ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે મુખ્ય અતિથિ તરીકે તિરુવનંતપુરમ ખાતે શ્રી ઉથરાડોમ થિરૂનાલ (SUT) એકેડેમી ઓફ મેડિકલ સાયન્સીસના 15મા પદવીદાન સમારોહમાં હાજરી આપી હતી.

પદવી પ્રાપ્ત કરી રહેલા વિદ્યાર્થીઓને સંબોધતા ઉપરાષ્ટ્રપતિએ કેરળના આરોગ્ય સંભાળ અને તબીબી શિક્ષણના ક્ષેત્રમાં SUT એકેડેમી ઓફ મેડિકલ સાયન્સીસના મહત્વપૂર્ણ સ્થાન પર પ્રકાશ પાડ્યો હતો.

ઉપરાષ્ટ્રપતિએ જણાવ્યું હતું કે, "કોઈ તબીબી સંસ્થાની સાચી શક્તિ તે પૂરા પાડતા શિક્ષણની ગુણવત્તા, તે જે ડૉક્ટરો તૈયાર કરે છે, તે જે સંશોધન કરે છે અને તે જે દર્દીઓની સેવા કરે છે તેમાં રહેલી છે."

શ્રી સી. પી. રાધાકૃષ્ણને જણાવ્યું હતું કે પદવી મેળવતા ડૉક્ટરો એક અસાધારણ સમયે આરોગ્ય સંભાળ ક્ષેત્રમાં પ્રવેશ કરી રહ્યા છે, જ્યારે આર્ટિફિશિયલ ઇન્ટેલિજન્સ, રોબોટિક્સ, ડિજિટલ હેલ્થ, એડવાન્સ્ડ ઇમેજિંગ અને પ્રીસિસન મેડિસિન આ ક્ષેત્રમાં બદલાવ લાવી રહ્યા છે.

આ સંદર્ભમાં, તેમણે કહ્યું કે, સંસ્થા ખાતે રોબોટિક સર્જરી અને કોમ્પ્યુટર-એિડડ ડાયગ્નોસિસ (કમ્પ્યુટર-સહાયિત નિદાન) સુવિધાઓનું ઉદ્ઘાટન મહત્વપૂર્ણ છે અને તે તબીબી શિક્ષણ અને આરોગ્ય સંભાળને ટેકનોલોજીકલ પ્રગતિ સાથે સુસંગત રાખવાના મહત્વને દર્શાવે છે.

જો કે, તેમણે ભારપૂર્વક જણાવ્યું હતું કે ટેકનોલોજીએ ક્યારેય ચિકિત્સાના માનવીય પાસાને વિસ્થાપિત ન કરવું જોઈએ. તેમણે કહ્યું કે, "ટેકનોલોજી ડૉક્ટરને મદદ કરી શકે છે, પરંતુ તે ડૉક્ટરના માનવીય પાસાઓનું સ્થાન લઈ શકતી નથી." તેમણે ઉમેર્યું કે, "એક મશીન વિશ્લેષણ કરી શકે છે. એક રોબોટ મદદ કરી શકે છે. એક અલ્ગોરિધમ પેટર્ન ઓળખી શકે છે. પરંતુ દર્દીને હજુ પણ એવા ડૉક્ટરની જરૂર હોય છે જે સાંભળી શકે, સમજી શકે, આશ્વાસન આપી શકે અને જવાબદારી લઈ શકે."

ઉપરાષ્ટ્રપતિએ ગ્રેજ્યુએટ્સને નિદાનમાં સચોટ, સંચારમાં પ્રામાણિક, સારવારમાં કરુણાસ્પદ અને દરેક નિર્ણયમાં નૈતિક રહીને વ્હાઇટ કોટ દ્વારા દર્શાવવામાં આવેલા વિશ્વાસનું રક્ષણ કરવા વિનંતી કરી હતી. તેમણે ભારપૂર્વક જણાવ્યું હતું કે વૈજ્ઞાનિક શ્રેષ્ઠતા અને માનવીય કરુણા હંમેશા સાથે ચાલવા જોઈએ.

ઉપરાષ્ટ્રપતિએ કહ્યું કે ભારત પ્રધાનમંત્રી શ્રી નરેન્દ્ર મોદી દ્વારા વ્યક્ત કરાયેલા વિકસિત ભારત @ 2047 ના વિઝન તરફ આત્મવિશ્વાસપૂર્વક આગળ વધી રહ્યું છે. તેમણે કહ્યું કે પ્રધાનમંત્રીએ ભારપૂર્વક જણાવ્યું છે કે વિકસિત ભારત ત્યારે જ પ્રાપ્ત થઈ શકે છે જ્યારે દરેક રાજ્ય, જિલ્લો અને ગામ વિકસે, અને નોંધ્યું કે ઉચ્ચ શિક્ષણ સુધીની પહોંચ આ રાષ્ટ્રીય વિઝનના મૂળમાં છે.

