നിർദ്ദിഷ്ട സമയപരിധിക്കുള്ളിൽ കാർഷിക ലക്ഷ്യങ്ങളും വാഗ്ദാനങ്ങളും പൂർത്തിയാക്കാൻ സംസ്ഥാനങ്ങൾ പ്രതിജ്ഞാബദ്ധരാകണമെന്ന് കേന്ദ്ര കാർഷിക, കർഷക ക്ഷേമ മന്ത്രി ശ്രീ ശിവരാജ് സിംഗ് ചൗഹാൻ നിർദ്ദേശിച്ചു. ഹൈദരാബാദിൽ നടന്ന ദക്ഷിണേന്ത്യൻ സംസ്ഥാനങ്ങളുടെ മേഖലാ കാർഷിക സമ്മേളനത്തിൻ്റെ സമാപന യോഗത്തിൽ സംസാരിക്കുകയായിരുന്നു അദ്ദേഹം. ദിവസം മുഴുവൻ നീണ്ടുനിന്ന ചർച്ചകളിൽ നിർദ്ദേശിക്കപ്പെട്ട പ്രധാന കർമ്മപദ്ധതികളിൽ സംസ്ഥാനങ്ങൾ ഗൗരവമായി ഇടപടേണ്ടതുണ്ടെന്ന് മന്ത്രി ചൂണ്ടിക്കാട്ടി. സമ്മേളനത്തിലെ തീരുമാനങ്ങൾ വെറും ചർച്ചകളിൽ ഒതുങ്ങാതെ വ്യക്തമായ പ്രവർത്തനങ്ങളിലേക്കും അളക്കാവുന്ന ഫലങ്ങളിലേക്കും പരിവർത്തനം ചെയ്യപ്പെടണം."കേന്ദ്രവും സംസ്ഥാനങ്ങളും വേറിട്ട സംവിധാനങ്ങളല്ല, മറിച്ച് ഒരൊറ്റ കാർഷിക ടീമാണ്. ശാസ്ത്രജ്ഞർ, കർഷകർ, കേന്ദ്ര-സംസ്ഥാന ഗവൺമെൻ്റുകളിലെ ഉദ്യോഗസ്ഥർ എന്നിവരെല്ലാം ചേർന്നതാണ് ഈ സംഘം. ഒന്നിച്ചുപ്രവർത്തിച്ചാൽ മാത്രമേ മുന്നേറ്റമുണ്ടാകൂ," ശ്രീ ചൗഹാൻ വ്യക്തമാക്കി.സമ്മേളനത്തിൽ സംസ്ഥാനങ്ങൾ നൽകിയ ഉറപ്പുകൾ പാലിച്ചില്ലെങ്കിൽ ഈ പ്രക്രിയയുടെ ഉദ്ദേശ്യം തന്നെ നഷ്ടപ്പെടുമെന്ന് അദ്ദേഹം മുന്നറിയിപ്പ് നൽകി. ഉദാഹരണത്തിന്, ഡിസംബറിനുള്ളിൽ 'കർഷക ഐഡി' നിർമ്മാണം പൂർത്തിയാക്കാമെന്ന് ഏതെങ്കിലും സംസ്ഥാനം സമ്മതിച്ചിട്ടുണ്ടെങ്കിൽ ആ സമയപരിധി കൃത്യമായി പാലിച്ചിരിക്കണം. ഓരോ വിഷയത്തിലും ചർച്ചകൾ ആവർത്തിക്കേണ്ടതില്ലെന്നും, കൈക്കൊണ്ട തീരുമാനങ്ങളിൽ ഉടനടി നടപടിയെടുക്കുകയാണ് വേണ്ടതെന്നും അദ്ദേഹം കൂട്ടിച്ചേർത്തു.
