನಿಗೂ ಕರೆ ನೀಡಿದರು. ಅಭೂತಪೂರ್ವ ಸಾಧ್ಯತೆಗಳ ಈ ಯುಗದಲ್ಲಿ ಈ ಸಾಮೂಹಿಕ ರಾಷ್ಟ್ರೀಯ ಕನಸು ಸಂಪೂರ್ಣವಾಗಿ ಅವರ ಕೈಗೆಟುಕುವಂತಿದೆ ಎಂದು ಅವರು ಸಂಪೂರ್ಣ ಆತ್ಮವಿಶ್ವಾಸ ವ್ಯಕ್ತಪಡಿಸಿದರು. "ನಾವು ಒಟ್ಟಾಗಿ ಅದನ್ನು ಸಾಧಿಸುತ್ತೇವೆ!" ಎಂದು ಶ್ರೀ ಮೋದಿ ಅವರು ಒತ್ತಿ ಹೇಳಿದರು.

ತಮ್ಮ ಅತ್ಯಂತ ವೈಯಕ್ತಿಕ ಘಟನೆಯನ್ನು ನೆನಪಿಸಿಕೊಂಡ ಪ್ರಧಾನಮಂತ್ರಿಯವರು, ಕೆಲವು ತಿಂಗಳ ಹಿಂದೆ ನಾಗರಕೋವಿಲ್‌ನಲ್ಲಿ ಗಿರಿಜಾ ಅಮ್ಮ ಮತ್ತು ಹಲವಾರು ಮಕ್ಕಳೊಂದಿಗೆ ನಡೆಸಿದ ಸಭೆಯನ್ನು ಸ್ಮರಿಸುತ್ತಾ, ತಮ್ಮ ಭೇಟಿಯ ಹಿಂದಿನ ಕುತೂಹಲಕಾರಿ ಪ್ರೇರಣೆಯನ್ನು ಬಹಿರಂಗಪಡಿಸಿದರು. "ದೇಶದ ಭವಿಷ್ಯಕ್ಕಾಗಿ ಅವರ ಆಳವಾದ ಸಮರ್ಪಣೆ, ಆತ್ಮವಿಶ್ವಾಸ ಮತ್ತು ಅಚಲ ಭಕ್ತಿಯು ನನ್ನ ಮನಸ್ಸಿನಲ್ಲಿ ಅಭೂತಪೂರ್ವ ಪ್ರಭಾವವನ್ನು ಬೀರಿದೆ" ಎಂದು ಶ್ರೀ ಮೋದಿ ಹೇಳಿದರು.

ತಮ್ಮ ಆರಂಭಿಕ ಸಭೆಯಲ್ಲಿ ನೀಡಿದ ಭರವಸೆಯನ್ನು ಈಡೇರಿಸಿದ ಪ್ರಧಾನಮಂತ್ರಿಯವರು, ಗಿರಿಜಾ ಅಮ್ಮನವರ ಆತ್ಮೀಯ ವಾತ್ಸಲ್ಯ ಮತ್ತು ಈ ಐತಿಹಾಸಿಕ ಸಂಸ್ಥೆಯ ಬಗ್ಗೆ ಅವರಿಗಿರುವ ಆಳವಾದ ಗೌರವವು, ಸುವರ್ಣ ಮಹೋತ್ಸವ ಆಚರಣೆಯ ಅವರ ಆಹ್ವಾನವನ್ನು ಸ್ವೀಕರಿಸಲು ನನ್ನನ್ನು ಪ್ರೇರೇಪಿಸಿತು ಎಂದು ಹಂಚಿಕೊಂಡರು. "ಐವತ್ತು ವರ್ಷಗಳ ಈ ಭವ್ಯ ಪಯಣಕ್ಕಾಗಿ ವಿಶ್ವ ಹಿಂದೂ ವಿದ್ಯಾ ಕೇಂದ್ರ ಮತ್ತು ಇಡೀ ಹಿಂದೂ ವಿದ್ಯಾಲಯ ಕುಟುಂಬಕ್ಕೆ ನಾನು ನನ್ನ ಹೃದಯಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ" ಎಂದು ಶ್ರೀ ಮೋದಿ ದೃಢಪಡಿಸಿದರು.

