രാജ്യരക്ഷാ മന്ത്രാലയം
ലഡാക്കിൽ 6,000 മീറ്ററിന് മുകളിലുള്ള 20 കൊടുമുടികൾ കീഴടക്കിയ ചരിത്രപ്രസിദ്ധമായ 'ഫസ്റ്റ് അസെന്റ്' പർവ്വതാരോഹണ ദൗത്യസംഘത്തെ രക്ഷാമന്ത്രി സ്വീകരിച്ചു
പോസ്റ്റഡ് ഓണ്:
25 SEP 2026 1:48PM by PIB Thiruvananthpuram
ലഡാക്കിൽ 6,000 മീറ്ററിന് മുകളിലുള്ള, ഇതുവരെ ആരും കയറാത്ത 20 കൊടുമുടികൾ വെറും 23 ദിവസത്തിനുള്ളിൽ കീഴടക്കി ചരിത്രം കുറിച്ച 'ഫസ്റ്റ് അസെന്റ്' (First Ascent) പർവ്വതാരോഹണ ദൗത്യസംഘത്തെ 2026 സെപ്റ്റംബർ 25-ന് രക്ഷാമന്ത്രി ശ്രീ രാജ്നാഥ് സിംഗ് ഫ്ലാഗ്-ഇൻ ചെയ്ത് സ്വീകരിച്ചു.
ലഡാക്ക് നിരയിലെ ചാംസർ-ലങ്സർ (Chamser-Lungser), ഗ്യാമ നല (Gyama Nala), ചോകുല (Chokula) എന്നീ മേഖലകളിലെ 20 കൊടുമുടികളിൽ രേഖപ്പെടുത്തപ്പെടുന്ന ആദ്യത്തെ പർവ്വതാരോഹണമാണിത്. ദിരാംഗിലെ നാഷണൽ ഇൻസ്റ്റിറ്റ്യൂട്ട് ഓഫ് മൗണ്ടനീറിംഗ് ആൻഡ് അഡ്വഞ്ചർ സ്പോർട്സിൽ (NIMAS) നിന്നുള്ള കേണൽ രൺവീർ സിംഗ് ജാംവാളിന്റെ നേതൃത്വത്തിലുള്ള 20 വിദഗ്ദ്ധ പർവ്വതാരോഹകരുടെ സംഘമാണ് ഈ ദൗത്യം നിർവ്വഹിച്ചത്.
ഈ ചരിത്രനേട്ടം കൈവരിച്ചതിൽ പർവ്വതാരോഹകരുടെ ധൈര്യത്തെയും ദൃഢനിശ്ചയത്തെയും രക്ഷാമന്ത്രി അഭിനന്ദിച്ചു. ഇന്ത്യയുടെ പർവ്വതാരോഹണ മികവിന്റെയും സാഹസിക കായിക രംഗത്തെ നേതൃത്വത്തിന്റെയും തെളിവാണ് ഈ ദൗത്യമെന്ന് അദ്ദേഹം വിശേഷിപ്പിച്ചു.
പർവ്വതാരോഹകർ പ്രചോദനത്തിന്റെ ഉറവിടമാണെന്ന് വിശേഷിപ്പിച്ച ശ്രീ രാജ്നാഥ് സിംഗ്, ഈ വിജയം പുതിയ മാനദണ്ഡങ്ങൾ സ്ഥാപിച്ചുവെന്നും സാഹസികതയും പര്യവേക്ഷണവും പിന്തുടരാനും രാജ്യത്തിന് അഭിമാനമേകാനും രാജ്യത്തുടനീളമുള്ള യുവ പർവ്വതാരോഹകർക്ക് ഇത് പ്രചോദനമാകുമെന്നും കൂട്ടിച്ചേർത്തു.
മികച്ച ആസൂത്രണം, സാങ്കേതിക പ്രാഗത്ഭ്യം, സഹിഷ്ണുത, കൂട്ടായ്മ എന്നിവ വെളിവാക്കുന്നതായിരുന്നു ഈ ദൗത്യം. ലോക പർവ്വതാരോഹണ ഭൂപടത്തിൽ ഇന്ത്യയുടെ സാന്നിധ്യം ഉറപ്പിച്ചുകൊണ്ട്, ഉയർന്ന പ്രദേശങ്ങളിലെ പർവ്വതാരോഹണത്തിൽ രാജ്യത്തിനുള്ള കഴിവ് ഇത് പ്രതിഫലിപ്പിച്ചു. അതിർത്തിയിലെ ഉയർന്ന പ്രദേശങ്ങളിൽ സാഹസികതയുടെയും പര്യവേക്ഷണത്തിന്റെയും മനോഭാവം പ്രോത്സാഹിപ്പിക്കുന്നതിനും ഭാവിയിലെ പർവ്വതാരോഹകർക്ക് പ്രചോദനം നൽകുന്നതിനുമായാണ് പരിപാടി സംഘടിപ്പിച്ചത്.
ന്യൂഡൽഹിയിലെ കർത്തവ്യ ഭവൻ-2 ൽ നടന്ന ഫ്ലാഗ്-ഇൻ ചടങ്ങിൽ പ്രതിരോധ സെക്രട്ടറി ശ്രീ രാജേഷ് കുമാറും പ്രതിരോധ മന്ത്രാലയത്തിലെ മറ്റ് ഉന്നത ഉദ്യോഗസ്ഥരും പങ്കെടുത്തു.
SKY
*******
( റിലീസ് ഐ.ഡി: 2314857)
സന്ദര്ശക കൗണ്ടര് : 4