ٹیلی کام ریگولیٹری اتھارٹی آف انڈیا (ٹرائی) نے آج ڈیجیٹل کنیکٹیویٹی ریٹنگ (ڈی سی آر) پلیٹ فارم کا آغاز کیا۔ یہ ایک مربوط ڈیجیٹل پلیٹ فارم ہے، جس کا مقصد صارفین کو املاک کی ریٹنگ سے متعلق معلومات فراہم کرنا اور املاک کی ڈیجیٹل کنیکٹیویٹی کی ریٹنگ کے مکمل عمل کو آسان بنانا ہے۔ اس کے ساتھ ڈیجیٹل کنیکٹیویٹی کی جانچ کے لیے ایک موبائل ایپ بھی دستیاب کرائی گئی ہے۔

ڈی سی آر پلیٹ فارم، ٹیلی کام ریگولیٹری اتھارٹی آف انڈیا (ڈیجیٹل کنیکٹیویٹی کے لیے املاک کی ریٹنگ) ضوابط، 2024 کے تحت مقررہ فریم ورک پر عمل درآمد میں سہولت فراہم کرتا ہے، جس میں 13 مئی 2026 کو مطلع کردہ ڈیجیٹل کنیکٹیویٹی کے لیے املاک کی ریٹنگ (ترمیمی) ضابطہ، 2026 کے ذریعے ترمیم کی گئی ہے۔ یہ پلیٹ فارم 9 جون 2026 کو ٹرائی کی جانب سے جاری کردہ ریٹنگ مینوئل 2026 میں متعین ریٹنگ کے عمل کو بھی نافذ کرنے میں مدد دیتا ہے۔

یہ پلیٹ فارم صارفین کے لیے ایک عوامی انٹرفیس فراہم کرتا ہے، جہاں وہ ڈیجیٹل کنیکٹیویٹی کے لیے ریٹ کی گئی املاک کو دیکھ سکتے ہیں۔ اس کے ذریعے پراپرٹی مینیجرز (پی ایمز)، رجسٹرڈ ڈیجیٹل کنیکٹیویٹی ریٹنگ ایجنسیاں (ڈی سی آر ایز) اور صارفین ایک مشترکہ ڈیجیٹل انٹرفیس پر آجاتے ہیں۔ پراپرٹی مینیجرز اپنی املاک کو عوامی، سرکاری، تجارتی، نجی وغیرہ زمروں میں رجسٹر کرسکتے ہیں، ریٹنگ کے لیے درخواستیں جمع کراسکتے ہیں، مقررہ معلومات اور دستاویزات اپ لوڈ کرسکتے ہیں، کسی رجسٹرڈ ڈیجیٹل کنیکٹیویٹی ریٹنگ ایجنسی کا انتخاب کرسکتے ہیں اور پلیٹ فارم کے ذریعے اپنی درخواست کی صورت حال دیکھ سکتے ہیں۔ یہ پلیٹ فارم زیر تعمیر اور تعمیر شدہ، دونوں طرح کی املاک کے لیے مقررہ جائزہ عمل کی معاونت کرتا ہے۔رجسٹرڈ ڈیجیٹل کنیکٹیویٹی ریٹنگ ایجنسیاں تفویض کردہ درخواستوں تک رسائی حاصل کرسکتی ہیں، جائزہ لے سکتی ہیں، مشاہدات اور ٹیسٹ کے نتائج درج کرسکتی ہیں، متعلقہ دستاویزات کا انتظام کرسکتی ہیں اور مقررہ فریم ورک کے مطابق ریٹنگ کا عمل مکمل کرسکتی ہیں۔ یہ پلیٹ فارم جائزے، رپورٹ تیار کرنے، سرٹیفیکیشن اور ریٹنگ شائع کرنے سے متعلق ڈیجیٹل عمل کو ممکن بناتا ہے۔ صارفین اور دیگر متعلقہ فریق ریٹ کی گئی املاک کو تلاش کرسکیں گے، شائع شدہ ریٹنگ دیکھ سکیں گے، متعلقہ سرٹیفکیٹس کی تصدیق کرسکیں گے اور اپنی دلچسپی کی املاک کا موازنہ کرسکیں گے۔

میدانی جائزوں میں ایک مخصوص ڈی سی آر اے موبائل ایپ کے ذریعے سہولت فراہم کی جائے گی۔ یہ ایپ مجاز ڈی سی آر اے کو مقررہ جانچ کے طریقہ کار کے مطابق عمارت کے اندر ڈیجیٹل کنیکٹیویٹی کی پیمائش کرنے کے قابل بنائے گی۔ ویب پورٹل کے ذریعے موصول ہونے والی جائیداد سے متعلق معلومات اور موبائل ایپ کے ذریعے حاصل کردہ جائزے کے اعداد و شمار کو پلیٹ فارم پر باہم ہم آہنگ کیا جائے گا۔ پلیٹ فارم دستاویزات اور سرٹیفکیٹس پر ڈیجیٹل دستخط اور ان کی تصدیق کے لیے ای سائن کی سہولت فراہم کرتا ہے۔ اس کے علاوہ یہ مقررہ ریٹنگ فیس کی آن لائن ادائیگی، ای میل اور ایس ایم ایس الرٹس اور املاک کے ریکارڈ، ٹیسٹ کے نتائج، سرٹیفکیٹس اور آڈٹ لاگز کو محفوظ رکھنے کی سہولت بھی فراہم کرتا ہے۔