ಸಂಸ್ಥೆಯ ಅತ್ಯಂತ ಸ್ಪೂರ್ತಿದಾಯಕ ಪಯಣವನ್ನು ಗುರುತಿಸಿದ ಪ್ರಧಾನಮಂತ್ರಿಯವರು, ವಿಶ್ವ ಹಿಂದೂ ವಿದ್ಯಾ ಕೇಂದ್ರವು 1975 ರಲ್ಲಿ ಚೆನ್ನೈನ 'ವೆಸ್ಟ್ ಮಾಂಬಲಂ'ನಲ್ಲಿ ಕೇವಲ ಏಳು ವಿದ್ಯಾರ್ಥಿಗಳು ಮತ್ತು ಸೀಮಿತ ಸಂಪನ್ಮೂಲಗಳೊಂದಿಗೆ ಒಂದು ಪುಟ್ಟ ಶಾಲೆಯಾಗಿ ಪ್ರಾರಂಭವಾಯಿತು ಎಂದು ಉಲ್ಲೇಖಿಸಿದರು. ಆಧುನಿಕ ಸೌಲಭ್ಯಗಳು ಅಥವಾ ಶಾಶ್ವತ ಕಟ್ಟಡದ ಕೊರತೆಯ ಹೊರತಾಗಿಯೂ, ಆರಂಭಿಕ ಸಂಕಷ್ಟಗಳನ್ನು ಮೆಟ್ಟಿ ನಿಂತು ಸಂಸ್ಥೆಯನ್ನು ಮುನ್ನಡೆಸಲು ತಮ್ಮ ದೃಢ ಇಚ್ಛಾಶಕ್ತಿ ಮತ್ತು ಅಚಲ ಸೇವಾ ಮನೋಭಾವವನ್ನು ನೆಚ್ಚಿಕೊಂಡಿದ್ದಕ್ಕಾಗಿ ಅವರು ಸಂಸ್ಥಾಪಕರನ್ನು ಶ್ಲಾಘಿಸಿದರು. "ಕೋಷ್ಟಕರ ಸನ್ನಿವೇಶ ಮತ್ತು ಪ್ರತಿಯೊಂದು ತೊಂದರೆಗಳ ನಡುವೆಯೂ ಈ ಸಂಸ್ಥೆಯು ಮುನ್ನಡೆಯುತ್ತಲೇ ಇತ್ತು" ಎಂದು ಶ್ರೀ ಮೋದಿ ಅಭಿಪ್ರಾಯಪಟ್ಟರು.

ಆ ವಿನಮ್ರ ಆರಂಭದಿಂದ ಬೆಳೆದ ಬೃಹತ್ ವಿಸ್ತರಣೆಯನ್ನು ಉಲ್ಲೇಖಿಸಿದ ಪ್ರಧಾನಮಂತ್ರಿಯವರು, ಆ ಸಣ್ಣ ಆರಂಭಿಕ ಪ್ರಯತ್ನವು ದಶಕಗಳಲ್ಲಿ ಬೃಹತ್ ಶಿಕ್ಷಣ ಚಳವಳಿಯಾಗಿ ಹೇಗೆ ರೂಪಾಂತರಗೊಂಡಿತು ಎಂಬುದನ್ನು ಶ್ಲಾಘಿಸಿದರು. ರಾಜ್ಯದಾದ್ಯಂತ ಸಂಸ್ಥೆಯ ಪ್ರಸ್ತುತ ತಲುಪುವಿಕೆಯ ಪ್ರಭಾವಶಾಲಿ ಪ್ರಮಾಣವನ್ನು ಅವರು ಉಲ್ಲೇಖಿಸಿದರು. "ಇಂದು ನೀವು ತಮಿಳುನಾಡಿನ ವಿವಿಧ ಭಾಗಗಳಲ್ಲಿ 15 ಸಂಸ್ಥೆಗಳನ್ನು ಹೊಂದಿದ್ದೀರಿ" ಎಂದು ಶ್ರೀ ಮೋದಿ ಹೇಳಿದರು.

ಸಂಸ್ಥೆಯ ಸ್ಥಾಪಕರಿಗೆ ಗೌರವ ಸಲ್ಲಿಸಿದ ಪ್ರಧಾನಮಂತ್ರಿಯವರು, ಶಾಲೆಯ ಕಟ್ಟಡ ನಿರ್ಮಾಣದಲ್ಲಿ ಶ್ರೀ ಜೈಗೋಪಾಲ್ ಗರೋಡಿಯಾ ಅವರ ಪ್ರಮುಖ ಕೊಡುಗೆಯನ್ನು ಗೌರವಪೂರ್ವಕವಾಗಿ ಸ್ಮರಿಸಿದರು. ಹಿಂದೂ ವಿದ್ಯಾಲಯದ ಈ ಪಯಣವನ್ನು ಅತ್ಯಂತ ಯಶಸ್ವಿಗೊಳಿಸಲು ತಮ್ಮ ಜೀವನವನ್ನು ಮುಡಿಪಾಗಿಟ್ಟ ಎಲ್ಲಾ ಶಿಕ್ಷಕರು, ಸಿಬ್ಬಂದಿ, ಪೋಷಕರು ಮತ್ತು ಹಳೆಯ ವಿದ್ಯಾರ್ಥಿಗಳಿಗೆ ಅವರು ಆಳವಾದ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು. "ಐವತ್ತು ವರ್ಷಗಳ ಸಮರ್ಪಣೆ, ಐವತ್ತು ವರ್ಷಗಳ ಬದ್ಧತೆ, ಯುವಕರ ಜೀವನವನ್ನು ರೂಪಿಸಿದ ಐವತ್ತು ವರ್ಷಗಳು" ಎಂದು ಶ್ರೀ ಮೋದಿ ಬಣ್ಣಿಸಿದರು.

