ભારતીય વાયુસેના (IAF) એ 08 ઓક્ટોબર 2026ના રોજ એરફોર્સ સ્ટેશન હિંડન, ગાઝિયાબાદ ખાતે તેની 94મી વર્ષગાંઠની ઉજવણી કરી હતી. આ પ્રસંગે વાયુસેનાની કાર્યકારી ક્ષમતાઓ, તકનીકી પ્રગતિ, વ્યાવસાયિકતા અને સમૃદ્ધ વારસાનું પ્રદર્શન કરવામાં આવ્યું હતું. ઔપચારિક એએફ ડે પરેડ (AFDP) ની સમીક્ષા વાયુસેનાના વડા, એર ચીફ માર્શલ એ. પી. સિંહે કરી હતી. મહેમાનોમાં સેનાના વડા, નૌકાસેનાના વડા, વાયુસેનાના ભૂતપૂર્વ વડાઓ અને અન્ય વરિષ્ઠ લશ્કરી અધિકારીઓ અને નાગરિકો સામેલ હતા.

કાર્યક્રમની શરૂઆત પ્રેસિડન્ટ કલર્સના માર્ચ-ઇન સાથે થઈ હતી, જે રાષ્ટ્ર પ્રત્યે વાયુસેનાની અસાધારણ સેવા, વ્યાવસાયિક ઉત્કૃષ્ટતા, સમર્પણ અને પ્રતિબદ્ધતાનું પ્રતીક છે. આગમન પર, વાયુસેનાના વડાને રાષ્ટ્રધ્વજ અને વાયુસેનાના ધ્વજને લહેરાવતા 'ધ્વજ' ફોર્મેશનમાં ત્રણ Mi-17 1V હેલિકોપ્ટર દ્વારા હવાઈ સલામી આપવામાં આવી હતી. પરેડનું કમાન્ડ ગ્રુપ કેપ્ટન મનીષ શર્માએ સંભાળ્યું હતું અને ત્યારબાદ ઇન્વેસ્ટિચર સમારોહ યોજાયો હતો, જે દરમિયાન એર વોરિયર્સને વીરતા અને વિશિષ્ટ સેવા માટે મેડલ એનાયત કરવામાં આવ્યા હતા. ઉત્કૃષ્ટતા માટે યુનિટોને સાઇટેશન પણ એનાયત કરવામાં આવ્યા હતા.

આ વર્ષના વાયુસેના દિવસ (AF Day)ની થીમ 'ભારતીય વાયુસેના: અચૂક, અભેદ્ય અને સચોટ' (Indian Air Force: Infallible, Impervious and Precise) હતી, જે ચોકસાઈ, દ્રઢતા અને કાર્યકારી શ્રેષ્ઠતા સાથે દેશના આકાશની રક્ષા કરવા પ્રત્યે ભારતીય વાયુસેનાની અતૂટ પ્રતિબદ્ધતાને પ્રતિબિંબિત કરે છે.

એર ચીફ માર્શલ એ. પી. સિંહ, વાયુસેનાના વડાએ તેમના સંબોધનમાં રેખાંકિત કર્યું હતું કે “હવાઈ શક્તિ એ રાષ્ટ્રીય હિતોના રક્ષણનું પ્રાથમિક સાધન છે”. તેમણે એવું પણ જણાવ્યું કે “ભારતીય વાયુસેના સતર્ક, પ્રતિબદ્ધ અને કોઈપણ આકસ્મિક પરિસ્થિતિને પહોંચી વળવા તૈયાર છે”, અને ભારપૂર્વક જણાવ્યું કે ઓપરેશનલ ક્ષમતા અને સજ્જતા યોગ્ય દિશામાં આગળ વધી રહી છે. તેમણે જણાવ્યું હતું કે “કોઈપણ વાયુસેના પાસે વિશ્વનું સૌથી અદ્યતન વિમાન હોઈ શકે છે, પરંતુ તેની સાચી શક્તિ તેની ઓપરેશનલ સજ્જતા—જ્યારે પણ કોલ આવે ત્યારે તે કેટલી ઝડપથી અને આત્મવિશ્વાસથી કાર્ય કરી શકે છે - દ્વારા માપવામાં આવે છે.” ઓપરેશન સિંદૂરનો ઉલ્લેખ કરતા તેમણે નોંધ્યું હતું કે કોમ્બેટ ઓપરેશન્સમાં વાયુસેનાના ઝડપી ટ્રાન્સફોર્મેશને તેની “વિનાશક શક્તિ તેમજ અસરકારક એર ડિફેન્સ ઓપરેશન્સ”નું પ્રદર્શન કર્યું છે. તેમણે વધુમાં ભારપૂર્વક જણાવ્યું હતું કે “‘અચૂક, અભેદ્ય, સચોટ’ એ માત્ર એક ટેગલાઈન નથી; તે આપણી શક્તિ અને સંકલ્પનું સ્વરૂપ છે.”

