نیتی آیوگ نے حکومت مغربی بنگال کے تعاون اور اقوام متحدہ کے ترقیاتی پروگرام (یو این ڈی پی) کے تکنیکی تعاون سے، نیتی آیوگ کے اسٹیٹ سپورٹ مشن (ایس ایس ایم) پہل کے تحت 29 ستمبر 2026 کو کولکاتا میں ایس ڈی جی بجٹ پر ایک قومی ورکشاپ کا انعقاد کیا۔ ورکشاپ میں پائیدار ترقی کے اہداف (ایس ڈی جی) کے ساتھ منصوبہ بندی اور بجٹ سازی کے عمل کو ہم آہنگ کرنے کو مزید مضبوط بنانے پر توجہ مرکوز کی گئی۔ اس دوران ایس ڈی جی بجٹ ٹیگنگ کو ادارہ جاتی شکل دینے اور مالی وعدوں کو ذیلی قومی سطح پر قابلِ پیمائش ترقیاتی نتائج میں تبدیل کرنے پر زور دیا گیا۔

ورکشاپ میں 32 ریاستوں اور مرکز کے زیر انتظام علاقوں کے شرکاء کے علاوہ نیتی آیوگ، بھارت کے کنٹرولر اینڈ آڈیٹر جنرل (سی اے جی) اور اس کے دفاتر، وزارت شماریات و پروگرام نفاذ (ایم او ایس پی آئی)، کنٹرولر جنرل آف اکاؤنٹس (سی جی اے)، محکمہ عوامی ادارہ جات (ڈی پی ای)، انڈین انسٹی ٹیوٹ آف کارپوریٹ افیئرز (آئی آئی سی اے)، یو این ڈی پی، اقوام متحدہ کے ریذیڈنٹ کوآرڈینیٹر کا دفتر (یو این آر سی او)، ترقیاتی شراکت داروں اور ایف آئی سی سی آئی ، سی آئی آئی، سی ای بی آئی، ٹاٹا اسٹیل فاؤنڈیشن، انٹیلی کیپ اور جی آئی زیڈ کے نمائندوں نے شرکت کی۔ ہریانہ، اڈیشہ، میگھالیہ اور مغربی بنگال کے سرکاری نمائندوں نے ایس ڈی جی بجٹ کے نفاذ اور اسے ادارہ جاتی شکل دینے کے اپنے تجربات کا اشتراک کیا، جو ایس ڈی جی کی مقامی سطح پر عمل درآمد کے لیے پوری حکومت اور پورے معاشرے کے نقطۂ نظر کی عکاسی کرتا ہے۔

افتتاحی اجلاس میں ڈاکٹر سوپن داس گپتا، وزیر خزانہ، حکومت مغربی بنگال؛ ڈاکٹر آر. بالاسبرامنیم، معزز رکن، نیتی آیوگ؛ جناب کے. سنجے مورتی، کنٹرولر اینڈ آڈیٹر جنرل آف انڈیا، ورچوئل طور پر؛ ڈاکٹر وی. اننت ناگیشورن، چیف اکنامک ایڈوائزر، حکومت ہند، ورچوئل طور پر؛ جناب پربھات کمار مشرا، ایڈیشنل چیف سکریٹری، خزانہ، حکومت مغربی بنگال؛ جناب اسٹیفن پریسنر، اقوام متحدہ کے ریذیڈنٹ کوآرڈینیٹر؛ ڈاکٹر انجیلا لوسیگی، ریذیڈنٹ نمائندہ، یو این ڈی پی؛ اور جناب راجب کمار سین، پروگرام ڈائریکٹر (ایس ڈی جی)، نیتی آیوگ نے شرکت کی۔

مہمان خصوصی کی حیثیت سے خطاب کرتے ہوئے ڈاکٹر سوپن داس گپتا نے کہا، "جو چیز ہمارے پاس ہمیشہ موجود نہیں رہی، وہ ایک ایسی واضح کڑی ہے جو کسی مقصد سے ہدف، بجٹ میں مختص رقم اور پھر اس اکائی تک جاتی ہے جو دراصل اس رقم کو خرچ کرے گی۔ اس کڑی کے بغیر، ایس ڈی جی لیجر کے اثاثوں کے پہلو میں محض ایک خواہش بن کر رہ جاتے ہیں، جس کے ساتھ ذمہ داری کے پہلو میں کوئی متعلقہ اندراج نہیں ہوتا۔ ایس ڈی جی بجٹ ٹیگنگ اس کڑی کو قائم کرنے کا ایک طریقۂ کار ہے۔"