ലക്ഷ്യം യോഗങ്ങളല്ല;ഫലപ്രാപ്തി
സമ്മേളനത്തിൽ എടുക്കുന്ന തീരുമാനങ്ങൾ നടപ്പിലാക്കിയില്ലെങ്കിൽ ഇത്തരമൊരു യോഗം കൊണ്ട് യാതൊരു പ്രയോജനവുമില്ലെന്ന് കേന്ദ്ര കാർഷിക മന്ത്രി ശിവരാജ് സിംഗ് ചൗഹാൻ വ്യക്തമാക്കി. "ഒരു ദിവസം വന്ന്, ഭക്ഷണം കഴിച്ച്, ചർച്ച നടത്തി പിരിയുക മാത്രമാണ് ചെയ്യുന്നതെങ്കിൽ അത് ജനങ്ങളെ വഞ്ചിക്കുന്നതിന് തുല്യമാണ്. അതല്ല നമ്മൾ ആഗ്രഹിക്കുന്നത്, കൃത്യമായ ഫലങ്ങൾ കാണിക്കുകയാണ് വേണ്ടത്," അദ്ദേഹം പറഞ്ഞു.കേന്ദ്രത്തിലെയും സംസ്ഥാനങ്ങളിലെയും കാർഷിക മേഖലയിൽ പ്രവർത്തിക്കുന്ന ടീമുകളിൽ പൂർണ്ണ ആത്മവിശ്വാസം പ്രകടിപ്പിച്ച മന്ത്രി, മേഖലയിൽ അർത്ഥവത്തായ മാറ്റങ്ങൾ കൊണ്ടുവരാൻ എല്ലാ തലങ്ങളിലുള്ളവരും ഒന്നിച്ച് പ്രവർത്തിക്കണമെന്ന് ആഹ്വാനം ചെയ്തു. "വെറുതെ ബഹളമുണ്ടാക്കുകയല്ല എൻ്റെ ലക്ഷ്യം, നിലവിലുള്ള സാഹചര്യത്തിന് മാറ്റമുണ്ടാക്കുകയാണ്. കാർഷിക മേഖലയുടെ മുഖച്ഛായ തന്നെ നമ്മൾ മാറ്റും," ശ്രീ ചൗഹാൻ വ്യക്തമാക്കി.വികസിത് കൃഷി സങ്കൽപ് അഭിയാൻ്റെ ഭാഗമായി നൽകിയ ഉറപ്പും അദ്ദേഹം ഓർമ്മിപ്പിച്ചു. സംസ്ഥാനങ്ങൾ അവരുടെ കാർഷിക പ്രചാരണ പരിപാടികളുടെ തീയതികൾ നിശ്ചയിക്കുമ്പോഴെല്ലാം കേന്ദ്ര ഗവൺമെൻ്റിലെ ശാസ്ത്രജ്ഞരും കൃഷി വിജ്ഞാൻ കേന്ദ്രങ്ങളിലെ ഉദ്യോഗസ്ഥരും അവരോടൊപ്പം പങ്കാളികളാകും. ശാസ്ത്രജ്ഞർ നേരിട്ട് ഗ്രാമങ്ങളിലും കൃഷിയിടങ്ങളിലുമെത്തി കർഷകരുമായി സംവദിക്കും. കർഷകർ, ശാസ്ത്രജ്ഞർ, കൃഷിവകുപ്പ് ഉദ്യോഗസ്ഥർ എന്നിവർ ഒന്നിച്ചിരിക്കുന്ന ഇത്തരം ചർച്ചകളിലൂടെ കാർഷിക ഗവേഷണങ്ങളും കർഷക സമൂഹവും തമ്മിലുള്ള നേരിട്ടുള്ള ബന്ധം ശക്തിപ്പെടുത്തുകയാണ് ലക്ഷ്യമിടുന്നത്.
