صدر جمہوریۂ ہند محترمہ دروپدی مرمو نے آج آل انڈیا انسٹی ٹیوٹ آف میڈیکل سائنسز (اے آئی آئی ایم ایس) بلاسپور کے ادارے پہلے جلسۂ تقسیم اسناد کے انعقاد کے موقع پر پہلے فارغ التحصیل بیچ کے طلبہ کو اسناد سے نوازا، جو ادارے کی ترقی اور ملک میں طبی تعلیم اور حفظان صحت میں اس کے تعاون کے حوالے سے ایک اہم سنگِ میل ہے۔

فارغ التحصیل طلبہ سے خطاب کرتے ہوئے، صدر جمہوریۂ ہند محترمہ دروپدی مرمو نے فارغ التحصیل طلبہ اور گولڈ میڈل حاصل کرنے والے طلبہ کے ساتھ ساتھ ان والدین، سرپرستوں اور اساتذہ کو بھی سراہا جنہوں نے ان کے تعلیمی سفر کے دوران ان کی معاونت کی۔ انہوں نے کہا کہ ایمس بلاسپور سے فارغ التحصیل پہلا بیچ ہونے کی حیثیت سے ادارے کی شناخت اور ورثے کو تشکیل دینے میں ان کا خصوصی کردار ہے۔ انہوں نے ان پر زور دیا کہ وہ اپنے طرزِ عمل، عزم اور خدمت کے ذریعے ادارے کی ساکھ کو برقرار رکھیں اور انہیں یاد دلایا کہ طبی پیشہ انسانیت کے تئیں ایک ذمہ داری عائد کرتا ہے۔

انہوں نے گریجویٹ طلبہ کی حوصلہ افزائی کی کہ وہ اپنے کام میں لوگوں کی ضروریات پر خاص توجہ دیں، خاص طور پر ان لوگوں کی جو دور دراز اور ناقابلِ رسائی علاقوں میں رہتے ہیں اور جنہیں خصوصی صحت کی دیکھ بھال تک محدود رسائی حاصل ہے۔ ایمس بلاسپور کے جغرافیائی محلِ وقوع کو مدنظر رکھتے ہوئے، انہوں نے ادارے اور اس کے فارغ التحصیل طلبہ سے کہا کہ وہ خطے میں ثالثی سطح کی صحت کی دیکھ بھال کو مضبوط بنانے کے لیے کام کریں، جس میں ٹیلی میڈیسن، ماہرین سے مشاورت، طبی عملے کی تربیت اور جدید ٹیکنالوجی کا استعمال شامل ہے۔

صدر جمہوریہ نے آیوشمان بھارت پردھان منتری جن آروگیہ یوجنا کے کردار کو بھی اجاگر کیا، جو معاشی طور پر کمزور کنبوں پر صحت کی دیکھ بھال کے مالی بوجھ کو کم کرنے میں معاون ہے، جس کے تحت اہل مستفیدین کو فی کنبہ فی سال 5 لاکھ روپے کا صحت بیمہ فراہم کیا جاتا ہے۔ انہوں نے کہا کہ اس اسکیم کے تحت علاج پر 2 لاکھ کروڑ روپے سے زیادہ خرچ کیے جا چکے ہیں اور متعلقہ فریقوں سے کہا کہ وہ اس بات کو یقینی بنائیں کہ صحت کے تحفظ کے ان اقدامات سے متعلق معلومات دور دراز علاقوں میں رہنے والے لوگوں تک پہنچیں۔ انہوں نے اس ضرورت پر بھی زور دیا کہ ایمس جیسے سرکردہ ادارے بنیادی اور کم لاگت والی صحت کی دیکھ بھال کے حل تیار کرنے میں اپنا کردار ادا کریں۔

گریجویٹ کرنے والے طلبہ کو تاحیات سیکھنے والے بنے رہنے کی تلقین کرتے ہوئے، صدر جمہوریہ نے ان سے کہا کہ وہ طبی طریقۂ کار اور صحت کی خدمات میں ہونے والی تبدیلیوں کے ساتھ ہم آہنگی کو برقرار رکھیں، جبکہ تحقیق کو ایسی جدت میں تبدیل کریں جو لوگوں کی زندگیوں کو بہتر بنائے۔ انہوں نے کہا، ’’میڈیسن کا شعبہ صرف سائنس اور ٹیکنالوجی کا شعبہ نہیں ہے۔ یہ درحقیقت ہمدردی اور اعتماد کا شعبہ بھی ہے۔‘‘

ہماچل پردیش کے گورنر جناب کوندَر گپتا نے فارغ التحصیل طلبہ کو ان کی کامیابی پر مبارکباد دی اور ہماچل پردیش اور پڑوسی ریاستوں کے لوگوں، بالخصوص دور دراز اور قبائلی علاقوں سے تعلق رکھنے والے افراد کے لیے خصوصی صحت کی دیکھ بھال کو ان کے قریب پہنچانے میں ایمس بلاسپور کے اہم کردار کو اجاگر کیا۔ ایمس بلاسپور کے افتتاح کے موقع پر وزیر اعظم جناب نریندر مودی کے تبصرے کو یاد کرتے ہوئے، انہوں نے کہا کہ یہ ادارہ صحت کی دیکھ بھال، تعلیم اور تحقیق میں وسیع پیمانے پر اپنا کردار ادا کر رہا ہے اور اس نے صحت کے شعبے میں ہماچل کی حیثیت کو مضبوط کیا ہے۔