ಶೈಕ್ಷಣಿಕ ವಿದ್ಯಾಭ್ಯಾಸವನ್ನು ದೃಢವಾದ ದೇಶಭಕ್ತಿಯ ಮೌಲ್ಯಗಳೊಂದಿಗೆ ಯಶಸ್ವಿಯಾಗಿ ಸಂಯೋಜಿಸಿದ್ದಕ್ಕಾಗಿ ಸಂಸ್ಥೆಯನ್ನು ಶ್ಲಾಘಿಸಿದ ಪ್ರಧಾನಮಂತ್ರಿಯವರು, ದೇಶದ ಯೋಧರಿಗಾಗಿ ದಿನಕ್ಕೆ ಕೇವಲ ಒಂದು ರೂಪಾಯಿಯನ್ನು ಉಳಿಸಲು ಮಕ್ಕಳನ್ನು ಅದ್ಭುತವಾಗಿ ಪ್ರೇರೇಪಿಸಿದ್ದಕ್ಕಾಗಿ, ತಮ್ಮ 'ಮನ್ ಕಿ ಬಾತ್' ಕಾರ್ಯಕ್ರಮದಲ್ಲಿ ಗಿರಿಜಾ ಅಮ್ಮ ಅವರನ್ನು ಉಲ್ಲೇಖಿಸಿದ್ದನ್ನು ನೆನಪಿಸಿಕೊಂಡರು. ಈ ಸಂಕಲ್ಪಕ್ಕೆ ಸಾವಿರಾರು ಮಕ್ಕಳು ಸೇರ್ಪಡೆಗೊಂಡು ಯಶಸ್ವಿಯಾಗಿ ನಲವತ್ತು ಲಕ್ಷ ರೂಪಾಯಿಗಳನ್ನು ಸಂಗ್ರಹಿಸಿದ ಅದ್ಭುತ ಸಾಮೂಹಿಕ ಪ್ರಭಾವವನ್ನು ಅವರು ಮೆಚ್ಚಿಕೊಂಡರು. " ನಿಜಕ್ಕೂ ಇದು ಎಂತಹ ಸ್ಪೂರ್ತಿದಾಯಕ ಉದಾಹರಣೆ!" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ಹಂತ-ಹಂತದ ಪ್ರಯತ್ನಗಳ ಅಪಾರ ಶಕ್ತಿಯ ಕುರಿತು ಒತ್ತುಕೊಟ್ಟು ಹೇಳಿದ ಪ್ರಧಾನಮಂತ್ರಿಯವರು, ಸಣ್ಣ ಕೊಡುಗೆಗಳು ಸಮಾಜದಲ್ಲಿ ಬೃಹತ್ ಸಕಾರಾತ್ಮಕ ಪ್ರಭಾವವನ್ನು ಬೀರಬಲ್ಲವು ಎಂದು ಹೇಳಿದರು. ಪ್ರಾಕೃತಿಕ ವಿಕೋಪಗಳ ಸಮಯದಲ್ಲಿ ಸಂತ್ರಸ್ತರಿಗೆ ನೆರವಾಗುವುದರ ಮೂಲಕ ಅಥವಾ ಸ್ವಚ್ಛತಾ ಅಭಿಯಾನಗಳಲ್ಲಿ ಸಕ್ರಿಯವಾಗಿ ಪಾಲ್ಗೊಳ್ಳುವುದರ ಮೂಲಕ ಮೌಲ್ಯಗಳ ಭವ್ಯ ಪರಂಪರೆಯನ್ನು ಸಕ್ರಿಯವಾಗಿ ಬೆಳೆಸಿದ್ದಕ್ಕಾಗಿ ಅವರು ಹಿಂದೂ ವಿದ್ಯಾಲಯ ಕುಟುಂಬವನ್ನು ಶ್ಲಾಘಿಸಿದರು. "ಒಂದು ಸಣ್ಣ ಪ್ರಯತ್ನವೂ ಸಹ ಅತ್ಯಂತ ದೊಡ್ಡ ಪ್ರಭಾವವನ್ನು ಬೀರಬಲ್ಲದು" ಎಂದು ಶ್ರೀ ಮೋದಿ ಅಭಿಪ್ರಾಯಪಟ್ಟರು.

ಪ್ರಾಚೀನ ಜ್ಞಾನವನ್ನು ಸ್ಮರಿಸಿದ ಪ್ರಧಾನಮಂತ್ರಿಯವರು, ಮಹಾನ್ ಸಂತ ತಿರುವಳ್ಳುವರ್ ಅವರಿಗೆ ಶ್ರದ್ಧಾಂಜಲಿ ಸಲ್ಲಿಸಿದರು, ಅವರ ಬೋಧನೆಗಳು ಇಂದಿನ ವಿದ್ಯಾರ್ಥಿಗಳಿಗೆ ಅಪಾರ ಸಮಕಾಲೀನ ಪ್ರಸ್ತುತತೆಯನ್ನು ಹೊಂದಿವೆ ಎಂದು ಒತ್ತಿಹೇಳಿದರು. ಅಧ್ಯಕ್ಷ ಪುಟಿನ್ ಅವರಿಗೆ ತಿರುಕ್ಕುರಲ್‌ನ ರಷ್ಯನ್ ಅನುವಾದವನ್ನು ಉಡುಗೊರೆಯಾಗಿ ನೀಡಿದ ಇತ್ತೀಚಿನ ರಾಜತಾಂತ್ರಿಕ ಸಂವಾದವನ್ನು ಅವರು ಹೆಮ್ಮೆಯಿಂದ ಹಂಚಿಕೊಂಡರು. "ಅವರ ಬೋಧನೆಗಳು ವಿದ್ಯಾರ್ಥಿಗಳಾದ ನಿಮ್ಮೆಲ್ಲರಿಗೂ ಅತ್ಯಂತ ಪ್ರಮುಖವಾಗಿವೆ" ಎಂದು ಶ್ರೀ ಮೋದಿ ಹೇಳಿದರು.

