ഉപരാഷ്ട്രപതി ശ്രീ സി. പി. രാധാകൃഷ്ണൻ ഇന്ന്  കൊല്ലം അമൃതപുരിയിലെ മാതാ അമൃതാനന്ദമയി മഠത്തിൽ, മാതാ അമൃതാനന്ദമയി ദേവിയുടെ 73-ാമത് ജന്മദിനത്തോടനുബന്ധിച്ച് സംഘടിപ്പിച്ച വിശ്വസേവാ ദിനാചരണത്തിൽ പങ്കെടുത്തു.

ചടങ്ങിൽ മഠത്തിന്റെ നിരവധി ജീവകാരുണ്യ പദ്ധതികൾക്ക് ഉപരാഷ്ട്രപതി തുടക്കം കുറിച്ചു. നേപ്പാളിലെ വെള്ളപ്പൊക്ക ദുരിതാശ്വാസത്തിനായി 2 കോടി രൂപയുടെ സഹായം ഇന്ത്യയിലെ നേപ്പാൾ സ്ഥാനപതി ശ്രീ സുരേന്ദർ ഥാപ്പയ്ക്ക് അദ്ദേഹം കൈമാറി. കൊച്ചിയിലെയും ഫരീദാബാദിലെയും അമൃത ആശുപത്രികളിൽ നിർദ്ധനരായവർക്കുള്ള സൗജന്യ ശസ്ത്രക്രിയകളുടെ സാക്ഷ്യപത്രങ്ങളും മത്സ്യത്തൊഴിലാളി കുടുംബങ്ങൾക്കുള്ള സാമ്പത്തിക സഹായവും അദ്ദേഹം വിതരണം ചെയ്തു.

ഇന്ത്യയിലും ശ്രീലങ്കയിലുമായി 50,000 വീടുകൾ പൂർത്തിയാക്കിയതിന്റെ സ്മരണയ്ക്കായി തയ്യാറാക്കിയ 'അമൃതകുടീരം' 30-ാം വാർഷിക സ്മരണികയും, ആശ്രമത്തിന്റെ പുതിയ മൂന്ന് പ്രസിദ്ധീകരണങ്ങളായ 'ഹനുമാൻ ചാലിസ', 'ദി ഓഷ്യൻ ഓഫ് ഗ്രേസ്', 'സത്യം ശിവം സുന്ദരം' എന്നിവയും ഉപരാഷ്ട്രപതി പ്രകാശനം ചെയ്തു.

അമ്മയുടെ 73-ാമത് ജന്മദിനത്തിൽ അമൃതപുരിയിൽ സാന്നിധ്യമാകാൻ കഴിഞ്ഞത് "വലിയൊരു ഭാഗ്യവും അളവറ്റ സന്തോഷവുമുള്ള കാര്യവുമാണെന്ന് " ചടങ്ങിനെ അഭിസംബോധന ചെയ്തുകൊണ്ട് ഉപരാഷ്ട്രപതി പറഞ്ഞു. മാതാ അമൃതാനന്ദമയി ദേവിക്ക് ആദരവോടെ പ്രണാമമർപ്പിച്ച അദ്ദേഹം, രാജ്യസേവനത്തിനു സമർപ്പിതമായ ദീർഘായുസ്സ് ആശംസിക്കുകയും ചെയ്തു.

മുമ്പ് കോയമ്പത്തൂരിൽ ഒരു പരിപാടിയിലേക്ക് അമ്മയെ ക്ഷണിച്ച സംഭവം അനുസ്മരിച്ച ശ്രീ സി. പി. രാധാകൃഷ്ണൻ, അമ്മയെ കാണാനും അനുഗ്രഹം തേടാനുമായി തടിച്ചുകൂടിയ ആയിരക്കണക്കിന് ആളുകളുടെ നീണ്ട നിര ഇപ്പോഴും തന്റെ ഓർമ്മയിലുണ്ടെന്നു പറഞ്ഞു.

