ಮಧ್ಯಪ್ರದೇಶದ ಗ್ವಾಲಿಯರ್‌ನಲ್ಲಿ ಬರಲಿರುವ ಭಾರತದ ಮೊದಲ ಸಮಗ್ರ ದೂರಸಂಪರ್ಕ ಉತ್ಪಾದನಾ ವಲಯದಲ್ಲಿ (TMZ) ಇರುವ ಹೂಡಿಕೆ ಅವಕಾಶಗಳ ಕುರಿತು ಮುಂಚೂಣಿಯ ತಂತ್ರಜ್ಞಾನ, ದೂರಸಂಪರ್ಕ, ಸೆಮಿಕಂಡಕ್ಟರ್ ಮತ್ತು ಎಲೆಕ್ಟ್ರಾನಿಕ್ಸ್ ಉದ್ಯಮದ ಭಾಗಿದಾರರೊಂದಿಗೆ ಚರ್ಚಿಸಲು ದೂರಸಂಪರ್ಕ ಇಲಾಖೆಯು (DoT) ಇಂದು ಬೆಂಗಳೂರಿನಲ್ಲಿ ತನ್ನ 3ನೇ ಹೂಡಿಕೆದಾರರ ದುಂಡುಮೇಜಿನ ಸಭೆಯನ್ನು ಆಯೋಜಿಸಿತ್ತು.

ಕೇಂದ್ರ ದೂರಸಂಪರ್ಕ ಮತ್ತು ಈಶಾನ್ಯ ವಲಯದ ಅಭಿವೃದ್ಧಿ ಸಚಿವರಾದ ಶ್ರೀ ಜ್ಯೋತಿರಾದಿತ್ಯ ಎಂ. ಸಿಂಧಿಯಾ ಹಾಗೂ ಮಧ್ಯಪ್ರದೇಶದ ಮುಖ್ಯಮಂತ್ರಿ ಡಾ. ಮೋಹನ್ ಯಾದವ್ ಅವರ ಅಧ್ಯಕ್ಷತೆಯಲ್ಲಿ ನಡೆದ ಈ ದುಂಡುಮೇಜಿನ ಸಭೆಯು, ಸ್ವದೇಶಿ ದೂರಸಂಪರ್ಕ ಉತ್ಪಾದನಾ ಸಾಮರ್ಥ್ಯಗಳನ್ನು ಬಲಪಡಿಸುವುದು, ಮೌಲ್ಯವರ್ಧನೆಯನ್ನು ಹೆಚ್ಚಿಸುವುದು, ಸಂಶೋಧನೆ ಮತ್ತು ಅಭಿವೃದ್ಧಿಯನ್ನು ಉತ್ತೇಜಿಸುವುದು, ನಾವೀನ್ಯತೆಯನ್ನು ಪ್ರೋತ್ಸಾಹಿಸುವುದು, ರಫ್ತಿಗೆ ಬೆಂಬಲ ನೀಡುವುದು ಹಾಗೂ ಜಾಗತಿಕವಾಗಿ ಸ್ಪರ್ಧಾತ್ಮಕ ದೂರಸಂಪರ್ಕ ಮತ್ತು ಎಲೆಕ್ಟ್ರಾನಿಕ್ಸ್ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ಕುರಿತು ಚರ್ಚಿಸಲು ಉದ್ಯಮದ ನಾಯಕರು ಮತ್ತು ಸಂಭಾವ್ಯ ಹೂಡಿಕೆದಾರರನ್ನು ಒಂದೆಡೆ ಸೇರಿಸಿತು.

