Ka Kynhun Myntri jong ka sorkar pdeng ba la pyniaid da u Myntri Rangbahduh ka ri u Narendra Modi ka la mynjur ia ka skhim Green Energy Corridor Phase-III (GEC-III). Kane ka sienjam ba kongsan kan pynkhlain ia ka India’s Intra-State Transmission System (InSTS) ban plie lad ban pynkynriah ia ka bording kaba lah ban pynthymmai haduh 135 Gigawatt (GW) ha kylleng ki Jylla/ ki Union Territory.

Ka skhim ka pynbiang ruh ban pyntreikam ia ka 50 GWh jong ki Battery Energy Storage System (BESS) ha ka jaka pynmih bording ba lah ban pynthymmai (RE) lane kano kano ka jaka kaba kongsan na ka bynta ka jingpynkylla ia ka bording ban weng ia ka jingthut, ka jingkhapngiah, ka jingpynduna ia ka por ba bun ka jingpyndonkam bad ban pynbiang ia ka jingdawa ha ka por ba lah dum. Ka skhim kan pynsuk ia ka jingpyniasoh ia ka grid bad ka jingpynkynriah ia ka bording ha ki Jylla/UT jong ka India.

Ia kane ka skhim la buh thong ban seng ha u snem mang tyngka 2032-33 ha kaba ka jingpynlut ha ka projek baroh kan long T.1,86,405 klur, kaba kynthup ia ka T.1,36,378 klur na ka bynta ban kyntiew ia ki Intra-State Transmission System (InSTS) hapoh ka GEC-III (Store-III), T.50,000 klur na ka bynta ka Battery Energy Storage Systems (BESS) kaba 50 GWh. Kane ka Skhim ka kynthup ia ka jingkyrshan pisa jong ka sorkar pdeng baroh kaba long T.54,082 klur. Ka jingiarap pisa jong ka sorkar pdeng (CFA) kan iarap ban pyndap ia ka jingsiew na ka bynta ka jingpynpoi bording hapoh ki jylla bad kumta kan pynduna ia ka jinglut ha ka bording. Kumta, ka jingkyrshan jong ka Sorkar kan ai jingmyntoi ïa ki nongpyndonkam – ki nongshong shnong jong ka ri India.

Baroh ki projek ba thymmai kiba hap hapoh ka bynta jong ka InSTS yn pyntreikam lyngba ka rukom treikam Tariff Based Competitive Bidding (TBCB), katba ïa ki kam ban kyntiew ïa ki jingdon jingem ba la don lypa bad pynkhlain ïa ka rynsan yn pyntreikam hapoh ka Cost Plus Basis (CPB). Ki tnad pynpoi bording jong ki jylla kin long ka tnad pyntreikam, bad ki Transmission Service Provider (TSP) kin iashim bynta hapoh ka TBCB ha ka rukom treikam Build-Own-Operate-Maintain (BOOM).

Kane ka skhim kan iarap ban pynurlong ia ka thong ban buh ia ka bording Non-Fossil kaba 900 GW shuwa u snem 2035. Ka skhim kan nohsynniang ruh ia ka jingpynbiang bording jong ka ri ha ka samoi ba jrong bad kan kyntiew ia ka jingkiew ka bym ktah palat ia ka mariang da kaba pynduna ia ka jingpynmih carbon. Kan pynmih ia ki lad ioh kam ioh jam ha ka kam ba iadei bad ka Bording, ki karkhana shna tiar, bad ki karkhana shna jingshna. Ka jingshna bad jingpyndonkam ia ka Battery Energy Storage System (BESS) kan pynmih shuh shuh ia ki lad ioh kam ha ka kam pynlang bording hapoh ka ri. Ka skhim kan pynmih ruh ia ki kam kiba jrong samoi, ka jingpynbha, bad jingpyniaid ia ka grid ha kylleng ki Jylla kiba iashim bynta.

****