അമ്മയുടെ ആജീവനാന്ത സേവനത്തെ പ്രകീർത്തിച്ചുകൊണ്ട്, അമ്മയുടെ ജീവിതം സ്നേഹത്തിന്റെയും കരുണയുടെയും നിസ്വാർത്ഥ സേവനത്തിന്റെയും സന്ദേശമാണെന്ന് ഉപരാഷ്ട്രപതി പറഞ്ഞു. സേവനം എന്നത് ഒരു ജീവിതരീതിയാണെന്നും മാനവികതയുമായുള്ള ഏകത്വത്തിന്റെ ആവിഷ്കാരമാണെന്നുമുള്ള ഭാരതത്തിന്റെ കാലാതീതമായ സത്യത്തെയാണ് അമ്മയുടെ ജീവിതം രാജ്യത്തെ ഓർമ്മിപ്പിക്കുന്നതെന്ന് അദ്ദേഹം പറഞ്ഞു.

കുട്ടിക്കാലം മുതൽക്കേ അമ്മ ചുറ്റുമുള്ളവരുടെ സങ്കടങ്ങൾ അറിയുകയും ഭക്ഷണവും വസ്ത്രവും സ്നേഹവും കരുണയും നൽകി സഹായിക്കുകയും ചെയ്തിരുന്നതായി അദ്ദേഹം അനുസ്മരിച്ചു. എല്ലാ ജീവജാലങ്ങളിലും അന്തർലീനമായ ദൈവികമായ ഏകത്വത്തെക്കുറിച്ചുള്ള ആത്മീയ ബോധമാണ് ഈ സേവനത്തിന്റെ കാതലെന്ന് അദ്ദേഹം പറഞ്ഞു.

മാതാ അമൃതാനന്ദമയി മഠത്തിന്റെ ജീവകാരുണ്യ പ്രവർത്തനങ്ങളിൽ ഏറ്റവും പ്രചോദനാത്മകമായ ഒന്നാണ് ആരോഗ്യരംഗത്തെ സേവനങ്ങളെന്ന് ചൂണ്ടിക്കാട്ടിയ ശ്രീ സി.പി. രാധാകൃഷ്ണൻ, 1998 മുതൽ ഭാരതത്തിൽ 890 കോടിയിലധികം രൂപയുടെ കാരുണ്യ ചികിത്സാ സഹായങ്ങൾ നൽകിയിട്ടുണ്ടെന്നും സൗജന്യ ചികിത്സയിലൂടെയും ശസ്ത്രക്രിയകളിലൂടെയും 64 ലക്ഷത്തിലധികം രോഗികൾക്ക് ഇതിന്റെ പ്രയോജനം ലഭിച്ചിട്ടുണ്ടെന്നും പറഞ്ഞു.

2022 ഓഗസ്റ്റിൽ ഫരീദാബാദിലെ അമൃത ആശുപത്രിയുടെ ഉദ്ഘാടന വേളയിൽ, അമ്മയെ "സ്നേഹം, കരുണ, സേവനം, ത്യാഗം" എന്നിവയുടെ മൂർത്തീഭാവമായും ഇന്ത്യയുടെ ആത്മീയ പാരമ്പര്യത്തിന്റെ വാഹകയായും പ്രധാനമന്ത്രി ശ്രീ നരേന്ദ്ര മോദി വിശേഷിപ്പിച്ചത് ഉപരാഷ്ട്രപതി അനുസ്മരിച്ചു.

സേവനം എന്നത് ഭാവിയിലേക്കുള്ള അവസരങ്ങൾ സൃഷ്ടിക്കുന്നത് കൂടിയാണെന്ന് ഉപരാഷ്ട്രപതി പറഞ്ഞു. മഠം ലോകമെമ്പാടുമായി 55,000-ത്തിലധികം സ്കോളർഷിപ്പുകൾ നൽകിയിട്ടുണ്ടെന്ന് ചൂണ്ടിക്കാണിച്ച അദ്ദേഹം, പിന്നാക്ക വിഭാഗങ്ങൾക്ക് പുതിയ വഴികൾ തുറന്നുനൽകുന്നതിനായി ആവിഷ്കരിച്ച ടാബ്‌ലെറ്റ് അധിഷ്ഠിത വിദ്യാഭ്യാസം, ട്യൂഷൻ കേന്ദ്രങ്ങൾ, മുതിർന്നവരുടെ സാക്ഷരത, തൊഴിലധിഷ്ഠിത പരിശീലനം തുടങ്ങിയ പദ്ധതികൾ എടുത്തുപറഞ്ഞു.

