شیڈولڈ کاسٹس کے قومی کمیشن (این سی ایس سی) کے معزز چیئرمین، جناب کشور مکوانا نے آج انڈین انسٹی ٹیوٹ آف ٹکنالوجی بمبئی (آئی آئی ٹی بمبئی) میں جناب ساحل واکوڈے، جو توانائی سائنس اور انجینئرنگ کے شعبے میں بی ٹیک کے دوسرے سال کے طالب علم تھے، کی موت کے سلسلے میں موقع پر تفصیلی تحقیقات کیں۔

یہ دورہ متوفی کے اہلِ خانہ کے ذریعے ذات پات پر مبنی امتیازی سلوک، ہراسانی اور اس کی موت سے قبل کے حالات کے بارے میں لگائے گئے الزامات کے پیش نظر کیا گیا۔ یہ معاملہ فی الحال ممبئی پولیس کرائم برانچ کی تحقیقات کے تحت ہے۔ کمیشن شیڈولڈ کاسٹس کے ارکان کو دستیاب آئینی اور قانونی تحفظات کے دائرہ کار میں اس معاملے کی جانچ کر رہا ہے۔

دورے کے دوران، معزز چیئرمین نے آئی آئی ٹی بمبئی کے سینئر حکام، جن میں ڈائریکٹر، ڈپٹی ڈائریکٹر، رجسٹرار، متعلقہ فیکلٹی ممبران اور انسٹی ٹیوٹ کے دیگر اہلکار شامل تھے، کے ساتھ تفصیلی گفت و شنید کی۔ کمیشن نے طالب علم کی موت سے قبل کے واقعات کی مکمل تفصیل طلب کی، جس میں 18 ستمبر 2026 کو وسط سمسٹر کے امتحان کے دوران پیش آنے والا واقعہ بھی شامل ہے، جب طالب علم پر تعلیمی بدعنوانی میں ملوث ہونے کا الزام لگایا گیا تھا۔

کمیشن نے ان حالات کا جائزہ لیا جن میں طالب علم سے امتحان کے دوران پوچھ گچھ کی گئی، اس کے بعد مبینہ طور پر اختیار کیا گیا طریقہ کار، متعلقہ فیکلٹی اور انسٹی ٹیوٹ کے حکام کا کردار، اور طلبہ کی شکایات کو حل کرنے اور شیڈولڈ کاسٹس سے تعلق رکھنے والے طلبہ کی بہبود اور حقوق کے تحفظ کے لیے دستیاب ادارہ جاتی میکانزم کا جائزہ لیا۔

معزز چیئرمین نے زور دیا کہ اس معاملے سے متعلق تمام متعلقہ ریکارڈ اور مواد، بشمول سی سی ٹی وی فوٹیج، الیکٹرانک شواہد، سرکاری مواصلات، امتحان سے متعلق ریکارڈ اور دیگر دستاویزی مواد کو قانون کے مطابق محفوظ رکھا جائے اور تحقیقاتی حکام کو دستیاب کرایا جائے، تاکہ طالب علم کی موت کے حالات کو شواہد کی بنیاد پر قائم کیا جا سکے۔

موقع پر تحقیقات کے حصے کے طور پر، جناب کشور مکوانا نے ذاتی طور پر توانائی سائنس اور انجینئرنگ کے شعبے کا دورہ کیا، جہاں جناب ساحل واکوڈے اپنی تعلیم حاصل کر رہے تھے۔ چیئرمین نے اس کلاس روم/امتحانی ہال کا بھی معائنہ کیا جہاں مبینہ امتحانی واقعہ پیش آیا تھا اور امتحان کے دوران اور اس کے فوراًً بعد کے واقعات کی ترتیب کے بارے میں معلومات طلب کیں۔

اس کے بعد کمیشن نے ہاسٹل کے احاطے اور متوفی طالب علم کے زیرِ استعمال کمرے کا دورہ کیا۔ معزز چیئرمین نے جناب ساحل واکوڈے کے ہم جماعتوں اور ساتھی طلبہ سے بھی گفت و شنید کی تاکہ ان کے تعلیمی اور کیمپس کے تجربے کو سمجھا جا سکے اور ان کی موت سے قبل کے حالات اور واقعات کے بارے میں معلومات حاصل کی جا سکیں۔ کمیشن سرکاری ریکارڈ اور جاری تحقیقات کے نتائج کے ساتھ ان معلومات پر غور کرنے کی کوشش کر رہا ہے۔

