‘দ্য এনচেণ্টিং ৮: এ কালিনাৰী জাৰ্নি থ্ৰু দ্য নৰ্থইষ্ট’ শীৰ্ষক তথ্যচিত্ৰ ধাৰাবাহিকৰ ট্ৰেইলাৰ আজি নতুন দিল্লীত কেন্দ্ৰীয় উত্তৰ-পূৰ্বাঞ্চল উন্নয়ন আৰু যোগাযোগ মন্ত্ৰী জ্যোতিৰাদিত্য এম সিন্ধিয়াই আনুষ্ঠানিকভাৱে মুকলি কৰে। উত্তৰ-পূৰ্বাঞ্চল উন্নয়ন মন্ত্ৰালয়ে এই মুকলি অনুষ্ঠানৰ আয়োজন কৰে। অনুষ্ঠানত উত্তৰ-পূৰ্বাঞ্চল উন্নয়ন মন্ত্ৰালয়ৰ ৰাজ্যিক মন্ত্ৰী ড° সুকান্ত মজুমদাৰ উপস্থিত থকাৰ লগতে মন্ত্ৰালয়ৰ জ্যেষ্ঠ বিষয়াসকল আৰু প্ৰযোজনা দলৰ সদস্যসকলে অংশগ্ৰহণ কৰে।

তথ্যচিত্ৰ ধাৰাবাহিকখনৰ জৰিয়তে উত্তৰ-পূব ভাৰতৰ আঠখন ৰাজ্যৰ সমৃদ্ধ ৰন্ধন পৰম্পৰা, বৈচিত্ৰময় সম্প্ৰদায় আৰু সজীৱ সাংস্কৃতিক ঐতিহ্যক ৰাষ্ট্ৰীয় পৰ্যায়ত গুৰুত্বসহকাৰে দাঙি ধৰা হৈছে।

 

উত্তৰ-পূৰ্বাঞ্চল উন্নয়ন মন্ত্ৰালয় আৰু উত্তৰ-পূব পৰিষদৰ সহযোগত গ্ৰহণ কৰা এই ধাৰাবাহিকখন উত্তৰ-পূৰ্বাঞ্চল আঞ্চলিক সম্প্ৰদায় সম্পদ ব্যৱস্থাপনা সমিতি (এনইআৰচিআৰএমএতছ)ৰ জৰিয়তে ৰূপায়ণ কৰা হৈছে আৰু আৰ্বান মিডিয়া প্ৰডাকচনে ফিলেণ্ডাৰিং ফ’ৰ্কাৰ মিডিয়াৰ সহযোগত প্ৰযোজনা কৰিছে। এই ধাৰাবাহিকখনে অঞ্চলটোৰ জনসাধাৰণৰ অভিজ্ঞতা আৰু প্ৰামাণিক কাহিনীৰ জৰিয়তে উত্তৰ-পূৰ্বাঞ্চলক এক বৃহত্তৰ দৰ্শকসমাজৰ সৈতে পৰিচয় কৰাই দিয়াৰ ক্ষেত্ৰত উত্তৰ-পূৰ্বাঞ্চল উন্নয়ন মন্ত্ৰালয়ৰ এক গুৰুত্বপূৰ্ণ সাংস্কৃতিক প্ৰচাৰ প্ৰয়াস হিচাপে চিহ্নিত হৈছে।

 

তথ্যচিত্ৰ ধাৰাবাহিকখনে উত্তৰ-পূৰ্বাঞ্চলৰ আটাইকেইখন ৰাজ্যৰ মাজেৰে খাদ্যক কেন্দ্ৰ কৰি এক যাত্ৰালৈ দৰ্শকক লৈ যায়, য’ত অঞ্চলটোক ইয়াৰ খাদ্য, সম্প্ৰদায় আৰু জনসাধাৰণৰ মাজেৰে অন্বেষণ কৰা হৈছে। ধাৰাবাহিকখনত উত্তৰ-পূৰ্বাঞ্চলৰ ৰন্ধন পৰম্পৰাক স্থানীয়ভাৱে উপলব্ধ সম্পদৰ ওপৰত আধাৰিত ৰূপত উপস্থাপন কৰাৰ লগতে ইয়াৰ সৈতে জড়িত আকৰ্ষণীয় তথ্যসমূহো দাঙি ধৰা হৈছে।