છેલ્લાં બાર વર્ષોમાં તબીબી શિક્ષણના વિસ્તરણ પર પ્રકાશ પાડતાં શ્રી સી. પી. રાધાકૃષ્ણને જણાવ્યું હતું કે અગાઉ નવી દિલ્હીમાં માત્ર એક જ AIIMS હતી, જ્યારે હવે 12 નવી AIIMS સ્થાપવામાં આવી છે.

ઉપરાષ્ટ્રપતિએ જણાવ્યું હતું કે તેમણે સમગ્ર ભારતમાં અનેક પદવીદાન સમારોહમાં હાજરી આપી છે અને પુરુષો કરતાં વધુ મહિલાઓ ડિગ્રીઓ અને મેડલ મેળવી રહી છે તેવો એક આવકારદાયક ટ્રેન્ડ જોયો છે.

તેમણે નોંધ્યું હતું કે વર્તમાન પદવીદાન સમારોહમાં, 60 મહિલાઓ અને 32 પુરુષો અંડરગ્રેજ્યુએટ ડિગ્રી મેળવી રહ્યા છે, જ્યારે 5 મહિલા અને 2 પુરુષ ડૉક્ટરો પોસ્ટગ્રેજ્યુએટ ડિગ્રી મેળવી રહ્યા છે. તેમણે આને એક આવકારદાયક બાબત ગણાવી હતી.

પદવી મેળવતા ડૉક્ટરોને ત્રણ માર્ગદર્શક સિદ્ધાંતો આપતાં, ઉપરાષ્ટ્રપતિએ તેમને મનમાં જ્ઞાન, તેમના હૃદયમાં કરુણા અને તેમના વર્તનમાં સત્યનિષ્ઠા રાખવા આહ્વાન કર્યું હતું.

તેમણે ગ્રેજ્યુએટ્સને નમ્ર રહીને આત્મવિશ્વાસ રાખવા, નૈતિક રહીને મહત્વાકાંક્ષી બનવા, કરુણાસ્પદ રહીને તકનીકી રીતે અદ્યતન બનવા અને સમાજ સાથે જોડાયેલા રહીને સફળ થવા જણાવ્યું હતું. તેમણે યુવા ડૉક્ટરોને "હંમેશા ડ્રગ્સને ના કહેવા" પણ વિનંતી કરી હતી.

પોતાના સંબોધનના સમાપનમાં, શ્રી સી. પી. રાધાકૃષ્ણને ગ્રેજ્યુએટ્સને સફળ, અર્થપૂર્ણ અને સંતોષકારક વ્યાવસાયિક સફરની શુભેચ્છા પાઠવી હતી અને કહ્યું હતું કે, "તમે હંમેશા યાદ રાખો કે ડૉક્ટર હોવાનો સૌથી મોટો વિશેષાધિકાર એ બીજા માનવીના જીવનમાં બદલાવ લાવવાની તક છે." તેમણે SUT એકેડેમી ઓફ મેડિકલ સાયન્સીસને તબીબી શિક્ષણ, આરોગ્ય સંભાળ, સંશોધન અને નવીનતામાં ઉત્કૃષ્ટતાના કેન્દ્ર તરીકે સતત વિકાસની પણ શુભેચ્છા પાઠવી હતી.

આ સમારોહમાં તમિળનાડુ અને કેરળના રાજ્યપાલ શ્રી રાજેન્દ્ર વિશ્વનાથ આર્લેકર; કેરળ સરકારના શ્રમ, પશુપાલન અને મહિલા અને બાળ વિકાસ મંત્રી શ્રીમતી બિંદુ કૃષ્ણા; SUT એકેડેમી ઓફ મેડિકલ સાયન્સીસના ચેરમેન ડૉ. એ. સી. સન્મુગમ; કેરળ યુનિવર્સિટી ઓફ હેલ્થ સાયન્સીસના વાઇસ ચાન્સલર ડૉ. મોહનન કુન્નુમલ; ફેકલ્ટી, સ્ટાફ, પદવી મેળવનાર વિદ્યાર્થીઓ અને તેમના પરિવારો ઉપસ્થિત રહ્યા હતા.

SM/DK/JD