ತಿರುಕ್ಕುರಲ್‌ನ ಕಾಲಾತೀತ ಮಾರ್ಗದರ್ಶನವನ್ನು ವಿವರಿಸಿದ ಪ್ರಧಾನಮಂತ್ರಿಯವರು, ಈ ಗ್ರಂಥವನ್ನು ಜೀವಿತಾವಧಿಯ ಕಲಿಕಾರ್ಥಿಗಳಿಗೆ ಅದ್ಭುತ ಕಂಪಾಸ್ (ದಿಕ್ಸೂಚಿ) ಎಂದು ಶ್ಲಾಘಿಸಿದರು. ಕಲಿತ ಜ್ಞಾನವನ್ನು ದಿನನಿತ್ಯದ ಜೀವನದಲ್ಲಿ ಸಕ್ರಿಯವಾಗಿ ಅಳವಡಿಸಿಕೊಳ್ಳುವ ಅತ್ಯಗತ್ಯ ಅಗತ್ಯವನ್ನು ಒತ್ತಿಹೇಳುವ ತಿರುವಳ್ಳುವರ್ ಅವರ ಪ್ರಸಿದ್ಧ ಕುರಲ್ ಅನ್ನು ಅವರು ಎತ್ತಿಹಿಡಿದರು, ಇದನ್ನು ವಿದ್ಯಾರ್ಥಿಗಳಿಗೆ ಪ್ರಮುಖ ಪಾಠ ಎಂದು ಕರೆದರು. "ಏನನ್ನಾದರೂ ಕಲಿಯುವುದರ ಜೊತೆಗೆ, ಅದನ್ನು ತನ್ನ ಜೀವನದಲ್ಲಿ ಅಳವಡಿಸಿಕೊಳ್ಳುವುದು ಸಹ ಅತ್ಯಗತ್ಯ" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ರಾಷ್ಟ್ರವನ್ನು ಬೆಸೆಯುವ ಆಳವಾದ ಸಾಂಸ್ಕೃತಿಕ ಬಾಂಧವ್ಯವನ್ನು ಎತ್ತಿಹಿಡಿದ ಪ್ರಧಾನಮಂತ್ರಿಯವರು, ಮಹಾಕವಿ ಭಾರತಿಯಾರ್ ಅವರು ಕಾಶಿಯಲ್ಲಿ ಅನುಭವಿಸಿದ ಆಧ್ಯಾತ್ಮಿಕ ಮತ್ತು ರಾಷ್ಟ್ರೀಯ ಪ್ರಜ್ಞೆಯಿಂದ ತೀವ್ರವಾಗಿ ಪ್ರಭಾವಿತರಾಗಿದ್ದರು ಎಂದು ಉಲ್ಲೇಖಿಸಿದರು. ಕವಿಯ ವಿಶಾಲವಾದ ಜೀವನ ಮತ್ತು ತತ್ವಶಾಸ್ತ್ರದಿಂದ ಸ್ಫೂರ್ತಿ ಪಡೆಯಲು ಮತ್ತು ಓದಲು ಅವರು ವಿದ್ಯಾರ್ಥಿಗಳನ್ನು ಪ್ರೋತ್ಸಾಹಿಸಿದರು. "ಆಧ್ಯಾತ್ಮಿಕ ಮತ್ತು ರಾಷ್ಟ್ರೀಯ ಪ್ರಜ್ಞೆಯಿಂದ ತುಂಬಿದ ಕಾಶಿಯ ವಾತಾವರಣವು ಅವರ ಆಲೋಚನೆಗಳ ಮೇಲೆ ಆಳವಾದ ಪ್ರಭಾವ ಬೀರಿತು" ಎಂದು ಶ್ರೀ ಮೋದಿ ಹೇಳಿದರು.

ತಮ್ಮ ಸಂಸದೀಯ ಕ್ಷೇತ್ರವನ್ನು ಈ ಸಾಂಸ್ಕೃತಿಕ ಪರಂಪರೆಗೆ ಜೋಡಿಸಿದ  ಪ್ರಧಾನಮಂತ್ರಿಯವರು, ಕಾಶಿಯ ಜನತೆಯು ಇಂದಿಗೂ ಮಹಾಕವಿ ಭಾರತಿಯಾರ್ ಅವರನ್ನು ಪ್ರೀತಿಯಿಂದ ಸ್ಮರಿಸುತ್ತಾರೆ ಎಂದು ತಿಳಿಸಿದರು. ತಮ್ಮ ಆಲೋಚನೆಗಳು ಮತ್ತು ಕನಸುಗಳನ್ನು ಧೈರ್ಯದಿಂದ ಮುನ್ನಡೆಸಲು ಕವಿಯ ಪ್ರಸಿದ್ಧ ಮಂತ್ರ 'ಅಚ್ಚಮಿಲ್ಲೈ, ಅಚ್ಚಮಿಲ್ಲೈ' (ಭಯವಿಲ್ಲ, ಭಯವಿಲ್ಲ) ಅನ್ನು ಸಕ್ರಿಯವಾಗಿ ಅಳವಡಿಸಿಕೊಳ್ಳುವಂತೆ ಅವರು ಯುವಜನರಿಗೆ ಕರೆ ನೀಡಿದರು. "ದೊಡ್ಡ ಕನಸು ಕಾಣಿ, ವಿಭಿನ್ನವಾಗಿ ಆಲೋಚಿಸಿ ಮತ್ತು ನಿರ್ಭಯರಾಗಿರಿ" ಎಂದು ಶ್ರೀ ಮೋದಿ ಪ್ರತಿಪಾದಿಸಿದರು.

