ઉપરાષ્ટ્રપતિ શ્રી સી. પી. રાધાકૃષ્ણને આજે લોનાવાલા, મહારાષ્ટ્ર સ્થિત કૈવલ્યધામ ખાતે ગોરધનદાસ સેકસરીયા કોલેજ ઓફ યોગા એન્ડ કલ્ચરલ સિન્થેસીસના પ્લેટિનમ જુબિલી સમારોહને સંબોધિત કર્યો હતો.

Vice President Shri C. P. Radhakrishnan addressed the Platinum Jubilee celebrations of Gordhandas Seksaria College of Yoga and Cultural Synthesis at Kaivalyadhama, Lonavala.

Congratulating the College on completing 75 years of dedicated service to Yoga education, research and… pic.twitter.com/HuBp777tEu

— Vice-President of India (@VPIndia) September 18, 2026

તેમણે યોગ શિક્ષણ, સંશોધન અને સાંસ્કૃતિક સમન્વય માટે 75 વર્ષની સમર્પિત સેવા પૂર્ણ કરવા બદલ કોલેજને અભિનંદન પાઠવ્યા હતા. તેમણે નોંધ્યું હતું કે આ પ્રસંગ ખાસ કરીને મહત્વપૂર્ણ હતો કારણ કે કૈવલ્યધામે પોતે પણ યોગ પ્રત્યેની સમર્પિત સેવાના 100 વર્ષ (એક સદી) પૂર્ણ કર્યા છે.

1924માં કૈવલ્યધામની સ્થાપના કરનાર સ્વામી કુવલયાનંદના યોગદાનને યાદ કરતા ઉપરાષ્ટ્રપતિએ જણાવ્યું હતું કે તેમણે એવા સમયે યોગના વૈજ્ઞાનિક અભ્યાસનો પ્રારંભ કર્યો હતો જ્યારે તેને મોટાભાગે એક રહસ્યમય સાધના તરીકે જોવામાં આવતો હતો. તેમણે ભારપૂર્વક જણાવ્યું હતું કે ભૂતકાળના વારસાને જાળવી રાખવો જોઈએ અને ભવિષ્યની પેઢીઓ માટે આગળ ધપાવવો જોઈએ. તેમણે કહ્યું, “યોગ કોઈ એક પેઢી માટે નથી; તે આવનારી દરેક પેઢી માટે છે.”

શ્રી સી. પી. રાધાકૃષ્ણને યોગની વધતી જતી વૈશ્વિક સ્વીકૃતિ પર પ્રકાશ પાડ્યો હતો અને તેના સંદેશને આંતરરાષ્ટ્રીય મંચ પર લઈ જવા માટે પ્રધાનમંત્રી શ્રી નરેન્દ્ર મોદીના સતત પ્રયાસોને યાદ કર્યા હતા. તેમણે નોંધ્યું હતું કે યોગ આજે દેશો, સંસ્કૃતિઓ અને સમુદાયોમાં આચરવામાં આવે છે.

ટેકનોલોજીકલ પ્રગતિ અને ડિજિટલ કનેક્ટિવિટીએ જીવનને ઝડપી બનાવી દીધું છે તેવું અવલોકન કરતાં ઉપરાષ્ટ્રપતિએ જણાવ્યું હતું કે યોગ થોભવાની, એકાગ્ર થવાની, આત્મચિંતન કરવાની અને પોતાની જાત સાથે પુનઃજોડાવાની તક પૂરી પાડે છે. તેમણે કહ્યું કે યોગ મન અને શરીર વચ્ચેના અંતરને પૂરી કરવામાં મદદ કરે છે અને શારીરિક તથા માનસિક સ્વસ્થતાને પ્રોત્સાહન આપે છે.

 

યુવા વિદ્યાર્થીઓને સંબોધિત કરતાં શ્રી સી. પી. રાધાકૃષ્ણને જણાવ્યું હતું કે ભારતના યુવાનોમાં અપાર ઊર્જા, પ્રતિભા અને મહત્વાકાંક્ષા છે, જે શિસ્ત અને જાગૃતિ સાથે જોડાય ત્યારે તેઓ પોતાની સંપૂર્ણ ક્ષમતા પ્રાપ્ત કરી શકે છે. પતંજલિના ચિત્તવૃત્તિના નિયંત્રણના વિચાર અંગે ચર્ચા કરતાં તેમણે જણાવ્યું હતું કે મનને શાંત રાખવાની અને એકાગ્રતા જાળવવાની ક્ષમતા સતત માહિતીના પ્રવાહ અને માહિતીના અતિરેકના યુગમાં ખાસ કરીને પ્રાસંગિક છે.

 

ઉપરાષ્ટ્રપતિએ જણાવ્યું હતું કે સારા હેતુથી અને સમાજના કલ્યાણ માટે સચોટ પ્રતિબદ્ધતા સાથે હાથ ધરવામાં આવેલો કોઈપણ પ્રયાસ એક કાયમી વારસો છોડી શકે છે. સારા વારસા ક્યારેય મરતા નથી; તેઓ આવનારી પેઢીઓને પ્રેરણા આપવાનું અને લાભ પહોંચાડવાનું ચાલુ રાખે છે. કૈવલ્યધામની સદી લાંબી યાત્રા આ સનાતન સત્યનો જીવંત પુરાવો છે.

ઉપરાષ્ટ્રપતિએ કોલેજના ટ્રસ્ટીઓ, પ્રિન્સિપાલ, ફેકલ્ટી, વિદ્યાર્થીઓ અને ભૂતપૂર્વ વિદ્યાર્થીઓને અભિનંદન પાઠવ્યા હતા અને સ્વામી કુવલયાનંદના દ્રષ્ટિકોણ તથા શેઠ માખનલાલ સેકસરીયાના યોગદાનને શ્રદ્ધાંજલિ અર્પણ કરી હતી.

આ પ્રસંગે ઉપરાષ્ટ્રપતિએ શ્રી ઓ. પી. તિવારી દ્વારા લિખિત “Yoga Explained – Learn From the Master” નું વિમોચન પણ કર્યું હતું. તેમણે કેમ્પસની મુલાકાત લીધી હતી અને વિદ્યાર્થીઓ સાથે સંવાદ કર્યો હતો, તથા તેમને યોગના અભ્યાસ દ્વારા શિસ્ત, એકાગ્રતા અને આત્મ-જાગરૂકતાના મૂલ્યો કેળવવા માટે પ્રોત્સાહિત કર્યા હતા.

આ પ્રસંગે મહારાષ્ટ્રના રાજ્યપાલ શ્રી જિષ્ણુ દેવ વર્મા, પૂર્વ કેન્દ્રીય મંત્રી અને કૈવલ્યધામ ગ્લોબલના ચેરમેન શ્રી સુરેશ પ્રભુ, કૈવલ્યધામ ગ્લોબલના સીઈઓ શ્રી સુબોધ તિવારી, મુખ્ય સંરક્ષક શ્રી રાકેશ સેકસરીયા, ફેકલ્ટી સભ્યો, વિદ્યાર્થીઓ, ભૂતપૂર્વ વિદ્યાર્થીઓ અને અન્ય મહાનુભાવો ઉપસ્થિત રહ્યા હતા.

SM/BS/JD

(રીલીઝ આઈડી: 2312133) મુલાકાતી સંખ્યા : 7