ಈ ಸಂದರ್ಭದಲ್ಲಿ ಮಾತನಾಡಿದ ಶ್ರೀ ಜ್ಯೋತಿರಾದಿತ್ಯ ಎಂ. ಸಿಂಧಿಯಾ ಅವರು, “ದೂರಸಂಪರ್ಕ ಉತ್ಪಾದನಾ ವಲಯವು ಸಹಕಾರ ಒಕ್ಕೂಟ ವ್ಯವಸ್ಥೆಗೆ ಒಂದು ಬಲವಾದ ಉದಾಹರಣೆಯಾಗಿದೆ. ಕೇಂದ್ರ ಸರ್ಕಾರ ಮತ್ತು ಮಧ್ಯಪ್ರದೇಶ ಸರ್ಕಾರಗಳು ಕೈಜೋಡಿಸಿ ಕೆಲಸ ಮಾಡುತ್ತಿದ್ದು, ರಾಜ್ಯ ಸರ್ಕಾರವು ಸುಮಾರು ₹8,000 ಕೋಟಿ ಮೊತ್ತದ ಪ್ರೋತ್ಸಾಹಕಗಳು ಮತ್ತು ಸಬ್ಸಿಡಿಗಳನ್ನು ನೀಡುತ್ತಿದೆ. ಇಂತಹ ಸಹಯೋಗದ ವಿಧಾನವು ಖಾಸಗಿ ವಲಯಕ್ಕೆ ಹೂಡಿಕೆ ಮಾಡಲು, ನಾವೀನ್ಯತೆ ತರಲು ಮತ್ತು ಬೆಳೆಯಲು ವಿಶ್ವಾಸವನ್ನು ನೀಡುತ್ತದೆ,” ಎಂದು ಹೇಳಿದರು.

ಇದರ ಜೊತೆಗೆ, “ಭಾರತವು ಈಗ ಸೇವಾ-ಆಧಾರಿತ ರಾಷ್ಟ್ರದಿಂದ ಉತ್ಪನ್ನ-ಆಧಾರಿತ ರಾಷ್ಟ್ರವಾಗುವತ್ತ ನಿರ್ಣಾಯಕವಾಗಿ ಮುನ್ನಡೆಯುತ್ತಿದೆ ಎಂದು ಕೇಂದ್ರ ಸಚಿವರು ಹೇಳಿದರು. ದೂರಸಂಪರ್ಕ ವಲಯದಲ್ಲಿ, ನಮ್ಮ ಮೂರು ಆದ್ಯತೆಗಳು ಸ್ಪಷ್ಟವಾಗಿವೆ: ಸ್ವದೇಶಿ ಮೌಲ್ಯವರ್ಧನೆಯನ್ನು ಹೆಚ್ಚಿಸುವುದು, ಭಾರತದಲ್ಲಿ ಬೌದ್ಧಿಕ ಆಸ್ತಿಯನ್ನು (IP) ಸೃಷ್ಟಿಸುವುದು ಮತ್ತು ಭಾರತದಲ್ಲೇ ವಿನ್ಯಾಸಗೊಳಿಸಿದ ಹಾಗೂ ಭಾರತದಲ್ಲೇ ತಯಾರಿಸಿದ ಉತ್ಪನ್ನಗಳನ್ನು ವಿಶ್ವದ ಮೂಲೆ ಮೂಲೆಗೆ ತಲುಪಿಸುವುದು. ಸೆಮಿಕಂಡಕ್ಟರ್‌ಗಳಿಂದ ಹಿಡಿದು ವಿಮಾನಯಾನದವರೆಗೆ ಹಲವು ವಲಯಗಳಲ್ಲಿ ಭಾರತದ 'ಆತ್ಮನಿರ್ಭರತೆ'ಯ ಪಯಣವು ವೇಗ ಪಡೆದುಕೊಂಡಿರುವುದನ್ನು ನಾವು ನೋಡಿದ್ದೇವೆ. ಮುಂದಿನ ಗಡಿ ದೂರಸಂಪರ್ಕವಾಗಿದೆ. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ 'ಮೇಕ್ ಇನ್ ಇಂಡಿಯಾ, ಮೇಕ್ ಫಾರ್ ಇಂಡಿಯಾ ಮತ್ತು ಮೇಕ್ ಫಾರ್ ದಿ ವರ್ಲ್ಡ್' ದೃಷ್ಟಿಕೋನದ ಅಡಿಯಲ್ಲಿ, ನಾವು ಈಗ ಭಾರತದಲ್ಲೇ ವಿನ್ಯಾಸಗೊಳಿಸಬೇಕು ಮತ್ತು ಜಾಗತಿಕವಾಗಿ ಸ್ಪರ್ಧಿಸುವ ಉತ್ಪನ್ನಗಳನ್ನು ನಿರ್ಮಿಸಬೇಕು,” ಎಂದು ಹೇಳಿದರು.