ತಮ್ಮ ಸ್ವಂತ ಜೀವನದ ಅನುಭವಗಳನ್ನು ಮೆಲುಕು ಹಾಕಿದ ಪ್ರಧಾನಮಂತ್ರಿಯವರು, ದೇಶದ ಕುರಿತಾದ ತಮ್ಮ ಆಳವಾದ ತಿಳುವಳಿಕೆಯು, ವ್ಯಾಪಕ ಪ್ರಯಾಣ ಮತ್ತು ವಿವಿಧ ಪ್ರದೇಶಗಳ ಜನರೊಂದಿಗೆ ಬೆರೆತು, ನೇರವಾಗಿ ಕಲಿಯುವ ಮೂಲಕ ರೂಪುಗೊಂಡಿತು ಎಂದು ವಿವರಿಸಿದರು. 1990ರ ದಶಕದ ಆರಂಭದಲ್ಲಿ ಕನ್ಯಾಕುಮಾರಿಯಿಂದ ಕಾಶ್ಮೀರದವರೆಗೆ ನಡೆದ ಏಕತಾ ಯಾತ್ರೆಯಲ್ಲಿ ತಾವು ಭಾಗವಹಿಸಿದ್ದನ್ನು ಅವರು ಪ್ರೀತಿಯಿಂದ ಸ್ಮರಿಸಿಕೊಂಡರು, ಅಲ್ಲಿ ಗಿರಿಜಾ ಅಮ್ಮನವರೊಂದಿಗಿನ ಅವರ ದೀರ್ಘಕಾಲದ ಪರಿಚಯವು ಮೊದಲು ಪ್ರಾರಂಭವಾಯಿತು. "ಅಂದಿನಿಂದ ನಮ್ಮ ಈ ಪರಿಚಯವು ಮುಂದುವರಿದಿದೆ" ಎಂದು ಶ್ರೀ ಮೋದಿ ಹೇಳಿದರು.

ತಮಿಳುನಾಡಿನೊಂದಿಗೆ ತಮಗಿರುವ ಆಳವಾದ ವೈಯಕ್ತಿಕ ಬಾಂಧವ್ಯವನ್ನು ವ್ಯಕ್ತಪಡಿಸಿದ ಪ್ರಧಾನಮಂತ್ರಿಯವರು, ತಮ್ಮ ವ್ಯಾಪಕ ಪ್ರಯಾಣವು ರಾಷ್ಟ್ರದ ಅಪಾರ ವೈವಿಧ್ಯತೆಯನ್ನು ಹತ್ತಿರದಿಂದ ಅರ್ಥಮಾಡಿಕೊಳ್ಳಲು ಮತ್ತು ಗೌರವಿಸಲು ತಮಗೆ ನೆರವಾಯಿತು ಎಂದು ಹೇಳಿದರು. "ತಮಿಳು ಭಾಷೆ ಮತ್ತು ತಮಿಳು ಸಂಸ್ಕೃತಿಯ ಮೇಲೆ ನನ್ನ ಜೀವನದಲ್ಲಿ ಇರುವ ಪ್ರೀತಿಯು ಈ ಎಲ್ಲಾ ಅನುಭವಗಳಿಂದಲೇ ಹುಟ್ಟಿಕೊಂಡಿದೆ" ಎಂದು ಶ್ರೀ ಮೋದಿ ಅವರು ಪ್ರತಿಪಾದಿಸಿದರು.

ರಾಷ್ಟ್ರೀಯ ಭಾವೈಕ್ಯತೆಯಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳಲು ವಿದ್ಯಾರ್ಥಿಗಳನ್ನು ಪ್ರೋತ್ಸಾಹಿಸಿದ ಪ್ರಧಾನಮಂತ್ರಿಯವರು, ವ್ಯಾಪಕವಾಗಿ ಪ್ರಯಾಣಿಸಲು ಮತ್ತು ಹೋದಲ್ಲೆಲ್ಲಾ ತಮಿಳು ಸಂಸ್ಕೃತಿಯನ್ನು ಹೆಮ್ಮೆಯಿಂದ ಕೊಂಡೊಯ್ಯುವಂತೆ ಯುವಜನರಿಗೆ ಕರೆ ನೀಡಿದರು. ರಾಷ್ಟ್ರದ ಐಕ್ಯತೆಯನ್ನು ಬಲಪಡಿಸಲು ಅತ್ಯಂತ ವಿಭಿನ್ನ ಹಿನ್ನೆಲೆಯ ಜನರೊಂದಿಗೆ ಸಕ್ರಿಯವಾಗಿ ಸ್ನೇಹ ಬೆಳೆಸುವ ಜೊತೆಗೆ ತಮಿಳು ಕವನಗಳು, ಕಥೆಗಳು ಮತ್ತು ಪರಂಪರೆಯನ್ನು ಹಂಚಿಕೊಳ್ಳುವಂತೆ ಅವರು ಸಲಹೆ ನೀಡಿದರು. "ನಮ್ಮ ರಾಷ್ಟ್ರದ ಐಕ್ಯತೆಯು ನೀವು ಬೆಳೆಸುವ ಸ್ನೇಹದಿಂದ ನಿರ್ಮಿತವಾಗುತ್ತದೆ" ಎಂದು ಶ್ರೀ ಮೋದಿ ಅವರು ಹೇಳಿದರು .