ഫാർമർ ഐഡി, അഗ്രിസ്റ്റാക്ക് എന്നിവയുടെ പ്രവർത്തനങ്ങൾ ത്വരിതപ്പെടുത്താൻ സംസ്ഥാനങ്ങൾക്ക് നിർദ്ദേശം
അഗ്രിസ്റ്റാക്ക് പദ്ധതിയുടെ പ്രാധാന്യം ഉൾക്കൊണ്ട് 'ഫാർമർ ഐഡി'നിർമ്മാണ പ്രവർത്തനങ്ങൾ സംസ്ഥാനങ്ങൾ വേഗത്തിലാക്കണമെന്ന് കേന്ദ്ര കാർഷിക, കർഷക ക്ഷേമ മന്ത്രി ശിവരാജ് സിംഗ് ചൗഹാൻ. തെലങ്കാനയും കർണാടകയും ഫാർമർ ഐഡി നിർമ്മാണത്തിൽ 75 ശതമാനത്തിലധികം ലക്ഷ്യം കൈവരിച്ചിട്ടുണ്ടെന്ന് അദ്ദേഹം ചൂണ്ടിക്കാട്ടി.തമിഴ്‌നാട്, കർണാടക, തെലങ്കാന എന്നീ സംസ്ഥാനങ്ങൾ ഭൂമിശാസ്ത്രപരമായ വിവരശേഖരണത്തിൽ മികച്ച മുന്നേറ്റമാണ് നടത്തിയത്. ഡിജിറ്റൽ വിള സർവേയിൽ ആന്ധ്രാപ്രദേശ്, തെലങ്കാന, കർണാടക, കേരളം, ആൻഡമാൻ നിക്കോബാർ ദ്വീപുകൾ എന്നിവ പൂർത്തീകരണം കൈവരിച്ചതായി അദ്ദേഹം പറഞ്ഞു.എന്നാൽ, കേരളം, തമിഴ്‌നാട്, അന്തമാൻ നിക്കോബാർ ദ്വീപുകൾ എന്നിവിടങ്ങളിൽ ഫാർമർ ഐഡി നിർമ്മാണ പ്രവർത്തനം ഇനിയും വേഗത്തിലാക്കേണ്ടതുണ്ടെന്ന് മന്ത്രി വ്യക്തമാക്കി. വരും വർഷങ്ങളിൽ രാജ്യത്തെ നിരവധി കാർഷിക സേവനങ്ങളും ആനുകൂല്യങ്ങളും ഫാർമർ ഐഡിയെ അടിസ്ഥാനമാക്കിയാകും ലഭ്യമാകുക. അതിനാൽ നിശ്ചിത സമയപരിധിക്കുള്ളിൽ തന്നെ ഇതിൻ്റെ പ്രവർത്തനം പൂർത്തിയാക്കണമെന്നും, ഈ പദ്ധതിയിൽ ഒരു സംസ്ഥാനം പോലും പിന്നിലായിപ്പോകരുതെന്നും മന്ത്രി കൂട്ടിച്ചേർത്തു.
ഭൂരേഖകളും ഫാർമർ രജിസ്ട്രിയും സംയോജിപ്പിക്കണം
ഭൂരേഖകൾ ഇതുവരെ ബന്ധിപ്പിക്കാത്ത സംസ്ഥാനങ്ങൾ, പ്രത്യേകിച്ച് തമിഴ്‌നാടും കേരളവും, ഈ പ്രക്രിയ വേഗത്തിലാക്കണമെന്ന് കേന്ദ്ര കൃഷി മന്ത്രി പറഞ്ഞു.ഭൂമി രേഖകളുടെ ഡാറ്റയും കർഷക രജിസ്ട്രിയും തമ്മിലുള്ള ഏകോപനം കേരളം ഉറപ്പാക്കേണ്ടതുണ്ടെന്ന് അദ്ദേഹം പറഞ്ഞു. ദക്ഷിണേന്ത്യൻ സംസ്ഥാനങ്ങളിലെ പാട്ടക്കർഷകർ, പങ്കുകൃഷിക്കാർ ഉൾപ്പെടെയുള്ള കുടിയാൻ കർഷകർക്കായി സ്റ്റാൻഡേർഡ് ഓപ്പറേറ്റിംഗ് നടപടിക്രമങ്ങൾ തയ്യാറാക്കി വിജ്ഞാപനം ചെയ്യണമെന്ന് അദ്ദേഹം ആവശ്യപ്പെട്ടു.കർണാടക, കേരളം, തമിഴ്‌നാട്, അന്തമാൻ നിക്കോബാർ ദ്വീപുകൾ എന്നീ സംസ്ഥാനങ്ങളും കേന്ദ്രഭരണ പ്രദേശങ്ങളും ഈ മേഖലയിൽ അടിയന്തര നടപടികൾ സ്വീകരിക്കണം. കൂടാതെ,ഗ്രാമ ഭൂപടങ്ങളുടെ ജിയോറെഫറൻസിംഗ് വേഗത്തിൽ പൂർത്തിയാക്കാൻ പുതുച്ചേരിയോടും ലക്ഷദ്വീപിനോടും മന്ത്രി നിർദ്ദേശിച്ചു.