ಕೇಂದ್ರ ಸಚಿವರು, “ಇಂದಿನ ಬೆಂಗಳೂರು ರೋಡ್‌ಶೋ ನಮ್ಮ ಹೂಡಿಕೆದಾರರ ಸಂಪರ್ಕ ಅಭಿಯಾನದ 1ನೇ ಹಂತದ ಪೂರ್ಣಗೊಳಿಸುವಿಕೆಯನ್ನು ಗುರುತಿಸುತ್ತದೆ, ಈಗಾಗಲೇ ಸುಮಾರು 24 ಕಂಪನಿಗಳು ನಮ್ಮೊಂದಿಗೆ ಸೇರಿಕೊಂಡಿವೆ. ನಮ್ಮ ಬದ್ಧತೆ ಸರಳವಾಗಿದೆ: ಹೂಡಿಕೆದಾರರಿಗೆ ಟಿಎಮ್‌ಝೆಡ್‌ಗೆ ಸಂಬಂಧಿಸಿದಂತೆ ಯಾವುದೇ ಪ್ರಶ್ನೆ ಅಥವಾ ಸಮಸ್ಯೆ ಇದ್ದರೆ, ನಾವು ಅದನ್ನು 48 ಗಂಟೆಗಳ ಒಳಗೆ ಬಗೆಹರಿಸಲು ಕೆಲಸ ಮಾಡುತ್ತೇವೆ. ನಾವು ಗ್ವಾಲಿಯರ್ ಅನ್ನು ಕೇವಲ ಉತ್ಪಾದನಾ ತಾಣವನ್ನಾಗಿ ಮಾಡಲು ಬಯಸುವುದಿಲ್ಲ, ಬದಲಿಗೆ ಉದ್ಯಮಕ್ಕೆ ತನ್ನೊಂದಿಗೆ ಸ್ಪಂದಿಸುವ ಸರ್ಕಾರಿ ಪಾಲುದಾರನಿದ್ದಾನೆ ಎಂದು ತಿಳಿಯುವ ತಾಣವನ್ನಾಗಿ ಮಾಡಲು ಬಯಸುತ್ತೇವೆ,” ಎಂದು ಅವರು ಒತ್ತಿ ಹೇಳಿದರು.

ಮಧ್ಯಪ್ರದೇಶದ ಮುಖ್ಯಮಂತ್ರಿ ಡಾ. ಮೋಹನ್ ಯಾದವ್ ಅವರು ಮಾತನಾಡಿ, “ಮಧ್ಯಪ್ರದೇಶವು ತನ್ನ ಆಯಕಟ್ಟಿನ ಸ್ಥಳ ಮತ್ತು ಮೂಲಸೌಕರ್ಯಗಳ ಬೆಂಬಲದೊಂದಿಗೆ ಅಪಾರ ಸಾಮರ್ಥ್ಯವನ್ನು ಹೊಂದಿದ್ದು, ವಿವಿಧ ವಲಯಗಳ ಹೂಡಿಕೆಗೆ ಬಲವಾದ ತಾಣವಾಗಿ ಹೊರಹೊಮ್ಮುತ್ತಿದೆ. ಉದ್ಯಮಗಳಿಗೆ, ವಿಶೇಷವಾಗಿ ಉದಯೋನ್ಮುಖ ತಂತ್ರಜ್ಞಾನ ಮತ್ತು ದೂರಸಂಪರ್ಕ ವಲಯಗಳಿಗೆ ಸೂಕ್ತವಾದ ಪರಿಸರ ವ್ಯವಸ್ಥೆಯನ್ನು ಸೃಷ್ಟಿಸಲು ನಾವು ಬದ್ಧರಾಗಿದ್ದೇವೆ. ಈ ಸಹಭಾಗಿತ್ವವು ಹೊಸ ಹೂಡಿಕೆಗಳನ್ನು ತರುತ್ತದೆ, ಉದ್ಯೋಗವನ್ನು ಸೃಷ್ಟಿಸುತ್ತದೆ ಮತ್ತು ಭಾರತವು ಜಾಗತಿಕ ಆರ್ಥಿಕ ನಾಯಕನಾಗುವ ಪಯಣಕ್ಕೆ ಕೊಡುಗೆ ನೀಡುತ್ತದೆ ಎಂಬ ವಿಶ್ವಾಸ ನನಗಿದೆ,” ಎಂದು ಹೇಳಿದರು.

ದೂರಸಂಪರ್ಕ ಉತ್ಪಾದನಾ ವಲಯ (TMZ) ಉಪಕ್ರಮದ ಪ್ರಾರಂಭದ ನಂತರ, ದೂರಸಂಪರ್ಕ ಇಲಾಖೆಯು ಕೈಗೊಂಡ ಹೂಡಿಕೆದಾರರ ನಿರಂತರ ಸಂಪರ್ಕ ಅಭಿಯಾನದ ಭಾಗವಾಗಿ ಬೆಂಗಳೂರಿನ ಹೂಡಿಕೆದಾರರ ದುಂಡುಮೇಜಿನ ಸಭೆಯನ್ನು ಆಯೋಜಿಸಲಾಗಿತ್ತು.