اپنے کلیدی خطاب میں ڈاکٹر آر. بالاسبرامنیم نے کہا، "ریاستی اخراجات کی ایس ڈی جیز کے ساتھ نقشہ بندی ایک اہم قدم ہے۔ پوری حکومت اور پورا معاشرہ محض نعرے لگ سکتے ہیں، لیکن آج محکمہ خزانہ، سیاسی قیادت، کثیرالجہتی اداروں اور نجی شعبے کے ساتھ مل کر یہ تصور حقیقت کا روپ اختیار کر رہا ہے۔ آگے کا کام ہر ریاست کی رہنمائی کرنا ہے تاکہ خرچ کی گئی رقم کو دانش مندی سے خرچ کی گئی رقم کے طور پر ظاہر کیا جا سکے۔"

جناب پربھات کمار مشرا، ایڈیشنل چیف سکریٹری، خزانہ، حکومت مغربی بنگال نے اس بات کو اجاگر کیا کہ ریاست نے پہلی بار اپنے بجٹ کی ایس ڈی جی کے ہدف کی سطح پر نقشہ بندی کی ہے اور اس عمل کو اپنے مربوط مالیاتی انتظامی نظام میں شامل کیا ہے۔

جناب اسٹیفن پریسنر نے نجی شعبے کی شمولیت کے لیے بھارت کے فعال فریم ورک پر روشنی ڈالی، جس میں کارپوریٹ سماجی ذمہ داری (سی ایس آر)، کاروباری ذمہ داری اور پائیداری کی رپورٹنگ، سرمایہ بازاروں میں ماحولیاتی، سماجی اور انتظامی (ای ایس جی) عوامل اور سوشل اسٹاک ایکسچینج شامل ہیں۔ انہوں نے پائیداری کو بنیادی کاروباری فیصلہ سازی میں شامل کرنے کی ضرورت پر زور دیا۔

ڈاکٹر انجیلا لوسیگی نے اخراجات کو مخصوص ایس ڈی جی اہداف سے جوڑنے اور اس بات کا جائزہ لینے میں ایس ڈی جی بجٹ ٹیگنگ کی اہمیت کو اجاگر کیا کہ آیا وسائل ان لوگوں تک پہنچ رہے ہیں جنہیں ان کی سب سے زیادہ ضرورت ہے۔ انہوں نے سی ایس آر، سرمایہ کاری اور انسان دوستی کو ترقیاتی ترجیحات کے ساتھ ہم آہنگ کرنے کی ضرورت پر بھی زور دیا۔ انہوں نے سرکاری اور نجی تنظیموں کو ایس ڈی جیز کو فیصلہ سازی کے مرکز میں رکھنے میں مدد دینے کے لیے آئی ایس او اور یو این ڈی پی کی جانب سے شروع کیے گئے مشترکہ معیارات کا بھی ذکر کیا۔

بات چیت میں اس بات پر زور دیا گیا کہ ایس ڈی جی بجٹ ٹیگنگ حکومتوں کو ترقیاتی اہداف کے مقابلے میں اخراجات کو ظاہر کرنے، خلا کی نشاندہی کرنے اور شواہد پر مبنی منصوبہ بندی کو مضبوط بنانے کے قابل بنا سکتی ہے۔ نیتی آیوگ، بھارت کے سی اے جی اور یو این ڈی پی کی جانب سے مشترکہ طور پر تیار کردہ "گائیڈ آن میپنگ اسٹیٹ بجٹ ٹو دی ایس ڈی جیز" پر ریاستی بجٹ کو ایس ڈی جی اہداف کے ساتھ ہم آہنگ کرنے کے لیے ایک عملی فریم ورک کے طور پر تبادلہ خیال کیا گیا۔