તકનીકી પ્રગતિ અને આત્મનિર્ભરતા પ્રત્યે વાયુસેનાની પ્રતિબદ્ધતાનો પુનરોચ્ચાર કરતા તેમણે જણાવ્યું હતું કે “આત્મનિર્ભરતા એ આપણો માર્ગદર્શક સિદ્ધાંત છે”, સાથે ભારપૂર્વક જણાવ્યું હતું કે આર્ટિફિશિયલ ઇન્ટેલિજન્સ અને સ્વાયત્ત સિસ્ટમો સહિતની ઉભરતી ટેકનોલોજીને માનવ સત્તાને કેન્દ્રમાં રાખીને સંકલિત કરવામાં આવશે. તેમણે એ પણ સ્પષ્ટ કર્યું કે “આધુનિક સંઘર્ષમાં સફળતા માટે ઊંડી સિનર્જીની જરૂર હોય છે” અને આર્મી અને નેવી સાથે સંયુક્ત આયોજન અને સંકલિત કોમ્બેટ એપ્લિકેશન એ દૈનિક પ્રવૃત્તિ છે. અંતરિક્ષના પાસા પર તેમણે ઉલ્લેખ કર્યો કે “અંતરિક્ષ એ હવાઈ ક્ષેત્રનો કુદરતી વિસ્તાર છે” સાથે જ ઈસરો અને દેશી સ્પેસ ઈન્ડસ્ટ્રી સાથે વધતા સહયોગને પણ રેખાંકિત કર્યો જેમાં ગગનયાન મિશનમાં વાયુસેનાની ભૂમિકા પણ સામેલ છે.

વાયુસેનાના અસ્કયામતોના સ્ટેટિક ડિસ્પ્લેએ દર્શકો અને મીડિયા કર્મચારીઓને વાયુસેનાની ઓપરેશનલ અને કોમ્બેટ ક્ષમતાઓની વ્યાપક શ્રેણી જોવાની તક પૂરી પાડી હતી. પરેડમાં ફાઇટર એરક્રાફ્ટ, હેલિકોપ્ટર, સરફેસ-ટુ-એર અને સરફેસ-ટુ-સરફેસ ગાઇડેડ વેપન સિસ્ટમ્સ, રડાર અને વન-વે એટેક અનમેન્ડ એરિયલ સિસ્ટમ્સનું પ્રદર્શન કરવામાં આવ્યું હતું. આ પ્રદર્શને વાયુસેનાના 'મેક ઇન ઇન્ડિયા' અને સ્વદેશી ક્ષમતા વિકાસ પરના સતત ધ્યાન પર પ્રકાશ પાડ્યો હતો. 24 સ્ક્વોડ્રન 'ધ હોક્સ', 110 હેલિકોપ્ટર યુનિટ 'ધ વેનગાર્ડ્સ', 200 સ્ક્વોડ્રન 'સ્કંદ', 2402 સ્ક્વોડ્રન 'વજ્ર' અને ઈલેક્ટ્રોનિક વોરફેર રેન્જને પાંચ યુનિટ સાઇટેશન એનાયત કરવામાં આવ્યા હતા.

આ ઉજવણીમાં ટીમ શક્તિનું પ્રદર્શન પણ સામેલ હતું, જે વાયુસેનાની તમામ મહિલા એર વોરિયર ડ્રીલ ટીમ છે. તેની ચોકસાઈ, ચપળતા અને શિસ્ત માટે જાણીતી આ ટીમે સુમેળભરી હિલચાલ અને જટિલ ફોર્મેશન્સનું પ્રદર્શન કર્યું હતું, જે વ્યાવસાયિકતા અને મહિલા એર વોરિયર્સના સશક્તિકરણને દર્શાવે છે.
33 યુવાન એર વોરિયર્સની બનેલી આઈએએફ ડ્રમર્સ ટીમે ગતિશીલ ફોર્મેશન અને એક્રોબેટિક હિલચાલ સાથે સ્નેર ડ્રમ્સ, રોટો ડ્રમ્સ, બેઝ ડ્રમ્સ અને સિમ્બલ્સ દર્શાવતું વાઇબ્રન્ટ પ્રદર્શન રજૂ કર્યું હતું.

આ કાર્યક્રમમાં આઈએએફ હેરિટેજ ફ્લાઇટ દ્વારા એક શાનદાર એરિયલ ડિસ્પ્લે પણ દર્શાવવામાં આવ્યું હતું જે ભારતીય લશ્કરી વિમાનચાલનનો સમૃદ્ધ વારસો દર્શાવે છે. વિન્ટેજ 'ટાઇગર મોથ' એરક્રાફ્ટ દ્વારા હવાઈ પ્રદર્શને પ્રેક્ષકોને મંત્રમુગ્ધ કર્યા હતા અને વાયુસેનાના ગૌરવશાળી વારસાને યોગ્ય શ્રદ્ધાંજલિ આપી હતી.

એરફોર્સ સ્ટેશન હિંડન ખાતે ઉજવણી બાદ, 25 ઓક્ટોબર 2026ના રોજ વારાણસીના નમો ઘાટ પર એરફોર્સ ડે એરિયલ ડિસ્પ્લે યોજાશે.

 

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com

(રીલીઝ આઈડી: 2321161) મુલાકાતી સંખ્યા : 13