13 പ്രാദേശിക ഭാഷകളിലൂടെ കർഷകരിലേക്ക് 'ഭാരത് വിസ്താർ' എത്തും
കർഷകർ ദിവസേന നേരിടുന്ന വിവിധ പ്രശ്നങ്ങൾക്കും സംശയങ്ങൾക്കും മറുപടി തേടി ഓരോ ഓഫീസുകൾ കയറി ഇറങ്ങേണ്ട സാഹചര്യം ഒഴിവാക്കാൻ മൊബൈൽ ഫോൺ വഴി നേരിട്ട് ഉപദേശങ്ങൾ ലഭ്യമാക്കുന്ന 'ഭാരത് വിസ്താർ' സംവിധാനം 13 പ്രാദേശിക ഭാഷകളിലേക്ക് വിപുലീകരിക്കുന്നു. നിലവിൽ ഹിന്ദിയിലും ഇംഗ്ലീഷിലും ലഭ്യമായ ഈ സേവനം ഉടൻ തന്നെ മലയാളം, തമിഴ്, തെലുങ്ക്, കന്നഡ തുടങ്ങിയ ഭാഷകളിൽ ലഭ്യമാക്കുമെന്ന് കേന്ദ്ര കാർഷിക മന്ത്രി ശിവരാജ് സിംഗ് ചൗഹാൻ വ്യക്തമാക്കി.കർഷകർക്ക് സ്വന്തം ഭാഷയിൽ ചോദ്യങ്ങൾ ചോദിക്കാനും അതേ ഭാഷയിൽ ഉത്തരങ്ങൾ സ്വീകരിക്കാനും കഴിയും.സമ്മേളനത്തിൽ തെലുങ്കിൽ സംസാരിച്ച ആന്ധ്രാപ്രദേശ് കൃഷിമന്ത്രിയെ പരാമർശിച്ചുകൊണ്ട് , മാതൃഭാഷയിൽ ആശയം പ്രകടിപ്പിക്കുന്നത് ആശയവിനിമയം കൂടുതൽ കൃത്യവും ഫലപ്രദവുമാക്കുമെന്ന് മന്ത്രി ചൂണ്ടിക്കാട്ടി."കർഷകർക്ക് അവരുടെ സ്വന്തം ഭാഷ മനസ്സിലാകും. അതിനാൽ, ഈ സംവിധാനം എത്രയും വേഗം പൂർത്തിയാക്കാൻ സംസ്ഥാനങ്ങളുമായി സഹകരിച്ച് പ്രവർത്തിക്കണം," അദ്ദേഹം പറഞ്ഞു.സംസ്ഥാന ഗവണ്മെൻ്റുകളുടെ കാർഷിക പദ്ധതികളെക്കൂടി ഭാരത് വിസ്താറുമായി അടിയന്തരമായി സംയോജിപ്പിക്കണമെന്നും മന്ത്രി നിർദ്ദേശിച്ചു.
ഗവേഷണഫലങ്ങൾ ലാബുകളിൽ നിന്ന് ഭൂമിയിലേക്ക് എത്തണം
സംസ്ഥാനങ്ങൾക്ക് സൗകര്യപ്രദമായ രീതിയിൽ 15 മുതൽ 20 ദിവസം വരെ നീളുന്ന കാർഷിക പ്രചാരണ പരിപാടികൾ സംഘടിപ്പിക്കാമെന്നും, ഇത്തരം ക്യാമ്പയിനുകളുടെ ഭാഗമായി കേന്ദ്ര ഗവൺമെൻ്റിൻ്റെ ശാസ്ത്രജ്ഞർ സംസ്ഥാനങ്ങൾ സന്ദർശിക്കുമെന്നും കേന്ദ്ര കാർഷിക മന്ത്രി ശിവരാജ് സിംഗ് ചൗഹാൻ അറിയിച്ചു.ഐ.സി.എ.ആർ. (ICAR) സ്ഥാപനങ്ങൾ, കൃഷി വിജ്ഞാൻ കേന്ദ്രങ്ങൾ, കാർഷിക സർവ്വകലാശാലകൾ എന്നിവയിലായി രാജ്യത്ത് പതിനാറായിരത്തോളം കാർഷിക ശാസ്ത്രജ്ഞരുണ്ടെന്ന് അദ്ദേഹം ചൂണ്ടിക്കാട്ടി. ഗവേഷണങ്ങൾ നടത്തുക എന്നത് മാത്രമല്ല, ആ ഗവേഷണ ഫലങ്ങൾ കർഷകരിലേക്ക് കൃത്യമായി എത്തുന്നുണ്ടെന്ന് ഉറപ്പാക്കുക കൂടി ഈ സ്ഥാപനങ്ങളുടെ ഉത്തരവാദിത്തമാണ്."കർഷകരും ശാസ്ത്രജ്ഞരും ഒന്നിച്ചിരുന്ന് ചർച്ചകൾ നടത്തുകയും ഗവേഷണങ്ങൾ കർഷകരിലേക്ക് എത്തുകയും ചെയ്തെങ്കിൽ മാത്രമേ ഈ പരിശ്രമം പൂർണ്ണമാകുകയുള്ളൂ. ഗവേഷണങ്ങൾ ലാബിൽ നിന്ന് ഭൂമിയിലേക്ക് ഇറങ്ങിച്ചെല്ലണം,"മന്ത്രി വ്യക്തമാക്കി.
