ঙসি ন্যু দিল্লিদা দোনর অমসুং কম্মুনিকেসনগী য়ুনিয়ন মিনিষ্টর জয়তিরাদিত্য এম. সিন্দিয়ানা দোকুমেন্তরি সেরিজ ‘ইনচান্তিং ৮: এ কুলিনারি জর্নি থ্রু নোর্থইষ্ট’ গী ত্রেল্লর ফোঙখ্রে। থৌরম অদু দোনর মিনিষ্ট্রিনা শীনবনি। থৌরম অদুদা দোনরগী রাজ্য মন্ত্রী দোক্তর সুকান্ত মজুমদার অমসুং দোনর মিনিষ্ট্রিগী সেনিয়র ওফিসিএলশিং অমসুং প্রদক্সন তিমগী মেম্বরশিং শরুক য়াখি।

দোকুমেন্তরি সেরিজ অদুদা ভারতকী অৱাং-নোংপোক্কী রাজ্য ৮ গী ইনাকখুল্লবা ইন্সাং মথেলশিং, মখল কয়গী ফুরুপশিং অমসুং ফজরবা নাৎ অমসুং চৎনবীশিংদা লৈবাক অসিদা খঙহল্লে।

দোনর মিনিষ্ট্রি অমসুং এন.ই.সিগী মতেংগা লোয়ননা, নোর্থ ইষ্টর্ন রিজন কম্মুনিতি রিছোর্স মেনেজমেন্ত সোসাইতিগী খুৎথাংদা সেরিজ পুথোকপগী থবক পায়খৎপনি অমসুং ফিলান্দরিং ফোরকর  মেদিয়াগা লোয়ননা অর্বান মেদিয়া প্রদক্সন্না পুথোকপনি। লমদম অসিগী মীয়ামগী অশেংবা ৱারিশিং অমসুং থৌদোকশিংগী খুৎথাংদা মীয়াম পাক-শন্না অৱাং-নোংপোক মশক তাক্নবা দোনর মিনিষ্ট্রিনা পায়খৎপা মরুওইবা থবক অমনি।

দোকুমেন্তরি সেরিজ অসিনা ভাবকশিং অৱাং-নোংপোক্কী রাজ্য ৮ গী চীঞ্জাক্কী খোঙচৎ অমদা পুরি, লমদম অসিগী ইন্সাং মথেলশিং, মীয়াম অমসুং ফুরুপশিং মশক তাক্লি। লমদম অসিদা ফংবা মচাকশিং, মসিগা শাগোন্নবা নুংঙাইরবা ৱাফমশিংদা য়ুম্ফম ওইবা অৱাং-নোংপোক্কী ইন্সাং মথেলগী চৎনবীশিং সেরিজ অসিদা উৎলি।

সেরিজ অসি পুথোকপদা লমদম অসিগী মীয়াম অমসুং চীঞ্জাক পুথোকপা মীওইশিংগা উনখি, ইন্সাং মচলশিংগী হৌরকফমশিংদগী হৌরগা চাকখুম ফাওবা অমসুং চাক চাফম ফাওবা য়ৌরকপগী খোঙ্গুল লিরি। দোকুমেন্তরি অসিনা চীঞ্জাক খক নত্তনা, মসিগা মরী লৈনবা ৱারিশিং, চৎনবীশিং অমসুং মীয়ামসু উৎলি।

লমদম অসিগী চীঞ্জাক অমসুং মদু থোংলিবা অমসুং চারিবা মীয়ামগী খুৎথাংদা অৱাং-নোংপোক্কী রাজ্যশিং ত্রেল্লর অদুদা উৎলি। ইন্সাং মথেল অমা খক্তদা অৱাং-নোংপোক উৎপগী মথক্ত, সেরিজ অসিদা অৱাং-নোংপোক্কী মখল কয়াগী ফুরুপশিং অমসুং মসিগী লম্মিৎ-তুমিৎশিং উৎলি, লমদম অসিগী মীয়ামগী খোঞ্জেলগা লোয়ননা, চাক্লেন অমা চানবা হোৎনবদা শীজিন্নরিবা মচলশিং, থায়নবগী লৌশিং অমসুং নুমিৎ খুদিংগী পাংথোকপা থবকশিং উৎলি।

সেরিজ অসিদা চীঞ্জাক্না মপুং ওইনা উৎলবসু, অৱাং-নোংপোক লমদমগী কলা, নাৎ অমসুং ফজরবা মফমশিং মীয়ামদা উৎলি। মসিগী ৱারিদা চীঞ্জাক্না ময়োলদা থমদুনা, লমদম অসিগী চাকখুমশিং, ইন্সাংগী মচলশিং অমসুং চাবগী মওংশিংগী খুৎথাংদা, ভারতকী অৱাং-নোংপোক লমদমগী মখল কয়াগী ইন্সাং মথেলগী থোঙনাও অমা ‘ইনচান্তিং ৮: এ কুলিনারি জর্নি থ্রু নোর্থইষ্ট’ না হাংদোক্লে। অৱাং-নোংপোক লমদমগী ইনাকখুল্লবা ইন্সাং মথেলশিং মীয়ামদা পাক-শন্না য়ৌহন্নবা দোকুমেন্তরিগী খোঙচৎ অমা থৌরম অসিদা হৌদোক্লে।

***