صارفین کے لیے یہ پلیٹ فارم عوامی ریٹنگ سرچ پیج فراہم کرتا ہے۔ صارفین جائیداد کے نام، سرٹیفکیٹ آئی ڈی یا مقام کے ذریعے ریٹ کی گئی جائیداد تلاش کرسکتے ہیں۔ وہ جائیداد کا ڈیجیٹل دستخط شدہ ریٹنگ سرٹیفکیٹ دیکھ سکتے ہیں اور سرٹیفکیٹ پر دیے گئے کیو آر کوڈ کے ذریعے اس کی صداقت کی تصدیق کرسکتے ہیں۔ اس سے ڈیجیٹل کنیکٹیویٹی ریٹ کی گئی جائیداد کی ایک نمایاں اور قابل تصدیق خصوصیت بن جائے گی اور صارفین کو کنیکٹیویٹی سے متعلق معلومات حاصل ہوں گی۔ اس معلومات کی بنیاد پر صارفین مطلوبہ جائیداد کا انتخاب کرتے وقت باخبر فیصلہ کرسکیں گے، حتمی خریداری یا لیز پر لینے کا فیصلہ کرنے سے پہلے۔

اس موقع پر ٹرائی کے چیئرمین جناب انیل کمار لاہوتی نے کہا کہ ’’ڈیجیٹل کنیکٹیویٹی ریٹنگ پلیٹ فارم املاک کی ڈیجیٹل کنیکٹیویٹی کے لیے تیاری کا جائزہ لینے کے لیے ایک شفاف اور معیاری فریم ورک قائم کرتا ہے۔ ریٹنگ کو عوامی طور پر تلاش کے قابل بنانے اور سرٹیفکیٹس کی تصدیق کی سہولت فراہم کرنے کے ذریعے یہ پلیٹ فارم صارفین کو قابل اعتماد اور قابل تقابل معلومات فراہم کرے گا۔ اس سے انہیں ایسے گھروں اور دفاتر کے انتخاب کے بارے میں زیادہ باخبر فیصلے کرنے میں مدد ملے گی جہاں مضبوط اور قابل اعتماد کنیکٹیویٹی موجود ہو، جس سے بہتر کالنگ، تیز ڈاؤن لوڈ اور آن لائن خدمات تک رسائی میں سہولت ہوگی۔ یہ صارفین کو جائیداد میں نصب ڈیجیٹل کنیکٹیویٹی کے بنیادی ڈھانچے کی اہمیت کو سمجھنے میں بھی مدد دے گا، جبکہ پراپرٹی مینیجرز کو جائیداد کی تعمیر و ترقی کے مناسب مرحلے پر ایسے بنیادی ڈھانچے کی منصوبہ بندی کرنے کی ترغیب دے گا۔‘‘

ڈیجیٹل کنیکٹیویٹی ریٹنگ (ڈی سی آر) فریم ورک کے بارے میں

ڈی سی آر فریم ورک املاک کے اندر ڈیجیٹل کنیکٹیویٹی کا جائزہ لینے کے لیے ایک معیاری طریقہ فراہم کرتا ہے۔ اس جائزے میں فائبر کی تیاری، موبائل نیٹ ورک کی دستیابی، عمارت کے اندر کنیکٹیویٹی کے حل اور وائی فائی کے بنیادی ڈھانچے سے متعلق مقررہ پیرامیٹرز شامل ہیں، جبکہ املاک کے مختلف زمروں کے لیے متعلقہ معیارات مقرر کیے گئے ہیں۔ اس فریم ورک کا مقصد جائیداد کی تعمیر و ترقی کے مناسب مراحل پر ڈیجیٹل کنیکٹیویٹی کے بنیادی ڈھانچے کو مدنظر رکھنے کی حوصلہ افزائی کرنا اور موجودہ املاک میں بنیادی ڈھانچے اور کنیکٹیویٹی کی کارکردگی کا جائزہ لینے میں سہولت فراہم کرنا ہے۔ ڈیجیٹل کنیکٹیویٹی ریٹنگ (ڈی سی آر) پلیٹ فارم تک یہاں رسائی حاصل کی جاسکتی ہے: https://dcrp.trai.gov.in

مزید معلومات کے لیے محترمہ ارچنا اہلاوت، ایڈوائزر (آئی ٹی) سے اس ای میل پتے پر رابطہ کیا جاسکتا ہے: advisorit@trai.gov.in

********

ش ح ۔ ش ت ۔ م الف

U NO-4098

(ریلیز آئی ڈی: 2314982) وزیٹر کاؤنٹر : 8