ഇന്ത്യ ലോകത്തിലെ മുൻനിര കാർഷിക രാഷ്ട്രമായി മാറണം
ഇന്ത്യയെ കാർഷിക മേഖലയിൽ ആഗോള നേതാവാക്കാൻ പൂർണ്ണ സമർപ്പണത്തോടെയും സത്യസന്ധതയോടെയും പ്രവർത്തിക്കാൻ ആഗ്രഹിക്കുന്നുവെന്ന് ശ്രീ ചൗഹാൻ പറഞ്ഞു."ഇന്ത്യയെ ലോകത്തിൻ്റെ 'ഭക്ഷ്യപാത്രം' ആക്കി മാറ്റാൻ നമുക്ക് സാധിക്കണം. അത് അസാധ്യമല്ല, തീർച്ചയായും സാധ്യമാകുന്ന ഒന്നാണ്. എന്നാൽ അതിനായി നമ്മൾ എല്ലാവരും ഒന്നിച്ച് പരിശ്രമിക്കേണ്ടതുണ്ട്," അദ്ദേഹം കൂട്ടിച്ചേർത്തു.ഇന്ത്യൻ കാർഷിക മേഖല ഇതിനകം തന്നെ വലിയ മാറ്റങ്ങൾക്ക് വിധേയമായിട്ടുണ്ടെന്ന് ചൂണ്ടിക്കാണിച്ച മന്ത്രി, ലോകത്തെ മുൻനിര കാർഷിക രാജ്യമാക്കി ഇന്ത്യയെ മാറ്റുന്നതിനായി കൂടുതൽ മാറ്റങ്ങൾ തുടർന്നും നടപ്പിലാക്കുമെന്ന് വ്യക്തമാക്കി.
റാബി സമ്മേളനം സെപ്റ്റംബർ 28, 29 തീയതികളിൽ ഡൽഹിയിൽ നടക്കും
വരുന്ന റാബി സീസണിലെ വിള ആസൂത്രണത്തിനായി കേന്ദ്ര-സംസ്ഥാന കാർഷിക മന്ത്രിമാരുടെയും ഉദ്യോഗസ്ഥരുടെയും സമ്മേളനം സെപ്റ്റംബർ 28, 29 തീയതികളിൽ ഡൽഹിയിലെ പൂസ ഇൻസ്റ്റിറ്റ്യൂട്ടിൽ (Pusa Institute) നടക്കുമെന്ന് കേന്ദ്ര കാർഷിക മന്ത്രി ശിവരാജ് സിംഗ് ചൗഹാൻ അറിയിച്ചു. എല്ലാ സംസ്ഥാനങ്ങളിൽ നിന്നുമുള്ള കൃഷി മന്ത്രിമാരും ഉദ്യോഗസ്ഥരും തങ്ങളുടെ റാബി സീസണിലെ വിശദമായ പദ്ധതികളുമായി യോഗത്തിൽ പങ്കെടുക്കും.റാബി സീസണിൽ കൃഷി ചെയ്യേണ്ട വിളകൾ, അതിനായി തിരഞ്ഞെടുക്കേണ്ട കൃഷിഭൂമിയുടെ വിസ്തൃതി എന്നിവ സമ്മേളനത്തിൽ ആസൂത്രണം ചെയ്ത് അന്തിമ തീരുമാനമെടുക്കും. ഈ പദ്ധതികളുടെ അടിസ്ഥാനത്തിൽ വിത്തുകളുടെ ലഭ്യത, ആവശ്യമായ വളത്തിന്റെ അളവ്, മറ്റ് അത്യന്താപേക്ഷിതമായ വിഭവങ്ങൾ എന്നിവ വിലയിരുത്തുകയും തുടർന്നുള്ള മുന്നൊരുക്കങ്ങൾ നടപ്പിലാക്കുകയും ചെയ്യും.
****