'അമൃതശ്രീ' (AmritaSREE) വഴിയുള്ള സ്ത്രീശാക്തീകരണത്തെ അദ്ദേഹം പ്രത്യേകമായി എടുത്തുപറഞ്ഞു. 15,000-ത്തിലധികം സ്വയംസഹായ സംഘങ്ങളിലൂടെ ദരിദ്രരും ദുർബലരുമായ കുടുംബങ്ങളിലെ ഏകദേശം 2.5 ലക്ഷം വനിതകൾക്ക് സ്റ്റാർട്ടപ്പ് മൂലധനം, തൊഴിലധിഷ്ഠിത പരിശീലനം, മൈക്രോഫൈനാൻസ് എന്നിവ നൽകി പിന്തുണച്ചിട്ടുണ്ടെന്ന് അദ്ദേഹം പറഞ്ഞു.

"ഒരു സ്ത്രീ സാമ്പത്തികമായി ശാക്തീകരിക്കപ്പെടുമ്പോൾ, അതിന്റെ സ്വാധീനം ആ വ്യക്തിയിൽ മാത്രം ഒതുങ്ങുന്നില്ല," എന്ന് പറഞ്ഞ അദ്ദേഹം, അത് കുടുംബങ്ങളെയും സമൂഹത്തെയും ശക്തിപ്പെടുത്തുന്നുവെന്ന് വ്യക്തമാക്കി. നാരീശക്തി എന്നത് വെറുമൊരു പങ്കാളിത്തം മാത്രമല്ല, മറിച്ച് ശാക്തീകരണവും ആത്മാഭിമാനവും അവസരങ്ങളും നേതൃത്വവുമാണെന്ന് അദ്ദേഹം പറഞ്ഞു.

ഒരു ഗ്രാമത്തിലെ കൊച്ചുപെൺകുട്ടിയുടെ കരുണയിൽ നിന്ന് തുടക്കമിട്ട പ്രസ്ഥാനം, ഇന്ന് ഭാരതത്തിലും ലോകമെമ്പാടുമായി ലക്ഷക്കണക്കിന് മനുഷ്യരുടെ ജീവിതങ്ങളെ സ്പർശിക്കുന്ന വമ്പിച്ചൊരു ജീവകാരുണ്യ പ്രസ്ഥാനമായി വളർന്നിരിക്കുകയാണെന്ന് ഉപരാഷ്ട്രപതി പറഞ്ഞു.

ഭവനരഹിതർക്കായി 50,000-ത്തിലധികം വീടുകളുടെ നിർമ്മാണം, ആയിരക്കണക്കിന് കുട്ടികൾക്കുള്ള സ്കോളർഷിപ്പുകൾ, ഒരു ലക്ഷത്തിലധികം സാധുക്കൾക്കുള്ള പെൻഷൻ, ഉപജീവന പദ്ധതികൾ എന്നിവ അദ്ദേഹം എടുത്തുപറഞ്ഞു.

ഇത്തരം പ്രവർത്തനങ്ങളുടെ വ്യാപ്തി ശ്രദ്ധേയമാണെങ്കിലും, ഈ കണക്കുകൾക്ക് പിന്നിലെ മനുഷ്യജീവിതങ്ങളിലാണ് യഥാർത്ഥ മഹത്വം കുടികൊള്ളുന്നതെന്ന് അദ്ദേഹം പറഞ്ഞു. അതിനാൽ, സേവനത്തെ കേവലം സ്ഥിതിവിവരക്കണക്കുകളിലൂടെയല്ല, മറിച്ച് അത് മനുഷ്യജീവിതത്തിൽ വരുത്തുന്ന പരിവർത്തനത്തിലൂടെയാണ് മനസ്സിലാക്കേണ്ടതെന്ന് അദ്ദേഹം കൂട്ടിച്ചേർത്തു.

സേവനത്തിന്റെ യഥാർത്ഥ പരീക്ഷണം പലപ്പോഴും പ്രതിസന്ധി ഘട്ടങ്ങളിലാണ് ഉണ്ടാകുന്നതെന്ന് പറഞ്ഞ ഉപരാഷ്ട്രപതി, ദുരന്തങ്ങളിലും അടിയന്തര സാഹചര്യങ്ങളിലും മഠം നൽകിയ മാനുഷിക സഹായങ്ങളും എടുത്തുപറഞ്ഞു.

