કેન્દ્રીય વાણિજ્ય અને ઉદ્યોગ મંત્રી શ્રી પિયૂષ ગોયલે યુનાઇટેડ સ્ટેટ્સ G20 અધ્યક્ષતા હેઠળ આયોજિત વિસ્કોન્સિનના મિલવૉકી ખાતે G20 વેપાર મંત્રીઓની બેઠકના ઉદ્ઘાટન દિવસે ભાગ લીધો હતો.

ખાદ્ય અને વેપાર પરના સત્રમાં બોલતા, શ્રી ગોયલે ચર્ચાઓના કેન્દ્રમાં ખાદ્ય સામગ્રીને રાખવા બદલ અધ્યક્ષતાનો આભાર માન્યો હતો. તેમણે કહ્યું કે સૌ માટે ખાદ્ય સુરક્ષા સુનિશ્ચિત કરવી અને ખેડૂતો માટે વધુ તકો ઊભી કરવી એ ભારતની નીતિના કેન્દ્રમાં છે અને પુનરુચ્ચાર કર્યો કે ખાદ્ય સામગ્રીનો ઉપયોગ ક્યારેય પણ કોઈ દેશ સામે દબાણના સાધન તરીકે થવો જોઈએ નહીં. તેમણે કહ્યું કે વૈશ્વિક સંઘર્ષોને કારણે ઊભી થયેલી ખાદ્ય, બળતણ અને ખાતરની કટોકટીથી ગ્લોબલ સાઉથના દેશો સૌથી વધુ પ્રતિકૂળ રીતે પ્રભાવિત થયા છે, અને ભારપૂર્વક જણાવ્યું કે આજની ખાતરની અછત આવતીકાલની ખાદ્ય કટોકટી બની શકે છે.

શ્રી ગોયલે જણાવ્યું હતું કે કોવિડ-19 મહામારી દરમિયાન, ભારતે 1.4 બિલિયનથી વધુ નાગરિકો માટે ખાદ્ય સુરક્ષા સુનિશ્ચિત કરી હતી અને જરૂરિયાતમંદ ઘણા દેશોને અન્ન પુરવઠો પૂરો પાડ્યો હતો. તેમણે નોંધ્યું હતું કે હાલમાં ભારતમાં 800 મિલિયનથી વધુ લોકોને વિનામૂલ્યે અન્ન પૂરું પાડવામાં આવી રહ્યું છે.

મંત્રીએ કહ્યું કે ભારત સાર્વજનિક સ્ટોકહોલ્ડિંગ જાળવી રાખે છે, નાના અને સીમાંત ખેડૂતો પાસેથી ખરીદી કરે છે અને, પાકની અછતની સ્થિતિમાં, ખાદ્ય સામગ્રીની ઉપલબ્ધતા અને પરવડે તેવી ક્ષમતા સુનિશ્ચિત કરવા માટે અસ્થાયી અને પારદર્શક પગલાં અપનાવે છે. તેમણે કહ્યું કે આ ઉપાયોને બાલી મંત્રી સ્તરીય નિર્ણય અને જીનિવા મંત્રી સ્તરીય ઘોષણા સહિત WTO હેઠળ માન્યતા આપવામાં આવી છે. તેમણે ખાદ્ય સુરક્ષા સુનિશ્ચિત કરવા માટે લેવામાં આવેલા ઉપાયો અને દબાવપૂર્ણ વેપાર ક્રિયાઓ વચ્ચે સ્પષ્ટ તફાવત માટે આહ્વાન કર્યું હતું.

શ્રી ગોયલે 2011 માં સ્થાપિત G20 એગ્રીકલ્ચરલ માર્કેટ ઇન્ફોર્મેશન સિસ્ટમ અને WTO ના 12મા મંત્રી સ્તરીય પરિષદમાં અપનાવવામાં આવેલા વર્લ્ડ ફૂડ પ્રોગ્રામ દ્વારા કરવામાં આવતી ખરીદીને નિકાસ મર્યાદામાંથી મુક્તિ આપવા સહિતની હાલની વ્યવસ્થાઓનો પણ ઉલ્લેખ કર્યો હતો. તેમણે WTO ને કેન્દ્રમાં રાખીને નિયમો-આધારિત, ન્યાયી, બિન-ભેદભાવપૂર્ણ, સમાન, પારદર્શક, ખુલ્લી, સમાવેશી અને બહુપક્ષીય વેપાર પ્રણાલી પ્રત્યે ભારતની પ્રતિબદ્ધતા પુનઃપુષ્ટ કરી હતી.

મંત્રીઓ પરિણામ દસ્તાવેજ, 'દબાવપૂર્ણ વેપાર ક્રિયાઓ દ્વારા ખાદ્ય સામગ્રીના હથિયારીકરણ પર G20 નિવેદન' પર સર્વસંમતિ પર પહોંચ્યા હતા અને આ વિષય પર સહયોગ ચાલુ રાખવાનો તેમનો ઈરાદો વ્યક્ત કર્યો હતો.

દિવસની શરૂઆતમાં, શ્રી ગોયલ મેક્વોન, વિસ્કોન્સિનમાં રોકવેલ ઓટોમેશન ઓફિસ અને ફેક્ટરીની મુલાકાતે G20 વેપાર મંત્રીઓ અને યુનાઇટેડ સ્ટેટ્સના વેપાર પ્રતિનિધિ રાજદૂત જેમિસન ગ્રીઅર સાથે જોડાયા હતા.

બેઠકની સાથે જ, શ્રી ગોયલે બ્રાઝિલના વિકાસ, ઉદ્યોગ, વેપાર અને સેવાઓ મંત્રી અને વિદેશ મંત્રી; યુનાઇટેડ સ્ટેટ્સના વેપાર પ્રતિનિધિ; વેપાર અને આર્થિક સુરક્ષા માટેના યુરોપિયન કમિશનર; યુનાઇટેડ કિંગડમના બિઝનેસ, ઇનોવેશન, સાયન્સ અને ટ્રેડના સેક્રેટરી ઓફ સ્ટેટ અને પ્રેસિડેન્ટ ઓફ ધ બોર્ડ ઓફ ટ્રેડ; મેક્સિકોના અર્થતંત્ર સચિવ; અને પોલેન્ડ પ્રજાસત્તાકના નાણાં અને અર્થતંત્ર મંત્રી સાથે દ્વિપક્ષીય બેઠકો યોજી હતી.

મંત્રીએ મિલવૉકી આર્ટ મ્યુઝિયમ ખાતે રાજદૂત ગ્રીઅર અને યુનાઇટેડ સ્ટેટ્સ ડિપાર્ટમેન્ટ ઓફ એગ્રીકલ્ચરના સચિવ રોલિન્સ દ્વારા આયોજિત સ્વાગત રાત્રિભોજનમાં પણ ઉપસ્થિત રહ્યા હતા.

 

SM/IJ/JD

(રીલીઝ આઈડી: 2317967) મુલાકાતી સંખ્યા : 12