ದೇಶದ ಶೈಕ್ಷಣಿಕ ಕ್ಷೇತ್ರವನ್ನು ಪರಿವರ್ತಿಸುತ್ತಿರುವ ಅಭೂತಪೂರ್ವ ರಚನಾತ್ಮಕ ಬದಲಾವಣೆಗಳನ್ನು ವಿವರಿಸಿದ ಪ್ರಧಾನಮಂತ್ರಿಯವರು, ಹೊಸ ಪೀಳಿಗೆಗೆ ಲಭ್ಯವಿರುವ ಅವಕಾಶಗಳ ಬೃಹತ್ ವಿಸ್ತರಣೆಯನ್ನು ಎತ್ತಿಹಿಡಿದರು. ಸ್ಪಷ್ಟ ಅಂಕಿಅಂಶಗಳ ಸಾಕ್ಷ್ಯವನ್ನು ಒದಗಿಸಿದ ಅವರು, ದೇಶದಲ್ಲಿದ್ದ ವಿಶ್ವವಿದ್ಯಾಲಯಗಳ ಸಂಖ್ಯೆಯು 2014 ರಲ್ಲಿ 750 ರಿಂದ ಇಂದು 1,300 ಕ್ಕೂ ಹೆಚ್ಚು ಹೆಚ್ಚಾಗಿದೆ, ಹಾಗೆಯೇ ಕಾಲೇಜುಗಳು 38,000 ರಿಂದ 52,000 ಕ್ಕೂ ಹೆಚ್ಚು ಹೆಚ್ಚಾಗಿವೆ, ಜೊತೆಗೆ ಹಲವಾರು ಹೊಸ ಐಐಟಿ (IIT), ಐಐಎಂ (IIM), ಐಐಐಟಿ (IIIT) ಮತ್ತು ಏಮ್ಸ್ (AIIMS) ಸಂಸ್ಥೆಗಳನ್ನು ಸ್ಥಾಪಿಸಲಾಗಿದೆ ಎಂದು ಗಮನಿಸಿದರು. "ಇಂದು ದೇಶದ ಶಿಕ್ಷಣದ ಸಂಪೂರ್ಣ ಚಿತ್ರಣವೇ ಬದಲಾಗುತ್ತಿದೆ" ಎಂದು ಶ್ರೀ ಮೋದಿ ಹೇಳಿದರು.

ಹೊಸ ಶಿಕ್ಷಣ ನೀತಿಯಿಂದ ನಡೆಸಲ್ಪಡುವ ಗುಣಮಟ್ಟದ ಸುಧಾರಣೆಗಳನ್ನು ಒತ್ತಿಹೇಳಿದ ಪ್ರಧಾನಮಂತ್ರಿಯವರು, ದೇಶೀಯ ಸಂಸ್ಥೆಗಳಿಗೆ ವೇಗವಾಗಿ ಬೆಳೆಯುತ್ತಿರುವ ಜಾಗತಿಕ ಗುರುತಿಸುವಿಕೆಯನ್ನು ಸಂಭ್ರಮಿಸಿದರು. ಕ್ಯೂಎಸ್ (QS) ಶ್ರೇಯಾಂಕದಲ್ಲಿ ಕಾಣಿಸಿಕೊಂಡ ಭಾರತೀಯ ವಿಶ್ವವಿದ್ಯಾಲಯಗಳ ಸಂಖ್ಯೆಯು 2015 ರಲ್ಲಿ ಕೇವಲ 14 ರಿಂದ ಇತ್ತೀಚಿನ ಶ್ರೇಯಾಂಕದಲ್ಲಿ 52 ಕ್ಕೆ ಗಮನಾರ್ಹವಾಗಿ ಹೆಚ್ಚಾಗಿದೆ, ಇದು ನೇರವಾಗಿ ವಿದ್ಯಾರ್ಥಿಗಳಿಗೆ ವ್ಯಾಪಕವಾಗಿ ವಿಸ್ತರಿಸಿದ ಆಯ್ಕೆಗಳಿಗೆ ಕಾರಣವಾಗಿದೆ ಎಂದು ಅವರು ಬೆಟ್ಟು ಮಾಡಿದರು. "ಹೆಚ್ಚಿನ ಸಂಸ್ಥೆಗಳು, ಹೆಚ್ಚಿನ ಆಯ್ಕೆಗಳು ಮತ್ತು ನಿಮಗಾಗಿ ಹೆಚ್ಚಿನ ಅವಕಾಶಗಳು ಲಭ್ಯವಿವೆ" ಎಂದು ಶ್ರೀ ಮೋದಿ ದೃಢಪಡಿಸಿದರು.