2026ರ ಜುಲೈ 30 ರಂದು, ಗ್ವಾಲಿಯರ್‌ನಲ್ಲಿ ಭಾರತದ ಮೊದಲ ದೂರಸಂಪರ್ಕ ಉತ್ಪಾದನಾ ವಲಯದ 1 ನೇ ಹಂತವನ್ನು ಸ್ಥಾಪಿಸಲು ನವದೆಹಲಿಯಲ್ಲಿ ದೂರಸಂಪರ್ಕ ಇಲಾಖೆ ಮತ್ತು ಮಧ್ಯಪ್ರದೇಶ ಸರ್ಕಾರದ ನಡುವೆ ತಿಳುವಳಿಕಾ ಒಪ್ಪಂದಕ್ಕೆ (MoU) ಸಹಿ ಹಾಕಲಾಯಿತು. ಈ ತಿಳುವಳಿಕಾ ಒಪ್ಪಂದವು ದೂರಸಂಪರ್ಕ ಮತ್ತು ಎಲೆಕ್ಟ್ರಾನಿಕ್ಸ್ ಉತ್ಪಾದನೆ, ಸಂಶೋಧನೆ ಮತ್ತು ಅಭಿವೃದ್ಧಿ, ನಾವೀನ್ಯತೆ ಮತ್ತು ಸಂಬಂಧಿತ ಚಟುವಟಿಕೆಗಳಿಗಾಗಿ ಸಮಗ್ರ ಮೂಲಸೌಕರ್ಯಗಳೊಂದಿಗೆ 'ಪ್ಲಗ್-ಅಂಡ್-ಪ್ಲೇ' (ತಕ್ಷಣವೇ ಕಾರ್ಯಾರಂಭಕ್ಕೆ ಸಿದ್ಧವಿರುವ) ಕೈಗಾರಿಕಾ ಕ್ಲಸ್ಟರ್ ನ ಸ್ಥಾಪನೆಯನ್ನು ಕಲ್ಪಿಸುತ್ತದೆ. ಮೊದಲ ಹಂತದಲ್ಲಿ, ಕೇಂದ್ರ ಸರ್ಕಾರವು ₹493 ಕೋಟಿಯ ಶೇ. 100 ರಷ್ಟು ಆರ್ಥಿಕ ಬೆಂಬಲವನ್ನು ನೀಡುತ್ತಿದ್ದು, ಮಧ್ಯಪ್ರದೇಶ ಸರ್ಕಾರವು ಹೂಡಿಕೆದಾರರ ಪ್ರೋತ್ಸಾಹಕಗಳೊಂದಿಗೆ ಸರಿಸುಮಾರು 170 ಎಕರೆ ಜಮೀನನ್ನು ಉಚಿತವಾಗಿ ಒದಗಿಸಿದೆ.

ಇದರ ನಂತರ, ದೆಹಲಿ ಮತ್ತು ಮುಂಬೈನಲ್ಲಿ ಎರಡು ಹೂಡಿಕೆದಾರರ ದುಂಡುಮೇಜಿನ ಸಭೆಗಳು ನಡೆದವು, ಅಲ್ಲಿ ಉದ್ಯಮವು ದೂರಸಂಪರ್ಕ ಉತ್ಪಾದನಾ ವಲಯದ ಅಡಿಯಲ್ಲಿ ಸುಮಾರು 18,000 ಉದ್ಯೋಗಾವಕಾಶಗಳನ್ನು ಸೃಷ್ಟಿಸುವ ಸಾಮರ್ಥ್ಯದೊಂದಿಗೆ ₹5,500 ಕೋಟಿ ಹೂಡಿಕೆ ಬದ್ಧತೆಯನ್ನು ಭರವಸೆ ನೀಡಿತು.

