تجارت و صنعت کے مرکزی وزیر جناب پیوش گوئل نے یہ بات اجاگر کی ہے کہ آزاد تجارتی معاہدوں کے ذریعے عالمی منڈیوں کے بھارت کے لیے کھلنے کے ساتھ اتر پردیش کے کاروباری افراد کو بین الاقوامی منڈیوں تک رسائی کے زیادہ مواقع حاصل ہوں گے۔ اتر پردیش کے گریٹر نوئیڈا میں یوپی بین الاقوامی تجارتی میلے سے خطاب کرتے ہوئے جناب گوئل نے کہا کہ برآمدات، سرمایہ کاری اور عالمی منڈیوں تک رسائی میں اضافے سے ریاست کو 1 ٹریلین ڈالر کی معیشت بنانے کے ہدف کے حصول میں مدد ملے گی۔

جناب گوئل نے کہا کہ دنیا بھر سے نئی سرمایہ کاری بھارت میں آنے کی توقع ہے۔ انہوں نے بتایا کہ سازگار صنعتی پالیسیوں اور فعال صنعتی اسکیموں کی حمایت سے اتر پردیش سرمایہ کاری کے لیے ایک ترجیحی مقام کے طور پر ابھرا ہے۔ انہوں نے کہا کہ مختلف شعبوں میں بڑی کارپوریشنیں اور عالمی سرمایہ کار آ رہے ہیں، جس سے روزگار کے نئے مواقع پیدا ہو رہے ہیں۔

وزیر نے ریاست کی ترقی میں جدید ٹیکنالوجی، بین الاقوامی کاروباری اداروں اور اتر پردیش کے نوجوانوں کی بدلتی ہوئی دست کاری اور تکنیکی مہارتوں کے کردار کو اجاگر کیا۔ انہوں نے کہا کہ اس پیمانے کے بین الاقوامی پروگرام عالمی منڈیوں تک براہِ راست رسائی کے مواقع فراہم کرتے ہیں، جس سے اتر پردیش کی متنوع مصنوعات، پکوان اور خدمات بین الاقوامی منڈیوں تک پہنچ سکتی ہیں۔

جناب گوئل نے یوپی بین الاقوامی تجارتی میلے میں بین الاقوامی شرکت کو اجاگر کرتے ہوئے کہا کہ اس میں 6 شراکت دار ممالک، سینکڑوں مندوبین اور نمائش کنندگان اور خریدار و فروخت کنندگان کے درمیان ملاقاتیں شامل ہیں۔ انہوں نے کہا کہ اس پروگرام میں بین الاقوامی متعلقہ فریقوں کی شرکت سے کاروباری اداروں کے لیے نئے مواقع پیدا ہوئے ہیں۔

وزیر نے اتر پردیش میں ایکسپریس ویز، جدید ہوائی اڈوں اور صنعتی پارکوں کی ترقی کو اجاگر کیا اور بتایا کہ ریاست دفاع، سیمی کنڈکٹرز، الیکٹرانکس اور دیگر جدید اعلیٰ ٹیکنالوجی کے شعبوں سمیت مختلف شعبوں میں اپنی موجودگی بڑھا رہی ہے۔ انہوں نے گریٹر نوئیڈا میں ایک بڑے روبوٹکس مینوفیکچرنگ مرکز کی توسیع کا بھی ذکر کیا اور اسے جدید صنعتی ترقی اور تکنیکی پیش رفت کی ایک مثال قرار دیا۔

جناب گوئل نے کہا کہ اتر پردیش کی ترقی کے لیے اگلا اہم مرحلہ عالمی منڈیوں میں برآمدات کو وسعت دینا، بین الاقوامی سرمایہ کاری کو راغب کرنا، سیاحت کو فروغ دینا اور ریاست کے برانڈز کو عالمی شناخت دلانا ہے۔ انہوں نے کہا کہ اتر پردیش عالمی تجارت کو مزید فروغ دینے کے لیے اپنی بنیاد مضبوط کر رہا ہے اور ترقی کے اپنے اہداف کی جانب پیش رفت کر رہا ہے۔

وزیر نے بتایا کہ اتر پردیش سے اس وقت سالانہ تقریباً 2 لاکھ کروڑ روپے کی برآمدات ہوتی ہیں اور ریاست نے 2030 تک اسے بڑھا کر 5 لاکھ کروڑ روپے کرنے کا ہدف مقرر کیا ہے۔

جناب گوئل نے کہا کہ آزاد تجارتی معاہدوں کے ذریعے عالمی منڈیوں تک بڑھتی ہوئی رسائی، سرمایہ کاری، سیاحت اور اتر پردیش کی مصنوعات و برانڈز کی بین الاقوامی شناخت سے ریاست کے کاروباری افراد کے لیے نئے مواقع پیدا ہوں گے۔ انہوں نے ترقی کے اس سفر کو آگے بڑھانے میں ریاست کی تجارتی اور صنعتی برادری سے فعال شرکت اور تعاون کی اپیل کی۔

وزیر نے اتر پردیش کی مسلسل اقتصادی اور برآمدی ترقی میں تعاون کے لیے مرکزی اور ریاستی حکومتوں کے درمیان تال میل کے ساتھ ساتھ شہریوں، نوجوانوں اور تجارتی و صنعتی شعبے سے وابستہ متعلقہ فریقوں کی شرکت کی اہمیت کو بھی اجاگر کیا۔

***

ش ح۔ ش ا ر۔ ول

Uno-4176