ഇന്ത്യൻ മഹാസമുദ്രത്തിലുണ്ടായ സുനാമി, ഗുജറാത്ത് ഭൂകമ്പം, ഉത്തരാഖണ്ഡ് പ്രളയം, കേരളത്തിലെ പ്രളയങ്ങൾ, കോവിഡ്-19 മഹാമാരി, വയനാട് ഉരുൾപൊട്ടൽ എന്നിവയുടെ സമയത്ത് സംഘടന നൽകിയ സഹായങ്ങൾ അദ്ദേഹം പരാമർശിച്ചു.

ഇന്ത്യാ ഗവണ്മെന്റിന്റെ 'നമാമി ഗംഗെ' പദ്ധതിയിലേക്ക് മഠം നൽകിയ 100 കോടി രൂപയുടെ സംഭാവനയെക്കുറിച്ചും, അതോടൊപ്പം വൃക്ഷത്തൈ നടീൽ, ശുചീകരണ യജ്ഞങ്ങൾ, സുസ്ഥിര ഗ്രാമീണ ജീവിതത്തിനായുള്ള പദ്ധതികൾ എന്നിവയും അദ്ദേഹം ചൂണ്ടിക്കാട്ടി.

'അമല ഭാരതം' പദ്ധതിയെക്കുറിച്ച് പരാമർശിക്കവെ, രാജ്യത്തുടനീളം വൻതോതിലുള്ള ശുചീകരണ യജ്ഞങ്ങൾ നടത്തിയിട്ടുണ്ടെന്നും, ഐക്യരാഷ്ട്രസഭയുടെ വൺ ബില്യൺ ട്രീ ക്യാമ്പയിന്റെ ഭാഗമായി ലോകമെമ്പാടും 10 ലക്ഷത്തിലധികം മരങ്ങൾ നട്ടുപിടിപ്പിച്ചിട്ടുണ്ടെന്നും അദ്ദേഹം പറഞ്ഞു.

അമ്മയുടെ പ്രവർത്തനങ്ങൾക്ക് പ്രചോദനമാകുന്ന ചൈതന്യം ഭാരതത്തിന്റെ സംസ്കാരവും പാരമ്പര്യവുമായി ആഴത്തിൽ ബന്ധപ്പെട്ടിരിക്കുന്നുവെന്ന് ഉപരാഷ്ട്രപതി പറഞ്ഞു. സേവനത്തിന് ജാതി, മതം, ഭാഷ, പ്രദേശം അല്ലെങ്കിൽ ദേശീയത എന്നീ അതിർവരമ്പുകളില്ലെന്നും അത് 'മാനവികത' എന്ന ഒരൊറ്റ സ്വത്വത്തെ മാത്രമേ അംഗീകരിക്കുന്നുള്ളൂ എന്നും അദ്ദേഹം പറഞ്ഞു. വിശ്വസേവാ ദിനത്തിന്റെ അടിസ്ഥാന തത്വം ഇതാണെന്ന് അദ്ദേഹം വിശേഷിപ്പിച്ചു.

സംഘർഷങ്ങൾ, മാനുഷിക പ്രതിസന്ധികൾ, പ്രകൃതിദുരന്തങ്ങൾ, പലായനം, ദാരിദ്ര്യം, ഒറ്റപ്പെടൽ, പാരിസ്ഥിതിക വെല്ലുവിളികൾ എന്നിവയുൾപ്പെടെ ലോകം നേരിടുന്ന നിരവധിയായ വെല്ലുവിളികളെക്കുറിച്ച് പരാമർശിച്ച ശ്രീ സി. പി. രാധാകൃഷ്ണൻ, മാനവികതയ്ക്ക് സാങ്കേതിക പുരോഗതിയേക്കാൾ ഉപരിയായി മറ്റൊന്നുകൂടി ആവശ്യമാണെന്ന് പറഞ്ഞു. "മാനവികതയ്ക്ക് കരുണാർദ്രമായ പുരോഗതിയാണ് ആവശ്യം," അദ്ദേഹം പറഞ്ഞു.