ಯುವಜನರ ವಿವಿಧ ಆಕಾಂಕ್ಷೆಗಳನ್ನು ಉಲ್ಲೇಖಿಸಿದ ಪ್ರಧಾನಮಂತ್ರಿಯವರು, ಅನೇಕ ವಿದ್ಯಾರ್ಥಿಗಳು ವಿಶೇಷವಾಗಿ ಕ್ರೀಡೆಯಲ್ಲಿ ಸಾಂಪ್ರದಾಯಿಕವಲ್ಲದ ವೃತ್ತಿಜೀವನವನ್ನು ಮುನ್ನಡೆಸಲು ಬಯಸುತ್ತಾರೆ ಎಂಬುದನ್ನು ಒಪ್ಪಿಕೊಂಡರು. ಕ್ರೀಡೆಯನ್ನು ಕೇವಲ ಮನರಂಜನೆಯಾಗಿ ನೋಡದೆ ಸೂಕ್ತ ವೃತ್ತಿಯಾಗಿ ಪರಿಗಣಿಸುವುದನ್ನು ಖಚಿತಪಡಿಸಿಕೊಳ್ಳಲು ದೇಶವು ಹೊಸ ಕ್ರೀಡಾ ಮೂಲಸೌಕರ್ಯಗಳನ್ನು ಸಕ್ರಿಯವಾಗಿ ನಿರ್ಮಿಸುತ್ತಿದೆ ಮತ್ತು ಉತ್ತಮ ತರಬೇತಿ ಹಾಗೂ ಬೆಂಬಲವನ್ನು ನೀಡುತ್ತಿದೆ ಎಂದು ಅವರು ಅವರಿಗೆ ಭರವಸೆ ನೀಡಿದರು, ಇದು ಈಗಾಗಲೇ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ರಾಷ್ಟ್ರದ ಕೀರ್ತಿಯನ್ನು ಹೆಚ್ಚಿಸುತ್ತಿದೆ. "ಯುವ ಕ್ರೀಡಾಪಟುಗಳು ಉತ್ತಮ ತರಬೇತಿ ಮತ್ತು ಬೆಂಬಲವನ್ನು ಪಡೆಯುತ್ತಿದ್ದಾರೆ" ಎಂದು ಶ್ರೀ ಮೋದಿ ಉಲ್ಲೇಖಿಸಿದರು.

ಅತ್ಯಂತ ಮಹತ್ವಾಕಾಂಕ್ಷೆಯ ರಾಷ್ಟ್ರೀಯ ಕ್ರೀಡಾ ಗುರಿಗಳನ್ನು ವಿವರಿಸಿದ ಪ್ರಧಾನಮಂತ್ರಿಯವರು, ದೇಶವು 2030ರ ಕಾಮನ್‌ವೆಲ್ತ್ ಕ್ರೀಡಾಕೂಟವನ್ನು ಆಯೋಜಿಸಲು ಶ್ರಮಿಸುತ್ತಿದೆ ಮತ್ತು 2036ರ ಒಲಿಂಪಿಕ್ಸ್ ಅನ್ನು ಆಯೋಜಿಸುವ ಭವ್ಯ ಕನಸಿನೊಂದಿಗೆ ಮುನ್ನಡೆಯುತ್ತಿದೆ ಎಂದು ಘೋಷಿಸಿದರು. ಮುಂಬರುವ ಬೃಹತ್ ಜಾಗತಿಕ ಕ್ರೀಡಾಕೂಟಗಳ ಹರಿವಿನೊಂದಿಗೆ, ಯುವಜನರು ಈಗ ಅತ್ಯುತ್ತಮ ವೇದಿಕೆ, ಸಾಮರ್ಥ್ಯ ಮತ್ತು ಸರ್ಕಾರದ ಸಂಪೂರ್ಣ ಬೆಂಬಲವನ್ನು ಹೊಂದಿದ್ದಾರೆ ಎಂದು ಅವರು ಸಾರಿದರು. "ಅವಕಾಶಗಳು ಅಪಾರವಾಗಿವೆ, ಮತ್ತು ನಿಮ್ಮ ಪೀಳಿಗೆಯು ಕ್ರೀಡಾ ಪ್ರಪಂಚದಲ್ಲೂ ಭಾರತವನ್ನು ಹೊಸ ಎತ್ತರಕ್ಕೆ ಕೊಂಡೊಯ್ಯುತ್ತದೆ ಎಂಬ ನಂಬಿಕೆ ನನಗಿದೆ" ಎಂದು ಶ್ರೀ ಮೋದಿ ಒತ್ತಿ ಹೇಳಿದರು.