فارغ التحصیل طلبہ کے لیے اپنی نیک خواہشات کا اظہار کرتے ہوئے، انہوں نے انہیں یاد دلایا کہ ان کی ڈگریاں معاشرے اور ملک کے تئیں ایک ذمہ داری عائد کرتی ہیں اور ان پر زور دیا کہ وہ اپنے پیشہ ورانہ سفر میں ہمدردی، حساسیت اور خدمت کو مرکزی حیثیت دیں۔انہوں نے اعتماد کا اظہار کیا کہ فارغ التحصیل طلبہ اپنے علم اور جذبۂ خدمت کو ملک کی خدمت کے لیے استعمال کریں گے اور کہا، ’’مجھے یقین ہے کہ ایمس بلاسپور کے یہ فارغ التحصیل طلبہ اپنی صلاحیت، اپنے علم اور اپنے جذبۂ خدمت کے ذریعے ملک کے مختلف شعبوں میں ایک نئی شناخت قائم کریں گے اور ایک ترقی یافتہ بھارت کی تعمیر میں اہم کردار ادا کریں گے۔‘‘

اس موقع پر خطاب کرتے ہوئے، صحت و خاندانی بہبود کےمرکزی وزیر جناب جے۔ پی۔ نڈا نے ایمس بلاسپور کے پہلے بیچ کے طلبہ کو اپنا تعلیمی سفر مکمل کرتے ہوئے دیکھنے پر خوشی اور فخر کا اظہار کیا۔ ملک میں طبی تعلیم کی توسیع کو اجاگر کرتے ہوئے، انہوں نے بتایا کہ میڈیکل کالجوں کی تعداد 384 سے بڑھ کر 800 سے زیادہ ہو گئی ہے، جبکہ انڈرگریجویٹ میڈیکل نشستوں کی تعداد 51,348 سے بڑھ کر 1.42 لاکھ ہو گئی ہے۔ اجتماع سے خطاب کرتے ہوئے، انہوں نے حکومت کے 2029 تک 75,000 انڈرگریجویٹ اور پوسٹ گریجویٹ طبی نشستوں کے اضافے کے ہدف کا ذکر کیا، جس میں مزید 10,000 ایم بی بی ایس اور پی جی نشستیں قائم کرنے کے لیے 15,000 کروڑ روپے کی تخصیص بھی شامل ہے۔

وزیر اعظم جناب نریندر مودی کی دوراندیش قیادت میں اے آئی آئی ایم ایس نیٹ ورک کی توسیع کو اجاگر کرتے ہوئے، وزیر موصوف نے کہا کہ کئی دہائیوں تک ملک میں صرف ایک ایمس تھا، جبکہ گزشتہ 12 برسوں میں 16 نئے ایمس قائم کیے گئے ہیں۔ انہوں نے سامعین پر زور دیا کہ وہ اس توسیع کے پیمانے اور ملک بھر میں معیاری طبی تعلیم اور خصوصی صحت کی دیکھ بھال تک رسائی کو وسیع کرنے کے لیے کی جانے والی کوششوں کو تسلیم کریں۔

ایمس بلاسپور کے بارے میں بات کرتے ہوئے، جناب نڈا نے بتایا کہ ادارے نے ابتدائی طور پر مقرر کیے گئے 750 بستروں کے ہدف سے آگے بڑھتے ہوئے اب 776 بستروں کی گنجائش حاصل کر لی ہے، جبکہ 26 اسپیشلٹیز اور 15 سپر اسپیشلٹیز مکمل طور پر فعال ہیں۔ انہوں نے پیچیدہ جراحی کے طریقۂ کار، کارڈیک کیتھیٹرائزیشن کے ذریعے مداخلتی علاج، نیورو سرجری، جامع نگہداشت، کینسر کی نگہداشت اور ریڈیوتھیرپی کی خدمات کی دستیابی کو اجاگر کیا اور بتایا کہ یہ پیش رفت گزشتہ پانچ برسوں کے دوران حاصل کی گئی ہے۔ انہوں نے یہ بھی بتایا کہ گزشتہ چار برسوں کے دوران ادارے میں او پی ڈی مشاورت کی تعداد 12 لاکھ سے تجاوز کر گئی ہے اور آئی پی ڈی میں داخلوں کی تعداد 1 لاکھ سے تجاوز کر گئی ہے۔