ഇന്ത്യ 'വികസിത ഭാരതം' എന്ന ലക്ഷ്യത്തിലേക്ക് മുന്നേറുകയാണെന്നും വികസനത്തിന് അടിസ്ഥാന സൗകര്യങ്ങൾ, സാങ്കേതികവിദ്യ, നിക്ഷേപം, നൂതനാശയം, സാമ്പത്തിക വളർച്ച എന്നിവ ആവശ്യമാണെന്നും ഉപരാഷ്ട്രപതി പറഞ്ഞു. എന്നാൽ വികസനത്തിന് മാനുഷികമായ ഒരു മുഖം കൂടി ഉണ്ടായിരിക്കണമെന്ന് അദ്ദേഹം എടുത്തുപറഞ്ഞു.

"വികസിത ഭാരതം കൈവരിക്കാനായി മുന്നേറുമ്പോൾ, ആധുനികതയും നമ്മുടെ സാംസ്കാരിക മൂല്യങ്ങളും ഒരുമിച്ച് മുന്നേറുന്നുണ്ടെന്ന് നാം ഉറപ്പുവരുത്തണം," എന്ന് പറഞ്ഞ അദ്ദേഹം, "വികാസ് ഭീ, വിരാസത് ഭീ" (വികസനത്തോടൊപ്പം പൈതൃകവും) എന്നത് നമ്മുടെ മാർഗ്ഗദർശക മന്ത്രമായിരിക്കണമെന്നും കൂട്ടിച്ചേർത്തു. ആരെയും പിന്നിലാക്കാത്ത, എല്ലാവരെയും ഉൾക്കൊള്ളുന്ന ഒരു വികസിത ഭാരതമാണ് യാഥാർത്ഥ്യമാക്കേണ്ടതെന്നും അദ്ദേഹം ആഹ്വാനം ചെയ്തു.

മാതാ അമൃതാനന്ദമയി ദേവിക്ക് ആദരവോടെ പ്രണാമമർപ്പിച്ചുകൊണ്ട് പ്രസംഗം ഉപസംഹരിച്ച ശ്രീ സി. പി. രാധാകൃഷ്ണൻ, അമ്മ ഒരു അത്ഭുതമാണെന്നും സമൂഹത്തെയും രാഷ്ട്രത്തെയും സേവിക്കുന്ന കാര്യത്തിൽ അമ്മ തുടർന്നും നമുക്ക് മാർഗ്ഗദർശനം നൽകണമെന്നും  പറഞ്ഞു. ഈ മഹത്തായ പ്രസ്ഥാനം ലക്ഷക്കണക്കിന് ജീവിതങ്ങളെ തുടർന്നും സ്പർശിക്കുമെന്നും സേവനം എന്നത് കൂടുതൽ സമാധാനപരവും സുസ്ഥിരവും കരുണാർദ്രവുമായ ഒരു ലോകത്തിന്റെ അടിത്തറയായി മാറുമെന്നും അദ്ദേഹം പ്രത്യാശ പ്രകടിപ്പിച്ചു.

പരിപാടിയിൽ കേരളം-തമിഴ്‌നാട് ഗവർണർ ശ്രീ രാജേന്ദ്ര വിശ്വനാഥ് അർലേക്കർ, കേരളം മുഖ്യമന്ത്രി ശ്രീ വി. ഡി. സതീശൻ, കേന്ദ്ര വ്യോമയാന മന്ത്രി ശ്രീ കിഞ്ചരാപ്പു രാംമോഹൻ നായിഡു, കേന്ദ്ര പെട്രോളിയം-പ്രകൃതി വാതക സഹമന്ത്രി ശ്രീ സുരേഷ് ഗോപി, കേരളം നിയമസഭാ സ്പീക്കർ ശ്രീ തിരുവഞ്ചൂർ രാധാകൃഷ്ണൻ, സംസ്ഥാന മന്ത്രിമാർ, കേരള ഹൈക്കോടതി ജഡ്ജി ജസ്റ്റിസ് ഗോപിനാഥ്, എം.പിമാരായ ശ്രീ എൻ.കെ. പ്രേമചന്ദ്രൻ, ശ്രീ ശശി തരൂർ, ഇന്ത്യയിലെ നേപ്പാൾ സ്ഥാനപതി ശ്രീ സുരേന്ദർ ഥാപ്പ, എം.എൽ.എമാർ, സ്വാമിജിമാർ, ഭക്തർ, സന്നദ്ധപ്രവർത്തകർ തുടങ്ങിയവർ പങ്കെടുത്തു.