ಮೂರನೇ ಹೂಡಿಕೆದಾರರ ದುಂಡುಮೇಜಿನ ಸಭೆಯು ಟಿಎಮ್‌ಝೆಡ್ ಉಪಕ್ರಮದೊಂದಿಗೆ ಹೂಡಿಕೆದಾರರ ಆಳವಾದ ತೊಡಗಿಸಿಕೊಳ್ಳುವಿಕೆಯನ್ನು ಪ್ರತಿಬಿಂಬಿಸಿತು, ಸಂಸ್ಥೆಗಳ ಆಡಳಿತ ಮಂಡಳಿಗಳ ಪರಿಶೀಲನೆಯ ನಂತರ ₹700 ಕೋಟಿಯಿಂದ ₹800 ಕೋಟಿವರೆಗಿನ ಹೂಡಿಕೆಗಳನ್ನು ಪ್ರಸ್ತಾಪಿಸಲಾಯಿತು. ಹಲವು ಕಂಪನಿಗಳು ಹೂಡಿಕೆಗೆ ಧನಾತ್ಮಕ ಪ್ರತಿಕ್ರಿಯೆಯನ್ನು ನೀಡಿವೆ ಮತ್ತು ಮೌಲ್ಯಮಾಪನಕ್ಕಾಗಿ ಸ್ಥಳ ವೀಕ್ಷಣೆಯನ್ನು ಕೈಗೊಳ್ಳಲಿವೆ.

ದೂರಸಂಪರ್ಕ ಉತ್ಪಾದನಾ ವಲಯ ಉಪಕ್ರಮವು 'ಸ್ವಾವಲಂಬಿ  ಭಾರತ' ಮತ್ತು 'ಮೇಕ್ ಇನ್ ಇಂಡಿಯಾ, ಮೇಕ್ ಫಾರ್ ದಿ ವರ್ಲ್ಡ್' ದೃಷ್ಟಿಕೋನಕ್ಕೆ ಅನುಗುಣವಾಗಿದೆ, ಮತ್ತು ದೂರಸಂಪರ್ಕ ಹಾಗೂ ಎಲೆಕ್ಟ್ರಾನಿಕ್ಸ್ ವಲಯಗಳಲ್ಲಿ ಹೂಡಿಕೆ, ಉತ್ಪಾದನೆ, ನಾವೀನ್ಯತೆ ಮತ್ತು ಉದ್ಯೋಗವನ್ನು ಉತ್ತೇಜಿಸುವ ಉದ್ದೇಶವನ್ನು ಹೊಂದಿದೆ.

ಹೂಡಿಕೆದಾರರ ದುಂಡುಮೇಜಿನ ಸಭೆಗೂ ಮುನ್ನ, ಕೇಂದ್ರ ಸಚಿವರು ಬೆಂಗಳೂರಿನಲ್ಲಿರುವ ಪ್ರಮುಖ ತಂತ್ರಜ್ಞಾನ ಮತ್ತು ದೂರಸಂಪರ್ಕ ಕಂಪನಿಯಾದ ಕ್ವಾಲ್ಕಾಮ್ (Qualcomm) ಕಚೇರಿಗೆ ಭೇಟಿ ನೀಡಿದರು. ಈ ಉದ್ಯಮ ಭೇಟಿಯ ಸಮಯದಲ್ಲಿ, ಕೇಂದ್ರ ಸಚಿವರು, ಕಂಪನಿಯ ನಾಯಕತ್ವ ಮತ್ತು ಹಿರಿಯ ಪ್ರತಿನಿಧಿಗಳೊಂದಿಗೆ ಸಂವಾದ ನಡೆಸಿದರು ಹಾಗೂ ದೂರಸಂಪರ್ಕ ತಂತ್ರಜ್ಞಾನಗಳಲ್ಲಿನ ಪ್ರಗತಿ, ಸೆಮಿಕಂಡಕ್ಟರ್ ಸಾಮರ್ಥ್ಯಗಳು, ಸ್ವದೇಶಿ ಉತ್ಪನ್ನ ಅಭಿವೃದ್ಧಿ, ಸಂಶೋಧನೆ ಮತ್ತು ನಾವೀನ್ಯತೆ ಮತ್ತು ಭಾರತದ ದೂರಸಂಪರ್ಕ ಉತ್ಪಾದನಾ ಪರಿಸರ ವ್ಯವಸ್ಥೆಯಲ್ಲಿ ತಂತ್ರಜ್ಞಾನ ಕಂಪನಿಗಳ ಹೆಚ್ಚಿನ ಸಹಭಾಗಿತ್ವದ ಅವಕಾಶಗಳ ಕುರಿತು ಚರ್ಚಿಸಿದರು.

