કેન્દ્રીય સંચાર અને ગ્રામીણ વિકાસ રાજ્ય મંત્રી ડૉ. ચંદ્ર શેખર પેમ્માસાનીએ આજે "કપટપૂર્ણ સંચાર (Fraudulent Communications) સામે લડવા માટે ITU માનકોનું અમલીકરણ" વિષય પર આયોજિત ITU રાઉન્ડટેબલ પરિષદમાં કી-નોટ એડ્રેસ આપ્યું હતું. આ રાઉન્ડટેબલ યશોભૂમિ ખાતે ચાલુ ઇન્ડિયા મોબાઇલ કોંગ્રેસ (IMC) 2026 ના ઉપક્રમે યોજાયું હતું, જેનું ઔપચારિક ઉદ્ઘાટન પ્રધાનમંત્રી શ્રી નરેન્દ્ર મોદી દ્વારા 08 ઓક્ટોબર 2026 ના રોજ કરવામાં આવ્યું હતું.

સભાને સંબોધતા ડૉ. પેમ્માસાનીએ જણાવ્યું હતું કે પ્રધાનમંત્રી શ્રી નરેન્દ્ર મોદીના નેતૃત્વ હેઠળ ભારતે એક અબજથી વધુ લોકોને જોડ્યા છે, અને હવે પછીનું કાર્ય એ સુનિશ્ચિત કરવાનું છે કે આ કનેક્ટિવિટી વિશ્વાસ સાથે આવે. આંતરરાષ્ટ્રીય સહયોગની જરૂરિયાત પર ભાર મૂકતા તેમણે કહ્યું, "ફ્રોડ એ નેટવર્કની સમસ્યા છે. તેનો જવાબ પણ નેટવર્ક આધારિત હોવો જોઈએ. અને કારણ કે નેટવર્ક્સ વૈશ્વિક છે, તેથી તેનો જવાબ પણ વૈશ્વિક હોવો જોઈએ."

ઓળખ છુપાવવી, ડિજિટલ એરેસ્ટ સ્કેમ્સ, AI-જનરેટેડ વોઈસ ક્લોનિંગ અને ડીપફેક્સ સહિતના સંગઠિત, સરહદ પારના ફ્રોડના વધતા જતા ખતરા પર પ્રકાશ પાડતા ડૉ. પેમ્માસાનીએ નોંધ્યું હતું કે ભારતીયોએ 2024 માં આવા ફ્રોડમાં ₹22,800 કરોડથી વધુ રકમ ગુમાવી હતી. તેમણે વધુમાં ઉમેર્યું હતું કે સરકારે આનાથી શીખ મેળવી છે અને હવે બહુસ્તરીય સંરક્ષણ વ્યવસ્થા ઊભી કરી છે.

ડૉ. પેમ્માસાનીએ કપટપૂર્ણ સંચાર સામે લડવા માટે ભારતના પાંચ-સ્તરીય અભિગમની રૂપરેખા આપી હતી, જેમાં બનાવટી આંતરરાષ્ટ્રીય કોલ્સનું રીયલ-ટાઇમ બ્લોકિંગ, C-DOTના AI-આધારિત ASTR ટૂલ દ્વારા ફ્રોડ મોબાઈલ કનેક્શન્સની ઓળખ, સંચાર સાથી દ્વારા નાગરિકોની સહભાગિતા, ડિજિટલ ઇન્ટેલિજન્સ પ્લેટફોર્મ (DIP) દ્વારા બાતમીની આપ-લે અને ઉભરતા ફ્રોડ માર્ગોને અટકાવવાના ઉપાયોનો સમાવેશ થાય છે.

કેન્દ્રીય રાજ્ય મંત્રીએ રેખાંકિત કર્યું હતું કે ASTR એ 82 લાખથી વધુ કપટપૂર્ણ કનેક્શન્સ કાપી નાખવામાં મદદ કરી છે, જ્યારે સંચાર સાથી એપે આશરે 2.5 કરોડ ડાઉનલોડ્સ નોંધાવ્યા છે. ડિજિટલ ઇન્ટેલિજન્સ પ્લેટફોર્મ ટેલિકોમ ઓપરેટરો, બેંકો અને કાયદા અમલીકરણ એજન્સીઓ સહિત 1,600 થી વધુ સંસ્થાઓને જોડે છે. ફાઇનાન્શિયલ ફ્રોડ રિસ્ક ઇન્ડિકેટરે 15 મહિનામાં ₹5,000 કરોડથી વધુના સંભવિત નાણાકીય નુકસાનને રોકવામાં મદદ કરી છે.

સરહદ પારના ફ્રોડને અટકાવવામાં રાષ્ટ્રીય ઉકેલોની મર્યાદાઓનો સ્વીકાર કરતા, ડૉ. પેમ્માસાનીએ આંતરરાષ્ટ્રીય નેટવર્ક્સ પર કોલરની ઓળખની ડિજિટલ ચકાસણી માટે ITU માનકોના મહત્વ પર પ્રકાશ પાડ્યો હતો. તેમણે સરકારો, નિયામકો, ઓપરેટરો અને ટેકનોલોજી કંપનીઓને આવરી લેતા સંયુક્ત ટ્રાયલ્સ માટેના ITU ના પ્રસ્તાવને આવકાર્યો હતો અને યોગદાન આપવા માટે ભારતની સજ્જતાની પુષ્ટિ કરી હતી.

કેન્દ્રીય રાજ્ય મંત્રીએ ઈચ્છુક દેશો વચ્ચે પસંદગીના આંતરરાષ્ટ્રીય રૂટ્સ પર ટ્રાયલ્સ શરૂ કરવા, વિવિધ નેટવર્ક ટેકનોલોજીની સહભાગિતા સુનિશ્ચિત કરવા અને ITU માનકોમાં સતત સુધારા માટે પાઠોનો સમાવેશ કરવાનું સૂચન કર્યું હતું. તેમણે વધુમાં ભારપૂર્વક જણાવ્યું હતું કે જેમ જેમ 6G નેટવર્ક્સ વિકસાવવામાં આવે છે, તેમ શરૂઆતથી જ વિશ્વાસનું નિર્માણ કરવું આવશ્યક છે.

તેમના સંબોધનના સમાપનમાં, ડૉ. પેમ્માસાનીએ ભારપૂર્વક જણાવ્યું હતું કે કપટપૂર્ણ સંચાર સામે લડવા માટે ટેકનોલોજી, નિયમન અને સહયોગે એકસાથે કામ કરવું પડશે. "દેશમાં, ભારત પ્રતિક્રિયાથી અટકાયત તરફ આગળ વધ્યું છે. હવે, ITU સાથે, ચાલો આપણે રાષ્ટ્રીય ઉકેલોથી વૈશ્વિક વિશ્વાસ તરફ આગળ વધીએ," તેમણે જણાવ્યું હતું.

SM/BS/JD

(રીલીઝ આઈડી: 2321452) મુલાકાતી સંખ્યા : 13