પેન્ડિંગ બાબતોનો નિકાલ કરવાથી લઈને ઓફિસ સ્પેસ પાછી મેળવવા સુધી, રેકોર્ડ્સના ડિજિટાઇઝેશનથી લઈને ઈ-વેસ્ટના જવાબદારીપૂર્વક નિકાલ કરવા સુધી, દિવ્યાંગજન સશક્તિકરણ વિભાગ (DEPwD) સ્પેશિયલ કેમ્પેઈન 6.0ને સ્વચ્છ કાર્યસ્થળો, પેન્ડન્સીના ઝડપી નિકાલ અને વધુ કાર્યક્ષમ શાસન માટેનું એક લક્ષિત અભિયાન બનાવવા માટે તૈયારી કરી રહ્યું છે. 2 થી 31 ઓક્ટોબર 2026 દરમિયાન હાથ ધરવામાં આવનાર આ અભિયાનમાં વિભાગ અને તેની સંસ્થાઓમાં સ્વચ્છતાને સંસ્થાકીય બનાવવાની સાથે ઈ-વેસ્ટના અસરકારક એકત્રીકરણ, વર્ગીકરણ અને નિકાલ પર વિશેષ ભાર મૂકવામાં આવશે.

વહીવટી સુધારણા અને જાહેર રજૂઆતો વિભાગ (DARPG) દ્વારા શરૂ કરવામાં આવેલ, સ્પેશિયલ કેમ્પેઈન 6.0નો ઉદ્દેશ્ય સરકારી કચેરીઓમાં સ્વચ્છતાને સંસ્થાકીય બનાવવાનો અને પેન્ડન્સી ઘટાડવાનો છે. આ અભિયાન બે તબક્કામાં લાગુ કરવામાં આવી રહ્યું છે, જેમાં 16 થી 30 સપ્ટેમ્બર 2026 સુધી પૂર્વ તૈયારીનો તબક્કો (પ્રિપેરેટરી ફેઝ), અને ત્યારબાદ 2 થી 31 ઓક્ટોબર 2026 સુધી અમલીકરણનો તબક્કો (ઈમ્પ્લીમેન્ટેશન ફેઝ) રહેશે.

DEPwDએ આ અભિયાન માટે સંસ્થાકીય માળખું પહેલાથી જ તૈયાર કરી લીધું છે. વિભાગ માટે એક નોડલ ઓફિસરની નિમણૂક કરવામાં આવી છે, જ્યારે DEPwDના વહીવટી નિયંત્રણ હેઠળની તમામ ગૌણ અને સંલગ્ન કચેરીઓ, જાહેર ક્ષેત્રના ઉપક્રમો અને સ્વાયત્ત સંસ્થાઓને તેમના સંબંધિત નોડલ ઓફિસરની નિમણૂક કરવા અને DARPG દ્વારા નિર્ધારિત માપદંડો અનુસાર પેન્ડિંગ બાબતોની ઓળખ કરવાની સલાહ આપવામાં આવી છે.

વિભાગ સ્પેશિયલ કેમ્પેઈન 5.0 દરમિયાન ઉત્પન્ન થયેલી ગતિને આગળ ધપાવી રહ્યો છે, જે 2 થી 31 ઓક્ટોબર 2025 દરમિયાન યોજાયો હતો, જ્યારે DEPwD અને તેની સંસ્થાઓએ આ અભિયાન માટે નક્કી કરેલા લક્ષ્યો પ્રાપ્ત કર્યા હતા. એક મહિનો ચાલેલા આ અભિયાન દરમિયાન, 11,972 ફિઝિકલ ફાઇલો/દસ્તાવેજોનું ડિજિટાઇઝેશન કરવામાં આવ્યું હતું અને તેને દૂર કરવામાં આવ્યા હતા, આશરે 15,588 સ્ક્વેર ફીટ ઓફિસ સ્પેસ ખાલી કરવામાં આવી હતી, અને ₹14,47,619ની આવક થઈ હતી. વિભાગ અને તેની સંસ્થાઓ દ્વારા દેશભરમાં ઇન્ડોર અને આઉટડોર જગ્યાઓને આવરી લેતા 64 સ્વચ્છતા અભિયાનો પણ યોજવામાં આવ્યા હતા.

જોકે, આ પ્રયાસ અભિયાનના સમાપન સાથે પૂરો થયો ન હતો. DARPGના માર્ગદર્શિકા અનુસાર, DEPwD અને તેની સંસ્થાઓએ નવેમ્બર 2025થી દર મહિને સ્વચ્છતા અને પેન્ડન્સી-ઘટાડાની પ્રવૃત્તિઓ ચાલુ રાખી છે. એક વખતની સ્વચ્છતા કવાયતના બદલે સતત કામગીરી પર વિભાગના ભારને દર્શાવતા, આ સિદ્ધિઓને સ્પેશિયલ કેમ્પેઈન 6.0 પોર્ટલ (SCDPM) પર નિયમિતપણે અપલોડ પણ કરવામાં આવી છે.

સ્પેશિયલ કેમ્પેઈન 6.0 સ્વચ્છતા અને સુશાસન એમ બંને ઉદ્દેશ્યોને એકસાથે લાવીને આ અભિગમને વધુ મજબૂત બનાવશે—બિનજરૂરી પેન્ડન્સી ઘટાડવી, રેકોર્ડ મેનેજમેન્ટમાં સુધારો કરવો, ઉપયોગી જગ્યા ખાલી કરવી અને બિનઉપયોગી સામગ્રી, ખાસ કરીને ઈ-વેસ્ટનો જવાબદારીપૂર્વક નિકાલ સુનિશ્ચિત કરવો. આ અભિયાન નકામા રેકોર્ડ્સ, બિનજરૂરી સામગ્રી અને પેન્ડિંગ બાબતોને વધુ કાર્યક્ષમતા, જવાબદારી અને પ્રોડક્ટિવિટી માટેની તકોમાં પરિવર્તિત કરવાનો પ્રયાસ કરશે.

DEPwD સ્પેશિયલ કેમ્પેઈન 6.0ને એક અર્થપૂર્ણ અને પરિણામ-લક્ષી કવાયત બનાવવા માટે પ્રતિબદ્ધ છે. પૂર્વ તૈયારીના તબક્કા દરમિયાન ઓળખવામાં આવેલા લક્ષ્યોને પ્રાપ્ત કરવા માટે અને રોજિંદા શાસનના એક અભિન્ન અંગ તરીકે સ્વચ્છતા, સમયસર નિકાલ અને જાહેર સંસાધનોના કાર્યક્ષમ ઉપયોગની સંસ્કૃતિને આગળ ધપાવવા માટે વિભાગ અને તેની સંસ્થાઓ દ્વારા સઘન પ્રયાસો કરવામાં આવશે.

 

SM/BS/GP/JT

(રીલીઝ આઈડી: 2314271) મુલાકાતી સંખ્યા : 11