بات چیت میں ایس ڈی جی ترجیحات کو سالانہ بجٹ کے چکر میں شامل کرنے اور پیمائش سے مشن موڈ میں نفاذ کی جانب پیش رفت کے لیے درکار ادارہ جاتی انتظامات قائم کرنے کی اہمیت پر بھی زور دیا گیا۔

ورکشاپ میں چار تکنیکی اجلاس منعقد کیے گئے، جن میں ایس ڈی جی بجٹ ٹیگنگ کے ڈیزائن سے متعلق مختلف پہلوؤں کا احاطہ کیا گیا۔ ان میں ٹیگ کیے جانے والے اخراجات کی شناخت، ٹیگنگ کی مناسب سطح کا تعین، اکاؤنٹس کے سربراہ کے ساتھ ربط، ایس ڈی جی اہداف کی ٹیگنگ، نیتی آیوگ کی اسکیم-ایس ڈی جی میپنگ اور ویلیو اسائنمنٹ کے ذریعے اخراجات کو متعلقہ ایس ڈی جی اہداف سے منسوب کرنا شامل تھا۔

ہریانہ، اڈیشہ، میگھالیہ اور مغربی بنگال سمیت مختلف ریاستوں نے ایس ڈی جی بجٹ کے نفاذ اور اسے ادارہ جاتی شکل دینے کے اپنے تجربات کا اشتراک کیا۔ ایس ڈی جی بجٹ کو سالانہ بجٹ کے چکر میں ضم کرنے سے متعلق بات چیت میں ادارہ جاتی ذمہ داریوں، مفاہمت، معیار کی یقین دہانی، رپورٹنگ اور کارکردگی آڈٹ جیسے پہلوؤں کا احاطہ کیا گیا۔

پرنسپل اکاؤنٹنٹ جنرل (اے اینڈ ای)، جناب نونیت گپتا کی قیادت میں "میکنگ اٹ ہیپن: ایس ڈی جی بجٹنگ ان دی اینول بجٹ سائیکل" کے موضوع پر منعقدہ اجلاس میں بجٹ کی تیاری، ادارہ جاتی ذمہ داریوں اور مفاہمت، معیار کی یقین دہانی، رپورٹنگ اور کارکردگی آڈٹ سمیت جواب دہی کے طریقۂ کار میں ایس ڈی جی بجٹ ٹیگنگ کے انضمام کا جائزہ لیا گیا، جس میں سی اے جی کے کردار پر بھی توجہ مرکوز کی گئی۔

نجی شعبے کی شمولیت سے متعلق ایک خصوصی اجلاس میں ایس ڈی جیز کے ساتھ نجی شعبے کی مسلسل وابستگی کو مستحکم کرنے کے لیے پالیسی فریم ورک، اختراعی مالی اعانت اور ذمہ دارانہ کاروباری طریقۂ کار کو فروغ دینے کے امکانات کا جائزہ لیا گیا۔ اجلاس میں ٹاٹا اسٹیل فاؤنڈیشن، انٹیلی کیپ، آئی آئی سی اے، ایم او ایس پی آئی، ایف آئی سی سی آئی، جی آئی زیڈ، آئی ٹی سی لمیٹڈ، سی آئی آئی اور ایس ای بی آئی کے نمائندوں نے شرکت کی۔

جیسے جیسے بھارت وِکسِت بھارت@2047 کی جانب پیش قدمی کر رہا ہے اور 2030 ایس ڈی جیز کے حصول کی جانب ایک اہم سنگِ میل ہے، ورکشاپ نے باہمی تعاون پر مبنی وفاقیت کو مضبوط بنانے اور ریاستوں اور مرکز کے زیر انتظام علاقوں کو ان کی منصوبہ بندی، بجٹ سازی اور حکمرانی کے عمل میں ایس ڈی جیز کو شامل کرنے میں مدد دینے کے نیتی آیوگ کے عزم کی توثیق کی۔ بات چیت میں عوامی اخراجات، ترقیاتی ترجیحات اور قابلِ پیمائش نتائج کے درمیان ربط کو مضبوط بنانے اور پیمائش سے عمل درآمد کی جانب منتقلی کو تیز کرنے کی ضرورت پر زور دیا گیا۔

***

UR-4507

(ش ح۔اس ک  )

(ریلیز آئی ڈی: 2318104) وزیٹر کاؤنٹر : 11