آٹھویں وزیر اعظم یادگاری اشیا کی آن لائن نیلامی 2026 میں مغربی بنگال کو نمایاں مقام حاصل ہے، جس میں ریاست کی فنکارانہ، ثقافتی، مذہبی اور ورثے سے متعلق روایات کی وسیع نمائندگی کرنے والی 109 یادگاری اشیا شامل ہیں۔ اس مجموعے میں روایتی دست کاریاں، مذہبی فن پارے، تاریخی ورثے کے مقامات کی عکاسی کرنے والے فن پارے، لوک فن کی مختلف شکلیں اور ممتاز شخصیات سے متعلق یادگاری اشیا شامل ہیں۔

وزیر اعظم یادگاری اشیا کی آن لائن نیلامی کے آٹھویں ایڈیشن کی آن لائن نیلامی 2 اکتوبر 2026 تک جاری رہے گی۔ تفصیلات، شرکت اور مکمل فہرست کے لیے وزیر اعظم یادگاری اشیا کی آن لائن نیلامی کے سرکاری پورٹل pmmementos.gov.in پر جائیں۔

مغربی بنگال کے مجموعے میں شامل نمایاں یادگاری اشیا میں درج ذیل شامل ہیں:

مجموعے میں شامل دو یادگاری اشیا میں معروف بھارتی روحانی رہنما اور سنت بابا لوکناتھ کے مجسمے شامل ہیں، جنہیں روحانی بیداری، یوگا اور عقیدت سے متعلق ان کی تعلیمات کے لیے عقیدت و احترام کی نظر سے دیکھا جاتا ہے۔ ان میں سے ایک مجسمہ چینی مٹی سے بنا ہے، جبکہ دوسرا مختلف مادے سے تیار کیا گیا ہے۔

ایک اور یادگاری شے میں شولا کاری کے ذریعے دیوی درگا کے چہرے کو نمایاں کیا گیا ہے۔ اس میں بھارتی کارک کا استعمال کیا گیا ہے، جو مغربی بنگال سے وابستہ ایک روایتی مادہ ہے۔

رتن کین سے ہاتھ سے بُنی ہوئی مغربی بنگال کی ایک منفرد یادگاری شے روایتی دست کاری کی خوب صورتی اور کاریگروں کی مہارت کو نمایاں کرتی ہے۔ اس یادگاری شے میں رتن کین کی باریک اور نفیس بُنائی کے ساتھ اس کی قدرتی ساخت کو بھی برقرار رکھا گیا ہے، جو مغربی بنگال کے دیہی ثقافتی ورثے سے وابستہ روایتی دست کاری کی عکاسی کرتی ہے۔

اس یادگاری شے میں ہاتھ سے تراشے گئے لکڑی کے بانکورا گھوڑوں کا ایک جوڑا شامل ہے، جو مغربی بنگال کے لوک فن کے ورثے کی نمائندگی کرتا ہے۔ ان مجسموں کی نمایاں خصوصیات میں لمبی گردنیں، کھڑے کان اور ہندسی اشکال شامل ہیں، جو پنچ مورا کے فنکارانہ انداز سے تعلق رکھتےہیں۔

مجموعے میں ہاتھ سے تیار کیا گیا شولا پیٹھ کا ایک فن پارہ بھی شامل ہے، جس میں ماں کالی کو دکھایا گیا ہے۔ اس فن پارے میں دیوی کا چہرہ، تیسری آنکھ اور کئی سطحوں والا تاج نمایاں ہے، جبکہ آرائشی عناصر ہاتھی دانت جیسے سفید شولہ پیٹھ سے تراشے گئے ہیں، جو بنگالی ورثے سے وابستہ ایک روایتی مادہ ہے۔

بشنوپور کی تاریخی رس منچ یادگار کی عکاسی کرنے والے ہاتھ سے بنائے گئے کینوس پر اس کی نمایاں اہرام نما ٹیراکوٹا ساخت اور محراب دار گیلریوں کو پیش کیا گیا ہے۔ اس مصوری پر فنکار نبیدِتا نیما کے دستخط ہیں۔

مغربی بنگال کے مجموعے میں رابندر ناتھ ٹیگور، بنکم چندر چٹوپادھیائے، ایشور چندر ودیا ساگر، سوامی وویکانند اور ستیہ جیت رے سے وابستہ یادگاری اشیا کے علاوہ مدن موہن مندر، جلپیش مندر، تاراپیٹھ، دکشنیشور، کلنا کے تاریخی ورثے کے مندروں، بنکورا کی لوک روایات اور درگا پوجا کی دست کاری کی عکاسی کرنے والی یادگاری اشیا بھی شامل ہیں۔

مجموعی طور پر یہ 109 یادگاری اشیا مغربی بنگال کی عقیدتی روایات، لوک اور دست کاری کے فنون، تعمیراتی ورثے، ادبی و فنکارانہ ورثے اور جدید یادگاری فن پاروں کے ذریعے ریاست کی ثقافتی زندگی کی ایک جامع تصویر پیش کرتی ہیں۔

****

 

 

 

ش ح۔ع و۔ ش ا

اُردو ریلیزنمبر:-4417 

(ریلیز آئی ڈی: 2317477) وزیٹر کاؤنٹر : 7