جناب وویک اگروال، سکریٹری، وزارتِ ثقافت نے آج گریٹر نوئیڈا کے پنڈت دین دیال اپادھیائے کیمپس میں واقع انسٹی ٹیوٹ آف آرکیالوجی میں نئے بھرتی شدہ سینئر کنزرویشن اسسٹنٹس اور کنزرویشن اسسٹنٹس کے لیے اِنڈکشن ٹریننگ پروگرام کا اِفتتاح کیا۔ یہ ملک بھر میں اے ایس آئی کے مختلف سرکلز سے تعلق رکھنے والے 53 نئے بھرتی شدہ سینئر کنزرویشن اسسٹنٹس (ایس آر سی اے) اور کنزرویشن اسسٹنٹس (سی اے) کے لیے ایک ماہ کا گہرا تربیتی پروگرام ہے۔ اِس نئے نصاب میں بنیادی آثارِ قدیمہ کے طریقوں کو انتظامی فیصلہ سازی کے ساتھ ضم کیا گیا ہے، جس میں افسران کو سرکاری مالیاتی قواعد (جی ایف آر)، انتظامی قانون، اِدارہ جاتی طریقہ کار، افرادی قوت کے انتظام اور محکمہ جاتی اِنکوائریوں کی تربیت دی جائے گی۔

تربیت حاصل کرنے والوں سے خطاب کرتے ہوئے، سکریٹری نے انسٹی ٹیوٹ کو ایک بین الاقوامی سینٹر آف ایکسیلنس میں تبدیل کرنے کے لیے ایک اسٹریٹجک تبدیلی کا اِظہار کیا۔ انھوں نے بھارت کی محفوظ یادگاروں کو اقتصادی محرک کے طور پر استعمال کرنے کی ضرورت پر زور دیا۔ ”یادگار معیشت“ کو اُجاگر کرتے ہوئے، سکریٹری نے زور دے کر کہا کہ ثقافتی ورثہ براہ راست روزگار پیدا کرتا ہے اور سیاحت، مقامی نقل و حمل، مہمان نوازی، دستکاری بازاروں، لائٹ اینڈ ساؤنڈ شوز اور کیوریٹڈ ہیریٹیج واکس وغیرہ کو تحریک دے کر، براہ راست یا پبلک-پرائیویٹ پارٹنرشپس (پی پی پیز) کے ذریعے قومی جی ڈی پی میں حصہ ڈالے گا۔

سکریٹری نے افسران پر فیصلہ کن قیادت اِختیار کرنے پر زور دیا۔ انھوں نے زور دے کر کہا کہ اِدارہ جاتی وسائل نیک نیتی سے شروع کیے گئے اِقدامات کے لیے کوئی رکاوٹ نہیں ہیں۔ انھوں نے مزید قومی مفاد (دیش ہت) کو اوّل، اِدارہ جاتی فرض (سنستھا ہت) کو دوم، اور معاشرے اور خاندان (سماج اور پریوار) کو سوم ترجیح دینے کے اِخلاقی اَقدار کا خاکہ پیش کیا۔

ڈائریکٹر جنرل، اے ایس آئی، جناب یادوبیر سنگھ راوت نے ”کم سے کم مداخلت اور زیادہ سے زیادہ برقراری“ کے بنیادی تحفظ کے فلسفے کو دہرایا۔ انھوں نے یہ بھی اعلان کیا کہ اِس ماڈیول کے بعد جلد ہی اِن-سروس اے ایس آئی اہلکاروں اور ریاستی آثارِ قدیمہ کے محکمہ کے اہلکاروں کے لیے ریفریشر کورسز منعقد کیے جائیں گے۔

یہ پہل انسٹی ٹیوٹ آف آرکیالوجی کے جدید ترین، 25 ایکڑ کے کیمپس کو مکمل طور پر اِستعمال کرنے کی بحالی کی مہم میں ایک اہم سنگِ میل کی نشان دہی کرتی ہے۔ اپنے روایتی 15 طلبہ کے پوسٹ گریجویٹ ڈپلومہ اِن آرکیالوجی (پی جی ڈی اے) کے گروپ سے آگے بڑھتے ہوئے، اِس اِدارے کو اب ایک اعلیٰ آثارِ قدیمہ تربیتی اِدارے کے طور پر دوبارہ پوزیشن کیا جا رہا ہے، جو اپنی پختگی پر دنیا کے بہترین تربیتی اِداروں کے ہم پلہ ہوگا۔ کیمپس کو علاقے میں ثقافتی سرگرمیوں کے مرکز کے طور پر اور نوجوان طلبہ کو پنڈت دین دیال اپادھیائے کی زندگی اور کام کے بارے میں تعلیم دینے کے لیے بھی تیار کیا جائے گا۔

***

(ش ح - ع ا)

U.No. 3603

(ریلیز آئی ڈی: 2310644) وزیٹر کاؤنٹر : 10