ধাৰাবাহিকখনৰ প্ৰযোজনাৰ সময়ত স্থানীয় সম্প্ৰদায় আৰু খাদ্য উৎপাদকসকলৰ সৈতে মত-বিনিময় কৰা হয় আৰু থলুৱা উপাদানসমূহৰ উৎসৰ পৰা আৰম্ভ কৰি পাকঘৰ আৰু শেষত খাদ্য পৰিৱেশন কৰা মেজলৈকে ইয়াৰ যাত্ৰাৰ অনুসৰণ কৰা হয়। এই মত-বিনিময়সমূহৰ জৰিয়তে তথ্যচিত্ৰখনে কেৱল খাদ্যকে নহয়, ইয়াৰ সৈতে জড়িত কাহিনী, পৰম্পৰা আৰু লোকসকলকো ধৰি ৰাখিছে।

 

ট্ৰেইলাৰটোৱে উত্তৰ-পূৰ্বাঞ্চলৰ ৰাজ্যসমূহৰ ওপৰত আলোকপাত কৰি খাদ্য আৰু ইয়াক প্ৰস্তুত তথা ভাগ-বতৰা কৰা লোকসকলৰ মাজেৰে অঞ্চলটোক উপস্থাপন কৰিছে। উত্তৰ-পূৰ্বাঞ্চলক কোনো এটা নিৰ্দিষ্ট খাদ্যৰ জৰিয়তে উপস্থাপন কৰাৰ পৰিৱৰ্তে ধাৰাবাহিকখনত অঞ্চলটোৰ বৈচিত্ৰময় সম্প্ৰদায় আৰু স্বকীয় ভৌগোলিক পৰিৱেশ প্ৰতিফলিত কৰা হৈছে। লগতে খাদ্য প্ৰস্তুতৰ আঁৰত থকা স্থানীয় উপাদান, থলুৱা জ্ঞান আৰু দৈনন্দিন পৰম্পৰাসমূহকো গুৰুত্ব দিয়া হৈছে, য’ত স্থানীয় লোকসকলৰ কণ্ঠই কাহিনীটোক আগুৱাই লৈ যায়।

যদিও খাদ্য ধাৰাবাহিকখনৰ কেন্দ্ৰবিন্দু হৈ আছে, এই যাত্ৰাই দৰ্শকসকলক উত্তৰ-পূৰ্বাঞ্চলৰ কলা, সংস্কৃতি আৰু প্ৰাকৃতিক পৰিৱেশৰো অধিক ওচৰলৈ লৈ যায় আৰু এই উপাদানসমূহক অঞ্চলটোৰ ৰন্ধন পৰম্পৰা বিকশিত হোৱা বহল পৰিৱেশৰ এক অবিচ্ছেদ্য অংশ হিচাপে উপস্থাপন কৰে। কাহিনী কোৱাৰ কেন্দ্ৰবিন্দুত খাদ্যক স্থান দি ‘দ্য এনচেণ্টিং ৮’এ উত্তৰ-পূব ভাৰতৰ সাংস্কৃতিক বৈচিত্ৰ্যৰ এক খিৰিকি মুকলি কৰিছে আৰু ইয়াৰ পাকঘৰ, উপাদান আৰু খাদ্য পৰম্পৰাৰ জৰিয়তে দৰ্শকসকলক অঞ্চলটোৰ সৈতে সংযুক্ত কৰিছে। এই মুকলি অনুষ্ঠানে উত্তৰ-পূৰ্বাঞ্চলৰ ৰন্ধন বৈভৱক এক বৃহত্তৰ দৰ্শকসমাজৰ মাজলৈ লৈ যোৱা এক তথ্যচিত্ৰ যাত্ৰাৰ সূচনা কৰিছে।

 

*****

PS/AA

(ৰিলিজ আই ডি : 2316774) অতিথি কক্ষ : 7