جناب نڈا نے اے آئی آئی ایم ایس بلاسپور کے فیکلٹی اور عملے کی اس رفتار سے ادارے کی ترقی کے لیے بھرپور ستائش کی اور اس کی مسلسل ترقی پر اعتماد کا اظہار کیا۔ فارغ التحصیل طلبہ سے خطاب کرتے ہوئے، انہوں نے ان پر زور دیا کہ وہ اے آئی آئی ایم ایس بلاسپور کی ساکھ کو برقرار رکھیں اور اس کی اعلیٰ معیار اور خدمت کی اقدار کو اپنے پیشہ ورانہ سفر میں آگے لے کر چلیں۔ انہوں نے کہا، "آپ کی تیز رفتار ترقی کے ساتھ، مجھے یقین ہے کہ بہت جلد اے آئی آئی ایم ایس بلاسپور ملک کے کسی بھی دوسرے اے آئی آئی ایم ایس کے برابر ہوگا۔" انہوں نے اس اعتماد کا بھی اظہار کیا کہ فارغ التحصیل طلبہ اعلیٰ معیار کی خدمات فراہم کریں گے اور انسانیت کے لیے کام کریں گے۔

ہماچل پردیش کے وزیر اعلیٰ جناب سکھوندر سنگھ سکھو نے بھی اس موقع پر فارغ التحصیل طلبہ اور ایمس بلاسپور کے لیے اپنی نیک خواہشات کا اظہار کیا۔

اس تقریب میں راجیہ سبھا کے رکن پارلیمنٹ جناب ہرش مہاجن، لیفٹیننٹ جنرل (ڈاکٹر) دلجیت سنگھ (ریٹائرڈ)، ایگزیکٹو ڈائریکٹر، ایمس بلاسپور اور پروفیسر (ڈاکٹر) نریندر کمار اروڑہ، صدر، ایمس بلاسپور بھی موجود تھے۔

تقریب میں مجموعی طور پر 92 طلبہ کو ڈگریاں تفویض کی گئیں: 43 ایم بی بی ایس، 26 بی ایس سی آنرز نرسنگ، 9 بی ایس سی الائیڈ ہیلتھ کیئر اور 14 ایم ڈی/ایم ایس طلبہ۔ صدر جمہوریہ نے تعلیمی کارکردگی کے اعتراف میں مختلف شعبوں کے نمایاں طلبہ کو گولڈ میڈلز بھی پیش کیے۔ ایوارڈ حاصل کرنے والوں میں ایم بی بی ایس سے محترمہ ساگریکا اور جناب رکشت وششٹھ، بی ایس سی الائیڈ ہیلتھ کیئر سائنس سے محترمہ بھاونا تھکرال، بی ایس سی آنرز نرسنگ سے محترمہ بھاویا ملہوترا اور ایم ڈی، کمیونٹی اینڈ فیملی میڈیسن سے جناب پرتیک گوئل شامل تھے۔

اے آئی آئی ایم ایس بلاسپور کے بارے میں

ایمس بلاسپور نے جنوری 2021 میں اپنے پہلے ایم بی بی ایس بیچ کے داخلے کے ساتھ اپنے تعلیمی سفر کا آغاز کیا، جس کے بعد 2022 میں الائیڈ ہیلتھ کیئر سائنسز اور نرسنگ سائنسز کے پہلے بیچ شروع ہوئے۔ اکتوبر 2022 میں وزیر اعظم جناب نریندر مودی کی موجودگی میں ادارے کا باضابطہ افتتاح کیا گیا۔ اس کے بعد سے، ادارے نے اپنی تعلیمی، طبی اور تحقیقی صلاحیتوں میں بتدریج توسیع کی ہے۔

سال2024 سے 2025 کے دوران، ادارے میں 3 لاکھ سے زیادہ او پی ڈی مشاورتیں ریکارڈ کی گئیں اور 17,000 سے زائد افراد کو ہنگامی طبی خدمات فراہم کی گئیں۔ سال کے دوران 3,500 سے زیادہ بڑی سرجریاں، 900 سے زائد معمولی سرجریاں، 1,000 سے زیادہ کارڈیک کیتھیٹرائزیشن کے طریقۂ کار اور 3,200 سے زائد ڈائیلاسس سیشن کیے گئے، جبکہ ادارے کی تشخیصی لیبارٹریوں نے 10 لاکھ سے زیادہ ٹیسٹ کیے۔ اس وقت ادارے میں تقریباً 620 طلبہ مختلف انڈرگریجویٹ، پوسٹ گریجویٹ اور سپر اسپیشلٹی کورسز کی تعلیم حاصل کر رہے ہیں، جو صحت کی دیکھ بھال کی فراہمی کے ساتھ ساتھ طبی تعلیم میں اس کے بڑھتے ہوئے کردار کی عکاسی کرتا ہے۔

یہ تقریب ایمس بلاسپور کے ادارہ جاتی سفر میں ایک اہم قدم ہے، کیونکہ اس کا اولین بیچ تعلیمی تربیت سے پیشہ ورانہ خدمت کی جانب بڑھ رہا ہے۔ نئے تعلیم یافتہ ڈاکٹر، نرسیں، الائیڈ ہیلتھ کیئر پروفیشنلز اور پوسٹ گریجویٹ ماہرین ملک بھر میں مریضوں کی نگہداشت کریں گے اور عوامی صحت کو مضبوط بنانے میں اپنا کردار ادا کریں گے۔

*****

ش ح-ک ح-ق ر

UR No.4694