مرکزی وزیرِ ماحولیات، جنگلات اور موسمیاتی تبدیلی جناب بھوپیندر یادو نے آج نئی دہلی میں قومی ساحلی مشن (این سی ایم 2.0) کے نفاذ کے لیے رہنما ہدایات جاری کیں۔

یہ مرکزی شعبہ جاتی اسکیم، جس کے لیے 767 کروڑ روپے کی منظور شدہ رقم مختص کی گئی ہے، ملک کی 9 ساحلی ریاستوں اور 4 مرکز کے زیرِ انتظام علاقوں میں 2030-31 تک نافذ کی جائے گی۔ اس اسکیم کا مقصد بھارت کے ساحلی علاقوں کی موسمیاتی و ماحولیاتی لچک اور پائیداری کو مضبوط بنانا اور بحری معیشت کی صلاحیتوں سے استفادہ کرنا ہے۔ اسے ساحلی ریاستوں، مرکز کے زیرِ انتظام علاقوں اور متعلقہ فریقوں کی فعال شرکت اور باہمی تعاون کے ذریعے نافذ کیا جائے گا۔

رہنما ہدایات جاری کرتے ہوئے جناب یادو نے کہا کہ یہ مشن خطرات کے جائزے، ماحولیاتی نظام کی بحالی، آلودگی کے انتظام، حیاتیاتی تنوع کے تحفظ، پائیدار سیاحت، مقامی منصوبہ بندی، تحقیق اور صلاحیت سازی کے ذریعے ساحلی علاقوں کی لچک کو مضبوط بنائے گا۔ اس کے علاوہ واضح اور آسان بنایا گیا نفاذی ڈھانچہ کاروبار کرنے میں آسانی کو بھی فروغ دے گا۔

وزیر اعظم جناب نریندر مودی نے ہمیشہ اس بات کو اجاگر کیا ہے کہ بھارتی قومی پرچم میں موجود نیلا چکر بھارت کی بحری معیشت کی بے پناہ صلاحیت کی علامت ہے۔ ان کے تصورِ حکمرانی سے رہنمائی حاصل کرتے ہوئے قومی ساحلی مشن 2.0 ملک کے ساحلی علاقوں کی پائیدار ترقی کی سمت میں پیش رفت کرے گا اور 2047 تک ترقی یافتہ بھارت کے ویژن کو عملی جامہ پہنانے میں اپنا کردار ادا کرے گا۔

رہنما ہدایات قومی ساحلی مشن 2.0 کے مؤثر، شفاف اور بروقت نفاذ کے لیے ایک واضح اور معاون ڈھانچہ فراہم کرتی ہیں اور اس بات کو یقینی بناتی ہیں کہ اسے حکومت کی جاری اسکیموں کے ساتھ مربوط کیا جائے۔ پورے حکومتی نظام کی مشترکہ حکمتِ عملی کو فروغ دے کر، طریقۂ کار کو آسان بنا کر، ادارہ جاتی ذمہ داریوں کو واضح کرکے اور نگرانی و جواب دہی کو مضبوط بنا کر، یہ رہنما ہدایات مرکزی اور ریاستی حکومتوں کے درمیان مربوط نفاذ کو سہل بنائیں گی۔

(این سی ایم 2.0 اسکیم کے رہنما خطوط کا لنک: https://moef.gov.in/storage/tender/1790775612.pdf)

******

ش ح۔ ش ا ر۔ ول

Uno-4393

 

(ریلیز آئی ڈی: 2317358) وزیٹر کاؤنٹر : 8