آئی آئی ٹی بمبئی میں موقع پر تحقیقات کے بعد، معزز چیئرمین نے سینئر پولیس حکام، جن میں ڈائریکٹر جنرل آف پولیس، کمشنر آف پولیس اور تحقیقات سے وابستہ سینئر افسران، بشمول کرائم برانچ کے افسران شامل تھے، کے ساتھ ایک اعلیٰ سطحی میٹنگ منعقد کی۔

میٹنگ کے دوران، کمیشن نے تحقیقات کی صورت حال اور پیش رفت کا جائزہ لیا اور ایف آئی آر، شواہد کی جمع آوری اور تحفظ، سی سی ٹی وی فوٹیج، گواہوں کی جانچ اور کیس کے دیگر متعلقہ پہلوؤں کے بارے میں تفصیلات طلب کیں۔

معزز چیئرمین نے تحقیقاتی حکام کو ہدایت دی کہ وہ یہ یقینی بنائیں کہ تحقیقات منصفانہ، غیر جانب دارانہ، جامع اور تیز رفتار ہوں، اور ہر متعلقہ الزام اور صورت حال کی جانچ دستیاب شواہد کی بنیاد پر اور قانون کے مطابق سختی سے کی جائے۔

پولیس حکام سے مزید کہا گیا کہ وہ تمام متعلقہ دستاویزی، الیکٹرانک، فارنسک اور گواہی کے شواہد کی مناسب جمع آوری، تحفظ اور جانچ کو یقینی بنائیں۔ کمیشن نے طلبہ، فیکلٹی ممبران، انسٹی ٹیوٹ کے اہلکاروں اور دیگر افراد کے بیانات ریکارڈ کرنے کی ضرورت پر بھی زور دیا جو قانون کے مطابق جہاں بھی ضروری ہو، متعلقہ معلومات رکھتے ہوں۔

معزز چیئرمین نے متعلقہ حکام کو ہدایت دی کہ وہ مزید جانچ کے لیے قومی کمیشن برائے شیڈولڈ کاسٹس کو جلد از جلد ایک تفصیلی کارروائی کی گئی/تحقیقاتی رپورٹ پیش کریں۔

معزز چیئرمین نے بعد میں جناب ساحل واکوڈے کے والدین اور دیگر اہلِ خانہ سے ملاقات کی اور ان کی شکایات اور خدشات کو تفصیل سے سنا۔ اہلِ خانہ نے کمیشن کے سامنے طالب علم کی موت سے قبل کے حالات کے بارے میں اپنے الزامات پیش کیے اور کمیشن کے ذریعے مناسب مداخلت کی درخواست کرتے ہوئے ایک تحریری شکایت جمع کرائی۔

جناب مکوانا نے اہلِ خانہ کو یقین دلایا کہ کمیشن اپنے آئینی اور قانونی مینڈیٹ کے مطابق اس معاملے کی جانچ کرے گا۔ کمیشن تحقیقات کی پیش رفت پر گہری نظر رکھے گا اور سامنے آنے والے حقائق اور شواہد کی بنیاد پر اپنے دائرہ اختیار میں مناسب کارروائی کرے گا۔

کمیشن نے اس بات کا اعادہ کیا کہ شیڈولڈ کاسٹس کے ارکان کو دستیاب آئینی اور قانونی تحفظات کو مؤثر طریقے سے محفوظ رکھا جانا چاہیے اور اداروں کو وقار، مساوات، عدم امتیازی سلوک، طلبہ کی بہبود اور شکایات کے مؤثر ازالے کو یقینی بنانے کے لیے مناسب میکانزم برقرار رکھنا چاہیے۔

کمیشن نے سماجی ہم آہنگی اور یکجہتی کو برقرار رکھنے کی اہمیت پر بھی زور دیا جب کہ یہ یقینی بنایا کہ تمام الزامات کا معروضی، شفاف اور مناسب عمل کے مطابق جائزہ لیا جائے۔

معزز چیئرمین کے ساتھ ڈاکٹر سنیل کمار بابو، ڈائریکٹر، این سی ایس سی اسٹیٹ آفس، مہاراشٹر؛ ڈاکٹر آر اسٹالن، ڈپٹی ڈائریکٹر، ایٹروسٹیز اینڈ پروٹیکشن آف سول رائٹس (اے پی سی آر) ونگ، این سی ایس سی ہیڈ کوارٹرز، نئی دہلی؛ اور این سی ایس سی اسٹیٹ آفس کے اہلکار بھی تھے۔

***

(ش ح - ع ا)

U.No. 4062

(ریلیز آئی ڈی: 2314622) وزیٹر کاؤنٹر : 6