ಈ ಕೈಗಾರಿಕಾ ಭೇಟಿಯು ಉದ್ಯಮದ ಅಗತ್ಯಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ದೂರಸಂಪರ್ಕ ಉಪಕರಣಗಳು, ಸೆಮಿಕಂಡಕ್ಟರ್ ತಂತ್ರಜ್ಞಾನಗಳು, ಉತ್ಪನ್ನ ವಿನ್ಯಾಸ, ಸಂಶೋಧನೆ ಮತ್ತು ಅಭಿವೃದ್ಧಿ ಹಾಗೂ ಮುಂದಿನ ಪೀಳಿಗೆಯ ಸಂಪರ್ಕ ತಂತ್ರಜ್ಞಾನಗಳು ಸೇರಿದಂತೆ ವಿವಿಧ ಕ್ಷೇತ್ರಗಳಲ್ಲಿ ಬಲವಾದ ಸರ್ಕಾರ-ಉದ್ಯಮ ಸಹಯೋಗಕ್ಕಾಗಿ ಮಾರ್ಗಗಳನ್ನು ಅನ್ವೇಷಿಸಲು ಅವಕಾಶವನ್ನು ಒದಗಿಸಿತು.

ಗ್ವಾಲಿಯರ್‌ನ ದೂರಸಂಪರ್ಕ ಉತ್ಪಾದನಾ ವಲಯದ (TMZ) ಕುರಿತು

ಗ್ವಾಲಿಯರ್‌ನಲ್ಲಿ ಪ್ರಸ್ತಾಪಿಸಲಾದ ದೂರಸಂಪರ್ಕ ಉತ್ಪಾದನಾ ವಲಯವನ್ನು (TMZ) ಮೊಬೈಲ್ ಸಾಧನಗಳು, ಆಪ್ಟಿಕಲ್ ಫೈಬರ್, ದೂರಸಂಪರ್ಕ ಉಪಕರಣಗಳು ಮತ್ತು ಮುಂದಿನ ಪೀಳಿಗೆಯ 5G/6G ತಂತ್ರಜ್ಞಾನಗಳನ್ನು ಒಳಗೊಂಡಂತೆ ದೂರಸಂಪರ್ಕ ಉತ್ಪಾದನೆ, ಸಂಶೋಧನೆ ಮತ್ತು ಅಭಿವೃದ್ಧಿ ಮತ್ತು ನಾವೀನ್ಯತೆಗಾಗಿ ಸಮಗ್ರ 'ಪ್ಲಗ್-ಅಂಡ್-ಪ್ಲೇ' (ತಕ್ಷಣವೇ ಕಾರ್ಯಾರಂಭಕ್ಕೆ ಸಿದ್ಧವಿರುವ) ಕೈಗಾರಿಕಾ ಕ್ಲಸ್ಟರ್ ನ ಸ್ಥಾಪನೆಯನ್ನು ಕಲ್ಪಿಸುತ್ತದೆ. ಇತ್ತೀಚೆಗೆ ಸಹಿ ಹಾಕಲಾದ ತಿಳುವಳಿಕಾ ಒಪ್ಪಂದದ ಅಡಿಯಲ್ಲಿ, ಮೊದಲ ಹಂತದಲ್ಲಿ, ಕೇಂದ್ರ ಸರ್ಕಾರವು ಆದರೆ ಮಧ್ಯಪ್ರದೇಶ ಸರ್ಕಾರವು ವಿವಿಧ ಹೂಡಿಕೆದಾರರ ಪ್ರೋತ್ಸಾಹಕಗಳೊಂದಿಗೆ ಸರಿಸುಮಾರು 170 ಎಕರೆ ಜಮೀನನ್ನು ಉಚಿತವಾಗಿ ಒದಗಿಸಿದೆ.

ಮಧ್ಯಪ್ರದೇಶ ಸರ್ಕಾರದಿಂದ ಶೇ. 51 ರಷ್ಟು ಮತ್ತು ದೂರಸಂಪರ್ಕ ಇಲಾಖೆಯಿಂದ ಶೇ. 49 ರಷ್ಟು ಈಕ್ವಿಟಿಯೊಂದಿಗೆ ಈ ಉದ್ದೇಶಕ್ಕಾಗಿ ವಿಶೇಷ ಉದ್ದೇಶದ ವಾಹನವನ್ನು (SPV) ಸ್ಥಾಪಿಸಲಾಗಿದೆ.

*****