કેન્દ્રીય આયુષ મંત્રાલયના રાજ્ય મંત્રી (સ્વતંત્ર પ્રભારી) અને સ્વાસ્થ્ય તથા પરિવાર કલ્યાણ મંત્રાલયના રાજ્ય મંત્રી શ્રી પ્રતાપરાવ જાધવે સંરક્ષણ મંત્રી શ્રી રાજનાથ સિંહને 23–25 નવેમ્બર, 2026 દરમિયાન બુલઢાણા જિલ્લાના લોનાર ક્રેટર લેક સહિત મહારાષ્ટ્રના આઇકોનિક પ્રવાસન સ્થળો પર ભારતીય વાયુસેનાની સૂર્ય કિરણ એરોબેટિક ડિસ્પ્લે ટીમ દ્વારા પ્રદર્શનો યોજવા અંગે વિચારણા કરવા વિનંતી કરી છે.

સંરક્ષણ મંત્રીને લખેલા પત્રમાં, શ્રી જાધવે 'સૂર્ય કિરણ' ટીમની ચોકસાઈ, કૌશલ્ય અને સુમેળભરી હવાઈ કરતબો માટેની પ્રતિષ્ઠા પર પ્રકાશ પાડ્યો હતો. તેમણે નોંધ્યું હતું કે આ ટીમનાં પ્રદર્શનો ભારતની ઉડ્ડયન ક્ષમતાઓને ઉજાગર કરવાની સાથે સાથે જનતામાં રસ જગાડે છે અને યુવાનોને ભારતીય વાયુસેનામાં તકો શોધવા માટે પ્રોત્સાહિત કરે છે.

શ્રી જાધવે ખાસ કરીને મહારાષ્ટ્રના બુલઢાણા જિલ્લામાં આવેલા લોનાર ક્રેટર લેકનો ઉલ્લેખ કર્યો, જે એક અનોખી કુદરતી રચના છે અને તેની વિશિષ્ટ ભૌગોલિક તથા પર્યાવરણીય લાક્ષણિકતાઓને કારણે પ્રવાસીઓને આકર્ષે છે. આ તળાવ તેના ખારા અને ક્ષારયુક્ત પાણી તેમજ ક્રેટરના અદભૂત દ્રશ્ય માટે જાણીતું છે.

મંત્રીએ અજંતા અને ઈલોરાની ગુફાઓ તરફ પણ ધ્યાન દોર્યું હતું, જે તેના ઉત્કૃષ્ટ સાંસ્કૃતિક અને ઐતિહાસિક મહત્વ માટે વૈશ્વિક સ્તરે માન્યતા પ્રાપ્ત છે. બંને સ્થળો યુનેસ્કો (UNESCO) ની વિશ્વ વિરાસત સૂચિમાં અંકિત છે.

શ્રી જાધવે સંરક્ષણ મંત્રાલયને વિનંતી કરી છે કે તેઓ 23, 24 અથવા 25 નવેમ્બર, 2026 દરમિયાન લોનાર, અજંતા અને ઈલોરા ખાતે 'સૂર્ય કિરણ એરોબેટિક ડિસ્પ્લે'ના પ્રદર્શનો અને તેની સાથે સંકળાયેલી પ્રેરણાદાયી પ્રવૃત્તિઓનું આયોજન કરવા માટે જરૂરી મંજૂરી આપે અને સંબંધિત સત્તાવાળાઓને યોગ્ય સૂચનાઓ જારી કરે.
પ્રસ્તાવિત એર શોનો ઉદ્દેશ્ય ભારતની ઉડ્ડયન ઉત્કૃષ્ટતા દર્શાવવાની સાથે અને મહારાષ્ટ્રની સમૃદ્ધ પ્રાકૃતિક, સાંસ્કૃતિક અને વારસાના પ્રવાસનની ક્ષમતા પર પ્રકાશ પાડવાની સાથે આ સ્થળોએ એક વિશિષ્ટ સાર્વજનિક આકર્ષણ ઉમેરવાનો છે.

SM/BS/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad