قومی راجدھانی خطے (این سی آر) میں قومی شاہراہوں کے راستوں پر ماحولیاتی تحفظ کے اقدامات کو مزید مضبوط بنانے کے لیے، بھارتی قومی شاہراہ اتھارٹی (این ایچ اے آئی) نے دوارکا ایکسپریس وے کے 8.7 کلومیٹر طویل پیکیج-4 میں نصب 25 ڈیزل جنریٹر سیٹوں پر اخراج پر قابو پانے والے جدید آلات (آر ای سی ڈی) لگانے کی پہل کی ہے۔ یہ حصہ بسئی سے کھیڑکی دھولا/دہلی-گروگرام ایکسپریس وے کے چوراہے تک جاتا ہے۔

یہ پہل قومی راجدھانی خطے میں ڈیزل جنریٹر سیٹوں کو منضبط کرنے سے متعلق فضائی معیار کے انتظام کے کمیشن (سی اے کیو ایم) کی ہدایات کے مطابق نافذ کی جا رہی ہے۔ اس کا مقصد فضائی آلودگی کو کم کرنا ہے، خصوصاً سردیوں کے موسم میں، جب درجہ وار کارروائی منصوبے (جی آر اے پی) کے تحت اقدامات کیے جاتے ہیں۔ دوارکا ایکسپریس وے کا پیکیج-4 دہلی-قومی راجدھانی خطے میں واقع ہے، جہاں سردیوں کے مہینوں میں فضائی آلودگی شدید ہو جاتی ہے۔ اس اہم مدت میں فضا کے معیار کو بہتر بنانے کے لیے سی اے کیو ایم نے علاقے میں چلنے والے ڈیزل جنریٹر سیٹوں کو منضبط کرنے اور ان سے ہونے والے اخراج پر قابو پانے کے اقدامات لازمی قرار دیے ہیں۔

یہ آلات ایکسپریس وے پر روشنی کے انتظام اور دیگر متعلقہ کاموں کے لیے استعمال ہونے والے ڈیزل جنریٹر سیٹوں پر نصب کیے جائیں گے، تاکہ ان کے چلنے کے دوران اخراج پر قابو پانے کے اقدامات کو مزید مؤثر بنایا جا سکے۔ اس کام میں آلات کی تنصیب، جانچ اور انہیں باضابطہ طور پر فعال کرنا شامل ہے۔ اس کے ساتھ ان کی جامع دیکھ بھال کی سہولت بھی فراہم کی جائے گی۔

ان آلات کی تنصیب قومی شاہراہوں کی تعمیر اور آپریشن میں ماحولیاتی تحفظ کو شامل کرنے سے متعلق این ایچ اے آئی کی وسیع تر حکمت عملی کا حصہ ہے، خاص طور پر قومی راجدھانی خطے میں واقع منصوبوں کے لیے۔ اس پہل سے یہ یقینی بنانے میں مدد ملے گی کہ قومی شاہراہوں سے متعلق ضروری کاموں کے لیے استعمال ہونے والے ڈیزل جنریٹر سیٹوں میں متعلقہ ضابطوں کے مطابق اخراج پر قابو پانے کے مناسب سسٹم نصب ہوں۔ این ایچ اے آئی نے یہ بھی واضح کیا ہے کہ تصدیق اور ضابطوں کی تعمیل کے مقصد سے ہر ڈیزل جنریٹر سیٹ اور مقام پر نصب آلات کی جی پی ایس سے منسلک تصاویر محفوظ رکھی جائیں گی۔

دہلی-این سی آر میں قومی شاہراہوں کے منصوبوں کے لیے این ایچ اے آئی کے ماحولیاتی اقدامات کا مقصد اس وسیع تر ہدف سے ہم آہنگ ہے کہ قومی شاہراہوں کے بنیادی ڈھانچے کی توسیع اور اسے چلانے کے دوران فضائی معیار کے ضابطوں پر عمل درآمد کو مزید مضبوط بنایا جائے۔

***

) ش ح – رک )

U.NO- 4917

(ریلیز آئی ڈی: 2321443) وزیٹر کاؤنٹر : 7