ಯುವ ಪೀಳಿಗೆಯ ಮೇಲಿನ ತಮ್ಮ ವಿಶ್ವಾಸವನ್ನು ವ್ಯಕ್ತಪಡಿಸಿದ ಪ್ರಧಾನಮಂತ್ರಿಯವರು, ವಿದ್ಯಾರ್ಥಿಗಳೊಂದಿಗೆ ತೊಡಗಿಸಿಕೊಂಡಿದ್ದು ಮತ್ತು ಅವರ ಜೀವಂತ ಕನಸುಗಳನ್ನು ಅನುಭವಿಸಿದ್ದು ಭವ್ಯವಾದ ರಾಷ್ಟ್ರೀಯ ಭವಿಷ್ಯದ ಮೇಲಿನ ತಮ್ಮ ನಂಬಿಕೆಯನ್ನು ಗಮನಾರ್ಹವಾಗಿ ಬಲಪಡಿಸಿದೆ ಎಂದು ಹೇಳಿದರು. ಮುಂದಿನ ಯುಗವನ್ನು ರೂಪಿಸುವ ಮತ್ತು ವ್ಯಾಖ್ಯಾನಿಸುವ ಅಂತಿಮ ನಾಯಕರು ಯುವಕರೇ ಎಂದು ಅವರು ಘೋಷಿಸಿದರು. "ಭಾರತದ ಭವಿಷ್ಯವು ಅತ್ಯಂತ ಭವ್ಯವಾಗಿರುತ್ತದೆ, ಮತ್ತು ಆ ಭವಿಷ್ಯದ ಅತಿದೊಡ್ಡ ನಾಯಕರು (heroes) ನೀವೇ" ಎಂದು ಶ್ರೀ ಮೋದಿ ಅವರು ದೃಢಪಡಿಸಿದರು.

ಅವರ ಸಾಮರ್ಥ್ಯಗಳ ಮೇಲಿನ ತಮ್ಮ ಸಂಪೂರ್ಣ ನಂಬಿಕೆಯನ್ನು ಪುನರುಚ್ಚರಿಸಿದ ಪ್ರಧಾನಮಂತ್ರಿಯವರು, ಉಪಸ್ಥಿತರಿದ್ದ ವಿದ್ಯಾರ್ಥಿಗಳ ಅಪಾರ ಪ್ರತಿಭೆ, ಆತ್ಮವಿಶ್ವಾಸ ಮತ್ತು ಸಾಮರ್ಥ್ಯವನ್ನು ಶ್ಲಾಘಿಸಿದರು. ಕೆಲವು ಬೃಹತ್, ಐತಿಹಾಸಿಕ ರಾಷ್ಟ್ರೀಯ ಸಂಕಲ್ಪಗಳನ್ನು ಮಾಡಲು ತಮ್ಮೊಂದಿಗೆ ಸೇರಿಕೊಳ್ಳುವಂತೆ ಅವರು ನೆರೆದಿದ್ದ ಯುವಜನರನ್ನು ಆಹ್ವಾನಿಸಿದರು. "ಇಂದು ನಾನು ನಿಮ್ಮೆಲ್ಲರೊಂದಿಗೆ ಕೆಲವು ದೊಡ್ಡ ಸಂಕಲ್ಪಗಳನ್ನು ಪುನರುಚ್ಚರಿಸಲು ಬಯಸುತ್ತೇನೆ" ಎಂದು ಶ್ರೀ ಮೋದಿ ಅವರು ಹೇಳಿದರು.

ಉನ್ನತ ಸಂವಾದಾತ್ಮಕ ಮತ್ತು ಶಕ್ತಿಯುತ ಶಪಥದೊಂದಿಗೆ ತಮ್ಮ ಭಾಷಣವನ್ನು ಮುಕ್ತಾಯಗೊಳಿಸಿದ ಪ್ರಧಾನಮಂತ್ರಿಯವರು, ಮಹಾನ್ ರಾಷ್ಟ್ರೀಯ ಗುರಿಗಳ ಸರಣಿಗೆ ಬದ್ಧರಾಗಲು "ನಾವು ಅದನ್ನು ಸಾಧಿಸುತ್ತೇವೆ!" (We will Do it!) ಎಂಬ ಪ್ರತಿಧ್ವನಿಸುವ ಘೋಷಣೆಯೊಂದಿಗೆ ಬೃಹತ್ ಜನಸ್ತೋಮವನ್ನು ಮುನ್ನಡೆಸಿದರು. 2047ರ ವೇಳೆಗೆ ವಿಕಸಿತ ಭಾರತವನ್ನು ನಿರ್ಮಿಸಲು, ಜಾಗತಿಕ ಆರ್ಥಿಕತೆಯಲ್ಲಿ ಪ್ರಮುಖ ಮೂರರಲ್ಲಿ ಒಂದಾಗಲು, ಸ್ವಾವಲಂಬಿ ಜಾಗತಿಕ ಉತ್ಪಾದನಾ ಕೇಂದ್ರವನ್ನು ಸ್ಥಾಪಿಸಲು, ಒಲಿಂಪಿಕ್ಸ್ ಆಯೋಜಿಸಲು ಮತ್ತು ಚಂದ್ರನ ಮೇಲೆ ಭಾರತೀಯನನ್ನು ತಲುಪಿಸಲು ತಮ್ಮನ್ನು ಸಂಪೂರ್ಣವಾಗಿ ಮುಡಿಪಾಗಿಡುವಂತೆ ಅವರು ಯುವಜನರಿಗೆ ಕರೆ ನೀಡಿದರು.

*****